'അസ്ഥികൂടത്തിന് കാവലിരിക്കുന്ന ദുർഭൂതം'; മുഖ്യമന്ത്രിക്കെതിരെ കെ. സുധാകരൻ

തിരുവനന്തപുരം: മുഖ്യമന്ത്രി പിണറായി വിജയനേയും സിപിഎമ്മിനേയും കടുത്ത ഭാഷയിൽ വിമർശിച്ച് കെപിസിസി പ്രസിഡന്റ് കെ. സുധാകരൻ. സംസ്ഥാനത്ത് ഇടതുപക്ഷത്തിനുണ്ടായ കനത്ത തിരിച്ചടിക്ക് യഥാർത്ഥ കാരണക്കാരൻ മുഖ്യമന്ത്രിയാണെന്ന് സഖ്യകക്ഷികളടക്കം പറഞ്ഞിട്ടും കാരണഭൂതനെ ഇപ്പോഴും കൈവിടാതെ ചുമക്കുന്നത് അഴിമതിയുടെ വിഹിതം കൈപ്പറ്റിയവരാണെന്ന് സുധാകരൻ വിമർശിച്ചു. സിപിഎമ്മിന് ജനം കെവിട്ട അവസ്ഥയാണുള്ളത്. അത്തരത്തിൽ ആത്മാവ് നഷ്ടപ്പെട്ടിരിക്കുന്ന പാർട്ടിയുടെ അസ്ഥികൂടത്തിന് കാവലിരിക്കുന്ന ദുർഭൂതമായി പിണറായി വിജയൻ മാറിയെന്നും കെ. സുധാകരൻ പറഞ്ഞു.  

അണികൾ ഒരുപാട് കഷ്ടപ്പെട്ട് പടുത്തുയർത്തിയ പ്രസ്ഥാനത്തിന്റെയും അവർ നേതൃത്വം നൽകുന്ന ഭരണത്തിന്റേയും തലപ്പത്ത് ചീഞ്ഞുനാറുന്നതൊന്നും തിരുത്തൽ യജ്ഞക്കാർ കണ്ടില്ലെന്ന മട്ടാണെന്ന് സുധാകരൻ വിമർശിച്ചു. തിരഞ്ഞെടുപ്പിൽ എൽഡിഎഫിന്റെ യഥാർത്ഥ പരാജയ കാരണം മുഖ്യമന്ത്രിയോട് ജനങ്ങൾക്കുള്ള എതിർപ്പാണ്. അത് സഖ്യകക്ഷികളിൽ പലരും തന്നെ തുറന്നുപറഞ്ഞു കഴിഞ്ഞു. എന്നാൽ അതൊന്നും ചെവിക്കൊള്ളാതെ പിണറായി വിജയന് സംരക്ഷണം ഒരുക്കാനാണ്  തിരുത്തല്‍ യജ്ഞം നടത്തിയതെന്നും സുധാകരൻ വിമർശിച്ചു. 

പിണറായി വിജയനിൽ നിന്നുമാണ് യഥാർത്ഥത്തിൽ ഇടതുപക്ഷത്തെ തിരുത്തൽ പ്രക്രിയ തുടങ്ങേണ്ടതെന്ന് പറഞ്ഞ സുധാകരൻ സിപിഎം സംസ്ഥാന സെക്രട്ടറി എംവി ഗോവിന്ദനേയും കടുത്ത ഭാഷയിലാണ് കുറ്റപ്പെടുത്തിയത്. മുഖ്യമന്ത്രിയെ കത്തുന്ന സൂര്യനോട് ഉപമിച്ച ഗോവിന്ദന്‍ സിപിഎം സംസ്ഥാന സെക്രട്ടറി എന്നതിനേക്കാള്‍ പിണറായി വിജയന്‍റെ  പണപ്പെട്ടിയുടെ സൂക്ഷിപ്പുകാരന്‍ എന്ന നിലയിലേക്കാണ് തരംതാണിരിക്കുന്നത്. കണ്ണൂരിലെ കോട്ടകളിലടക്കം പാര്‍ട്ടി വോട്ടുകൾ വ്യാപകമായി മറിഞ്ഞിട്ടും തിരുത്തലിനു തയാറാകാതെ കാരണഭൂതനെ കൈവിടാതെ ചുമക്കുന്നത് ലാഭവിഹിതം പങ്കുപറ്റിയവരാണെന്നും കെപിസിസി പ്രസിഡന്റ് വിമർശിച്ചു.

Read More

• ഇടതുപക്ഷം കനത്ത തോൽവി നേരിട്ടു, വിവിധ ജാതീയ സംഘടനകൾ വർഗീയ ശക്തികൾക്ക് കീഴ്‌പ്പെട്ടു: സിപിഎം
• 'ജീവിക്കാൻ അനുവദിക്കണം, പാർട്ടിയോടുള്ള അപേക്ഷയാണ്'; കണ്ണൂരിലെ ബോംബ് സ്ഫോടനത്തിൽ യുവതിയുടെ പരസ്യപ്രതികരണം
• തേങ്ങ പെറുക്കാൻ പോയ വയോധികൻ ബോംബ് പൊട്ടി മരിച്ചു; കണ്ണൂരിൽ വീണ്ടും വില്ലനായി സ്റ്റീൽ ബോംബ്
• മാസപ്പടി കേസിൽ മുഖ്യമന്ത്രിക്കും മകൾക്കും തിരിച്ചടി; നോട്ടീസയച്ച് ഹൈക്കോടതി
• ബംഗാളിൽ കാഞ്ചൻജംഗ എക്സ്പ്രസ് ചരക്ക് ട്രെയിനുമായി കൂട്ടിയിടിച്ച് 5 മരണം; രക്ഷാപ്രവർത്തനം തുടരുന്നു