'പൊതുരംഗത്ത് നിന്ന് വിട്ടുനിൽക്കും'; വൈകാരിക പ്രതികരണവുമായി കെ. മുരളീധരൻ

തൃശ്ശൂർ: തൃശ്ശൂർ ലോക്സഭാ നിയോജക മണ്ഡലത്തിൽ കനത്ത തോൽവിയേറ്റു വാങ്ങിയതിന് പിന്നാലെ വൈകാരിക പ്രതികരണവുമായി കോൺഗ്രസ് യുഡിഎഫ് സ്ഥാനാർത്ഥി കെ. മുരളീധരൻ രംഗത്ത്. "കുരുതിക്ക് താൻ നിന്നു കൊടുക്കാൻ പാടില്ലായിരുന്നു. വടകരയിൽ തന്നെ നിന്നാൽ താൻ ജയിക്കുമായിരുന്നു. സുരേഷ് ഗോപിക്കായി പ്രധാനമന്ത്രിയും സുനിലിനായി മുഖ്യമന്ത്രിയും തൃശ്ശൂരെത്തി. തനിക്കായി ആരും തൃശ്ശൂരിലേക്ക് എത്തിയില്ല," മുരളീധരൻ പറഞ്ഞു.

"ഇനിയൊരു മത്സരത്തിന് ഞാനില്ല. പൊതുരംഗത്ത് നിന്ന് വിട്ടുനിൽക്കാനാണ് തീരുമാനം. കോൺഗ്രസിന്റെ ഒരു കമ്മിറ്റികളിലും ഇനി ഞാൻ പങ്കെടുക്കില്ല," മുരളീധരൻ വൈകാരികമായി പറഞ്ഞു. കനത്ത തോൽവിക്ക് പിന്നാലെ തൃശ്ശൂരിലെ കോൺഗ്രസ് നേതാക്കളോട് കെ. മുരളീധരൻ കയർത്തെന്നും റിപ്പോർട്ടുകളുണ്ട്. ടി.എൻ. പ്രതാപനും ഡിസിസി പ്രസിഡൻറ് ജോസഫ് വള്ളൂരും അനിൽ അക്കരയും മുരളീധരനെ കാണാൻ വീട്ടിലെത്തിയപ്പോഴാണ് സംഭവം. പണിയെടുക്കാൻ അറിയില്ലെങ്കിൽ ഡിസിസി പിരിച്ചുവിടുന്നതാണ് നല്ലതെന്ന് മുരളീധരൻ പറഞ്ഞെന്നാണ് റിപ്പോർട്ട്.

തൃശ്ശൂരിൽ അപ്രതീക്ഷിതമായുണ്ടായ പരാജയത്തിന് കാരണം ഉറപ്പായും കിട്ടുമെന്ന് പ്രതീക്ഷിച്ച ന്യൂനപക്ഷ വോട്ടുകളിലെ വിള്ളലാണെന്നാണ് കെ. മുരളീധരൻ മാധ്യമങ്ങളോട് പറഞ്ഞത്. "ഇതാണ് ബിജെപിക്ക് മുന്നേറ്റമുണ്ടാക്കാൻ കഴിഞ്ഞത്. മുന്നോക്ക സമുദായത്തിന്റെ ഏതാണ്ട് മുഴുവൻ വോട്ടുകളും ക്രൈസ്തവ വോട്ടുകളും ബിജെപിക്ക് സമാഹരിക്കാൻ കഴിഞ്ഞു. ചില നിയോജക മണ്ഡലങ്ങളിൽ മുസ്ലീം മുസ്ലീം വോട്ടുകളിൽ എൽഡിഎഫിനൊപ്പം നിന്നു. എന്നാൽ മുസ്ലീം വോട്ടുകളുടെ ഏകീകരണം യുഡിഎഫിന് കിട്ടിയില്ല. കേരളത്തിലെ ഭരണവിരുദ്ധ വികാരം യുഡിഎഫിനൊപ്പം ബിജെപിയും പങ്കിട്ടു. കേന്ദ്ര വിരുദ്ധ മനോഭാവം 18 മണ്ഡലങ്ങളിലും പ്രകടിപ്പിക്കാൻ‌ യുഡിഎഫിന് കഴിഞ്ഞു," മുരളീധരൻ പറഞ്ഞു.

തൃശ്ശൂർ ലോക്സഭാ മണ്ഡലത്തിൽ എൻഡിഎ സ്ഥാനാർത്ഥി സുരേഷ് ഗോപിയാണ് വിജയിച്ചത്. 75,079 വോട്ടുകളുടെ ഭൂരിപക്ഷത്തോടെയാണ് സുരേഷ് ഗോപിയുടെ വിജയം. വോട്ടെണ്ണലിന്റെ ആദ്യ ഘട്ടം മുതൽ വ്യക്തമായ ഭുരപക്ഷം സുരേഷ് ഗോപി നിലനിർത്തിയിരുന്നു. എല്‍ഡിഎഫ് സ്ഥാനാർത്ഥി സുനില്‍കുമാർ രണ്ടാം സ്ഥാനത്തും, യുഡിഎഫ് സ്ഥാനാർത്ഥി കെ. മുരളീധരന്‍ മൂന്നാം സ്ഥാനത്തുമാണ്.

Read More

• Kerala Lok Sabha Election Result 2024 Live: കേരളത്തിൽ യുഡിഎഫ് തരംഗം
• Lok Sabha Election Result 2024 Live: എക്സിറ്റ് പോളുകളെ എഴുതിത്തള്ളുന്ന പ്രകടനവുമായി ഇന്ത്യാ സഖ്യം; ഉത്തർ പ്രദേശിലടക്കം അട്ടിമറി മുന്നേറ്റം
• Lok Sabha Top Constituencies Result 2024 Live: തൃശൂരിൽ മുന്നേറ്റവുമായി സുരേഷ് ഗോപി, കേരളത്തിൽ താമര വിരിയുമോ?
• വോട്ടെണ്ണല്‍ കേന്ദ്രത്തിൽ നടക്കുന്നത് എന്തെല്ലാമാണ്?