മമ്മൂട്ടിക്ക് നേരെ സൈബർ ആക്രമണം; സംഘികളുടെ ആ പരിപ്പ് ഇവിടെ വേവില്ലെന്ന് ഇടതു മന്ത്രിമാർ

തിരുവനന്തപുരം: മമ്മൂട്ടിക്ക് നേരെ നടക്കുന്ന സൈബർ ആക്രമണത്തിന് പിന്നാലെ താരത്തിന് പിന്തുണയുമായി മന്ത്രിമാരായ കെ. രാജനും വി. ശിവൻകുട്ടിയും. പുഴു, ഉണ്ട എന്നീ ചിത്രങ്ങളുടെ തിരക്കഥാകൃത്തായ ഹര്‍ഷദിനേയും മമ്മൂട്ടിയേയും ചേര്‍ത്തുകൊണ്ടാണ് സൈബർ ആക്രമണം നടക്കുന്നത്.

വിദ്വേഷ സ്വഭാവത്തിലുള്ള വർഗ്ഗീയ നിറം കലർത്തിയുള്ള ട്രോളുകൾ അടക്കമാണ് ഒരു വിഭാഗം സോഷ്യൽ മീഡിയയിൽ മമ്മൂട്ടിക്കെതിരായി പ്രചരിക്കുന്നത്. സംഭവത്തിൽ മമ്മൂട്ടിക്ക് പിന്തുണയുമായി നിരവധി പ്രേക്ഷകർ സമൂഹ മാധ്യമങ്ങളിലൂടെ പ്രതികരിക്കുന്നുമുണ്ട്.

മമ്മൂട്ടി എന്ന വ്യക്തി മലയാളികളുടെ അഭിമാനമാണ് എന്നും അദ്ദേഹത്തെ പിന്തുണയ്ക്കുന്നതായും മന്ത്രി കെ. രാജൻ ഫേസ്‍ബുക്കിൽ കുറിച്ചു. "മമ്മൂട്ടിയെ മുഹമ്മദ് കുട്ടിയെന്നും, കമലിനെ കമാലുദ്ദീന്‍ എന്നും വിജയ്‌യെ ജോസഫ് വിജയ് എന്നും വിളിക്കുന്ന സംഘി രാഷ്ട്രീയം ഇവിടെ വിലപോവില്ല. ഇത് കേരളമാണ്," എന്ന് കെ. രാജൻ കുറിച്ചു.

നേരത്തെ മന്ത്രി വി. ശിവൻകുട്ടിയും സംഭവത്തിൽ മമ്മൂട്ടിയെ പിന്തുണച്ച് രംഗത്തെത്തിയിരുന്നു. "ആ പരിപ്പ് ഇവിടെ വേവില്ല... മമ്മൂട്ടി മലയാളിയുടെ അഭിമാനം," എന്നായിരുന്നു വി. ശിവൻകുട്ടി ഫേസ്‍ബുക്കിൽ കുറിച്ചത്.

"മമ്മൂട്ടി മലയാളിയുടെ സ്വകാര്യ അഹങ്കാരം... മമ്മൂക്കയ്ക്കൊപ്പം നിൽക്കുന്നതിൽ മതമോ രാഷ്ട്രീയമോ മലയാളിക്ക് തടസ്സമല്ല… #supportmammootty," എന്നായിരുന്നു  ടി. സിദ്ധീഖ് എംഎൽഎയുടെ ഫേസ്ബുക്ക് കുറിപ്പ്.

മമ്മൂട്ടി നായകനാവുന്ന പുതിയ ചിത്രം ടർബോ ഈ മാസം 23 ന് റിലീസിന് ഒരുങ്ങുകയാണ്. മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെയാണ് ചിത്രം നിർമ്മിക്കുന്നത്.

ജോസ് എന്ന കഥാപാത്രത്തെയാണ് മമ്മൂട്ടി ചിത്രത്തിൽ അവതരിപ്പിക്കുന്നത്. കന്നഡ താരം രാജ് ബി ഷെട്ടിയും തെലുങ്ക് താരം സുനിലും സുപ്രധാന വേഷങ്ങളിൽ ടർബോയിൽ ഉണ്ടാകും.

Read More:

• കൊച്ചിയിൽ മഞ്ഞപ്പിത്ത ബാധ; വേങ്ങൂരിൽ 180 പേർക്ക് രോഗം സ്ഥിരീകരിച്ചു
• 'സിപിഎമ്മിന് സമനില തെറ്റി'; കേരളത്തിൽ വർഗീയ വിഭജനത്തിന് ശ്രമിക്കുന്നുവെന്ന് പ്രതിപക്ഷ നേതാവ്
• കൊടകര കുഴൽപണക്കേസ് അന്വേഷിക്കുന്നുണ്ടെന്ന് ഇ.ഡി
• വിഷ്ണുപ്രിയ വധക്കേസിൽ പ്രതി ശ്യാംജിത്ത് കുറ്റക്കാരൻ; ജീവനെടുത്തത് പ്രണയപ്പക