വോട്ടെണ്ണൽ 9 മണിക്കൂർ: കേരളത്തിൽ യുഡിഎഫ് തേരോട്ടം, തൃശൂരെടുത്ത് സുരേഷ് ഗോപി, മാറിമറിഞ്ഞ് ആറ്റിങ്ങൽ

തിരുവനന്തപുരം: വോട്ടെണ്ണലിന്റെ ഒമ്പത്  മണിക്കൂർ പിന്നിടുമ്പോൾ ദേശീയ തലത്തിൽ സഖ്യകക്ഷികളുടെ തണലിൽ ലീഡ് നിലനിർത്തി ബിജെപി. തകർന്നടിഞ്ഞുവെന്ന് എഴുതി തള്ളിയിടത്ത് നിന്ന് കരുത്തുറ്റ പോരാട്ടം നടത്താൻ  ഇന്ത്യാ സഖ്യത്തിന് സാധിച്ചുവെന്നതാണ് ഈ സമയം പുറത്തുവരുന്ന തിരഞ്ഞെടുപ്പ് ചിത്രത്തിൽ തെളിയുന്നത്.

കേരളത്തിൽ രാഹുൽ ഗാന്ധി മൂന്ന് ലക്ഷത്തിലേറെ ലീഡ് നേടി കുതിപ്പ് തുടരുന്നു. മൂന്ന് മണ്ഡലങ്ങളിൽ രണ്ട് ലക്ഷത്തിലേറെ, നാല് മണ്ഡലത്തിൽ ഒരു ലക്ഷത്തിലേറെ ലീഡുമായി യുഡിഎഫ് തകർപ്പൻ പ്രകടനമാണ് കാഴ്ചവെക്കുന്നത്.

എറണാകുളത്ത് ഹൈബി ഈഡനും തൃശൂരിൽ സുരേഷ് ഗോപിയും വിജയിച്ചു. ഇ ടി മുഹമ്മദ് ബഷീർ, അബ്ദുൾ സമദ് സമദാനി  എന്നിവർ ഭൂരിപക്ഷം രണ്ട് ലക്ഷത്തിൽ കൂടുതലാക്കി, വടകരയിലും ഇടുക്കിയിലും കൊല്ലത്തും കോഴിക്കോടും യു ഡി എഫ് സ്ഥാനാർത്ഥികളായ ഷാഫി പറമ്പിൽ, ഡീൻ കുര്യാക്കോസ്, എൻ കെ പ്രേമചന്ദ്രനും എം കെ രാഘവനും  ലീഡ് ഒരു ലക്ഷം കടന്നു.

ബിജെപിയുടെ ബാലികേറാമലയെന്ന് വിശേഷിപ്പിക്കപ്പെട്ട കേരളത്തിൽ ഒരു മണ്ഡലത്തിൽ ബിജെപി വിജയിച്ചു. തൃശൂരിൽ സുരേഷ് ഗോപി തുടക്കം മുതൽവ്യക്തമായ ലീഡ് നിലനിർത്തിയിരുന്നു. 75,079 വോട്ടുകൾക്കാണ് സുരേഷ് ഗോപിയുടെ ജയം. തൃശൂരിൽ കോൺഗ്രസ്സിന്റെ കറുത്ത കുതിരയെന്ന് വിശേപ്പിക്കപ്പെട്ട കെ മുരളീധരൻ നിലവിൽ മൂന്നാം സ്ഥാനത്തായി. തിരുവനന്തപുരത്ത് രാജീവ് ചന്ദ്രശേഖർ ലീഡ് നഷ്ടമായി. ശശി തരൂർ ലീഡ് വീണ്ടും ഉയർത്തി 15,000ത്തിന് മുകളിലായി. 

എൽഡിഎഫ് ആലത്തൂരിലും ആറ്റിങ്ങലിലും നേരിയ ലീഡ് നിലനിർത്തുന്നു.  തിരുവനന്തപുരം ഒഴികെ മറ്റ് മണ്ഡലങ്ങളിൽ രണ്ടാം സ്ഥാനത്ത് തുടരുന്നുവെന്നതാണ് എൽഡിഎഫിന് ഏഴ്  മണിക്കൂർ പിന്നിടുമ്പോഴുള്ള ആശ്വാസം. ആറ്റിങ്ങലിൽ ഇഞ്ചോടിഞ്ച് പോരാട്ടമാണ് നടക്കുന്നത്. അടൂർ പ്രകാശിനെ മറികടന്ന്  നേരിയ ലീഡ് സി പി എമ്മിലെ വി എസ് ജോയി നേടിയെങ്കിലും ഏതാനും മിനിട്ടുകൾക്കുള്ളിൽ നേരിയ ലീഡ് അടുർ പ്രകാശ്  തിരിച്ചു പിടിച്ചു.  

നാല് മണിക്കൂർ പിന്നിടുമ്പോൾ രണ്ട് സീറ്റ് ലീഡ് നിലനിർത്തിയ ബി ജെ പിക്ക് അഞ്ചാം മണിക്കൂർ കഴിഞ്ഞപ്പോൾ ഒരു സീറ്റിൽ മാത്രമായി ലീഡ് ചുരുങ്ങി. ഏഴാം മണിക്കൂർ ആയപ്പോഴും ആ സ്ഥിതി തുടരുകയാണ്.

അഞ്ച് മണിക്കൂർ കഴിയുമ്പോൾ രണ്ട് ലക്ഷത്തിലേറെ മണ്ഡലത്തിൽ വോട്ട് ലീഡുമായി രണ്ട് മണ്ഡലത്തിൽ കോൺഗ്രസ് ജയം ഉറപ്പിച്ചു. എങ്കിൽ ഏഴ്  മണിക്കൂർ കഴിയുമ്പോൾ രണ്ട്  ലക്ഷത്തിലേറെ ഭൂരിപക്ഷം നേടി വിജയം ഉറപ്പിച്ച മണ്ഡലങ്ങളുടെ എണ്ണം യുഡിഎഫ് മൂന്നായി ഉയർത്തി. 

Read More

• KeralaLok Sabha Election Result 2024 Live: കേരളത്തിൽ യുഡിഎഫ് തരംഗം
• Lok Sabha Election Result 2024 Live: എക്സിറ്റ് പോളുകളെ എഴുതിത്തള്ളുന്ന പ്രകടനവുമായി ഇന്ത്യാ സഖ്യം; ഉത്തർ പ്രദേശിലടക്കം അട്ടിമറി മുന്നേറ്റം
• Lok Sabha Top Constituencies Result 2024 Live: തൃശൂരിൽ മുന്നേറ്റവുമായി സുരേഷ് ഗോപി, കേരളത്തിൽ താമര വിരിയുമോ?
• വോട്ടെണ്ണല്‍ കേന്ദ്രത്തിൽ നടക്കുന്നത് എന്തെല്ലാമാണ്?