ഹിറ്റാച്ചിക്കു മുകളിൽ പാറ ഇടിഞ്ഞുവീണ് അപകടം; ഒരാളുടെ മൃതദേഹം കണ്ടെത്തി; രക്ഷാദൗത്യം നാളെ തുടരും

പത്തനംതിട്ട: കോന്നിയിൽ ഹിറ്റാച്ചിക്കു മുകളിലേക്ക് പാറ ഇടിഞ്ഞുവീണ് അപകടം. പയ്യനാമണ്‍ ചെങ്കുളം പാറമടയിലാണ് അപകടമുണ്ടായത്. ഹിറ്റാച്ചിക്കുള്ളിൽ അകപ്പെട്ട രണ്ടു തൊഴിലാളികളിൽ ഒരാളുടെ മൃതദേഹം കണ്ടെത്തി.  

ഓഡീഷ, ബിഹാർ സ്വദേശികളായ മഹാദേവ്, അജയ് റായ് എന്നിവരാണ് കുടുങ്ങിയതെന്നാണ് റിപ്പോർട്ട്. ഹിറ്റാച്ചി ഓപ്പറേറ്ററും സഹായിയുമാണ് ഇവർ. ഇതിൽ ഒരാളുടെ മൃതദേഹമാണ് കണ്ടെത്തിയത്. രക്ഷാപ്രവർത്തനം ഇന്നത്തേക്ക് അവസാനിപ്പിച്ചിരിക്കുകയാണ്. വീണ്ടും പാറയിടിയുന്നത് വെല്ലുവിളി സൃഷ്ടിക്കുന്നതിനാലാണ് രക്ഷപ്രവർത്തനം അവസാനിപ്പിച്ചത്.

Also Read: എംഎസ്‌സി എല്‍സ-3 അപകടം; 9531 കോടി നഷ്ടപരിഹാരം ആവശ്യപ്പെട്ട് സർക്കാർ

നാളെ രാവിലെ ഏഴു മണിക്ക് വീണ്ടും രക്ഷാദൗത്യം ആരംഭിക്കുമെന്ന് അധികൃതർ അറിയിച്ചു. അപകടത്തിൽ മന്ത്രി വി. ശിവൻകുട്ടി അനുശോചനം രേഖപ്പെടുത്തി. "പത്തനംതിട്ടയിൽ ക്വാറി ഇടിഞ്ഞു തൊഴിലാളി മരണപ്പെട്ട സംഭവത്തിൽ അതീവ ദുഃഖം രേഖപ്പെടുത്തുന്നു. ഒരാൾക്ക് വേണ്ടി തിരച്ചിൽ തുടരുകയാണെന്നാണ് റിപ്പോർട്ട്. സംഭവത്തെക്കുറിച്ച് അന്വേഷിച്ച് റിപ്പോർട്ട് നൽകാൻ അഡീഷണൽ ലേബർ കമ്മീഷണർ കെ ശ്രീലാലിന് നിർദ്ദേശം നൽകി. മരിച്ച തൊഴിലാളിയുടെ കുടുംബത്തിന് എംപ്ലോയീസ് കോമ്പൻസേഷൻ ആക്ട് പ്രകാരം നഷ്ടപരിഹാരം നൽകും. മൃതദേഹം നാട്ടിലെത്തിക്കാനുള്ള നടപടികളും തൊഴിൽ വകുപ്പ് കൈക്കൊള്ളും," മന്ത്രി പ്രസ്താവനയിൽ പറഞ്ഞു.

Also Read: ഭാരതാംബ ചിത്ര വിവാദം; സ്ഥാനത്തു നിന്ന് നീക്കിയതിനെതിരെ സമർപ്പിച്ച ഹർജി പിൻവലിച്ച് രജിസ്ട്രാർ

പാറമടയിൽ പണി നടക്കുന്നതിനിടെ കൂറ്റൻ കല്ലുകൾ വാഹനത്തിനു മുകളിലേക്ക് പതിച്ചായിരുന്നു അപകടം. ഹിറ്റാച്ചി ഉപയോഗിച്ച് പാറ നീക്കം ചെയ്യുന്നതിനിടെ ഇന്ന് ഉച്ചയ്ക്ക് മൂന്നു മണിയോടെയായിരുന്നു അപകടം. ഫയർഫോഴ്സിന്റെയും പൊലീസിന്റെയും നേതൃത്വത്തിലായിരുന്നു രക്ഷപ്രവർത്തനം നടത്തിയത്. കുത്തനെയുള്ള പാറക്കെട്ടായതിനാൽ രക്ഷാപ്രവർത്തനം ആതീവ ദുഷ്കരമായിരുന്നു. 

Read More: സംസ്ഥാനത്ത് നാളെ സ്വകാര്യ ബസ് സമരം