വോട്ടെണ്ണൽ ആദ്യ 4 മണിക്കൂർ: 5 മണ്ഡലങ്ങൾ ഉറപ്പിച്ച് യുഡിഎഫ്, 2 മണ്ഡലങ്ങളിൽ വീതം ലീഡ് നേടി ബിജെപിയും എൽഡിഎഫും

തിരുവനന്തപുരം: വോട്ടെണ്ണലിന്റെ ആദ്യ നാല് മണിക്കൂർ പിന്നിടുമ്പോൾ ദേശീയ തലത്തിൽ ഇന്ത്യ സഖ്യം മികച്ച പ്രകടനം തുടരുകയാണ്. എൻഡിഎ സഖ്യം മുൻതൂക്കം നിലനിർത്തുന്നുണ്ടെങ്കിലും അവരുടെ സ്വപ്നത്തിന് മങ്ങലേൽപ്പിക്കാൻ ഇന്ത്യാ സഖ്യത്തിന് സാധിച്ചുവെന്നതാണ് ഈ സമയം പുറത്തുവരുന്ന തിരഞ്ഞെടുപ്പ് ചിത്രത്തിൽ തെളിയുന്നത്.

കേരളത്തിൽ രാഹുൽ ഗാന്ധി, ഹൈബി ഈഡൻ, ഇ.ടി.മുഹമ്മദ് ബഷീർ, അബ്ദുൾ സമദ് സമദാനി, ഡീൻ കുര്യാക്കോസ് എന്നിവർ  ഭൂരിപക്ഷം ഒരു ലക്ഷം പിന്നിട്ട് മുന്നോട്ട് കുതിക്കുകയാണ്.  

ബിജെപിയുടെ ബാലികേറാമലയെന്ന് വിശേഷിപ്പിക്കപ്പെട്ട കേരളത്തിൽ രണ്ട് മണ്ഡലങ്ങളിൽ അവർ ലീഡ് നിലനിർത്തുന്നു. തൃശൂരിൽ സുരേഷ് ഗോപി തുടക്കം മുതൽ വ്യക്തമായ ലീഡ് നിലനിർത്തുന്നു. അരലക്ഷം കവിഞ്ഞു സുരേഷ് ഗോപിയുടെ ഭൂരിപക്ഷം. തിരുവനന്തപുരത്ത് രാജീവ് ചന്ദ്രശേഖർ ഇപ്പോൾ ശശി തരൂരിനേക്കാൾ 17000ലേറെ വോട്ടുകൾക്ക് മുന്നിലാണ്. തൃശൂരിൽ കോൺഗ്രസ് കൊണ്ടു നിർത്തിയ കറുത്ത കുതിരയെന്ന് വിശേപ്പിക്കപ്പെട്ട കെ മുരളീധരൻ നിലവിൽ മൂന്നാം സ്ഥാനത്താണ്.

എൽ ഡി എഫ് ആലത്തൂരിലും ആറ്റിങ്ങലിലും നേരിയ ലീഡ് നിലനിർത്തുന്നു. മറ്റ് മണ്ഡലങ്ങളിൽ രണ്ടാം സ്ഥാനത്ത് തുടരുന്നു. തിരുവനന്തപുരം ഒഴികെ മറ്റ് മണ്ഡലങ്ങളിൽ രണ്ടാം സ്ഥാനത്ത് തുടരുന്നുവെന്നതാണ് എൽ ഡി എഫിന് നാല് മണിക്കൂർ പിന്നിടുമ്പോഴുള്ള ആശ്വാസം.

യു ഡി എഫ് മൂന്ന് മണിക്കൂർ പിന്നിടുമ്പോൾ ഒരു മണ്ഡലത്തിൽ മാത്രമായിരുന്നു ലക്ഷത്തിലേറെ ലീഡ് നിലനിർത്തിയതെങ്കിൽ ഇപ്പോഴത് അഞ്ച് മണ്ഡലങ്ങളിലായി ഉയർന്നു. 

Read More

• Kerala Lok Sabha Election Result 2024 Live: കേരളത്തിൽ യുഡിഎഫ് തരംഗം, തൃശൂരിൽ ജയമുറപ്പിച്ച് സുരേഷ് ഗോപി
• Lok Sabha Election Result 2024 Live: എക്സിറ്റ് പോളുകളെ എഴുതിത്തള്ളുന്ന പ്രകടനവുമായി ഇന്ത്യാ സഖ്യം; ഉത്തർ പ്രദേശിലടക്കം അട്ടിമറി മുന്നേറ്റം
• Lok Sabha Top Constituencies Result 2024 Live: തൃശൂരിൽ മുന്നേറ്റവുമായി സുരേഷ് ഗോപി, കേരളത്തിൽ താമര വിരിയുമോ?
• വോട്ടെണ്ണല്‍ കേന്ദ്രത്തിൽ നടക്കുന്നത് എന്തെല്ലാമാണ്?