തൃശൂരിൽ നിന്ന് കാണാതായ ദമ്പതികൾ വേളാങ്കണ്ണിയിൽ മരിച്ച നിലയിൽ

തൃശൂർ: കൊരട്ടിയിൽ നിന്ന് കാണാതായ ദമ്പതികളെ വേളാങ്കണിയിൽ മരിച്ച നിലയിൽ കണ്ടെത്തി. വേളാങ്കണി പള്ളിയുടെ സമീപത്തായി ലോഡ്‌ജിൽ നിന്ന് വിഷം കുത്തിവച്ച് മരിച്ച നിലയിലാണ് ദമ്പതികളുടെ മൃതദേഹം കണ്ടെത്തിയത്. കൊരട്ടി തിരുമുടിക്കുന്ന് മുടപ്പുഴ സ്വദേശികളായ ആന്റോ (34) ഭാര്യ ജിസ്സു (29) എന്നിവരാണ് മരിച്ചത്.

കൊരട്ടിയില്‍ നിന്ന് ജൂൺ മാസം 22 മുതലാണ് ആന്റോയും ജിസ്സുവും കാണാതായത്. തിരുമുടിക്കുന്നിലെ വീട്ടിൽനിന്നാണ് ഇരുവരും കാണാതായത്. തിരോധാന കേസിൽ അന്വേഷണം പുരോഗമിക്കുന്നതിനിടയിൽ, ആന്റോ ജീവനൊടുക്കിയതായി കഴിഞ്ഞ ദിവസം വിവരം ലഭിച്ചു.

വിഷം കുത്തിവച്ച് ആത്മഹത്യക്ക് ശ്രമിച്ച ആന്റോയെ നാഗപട്ടണം മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ആന്റോയെ ആശുപത്രിയിലെത്തിക്കാന്‍ കൂടെയുണ്ടായിരുന്ന ഭാര്യ ജിസ്സു തന്നെയാണ് ആന്റോ മരണപ്പെട്ടെന്ന വിവരം നാട്ടില്‍ വിളിച്ച് അറിയിച്ചത്.

ഭർത്താവിന്റെ മരണം സ്ഥിരീകരിച്ചതോടെ ജിസ്സു വിഷം കുത്തിവച്ച് ജീവനൊടുക്കിയെന്നാണ് റിപ്പോർട്ട്. ദമ്പതികൾ സാമ്പത്തിക ബുദ്ധിമുട്ടുകൾ നേരിട്ടിരുന്നുവെന്നാണ് വിവരം. നാഗപട്ടണം മെഡിക്കൽ കോളജ് ആശുപത്രിയിൽ പോസ്റ്റ്മാർട്ടം നടപടികൾ പൂർത്തിയാക്കിയ ശേഷം മൃതദേഹം വ്യാഴാഴ്ച നാട്ടിലെത്തിക്കും.  

ശ്രദ്ധിക്കു

ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായത്തിനായി വിളിക്കൂ:Pratheeksha: 0484 2448830; Roshni: 040 790 4646, Aasra: 022 2754 6669 and Sanjivini: 011-24311918