സംസ്ഥാനത്ത് വീണ്ടും അമീബിക് മസ്തിഷ്ക ജ്വരം; 14 കാരൻ മരിച്ചു

കോഴിക്കോട്: അമീബിക് മസ്തിഷ്ക ജ്വരം ബാധിച്ച് കേരളത്തിൽ വീണ്ടും മരണം. കോഴിക്കോട് ഫറോക് സ്വദേശി, 14 വയസുകാരനായ മൃദുൽ ആണ് മരണപ്പെട്ടത്. ജൂൺ 24 മുതൽ രോഗ ലക്ഷണങ്ങളോടെ കോഴിക്കോട്ട് സ്വകാര്യ ആശുപത്രിയിൽ ചികിത്സയിലായിരുന്നു. രാമനാട്ടുകരയിലുള്ള അച്ഛൻ കുളത്തിൽ കുളിച്ച ശേഷമായിരുന്നു കുട്ടിക്ക് രോഗ ലക്ഷണങ്ങൾ ഉണ്ടായത്. കോരളത്തിൽ മൂന്ന് കുട്ടികളാണ് രണ്ട് മാസത്തിനുള്ളിൽ മസ്തിഷ്ക ജ്വരം ബാധിച്ച് മരിക്കുന്നത്.

എന്താണ് മസ്തിഷ്ക ജ്വരം
നെയ്‌ഗ്ലേരിയ ഫൗളറി അഥവാ ബ്രെയിൻ ഈറ്റിങ് അമീബ മൂലമുണ്ടാകുന്ന അപൂർവ അണുബാധയായ പ്രൈമറി അമീബിക് മെനിംഗോ എൻസെഫലൈറ്റിസ് (പിഎഎം) ബാധിച്ചാണ് കേരളത്തിൽ മൂന്ന് കുട്ടികൾ മരണപ്പെട്ടത്. മുമ്പും അപൂർവവും മാരകവുമായ ഈ അണുബാധ നിരവധി ജീവനുകൾ അപഹരിച്ചിട്ടുണ്ട്. 

എന്താണ് പ്രാഥമിക അമീബിക് മെനിംഗോ എൻസെഫലൈറ്റിസ്?
പ്രൈമറി അമീബിക് മെനിംഗോ എൻസെഫലൈറ്റിസ് (PAM) നെയ്‌ഗ്ലേരിയ ഫൗളറി മൂലമുണ്ടാകുന്ന അപൂർവ മസ്തിഷ്‌ക അണുബാധയാണ്. ഇത് സ്വതന്ത്രമായി ജീവിക്കുന്ന അമീബ അല്ലെങ്കിൽ ഏകകോശ ജീവിയാണ്. ലോകമെമ്പാടുമുള്ള ചൂടുള്ള ശുദ്ധജലത്തിലും മണ്ണിലുമാണ് നെഗ്ലേരിയ ഫൗളേരി ജീവിക്കുന്നത്. ഇത് മൂക്കിലൂടെ ശരീരത്തിൽ പ്രവേശിക്കുന്നതിലൂടെയാണ് മനുഷ്യരെ ബാധിക്കുന്നത്. 

115°F (46°C) വരെയുള്ള ഉയർന്ന ഊഷ്മാവ് അതിൻ്റെ വളർച്ചയ്ക്ക് അനുകൂലമാണ്. ചൂടുള്ള ചുറ്റുപാടുകളിൽ ഇതിന് ഹ്രസ്വകാലത്തേക്ക് അതിജീവിക്കാൻ കഴിയും. തടാകങ്ങൾ, നദികൾ, നീന്തൽക്കുളങ്ങൾ, സ്പ്ലാഷ് പാഡുകൾ, സർഫ് പാർക്കുകൾ അല്ലെങ്കിൽ, മോശമായി പരിപാലിക്കപ്പെടാത്തതോ കുറഞ്ഞ അളവിൽ ക്ലോറിനേറ്റ് ചെയ്തതോ ആയ മറ്റ് വിനോദ പാർക്കുകൾ എന്നിവിടങ്ങളിലെ ചൂടുള്ള ശുദ്ധജലത്തിൽ ഈ അപകടകാരിയായ അമീബയെ കാണാം. 

പ്രൈമറി അമീബിക് മെനിംഗോഎൻസെഫലൈറ്റിസിൻ്റെ ലക്ഷണങ്ങൾ എന്തൊക്കെയാണ്?
പ്രാരംഭ ഘട്ടത്തിൽ തലവേദന, പനി, ഓക്കാനം, ഛർദ്ദി എന്നിവയാണ് ലക്ഷണങ്ങൾ. പിന്നീട്, രോഗിക്ക് കഴുത്ത് ഞെരുക്കം ഉണ്ടാകുകയും ആശയക്കുഴപ്പം, അപസ്മാരം, ഭ്രമാത്മകത എന്നിവ അനുഭവപ്പെടുകയും കോമ അവസ്ഥയിലേക്ക് വഴുതി വീഴുകയും ചെയ്യാം. യുഎസ് സെൻ്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) റിപ്പോർട്ട് പ്രകാരം, “പിഎഎം ഉള്ള മിക്ക ആളുകൾ രോഗലക്ഷണങ്ങൾ ആരംഭിച്ച് ഒന്നു മുതൽ 18 ദിവസത്തിനുള്ളിൽ മരിക്കുന്നു. ഇത് സാധാരണയായി 5 ദിവസത്തിന് ശേഷം കോമയിലേക്കും മരണത്തിലേക്കും നയിക്കുന്നു," എന്നാണ് കണ്ടെത്തൽ.

പ്രാഥമിക അമീബിക് മെനിംഗോ എൻസെഫലൈറ്റിസ് ചികിത്സ എന്താണ്?
നേരത്തെ റിപ്പോർട്ട് ചെയ്തതുപോലെ, രോഗത്തിനുള്ള ഫലപ്രദമായ ചികിത്സകളൊന്നും ഇതുവരെ ശാസ്ത്രജ്ഞർക്ക് തിരിച്ചറിയാൻ കഴിഞ്ഞിട്ടില്ല. നിലവിൽ, ആംഫോട്ടെറിസിൻ ബി, അസിത്രോമൈസിൻ, ഫ്ലൂക്കോണസോൾ, റിഫാംപിൻ, മിൽറ്റെഫോസിൻ, ഡെക്സമെതസോൺ എന്നിവ ഉൾപ്പെടെയുള്ള മരുന്നുകൾ സംയോജിപ്പിച്ചാണ് ഡോക്ടർമാർ ചികിത്സിക്കുന്നത്.

Read More

• തൃശൂരിൽ നിന്ന് കാണാതായ ദമ്പതികൾ വേളാങ്കണ്ണിയിൽ മരിച്ച നിലയിൽ
• റീൽസ് പണിയായി, തിരുവല്ലയിൽ സർക്കാർ ഓഫീസ് ഉദ്യോഗസ്ഥർക്കെതിരെ നടപടി
• കലയെ ഭർത്താവ് കൊലപ്പെടുത്തിയത് പരപുരുഷ ബന്ധം ആരോപിച്ചെന്ന് എഫ്ഐആർ
• കലയുടേത് കൊലപാതകം തന്നെയെന്ന് എസ്.പി; അഞ്ച് പേർ കസ്റ്റഡിയിൽ
• 'ഭഗവാൻ പരമശിവനെ അവഹേളിക്കുന്ന പ്രവൃത്തി'; രാഹുൽ ഗാന്ധിക്കെതിരെ കെ.സുരേന്ദ്രൻ