Weekly Horoscope Sep 07-Sep 13: വാരഫലം, അശ്വതി മുതൽ രേവതി വരെ

Weekly Horoscope: ആദിത്യൻ ചിങ്ങം രാശിയിലാണ്. പൂരം ഞാറ്റുവേലയിലാണ് 28ന് ഉച്ചവരെ. തുടർന്ന് ഉത്രം ഞാറ്റുവേലയിലും.ചന്ദ്രന് സെപ്തംബർ 7ന് ഞായറാഴ്ച ഗ്രഹണയോഗമുണ്ട്. അന്നുരാത്രി 9:58 മുതൽ പുലർച്ചേ 1:22 വരെയാണ് ചന്ദ്രഗ്രഹണം ഭവിക്കുന്നത്. അന്ന് പൗർണമിയാണ്. സെപ്തംബർ 8 മുതൽ കൃഷ്ണപക്ഷം ആരംഭിക്കുന്നു. ചതയം മുതൽ കാർത്തിക - രോഹിണി വരെയുള്ള നക്ഷത്രങ്ങളിലൂടെയാണ് ചന്ദ്രസഞ്ചാരം.

ചൊവ്വ കന്നി രാശിയിൽ ചിത്തിര നക്ഷത്രത്തിലാണ്. 13ന് രാത്രി തുലാം രാശിയിൽ പ്രവേശിക്കും. ശുക്രൻ കർക്കടകം രാശിയിൽ ആയില്യം നക്ഷത്രത്തിലാണ്. ബുധൻ ചിങ്ങം രാശിയിൽ പൂരം നക്ഷത്രത്തിൽ തുടരുന്നു. 

ശനി മീനം രാശിയിൽ വക്രഗതിയിലാണ്. വ്യാഴം മിഥുനം രാശിയിൽ പുണർതത്തിൽ സഞ്ചരിക്കുന്നു. രാഹു കുംഭത്തിലും കേതു ചിങ്ങത്തിലും പിൻഗതിയിലാണ്. ഈ ഗ്രഹസ്ഥിതിയെ അവലംബിച്ച് അശ്വതി മുതൽ രേവതി വരെയുള്ള നക്ഷത്രങ്ങളിൽ ജനിച്ചവരുടെ വാരഫലം ഇവിടെ അവതരിപ്പിക്കുന്നു.

അശ്വതി

വാരാദ്യത്തിലെ ചന്ദ്രഗ്രഹണം ഏറ്റവും കുറവ് ദോഷഫലം സൃഷ്ടിക്കുന്നത് അശ്വതി ഉൾപ്പെട്ട മേടക്കൂറിലെ നക്ഷത്രങ്ങളെയാണ്. അശ്വതിക്കാർക്ക് വാരാദ്യം മുതൽ തന്നെ ഉന്മേഷമുണ്ടാവും. പുത്തനുണർവ്വോടെ ജോലിയിൽ പ്രവേശിക്കാനാവും. എതിർപ്പുകളെ സഹജമായ പ്രത്യുല്പന്നമതിത്വം കൊണ്ട് മറികടക്കുന്നതാണ്. ഏകോപനം സുസാധ്യമാവും. കൂട്ടുകച്ചവടത്തിലേർപ്പെട്ടവർ പുതിയ പ്രവർത്തന മാനദണ്ഡങ്ങൾ കണ്ടെത്തിയേക്കും. പ്രണയികൾക്ക് പരസ്പരമറിയാൻ അവസരങ്ങളുണ്ടാവും. കുടുംബ പ്രശ്നങ്ങൾ ചെറിയ തോതിൽ സ്വസ്ഥതയെ ബാധിക്കുന്നതാണ്. ധനവ്യയത്തിൽ മിതത്വം പുലർത്തേണ്ടതുണ്ട്.
ചൊവ്വ, ശനി ദിവസങ്ങൾക്ക് തെല്ല് മേന്മ കുറയാം.

Also Read: ചിങ്ങത്തിൽ വിശാഖക്കാർക്ക് വീടു പണിയിൽ മന്ദഗതി, അനിഴക്കാർക്ക് നഷ്ടം വരാം, തൃക്കേട്ടക്കാർക്ക് ശത്രുവിജയം

ഭരണി

സ്വന്തം തറവാട്ടിൽ സഹജസ്നേഹമനുഭവിക്കാൻ അവസരം ലഭിക്കും. വിദ്യാർത്ഥികൾക്ക് ദിശാബോധം കൈവരുന്നതാണ്. പരീക്ഷണാടിസ്ഥാനത്തിൽ ചില നീക്കങ്ങൾ നടത്തുന്നത് വിജയിക്കാനാണ് സാധ്യത. ഭൂമിവിൽപ്പന സംബന്ധിച്ച് കരുനീക്കങ്ങൾ നടത്തിയേക്കും. സുഹൃത്തുക്കളുടെ സമാഗമത്തിൽ പങ്കെടുക്കുന്നതാണ്. സന്താനങ്ങളുടെ നീക്കങ്ങളിൽ ഉൽക്കണ്ഠയുണ്ടാവും. തൊഴിൽ തേടുന്നവർക്ക് പ്രയോജനകരമായ അറിയിപ്പുകൾ ലഭിക്കാം. ഉദ്യോഗസ്ഥർക്ക് ജോലിഭാരം കൂടാനാണ് സാധ്യത. തിങ്കൾ, ചൊവ്വ, ബുധൻ ദിവസങ്ങളിൽ ദേഹക്ഷീണമുണ്ടാവും. 

കാർത്തിക

അനാവശ്യമായ തിടുക്കം ഒഴിവാക്കുക കരണീയം. അവധി നീട്ടി നാട്ടിൽ ഒന്നുരണ്ടുദിവസം കൂടി തങ്ങിയേക്കും. കുടുംബ പ്രശ്നങ്ങൾ മുതിർന്നവരുമായി ചർച്ച ചെയ്യുന്നതാണ്. എങ്കിലും മുഴുവനും പരിഹരിക്കാനായേക്കില്ല. കലാമത്സരങ്ങൾക്ക് തയ്യാറെടുപ്പ് തുടങ്ങാൻ സാധിച്ചേക്കും. ആവശ്യത്തിനുള്ള പണം കച്ചവടത്തിലൂടെ കൈവശമെത്തുന്നതാണ്. വിപുലീകരണ ശ്രമങ്ങൾ നീളാനിടയുണ്ട്. കിടപ്പുരോഗികൾക്ക് തുടർ ചികിത്സകൊണ്ട് മാറ്റം കണ്ടുതുടങ്ങും. പൂർവ്വിക സ്വത്ത് വിൽക്കുന്നതിന് കളമൊരുങ്ങിയേക്കും. സാങ്കേതികമായ അറിവ് നേടാൻ പുതുതലമുറയുടെ സഹായം തേടുന്നതാണ്.

രോഹിണി

നക്ഷത്രനാഥനായ ചന്ദ്രന് ഗ്രഹണം വരുന്ന വാരമാകയാൽ മാനസികശക്തി ചോർന്നുപോകാം. സന്ദിഗ്ദ്ധത മനസ്സിലിടം പിടിച്ചേക്കും. എന്നിരുന്നാൽ തന്നെയാവും കർമ്മമേഖലയിൽ ആസൂത്രണം ചെയ്ത കാര്യങ്ങൾ പ്രാവർത്തികമാക്കാൻ സാധിക്കും. പുതിയ സൗഹൃദങ്ങൾ ഉണ്ടാവുന്നതാണ്. വലിയ തോതിൽ മുതൽമുടക്കിന് തത്കാലം മുതിരരുത്. കലാപ്രവർത്തകർക്ക് ശക്തമായ തിരിച്ചുവരവ് സാധ്യമാവും. കുടുംബകാര്യങ്ങളിൽ ജീവിത പങ്കാളിയുടെ അഭിപ്രായം സ്വീകരിക്കും.  പ്രണയികൾക്കിടയിൽ ഐക്യം വളരുന്നതാണ്. ക്ഷേത്രാടനത്തിന് അവസരമുണ്ടാവും.

മകയിരം

ആത്മവിശ്വാസമുയരാൻ പറ്റിയ സാഹചര്യങ്ങൾ സംജാതമാകും. സ്വാശ്രയത്വത്തിൽ ഉറച്ചുനിൽക്കുന്നതാണ്. സഹപ്രവർത്തകർക്കിടയിൽ സ്വീകര്യത ഉയർന്നേക്കും. നവസംരംഭങ്ങളുമായി മുന്നോട്ടുപോകാൻ തയ്യാറാവും. അതിനാവശ്യമായി രേഖകൾ സർക്കാരിൽ നിന്നും നേടാനായേക്കും. ഇരുദിക്കിൽ കഴിഞ്ഞിരുന്ന ഭാര്യാഭർത്താക്കന്മാർക്ക് ഒരിടത്തേക്ക് മാറ്റം കിട്ടുന്നതാണ്. സാമൂഹ്യസേവനത്തിന് സമയം കണ്ടെത്തും. ഗവേഷകർക്ക് യാത്രകളിലൂടെ വസ്തുതകളും പഠനവിവരങ്ങളും സമാഹരിക്കാനാവും. പുതുവാഹനത്തിനായുള്ള മകൻ്റെ ശാഠ്യത്തിന് വഴങ്ങിയേക്കും.

തിരുവാതിര

യാഥാർത്ഥ്യങ്ങളെ സ്വീകരിക്കാൻ മനസ്സ് സന്നദ്ധമാവും. പുതിയ കാര്യങ്ങളെക്കുറിച്ച് വ്യക്തമായ ധാരണ പുലർത്തുന്നതാണ്. ഉദ്യോഗസ്ഥർക്ക് കൃത്യനിർവഹണം സുഗമമാവും. ചെലവിനത്തിൽ കരുതൽ വേണ്ടതുണ്ട്. തൊഴിൽ തർക്കങ്ങൾ പരിഹരിക്കാൻ മുൻകൈയ്യെടുക്കും. ചെറുപ്പക്കാരുടെ വിവാഹ കാര്യത്തിൽ ആശാവഹമായ നീക്കങ്ങൾ പ്രതീക്ഷിക്കാം. ഗ്രഹനിർമ്മാണത്തിൽ തടസ്സങ്ങൾ തുടരും. നാലിൽ ചൊവ്വ സഞ്ചരിക്കുകയാൽ വാഹനയാത്രയിൽ കരുതലുണ്ടാവണം. ശനിയാഴ്ചക്ക് മേന്മ കുറയാം.

പുണർതം

അവധി കഴിഞ്ഞ് ജോലിയിൽ പ്രവേശിക്കയാൽ നിർത്തിയേടത്തു നിന്നും തന്നെ വീണ്ടും തുടങ്ങേണ്ടി വരാം. ഉദ്യോഗം തേടുന്നവർക്ക് പ്രതീക്ഷിച്ച നിയമനം വൈകാനിടയുണ്ട്. ചർച്ചകളിൽ / കാര്യാലോചനകളിൽ ശോഭിക്കുന്നതാണ്. വാടക കെട്ടിടത്തിൽ നിന്നും മാറാൻ ശ്രമം തുടരേണ്ടി വരാം. മംഗളകർമ്മങ്ങളിൽ പങ്കെടുക്കാനായി യാത്ര വേണ്ടിവരുന്നതാണ്. ക്ഷേത്രദർശനം , ബന്ധുസമാഗമം എന്നിവ സന്തോഷമേകും. ഓൺലൈൻ വ്യാപാരത്തിലൂടെ നേട്ടങ്ങളുണ്ടാക്കും. ലോണിൻ്റെ തിരിച്ചടവ് മുടക്കില്ല. ഞായർ, വെള്ളി, ശനി ദിവസങ്ങൾക്ക് മേന്മ കുറയാം.

പൂയം

വാരാദ്യത്തിൽ ചന്ദ്രഗ്രഹണം, അഷ്ടമരാശിക്കൂറ് ഇവയാൽ മനക്ലേശവും കാര്യതടസ്സവും അനുഭവപ്പെടും. ചൊവ്വ മുതൽ  അനുകൂല കാര്യങ്ങൾ ഉണ്ടാവുന്നതാണ്. സാമ്പത്തിക സ്വാതന്ത്ര്യം പ്രതീക്ഷിക്കാം. കച്ചവട രംഗത്തിൽ സജീവമാകാൻ സാധിക്കുന്നതാണ്. കുടുംബാംഗങ്ങളുമായി ഒത്തുചേരാനായതിൻ്റെ സന്തോഷം ചെറുതാവില്ല. ഭോഗസുഖമുണ്ടാവും. പാരിതോഷികങ്ങൾ വാർദ്ധക്യത്തെ സന്തോഷിപ്പിച്ചേക്കും. രാഷ്ട്രീയ നിലപാടുകൾ വിമർശിക്കപ്പെടാം. ചിന്തിച്ചുറപ്പിച്ച കാര്യങ്ങൾ നടപ്പിലാക്കുന്നതാണ്.

Also Read:സമ്പൂർണ വർഷഫലം: അശ്വതി മുതൽ രേവതിവരെ

ആയില്യം

സ്വാഭിപ്രായം വെട്ടിത്തുറന്നു പറയുകയാൽ പലരുടെയും ശത്രുത സമ്പാദിച്ചേക്കും. കർമ്മരംഗത്ത് ഞായർ മുതൽ ചൊവ്വ വരെ ഗുണം കുറയുന്നതാണ്. ആലസ്യം നിറയും. വാഗ്ദാനലംഘനങ്ങൾ പരിഹാസ്യമാവും. യാത്രാക്ലേശം അനുഭവപ്പെടുന്നതാണ്. തുടർദിവസങ്ങളിൽ പ്രവർത്തന മികവ് ശ്രദ്ധേയമാകും. മേലധികാരികൾ പ്രശംസിക്കാനിടയുണ്ട്. വിപണന തന്ത്രങ്ങൾ ഫലം കാണുന്നതാണ്. പൊതുപ്രവർത്തനത്തിലൂടെ കൂടുതൽ ജനകീയത നേടും. സഹോദരർക്കിടയിലെ അസ്വാരസ്യം നീങ്ങാം. വയോജനങ്ങളുടെ വാക്കുകൾ അംഗീകരിക്കും. ഭൂമിവിൽപ്പനയുടെ അഡ്വാൻസ് കൈപ്പറ്റിയേക്കാം.

മകം

ദാമ്പത്യത്തിൽ സമ്മിശ്രാനുഭവങ്ങൾ. ചിലപ്പോൾ സന്തുഷ്ടരാണെന്ന് അഭിനയിക്കും. മക്കളെ മനസ്സിലാക്കാൻ കഴിയുന്നില്ലെന്ന് തോന്നും. വ്യാപാരത്തിൽ/ ഏജൻസിയിൽ നേട്ടമുണ്ടാവും. കടബാധ്യതകൾ കുറച്ചൊക്കെ വീടാൻ കഴിഞ്ഞേക്കും. പഴയ സുഹൃത്തുക്കളെ കാണും. കൂട്ടായി സംരംഭങ്ങൾ തുടങ്ങുന്നതിനെക്കുറിച്ച് പ്രാരംഭ ചർച്ചകൾ നടക്കാനിടയുണ്ട്. ആരോഗ്യകാര്യങ്ങളിൽ ജാഗ്രത പുലർത്തണം. കലാകാരന്മാർക്ക് അവസരം ലഭിക്കാത്തതിൽ ഖേദമുണ്ടാവുന്നതാണ്. ചൊവ്വയും ബുധനും അഷ്ടമരാശിയാകയാൽ കരുതൽ വേണം. വാഗ്വാദങ്ങൾക്ക് മുതിരരുത്.

പൂരം

പുതിയതിൻ്റെ പക്ഷം പിടിച്ചാലും പഴമയ്ക്കും മനസ്സിലിടമുണ്ടാവും. ആശയക്കുഴപ്പം തൊഴിലിടത്തിലും ഏർപ്പെടാം. അഹിതകാര്യങ്ങൾ ഏറ്റവും ആത്മാർത്ഥമായി ചെയ്യേണ്ടി വരുന്നതാവും ക്ലേശിപ്പിക്കുക. ആഡംബരച്ചെലവുകൾ കുറയില്ല. കുടുംബത്തിലെ വിവാഹാദി മംഗളകർമ്മങ്ങൾക്ക് മുൻനിന്ന് സഹകരിക്കും. ജന്മനക്ഷത്രത്തിലെ ഗ്രഹാധിക്യം വെറുതെ സമ്മർദ്ദങ്ങൾക്ക് കളമൊരുക്കുന്നതാണ്. ആരംഭിച്ച കാര്യങ്ങൾ നിന്നേടത്തുതന്നെ നിന്നേക്കും. തിങ്കൾ ഉച്ചമുതൽ ബുധൻ സായാഹ്നം വരെ വാക്കിലും കർമ്മത്തിലും കൂടുതൽ ശ്രദ്ധയുണ്ടാവണം'.

ഉത്രം

സ്വതന്ത്രമായി പ്രവർത്തിക്കാനാഗ്രഹിക്കും. പക്ഷേ പരാശ്രയത്വം വേണ്ടിവരുന്നതാണ്. താത്കാലിക ജോലി അവസാനിച്ചതിനാൽ പുതിയ വരുമാന മാർഗം കണ്ടെത്തേണ്ട സ്ഥിതി സംജാതമാകും. കുടുംബാംഗങ്ങളുടെ പിന്തുണ അത്ര ആശാവഹമാവില്ല.പ്രണയികൾക്കിടയിൽ പിണക്കം ആവർത്തിക്കും. പഴിചാരുന്നതിൽ ആനന്ദിക്കുന്നതാണ്. സാഹിത്യപ്രവർത്തനം പുരോഗമിക്കും. ഭാവനയുടെ ലോകത്തെ കൂടുതൽ ഇഷ്ടപ്പെടാനിടയുണ്ട്. വിദ്യാർത്ഥികളുടെ കഴിവുകൾ പരീക്ഷാഫലത്തിൽ പ്രകടമാവുന്നതാണ്. വാരാദ്യത്തിൽ ശുഭഫലങ്ങളേറും. വാരമധ്യത്തിൽ എല്ലാക്കാര്യങ്ങളിലും കരുതൽ വേണം.

അത്തം

പ്രവർത്തനത്തിൽ അവ്യക്തത നിഴലിക്കും. അടുത്തത് എന്തെന്ന് സംശയിക്കും. പ്രതീക്ഷിച്ച സഹായം വന്നെത്തുന്നതാണ്. തടസ്സ സാധ്യതകളെ മുൻകൂട്ടി കണ്ടറിയേണ്ടതുണ്ട്. മേലധികാരികൾക്ക് തൃപ്തിയുണ്ടാവും. ചെറുയാത്രകൾ ഗുണപ്രദമായേക്കും. മകൻ്റെ നിർബന്ധശീലം കുടുംബാന്തരീക്ഷത്തെ തെല്ലൊന്ന് മ്ളാനമാക്കാം. ജീവിതശൈലീരോഗങ്ങളെ നിയന്ത്രിക്കാൻ കഴിയും.  ഊഹക്കച്ചവടത്തിൽ നഷ്ടം വരാനിടയുണ്ട്. ദൈവിക സമർപ്പണങ്ങൾക്ക്  സമയം കണ്ടെത്തും. പന്ത്രണ്ടാം ഭാവത്തിലെ ത്രിഗ്രഹയോഗം ചെലവേറാൻ കാരണമാകും. വ്യാഴം, വെള്ളി ദിനങ്ങളിൽ കരുതലുണ്ടാവണം.

ചിത്തിര

ജന്മനക്ഷത്രത്തിലൂടെ ചൊവ്വ സഞ്ചരിക്കുകയാൽ ക്ഷോഭശീലമേറും. അനാവശ്യമായ തിടുക്കം കാട്ടി കുഴപ്പത്തിൽ ചാടാനിടയുണ്ട്. വരുംവരായ്കകളെക്കുറിച്ച് അധികം ചിന്തിക്കില്ല. ബന്ധുകലഹത്തിൽ മാധ്യസ്ഥം വഹിക്കുന്നതാണ്. ലീവിന് വന്നിട്ട് മടങ്ങിപ്പോകാൻ  കുറച്ചുദിവസം വൈകിയേക്കും.  പണിപൂർത്തിയാക്കിയ കെട്ടിടത്തിന്  വാടകക്കാരെ ലഭിച്ചേക്കാം.  പുതിയ ഇലക്ട്രോണിക് ഉല്പന്നം സ്വന്തമാക്കും. നവസംരംഭങ്ങളുടെ സാധ്യതകൾ പലരുമായി ചർച്ചചെയ്യുന്നതാണ്. വ്യാഴം,  വെള്ളി, ശനി ദിവസങ്ങളിൽ സാഹസ കർമ്മങ്ങൾക്ക് മുതിരരുത്. 

ചോതി

ഞായർ, തിങ്കൾ, ശനി  ദിവസങ്ങളിൽ ആലോചന കാടുകയറും. ആലസ്യമുണ്ടാവുന്നതായിരിക്കും. വേണ്ടാത്ത കാര്യങ്ങളിൽ അഭിപ്രായം പറയുന്നതിനാൽ തന്മൂലം ശത്രുക്കൾ കൂടാം. മറ്റുള്ള ദിവസങ്ങൾ ഗുണപ്രധാനങ്ങൾ! കാര്യസാധ്യം വൈകില്ല. പലരുടെയും സഹകരണം ആവശ്യപ്പെടാതെ തന്നെ ലഭിക്കുന്നതാണ്. രോഗക്ലേശിതർക്ക് ആശ്വാസമുണ്ടാവും. സംഘടനകളിൽ നേതൃത്വപദവി കൈവരും. പഠനകാര്യത്തിൽ ശുഷ്കാന്തി കാട്ടും. അഭിമുഖങ്ങൾക്ക് തയ്യാറെടുപ്പ് തുടരുന്നതാണ്. ശുഭവാർത്തകൾ കേൾക്കും.

വിശാഖം

വിഷണ്ണഭാവങ്ങൾ അകലുന്ന കാലമാണ്. ആത്മവിശ്വാസം ഉയരുന്നതാണ്. ജോലിക്കായുള്ള ശ്രമങ്ങൾ ഫലിച്ചേക്കും.പുതിയ കാര്യങ്ങൾ പഠിച്ചറിയാൻ തയ്യാറാകുന്നതാണ്.കുടുംബ ബന്ധങ്ങൾ, വിശേഷിച്ചും സഹോദരബന്ധം ദൃഢമാകുന്നതാണ്. കൈവായ്പകൾ മടക്കിക്കിട്ടും. വാഹനം വാങ്ങുന്നതിൽ വ്യക്തതയുണ്ടാവും. പതിനൊന്നിലെ ഗ്രഹസമൃദ്ധി അഭീഷ്ടകാര്യങ്ങൾ നേടാൻ വഴിയൊരുക്കാം. ചൊവ്വയുടെ സഞ്ചാരം അനുകൂലമല്ലാത്തതിനാൽ രക്തസമ്മർദ്ദം പോലുള്ള ജീവിതശൈലീ രോഗങ്ങളിൽ കരുതലുണ്ടാവണം.

അനിഴം

സമ്മിശ്രഫലം ഉളവാകുന്ന വാരമാണ്. ആദിത്യബുധന്മാരുടെ അനുകൂലതയാൽ കർമ്മരംഗത്ത് ശോഭിക്കാനാവും. ഏതെങ്കിലും തരത്തിലുള്ള മത്സരങ്ങളുണ്ടായാൽ അവയിൽ വിജയം വരിക്കുന്നതാണ്. അറിവ് പ്രകടിപ്പിക്കാൻ സന്ദർഭം സംജാതമാകും. ഭൂമിയിൽ നിന്നും ആദായം വന്നെത്തും. വസ്തുവിൽപ്പനയിലെ ദുർഘടങ്ങൾ തീർന്നേക്കും. ഉന്നതരുടെ പരിചയം സിദ്ധിക്കുന്നതാണ്. നിലപാടുകളിലെ അയവില്ലായ്മ ശത്രുക്കളെ സൃഷ്ടിച്ചേക്കും. കുടുംബകാര്യങ്ങളിൽ ശ്രദ്ധിക്കേണ്ടതുണ്ട്. പുതുതലമുറയുടെ ശീലങ്ങളോട് പൊരുത്തപ്പെടാൻ വിഷമിക്കും.

തൃക്കേട്ട

ഉദ്യോഗസ്ഥർക്ക് തൃപ്തികരമായ വാരമാണ്. ദൗത്യങ്ങൾ ഭംഗിയായി നിർവഹിക്കാനാവും. വ്യാപാരത്തിൽ ഉണർവ്വുണ്ടാവുന്നതായിരിക്കും. വലിയ തോതിൽ സാമ്പത്തിക ഇടപാടുകൾ നടത്താൻ സാധിച്ചേക്കും. പുതിയ കാലത്തിൻ്റെ മാറ്റങ്ങൾ ഉൾക്കൊള്ളുന്നതാണ്. ഗാർഹികാന്തരീക്ഷത്തിലെ അലോസരങ്ങൾ പരിഹരിക്കും. വിദ്യാർത്ഥികൾക്ക് ഏകാഗ്രത തെല്ല് കുറയാനിടയുണ്ട്. വാരാദ്യ ദിവസങ്ങളിൽ ലഘു യാത്രകൾ വേണ്ടിവരാം. രാഷ്ട്രീയക്കാരുടെ ജനകീയത വർദ്ധിക്കുന്നതാണ്. എതിർപ്പുകളെ തന്ത്രപൂർവ്വം തരണം ചെയ്യും. പ്രണയികൾക്ക് ആഹ്ളാദിക്കാനുള്ള സാഹചര്യം കൈവരുന്നതാണ്.

മൂലം

സ്വസ്ഥതകളും അസ്വസ്ഥതകളും കലരുന്നതാവും, വാരം. ഓഫീസിലെ മീറ്റിംഗിൽ വ്യക്തതയോടെ സംസാരിക്കുന്നതാണ്. സഹപ്രവർത്തകരുടെ സഹകരണം കുറയാനിടയുണ്ട്. അന്യദേശവാസത്തിന് സാധ്യത കാണുന്നു. സഹോദരാനുകൂല്യം പ്രതീക്ഷിക്കാം. സുഹൃത്തുക്കളുടെ പ്രശ്നങ്ങൾ പരിഹരിക്കാൻ മുൻകൈയെടുക്കും. ബന്ധുക്കളുടെ പെരുമാറ്റം മനസ്സിനെ വേദനിപ്പിച്ചേക്കാം. മക്കളുടെ കാര്യത്തിൽ ചില ഉൽക്കണ്ഠകൾ ഉണ്ടാവുന്നതാണ്. മുന്നേ കിട്ടാനുള്ള തുക ഇപ്പോൾ കൈവശമെത്തിച്ചേരും. ചൊവ്വ, ബുധൻ ദിവസങ്ങൾ നവാരംഭങ്ങൾക്ക് ഉചിതമല്ല.

പൂരാടം

കഴിഞ്ഞ ആഴ്ചയിൽ ഏറ്റെടുത്ത ദൗത്യം ഈയാഴ്ച കൊണ്ട് ഒട്ടൊക്കെ അവസാനിപ്പിക്കാനാവും. ആത്മസംതൃപ്തി പുലരുന്നതാണ്. കാത്തിരുന്ന ശുഭവാർത്തയെത്തും. മത്സരങ്ങളിൽ വിജയിക്കുവാൻ കഴിയും.ഉറ്റവരെ കാണാനവസരം സംജാതമാകുന്നതാണ്.വ്യാപാരികൾക്ക് ബിസിനസ്സുകൊണ്ട് നേട്ടം വന്നെത്താം. കർമ്മമേഖലയിൽ കൂടുതൽ ശുഷ്കാന്തി കാട്ടണമെന്ന് സ്വയം തീരുമാനിക്കും. തൊഴിൽ തേടുന്നവർക്ക്കരാർ പണികൾ ലഭിക്കാൻ സാധ്യതയുണ്ട്. മംഗളകർമ്മങ്ങൾക്ക് നേതൃത്വം വഹിക്കുന്നതാണ്.

ഉത്രാടം

കർമ്മമേഖലയിൽ ഉന്മേഷമുണ്ടാവും. തീരുമാനിച്ച കാര്യങ്ങൾ ഒരുവിധം ഭംഗിയായി നിർവഹിക്കുവാൻ കഴിയുന്നതാണ്. വീട് നിർമ്മാണത്തിൽ കുടുംബത്തിൻ്റെ പിന്തുണ ഭാഗികമാവും. ആത്മസംയമനം അനിവാര്യമാവേണ്ട സാഹചര്യമാണുള്ളത്. വായ്പ നേടാനുള്ള ശ്രമം തുടരും. ഉന്നതാധികാരികളെ ബോധ്യപ്പെടുത്തുന്നതിൽ വിജയിച്ചേക്കും. സർക്കാർ കാര്യങ്ങളിൽ ആവർത്തിത ശ്രമം വേണ്ടതായി വരുന്നതാണ്. തീർത്ഥാടനം കൊണ്ട് മനക്ലേശം കുറയാം. കൂട്ടുകെട്ടുകളിൽ ശ്രദ്ധ പുലർത്തണം.വ്യാഴം, വെള്ളി ദിവസങ്ങളിൽ ശുഭാരംഭം ഒഴിവാക്കണം.

തിരുവോണം

പുത്തൻ കാര്യങ്ങളിൽ താത്പര്യമേറും. പുതുതലമുറയിൽ നിന്നും സാങ്കേതികജ്ഞാനം നേടുന്നതായിരിക്കും. കലാമത്സരങ്ങളിൽ വിജയിക്കാനാവും.ഉദ്യോഗാർത്ഥികൾ അഭിമുഖങ്ങളിൽ ശോഭിക്കുന്നതാണ്. ദമ്പതികൾക്കിടയിൽ അസ്വാരസ്യങ്ങൾ ഉയർന്നേക്കും. രോഗഗ്രസ്തർക്ക് ചികിൽസാമാറ്റത്തിലൂടെ ആശ്വാസം ലഭിക്കുന്നതാണ്.വ്യാപാരികൾ കിടമത്സരത്തെ അഭിമുഖീകരിച്ചേക്കും. ഉപഭോക്താക്കളെ ആകർഷിക്കുന്നതിൽ അവ്യക്തതയുണ്ടാവും. സഹപ്രവർത്തകരുടെ അനർഹമായ സ്ഥാനക്കയറ്റത്തിൽ ക്ഷോഭമുണ്ടാവും. ആത്മാർത്ഥതയ്ക്ക് അംഗീകാരം വൈകില്ലെന്ന ശുഭപ്രതീക്ഷ അനിവാര്യം.

അവിട്ടം

ആഘോഷങ്ങളിൽ മറക്കാൻ കഴിഞ്ഞ പരുഷ ജീവിതസത്യങ്ങളെ വീണ്ടും അഭിമുഖീകരിക്കേണ്ടി വരുന്നതാണ്. വ്യാപാരികൾക്ക് അല്പം മാന്ദ്യം അനുഭവപ്പെടും.കൂടുതൽ അദ്ധ്വാനിക്കേണ്ട സാഹചര്യം ഉദിച്ചേക്കാം.സംഘടനകളിൽ പ്രവർത്തിക്കുന്നവർക്ക് ഉത്തരവാദിത്വമേറിയ പദവികൾ കരഗതമാവുന്നതാണ്.അനുകൂലദിക്കിലേക്ക് സ്ഥലംമാറ്റം കിട്ടാം. ഗവേഷണം ദിശാബോധത്തോടെ മുന്നേറും.ഗൃഹനിർമ്മാണത്തിന് അനുമതി ലഭിക്കുന്നതാണ്. ചെലവുചുരുക്കാനാവും. അയൽക്കാർ തമ്മിലുള്ള തർക്കങ്ങളിൽ മൗനമാവും ഭൂഷണം.

Also Read:സെപ്റ്റംബർ മാസഫലം, അശ്വതി മുതൽ രേവതി വരെ

ചതയം

ചന്ദ്രഗ്രഹണം നടക്കുന്ന നക്ഷത്രമാണ് ചതയം. പൊതുവേ കരുതൽ വേണ്ടതായ കാലമാണ്. തിടുക്കത്തിൽ തീരുമാനങ്ങൾ കൈക്കൊള്ളരുത്. വാഗ്ദാനങ്ങളിൽ മതിമറക്കാനിടയുണ്ട്. യുക്തിയും ബുദ്ധിയും കൈവിടാതെ സംസാരിക്കണം.സാമ്പത്തികമായി അത്ര മോശം സമയമല്ല. എങ്കിലും പാഴ്ചെലവുകളും വന്നുകൂടുന്നതാണ്. കാര്യാലോചനകളിൽ എതിർക്കപ്പെടാം. മൗനം ഭൂഷണമാവും. ദുരാരോപണങ്ങളിൽ സംയമം വേണം. വിശ്രമിക്കാനും വിനോദിക്കാനും സമയം കുറഞ്ഞേക്കും. പുതുകാര്യങ്ങൾ സമാരംഭിക്കാൻ ഈയാഴ്ച അസ്വീകാര്യമാണ്. കുടുംബജീവിതം സംതൃപ്തിയേകും.

പൂരൂരുട്ടാതി

പുതിയ കാര്യങ്ങൾ തുടങ്ങുന്നതിന് കാലം ഇപ്പോൾ ഇണങ്ങുന്നതല്ല. പഠനത്തിൽ പരാങ്മുഖത്വമേർപ്പെടുന്നതാണ്. ചുമതലകൾ നടത്തുക വിചാരിച്ചത്ര എളുപ്പമല്ലെന്ന് എളുപ്പം തിരിച്ചറിയും. സാഹസങ്ങൾ ഒഴിവാക്കേണ്ടതുണ്ട്. ചന്ദ്രഗ്രഹണം നടക്കുന്ന നക്ഷത്രമാകയാൽ മനക്ലേശത്തിന് സാധ്യതയുണ്ട്. മിതവ്യയം പുലർത്തിയാലും ചെലവേറുന്നതിൽ ഖേദിച്ചേക്കും. വയോജനങ്ങളുടെ ആരോഗ്യസംരക്ഷണം വെല്ലുവിളിയാവും. പ്രോജക്ടുകൾക്ക് മേലധികാരി പച്ചക്കൊടികാട്ടാം. പ്രവർത്തനോർജ്ജം പുറത്തെടുക്കാൻ കഴിയാതെ വരും. സ്വകാര്യ ദുഃഖങ്ങൾ സുഹൃത്തുക്കളോട് പങ്കുവെക്കും.

ഉത്രട്ടാതി

സുഖവും സമാധാനവും ചിലപ്പോൾ കുറയുന്നതായി തോന്നും. കരാർ പണികളിലെ വ്യവസ്ഥകൾ കഠിനമായി അനുഭവപ്പെടുന്നതാണ്. മേലുദ്യോഗസ്ഥരുടെ എതിർപ്പിന് പാത്രമാവും. വിശദീകരണങ്ങൾ ചെവിക്കൊള്ളാൻ തയ്യാറാവാത്തത് പ്രശ്നങ്ങൾ സൃഷ്ടിക്കും. കൂട്ടുകാരുമായി ചേർന്നുള്ള സംരംഭങ്ങളുടെ ചർച്ച എങ്ങുമെങ്ങുമെത്തില്ല.പ്രേമിക്കുന്നവരുടെ വിവാഹകാര്യത്തിൽ എതിർപ്പുയരുന്നതാണ്. മാധ്യസ്ഥ പ്രവർത്തനങ്ങളിൽ വിജയിക്കും. വാരാദ്യം ചെലവുകൾ അനിയന്ത്രിതമാവും. സിമ്പോസിയം, ഡിബേറ്റ് എന്നിവകളിൽ താല്പര്യം ജനിക്കുന്നതായിരിക്കും.

രേവതി

തീരുമാനങ്ങൾ ഏകപക്ഷീയമാവാതിരിക്കാൻ ശ്രദ്ധിക്കണം. സഹപ്രവർത്തകരിൽ ചിലർ നിസ്സഹകരണം തുടരുന്നതാണ്. വാരാദ്യം അലച്ചിലുണ്ടാവും. പണച്ചെലവും കൂടുന്നതാണ്. ചൊവ്വ, ബുധൻ, വ്യാഴം ദിവസങ്ങളിൽ സ്വച്ഛതയേറും. ഗൃഹത്തിൽ മംഗളകർമ്മങ്ങൾ, വിശിഷ്ടാതിഥികളുടെ സാന്നിദ്ധ്യം ഇവ പ്രതീക്ഷിക്കാം. പ്രവർത്തന മേഖലയിൽ മുന്നേറാനാവും.മറ്റു ദിവസങ്ങളിൽ സമ്മിശ്രഫലങ്ങളാവും. വായ്പയുടെ തിരിച്ചടവുതുക സമാഹരിക്കാൻ ക്ലേശിച്ചേക്കും. വ്യാപാരത്തിൽ പകരക്കാരെ ചുമതല ഏൽപ്പിക്കുന്നത് കരുതലോടെ വേണം. ആരോഗ്യപരിരക്ഷ അനിവാര്യം.

Read More: സെപ്റ്റംബർ 7 ലെ പൂർണ്ണ ചന്ദ്രഗ്രഹണം: ദോഷഫലങ്ങൾ ഏതൊക്കെ കൂറുകാർക്ക്?