യുഡിഎഫിൽ ഭിന്നതയില്ല; തദ്ദേശ തിരഞ്ഞെടുപ്പിന് ശേഷം സീറ്റ് വിഭജനം: രമേശ് ചെന്നിത്തല

യുഡിഎഫിൽ തർക്കങ്ങളില്ലെന്നും തദ്ദേശ തിരഞ്ഞെടുപ്പിന് പിന്നാലെ സീറ്റ് വിഭജനം മുന്നണിയ്ക്കുള്ളിൽ വേഗത്തിൽ പൂർത്തിയാക്കുമെന്നും മുതിർന്ന കോൺഗ്രസ് നേതാവും മുൻ പ്രതിപക്ഷ നേതാവുമായ രമേശ് ചെന്നിത്തല. ഇന്ത്യൻ എക്‌സ്പ്രസ് മലയാളം പോഡ്കാസ്റ്റ് പരിപാടി വർത്തമാനത്തിലാണ് ചെന്നിത്തല ഇക്കാര്യം വ്യക്തമാക്കിയത്. 

Also Read in English: Congress needs to present a united front, step up heat on unpopular LDF govt in Kerala, says Chennithala

"സീറ്റ് വിഭജനവുമായി ബന്ധപ്പെട്ട യുഡിഎഫിൽ തർക്കങ്ങൾ വരാനില്ല. എല്ലാ പാർട്ടികൾക്കും അവരുടെ സീറ്റുകളുണ്ട്. തദ്ദേശതിരഞ്ഞെടുപ്പിന് പിന്നാലെ സീറ്റ് വിഭജന ചർച്ചകളിലേക്ക് കടക്കും"- ചെന്നിത്തല പറഞ്ഞു.

Also Read:തന്നെ പോലും ആരും സൈബർ ആക്രമണം നേരിട്ടിട്ടില്ല: രമേശ് ചെന്നിത്തല

യുവാക്കൾ തങ്ങളുടെ സീറ്റുകളിൽ കൂടുതൽ ശ്രദ്ധ ചെലുത്തണമെന്നും രമേശ് ചെന്നിത്തല പറഞ്ഞു. കഴിഞ്ഞ നിയമസഭാ തിരഞ്ഞെടുപ്പിൽ 52 സീറ്റുകൾ യുവാക്കൾക്ക് നൽകിയെങ്കിലും കേവലം രണ്ട് സീറ്റുകളിൽ മാത്രമാണ് അവർക്ക് വിജയിക്കാനായത്. ഈ സാഹചര്യം മനസ്സിലാക്കി വിജയിക്കാൻ യുവാക്കൾ കൂടുതൽ പരിശ്രമം നടത്തണമെന്നും ചെന്നിത്തല പറഞ്ഞു. 

Also Read: സിപിഎമ്മല്ല കോൺഗ്രസ്; രാഹുൽ മാങ്കൂട്ടത്തിലിനെതിരായ നടപടി അനിവാര്യം: രമേശ് ചെന്നിത്തല

വരുന്ന തിരഞ്ഞെടുപ്പിൽ ഭരണത്തിലെത്തുന്നതിനാണ് യുഡിഎഫ് പ്രഥമ പരിഗണന നൽകുന്നതെന്നും മുഖ്യമന്ത്രിയെ പിന്നീട് ജനങ്ങൾ തീരുമാനിക്കുമെന്നും ചെന്നിത്തല പറഞ്ഞു. "നിലവിലെ എൽഡിഎഫ് സർക്കാരിനെതിരെ ജനവികാരം ശക്തമാണ്. യുഡിഎഫിന് അനുകൂലമായ സാഹചര്യമാണ് നിലവിലുള്ളത്. ജനങ്ങൾക്ക് യുഡിഎഫിൽ വിശ്വാസമുണ്ട്. മുഖ്യമന്ത്രി ആരെന്ന് ചോദ്യത്തിന് ഇപ്പോൾ പ്രസ്‌ക്തിയില്ല. മുഖ്യമന്ത്രിയെ തീരുമാനിക്കുന്നതിന് കോൺഗ്രസിനുള്ളിൽ ഒരു കീഴ്വഴക്കമുണ്ട്. അതനുസരിച്ച് മുന്നോട്ടുപോകും. മുഖ്യമന്ത്രി ആരാകണമെന്നതിൽ അന്തിമ തീരുമാനം ഹൈക്കമാൻഡ് സ്വീകരിക്കും". -രമേശ് ചെന്നത്തില പറഞ്ഞു. 

കോൺഗ്രസിന് ഒരു മുഖ്യമന്ത്രി സ്ഥാനാർഥി ഇല്ലേയെന്ന് ചോദ്യം സ്വഭാവികമായി ഉയരും. പക്ഷെ, ജനങ്ങൾക്ക് യുഡിഎഫിൽ വിശ്വാസമുണ്ട്. ശരിയാ തീരുമാനം കോൺഗ്രസ് എടുക്കുമെന്ന് ജനങ്ങൾക്കറിയാമെന്നും രമേശ് ചെന്നിത്തല പറഞ്ഞു.

Read More:ഭരണത്തിലെത്തുന്നത് മുഖ്യം, യുഡിഎഫിന്റെ മുഖ്യമന്ത്രിയെ ജനങ്ങൾ തീരുമാനിക്കും: രമേശ് ചെന്നിത്തല