ED Raids Gokulam Gopalan's Offices: ഗോകുലം ​ഗോപാലനെ ചെന്നൈയിലേക്ക് വിളിപ്പിച്ച് ഇ.ഡി; എത്രയും വേഗം എത്താൻ നിർദേശം

ED Raids Gokulam Offices: കൊച്ചി: പ്രമുഖ വ്യവസായിയും മോഹൻലാൽ ചിത്രം എമ്പുരാന്റെ നിർമാതാവുമായ ഗോകുലം ഗോപാലന്റെ ഓഫിസുകളിൽ ഇ.ഡി റെയ്ഡ്. കോഴിക്കോട് ഓഫിസിൽ പരിശോധന അവസാനിച്ചതിനുപിന്നാലെ ചെന്നൈയിലെ ഓഫിസിലും ഇ.ഡി റെയ്ഡ്. ചെന്നൈ ഓഫിസിൽ ഇ.ഡി റെയ്ഡ് തുടരുകയാണ്. ഇതിനിടെ ഗോകുലം ഗോപാലനെ ഇ.ഡി ചെന്നൈയിലേക്ക് വിളിപ്പിച്ചു. വിശദമായ ചോദ്യം ചെയ്യലിനാണ് ഗോപാലനെ ചെന്നൈയിലേക്ക് വിളിപ്പിച്ചത്. എത്രയും വേഗം ചെന്നൈയിലെ ഓഫിസിൽ എത്തണമെന്നാണ് ഇ.ഡി നൽകിയിരിക്കുന്ന നിർദേശം. ഇതേത്തുടർന്ന് ഗോകുലം ഗോപാലൻ ചെന്നൈയിലേക്ക് പുറപ്പെട്ടു.  

ചെന്നൈ കോടമ്പാക്കത്തുള്ള ഗോകുലം ഗോപാലന്റെ ധനകാര്യ സ്ഥാപനത്തിന്റെ ആസ്ഥാനത്ത് നടന്ന റെയ്ഡിന് പിന്നാലെ ഗോകുലം ഗോപാലന്റെ വടകരയിലുള്ള വീട്ടിലെത്തി ഇഡി ഉദ്യോഗസ്ഥർ ചോദ്യം ചെയ്തിരുന്നു. നേരത്തെ, ചിട്ടി ഇടപാടുകളുടെ മറവിൽ ഫെമി നിയമം ലംഘിച്ചെന്ന് ആരോപണം ഉയർന്നിരുന്നു. ഇതിന് പിന്നാലെയാണ് ഇ.ഡി. റെയ്ഡും അതിനെ തുടർന്നുള്ള ചോദ്യം ചെയ്യല്ലുമെന്നാണ് വിവരം.

അനധികൃത സാമ്പത്തിക ഇടപാടുകളുമായി ബന്ധപ്പെട്ട ആരോപണത്തിൽ രണ്ടുവർഷം മുൻപ് ഗോകുലം ഗോപാലനെ എൻഫോഴ്‌സ്‌മെന്റ് ഡയറക്ടറേറ്റ് ചോദ്യം ചെയ്തിരുന്നു. അന്ന് കൊച്ചി ഇ ഡി ഓഫീസിൽ വിളിച്ചു വരുത്തിയായിരുന്നു ചോദ്യം ചെയ്യൽ. ചിട്ടി തട്ടിപ്പ് സംബന്ധിച്ച ആരോപണത്തിലും അന്ന് ഇഡി അന്വേഷണം ആരംഭിച്ചിരുന്നു. കൊച്ചിയിൽ നിന്നുള്ള ഇ.ഡി.ഉദ്യോഗസ്ഥരും ചെന്നൈയിൽ നടക്കുന്ന റെയ്ഡിൽ പങ്കെടുക്കുന്നുണ്ട്. 

കള്ളപ്പണ ഇടപാട് സംബന്ധിച്ച പരാതിയുടെ അടിസ്ഥാനത്തിലായിരുന്നു രണ്ടുവർഷം മുൻപ് ഗോകുലം ഗോപാലനെ ചോദ്യം ചെയ്തത്. അനധികൃതമായാണ് ചിട്ടി ഇടപാടുകൾ നടക്കുന്നതെന്നായിരുന്നു ഇഡിക്ക് അന്ന് ലഭിച്ച പരാതി. 

അതേസമയം,  എമ്പുരാൻ വിവാദങ്ങളുടെ പശ്ചാത്തലത്തിൽ നിർമ്മാതാക്കളിൽ ഒരാളായ ഗോകുലം ഗോപാലൻറെ സ്ഥാപനത്തിൽ ഇഡി എത്തിയത് വലിയ ചർച്ചയായിട്ടുണ്ട്. എമ്പുരാൻ സിനിമ ലൈക്ക പ്രൊഡക്ഷൻസുമായി ബന്ധപ്പെട്ട് തർക്കത്തിൽ എത്തിയപ്പോൾ അവസാന നിമിഷമാണ് ഗോകുലം ഗോപാലൻ രക്ഷകനായി എത്തിയത്. പിന്നീട് എമ്പുരാൻ വിവാദമായതോടെ ചില രംഗങ്ങൾ നീക്കം ചെയ്യണമെന്ന് താൻ ആവശ്യപ്പെട്ടുവെന്ന് ഗോകുലം ഗോപാലൻ ചില അഭിമുഖങ്ങളിൽ പറഞ്ഞിരുന്നു.

Read More

• Suresh Gopi angry with Media: നിങ്ങളാരാ? ബി കെയർഫുൾ;മാധ്യമങ്ങളോട് കയർത്ത് വീണ്ടും സുരേഷ് ഗോപി
• രാഷ്ട്രീയത്തിൽ താത്പര്യമുണ്ട്, കുടുംബപശ്ചാത്തലം അങ്ങനെയാണല്ലോയെന്ന് പിണറായി വിജയന്റെ ചെറുമകൻ
• Weather inKerala: സംസ്ഥാനത്ത് ഇന്ന് ശക്തമായ മഴ; അഞ്ചിടത്ത് യെല്ലോ അലർട്ട്
• മാസപ്പടി കേസ്; വീണ വിജയനെ പ്രതിചേർത്ത് കുറ്റപത്രം; വിചാരണയ്ക്ക് അനുമതി