scorecardresearch
Horoscope

സമ്പൂര്‍ണ വാരഫലം, അശ്വതി മുതൽ രേവതി വരെ; March 17-March 23, 2024, Weekly Horoscope

Weekly Horoscope: മാർച്ച് 17 ഞായറാഴ്ച മുതൽ മാർച്ച് 23-ാം തീയതി ശനിയാഴ്ച വരെയുള്ള ഒരാഴ്ചത്തെ രാശിഫലം, അശ്വതി മുതൽ രേവതി വരെയുളള നക്ഷത്രക്കാർക്ക് എങ്ങനെയെന്ന് ശ്രീനിവാസ് അയ്യർ എഴുതുന്നു

Written byS. Sreenivas Iyer

Weekly Horoscope: മാർച്ച് 17 ഞായറാഴ്ച മുതൽ മാർച്ച് 23-ാം തീയതി ശനിയാഴ്ച വരെയുള്ള ഒരാഴ്ചത്തെ രാശിഫലം, അശ്വതി മുതൽ രേവതി വരെയുളള നക്ഷത്രക്കാർക്ക് എങ്ങനെയെന്ന് ശ്രീനിവാസ് അയ്യർ എഴുതുന്നു

author-image
S. Sreenivas Iyer
New Update
Weekly Horoscope

Weekly Horoscope: ഈ ആഴ്ച നിങ്ങൾക്കെങ്ങനെ?

ആദിത്യൻ മീനം രാശിയിൽ ഉത്രട്ടാതി ഞാറ്റുവേലയിലാണ്. ശനി കുംഭം രാശിയിൽ ചതയത്തിൽ തുടരുന്നു. ശനിയുടെ വാർഷിക മൗഢ്യം മാർച്ച് 18 ന് തീരുകയാണ് എന്നത് പ്രസ്താവ്യമത്രെ!

Advertisment

വ്യാഴം മേടം രാശിയിൽ ഭരണി നക്ഷത്രത്തിലാണ്. രാഹു മീനം രാശിയിൽ രേവതിയിലും കേതു കന്നി രാശിയിൽ അത്തത്തിലും സഞ്ചരിക്കുന്നു. ബുധൻ നീചരാശിയായ മീനത്തിൽ രേവതി നക്ഷത്രത്തിലാണ്. ശുക്രൻ കുംഭം രാശിയിൽ പൂരൂരുട്ടാതി നാളിൽ സഞ്ചരിക്കുന്നു. ചൊവ്വ കുംഭം രാശിയിൽ അവിട്ടം നക്ഷത്രത്തിലുമാണ്. ചന്ദ്രൻ മകയിരം മുതൽ പൂരം വരെയുള്ള നക്ഷത്രങ്ങളിലൂടെ സഞ്ചരിക്കുന്നു. വെളുത്ത പക്ഷത്തിൽ അഷ്ടമി മുതൽ ചതുർദ്ദശി വരെയുള്ള തിഥികളാണ് ഈയാഴ്ച വരുന്നത്. 

ഈയാഴ്ചത്തെ അഷ്ടമരാശിക്കൂറ് വരുന്നത് ഏതൊക്കെ കൂറുകാർക്കാണെന്ന് നോക്കാം. ഞായറും തിങ്കളും ചൊവ്വ മദ്ധ്യാഹ്നം വരെയും വൃശ്ചികക്കൂറുകാർക്കാണ്. തദനന്തരം വെള്ളി പുലർച്ചവരെ ധനുക്കൂറുകാർക്കാണ് അഷ്ടമരാശി സംഭവിക്കുന്നത്. വെള്ളി, ശനി ദിവസങ്ങളും കടന്ന് അടുത്ത ആഴ്ചയുടെ തുടക്കത്തോളം മകരക്കൂറുകാർക്ക് അഷ്ടമരാശി വരുന്നു.  

മുകളിൽ വ്യക്തമാക്കിയ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെയും സമ്പൂര്‍ണ വാരഫലം ഇവിടെ പരിശോധിക്കുന്നു. 

Advertisment

അശ്വതി

വാരാദ്യം അനുകൂലമായ അനുഭവങ്ങളാവും ഭവിക്കുക. അവഗണിച്ചവർ പരിഗണിക്കും. മാനസികവും ഭൗതികവുമായ പിന്തുണ നൽകും. തൊഴിൽ രംഗത്തെ ആലസ്യം അകലുന്നതാണ്. ഉദ്യോഗസ്ഥർക്ക് സ്വതന്ത്രമായ നിലപാടുകൾ കെക്കൊള്ളാനാവും. കുടുംബത്തിൻ്റെ ആവശ്യങ്ങൾ നിറവേറുന്നതാണ്. സാമ്പത്തികമായ ഞെരുക്കത്തിന് അയവുണ്ടാകും. വാരാന്ത്യത്തിൽ ചില ആശയക്കുഴപ്പങ്ങൾ ഉദയം ചെയ്തുകൂടായ്കയില്ല. കർമ്മപരാങ്മുഖത്വം അനുഭവപ്പെടാം.

ഭരണി

പതിനൊന്നിലെ ഗ്രഹസമൃദ്ധി ഭൗതിക നേട്ടങ്ങൾ സമ്മാനിക്കും. മുൻപ് തോറ്റുപോയ ഇടങ്ങളിൽ ഇപ്പോൾ നേട്ടം കൊയ്യാൻ സാധിക്കുന്നതാണ്. ഭൂമിയിൽ നിന്നും ലാഭം പ്രതീക്ഷിക്കാം. ആഢംബരവസ്തുക്കൾ സ്വന്തമാക്കാനാവും. കച്ചവടക്കാർക്ക് ഉപഭോക്താക്കളുടെ പ്രീതി നേടാനായേക്കും. മത്സരങ്ങളിൽ വിജയിക്കുന്നതാണ്. സർക്കാർ സംബന്ധിച്ച ആനുകൂല്യങ്ങൾ/ഉത്തരവുകൾ എന്നിവ കാത്തിരിക്കുന്നവർക്ക്  നിരാശപ്പെടേണ്ടിവരും. അനാവശ്യമായ അലച്ചിലും പാഴ്ച്ചെലവും വാരാന്ത്യത്തിലെ സാധ്യതകളാണ്.

കാർത്തിക

ജീവിത പ്രാരബ്ധങ്ങൾ വിഷമിപ്പിച്ചേക്കാം. കുടുംബത്തിൻ്റെ ചുമതല അധികരിക്കുന്നതാണ്. കൂടുതൽ സമയം അധ്വാനിക്കേണ്ടി വരുന്ന സാഹചര്യം ഉണ്ടാവും. മുഖ്യതൊഴിലിനൊപ്പം  ഉപതൊഴിലിനെക്കുറിച്ച്  ചിന്തിക്കും. പാരമ്പര്യ വസ്തുക്കൾ വിൽക്കാനുള്ള ശ്രമം ഊർജ്ജിതമാവും.  അതിനായി ഇടനിലക്കാരെ സമീപിക്കാൻ തീരുമാനിക്കും. ഇൻഷ്വറൻസ്, ഊഹക്കച്ചവടം, ചിട്ടി മുതലായവയിൽ നിന്നും ധനം കൈവരുന്നതാണ്. സാങ്കേതിക വിജ്ഞാനം നേടാനുള്ള വിദ്യാർത്ഥികളുടെ  ശ്രമം വിജയിച്ചേക്കും. 

രോഹിണി

മനസ്സിനെ ഏതെങ്കിലും ഒരു കാര്യത്തിൽ ഉറപ്പിക്കുന്നതിൽ ക്ലേശമനുഭവിക്കും. നിഗൂഢരീതികളിലൂടെ കൂടുതൽ വരുമാനത്തിന് സാധ്യത കാണുന്നു. പുതിയ തൊഴിൽ സ്ഥാപനം തുടങ്ങുന്നതിനെപ്പറ്റി തീവ്രമായാലോചിക്കും. ബന്ധുക്കളുടെ പിന്തുണ വാക്കിലൊതുങ്ങില്ല. സദസ്സുകളിൽ, ചർച്ചകളിൽ ശോഭിക്കുന്നതാണ്. കൂട്ടുകാരുടെ കുടുംബ പ്രശ്നങ്ങൾ പരിഹരിക്കുന്നതിൽ മുൻകൈയ്യെടുക്കും. ഉദ്യോഗസ്ഥലത്ത് എതിർപ്പുകളുള്ളതായി മനസ്സിലാക്കും.
ആത്മീയ യാത്രകൾക്ക് അവസരം ഭവിക്കും.

മകയിരം

സന്തോഷാനുഭവങ്ങളുണ്ടാവും, വാരാദ്യം. പഴയ കൂട്ടുകാരെ കാണുവാനാവും. വിരുന്നുകളിൽ പങ്കെടുക്കാനായേക്കും. ഉപരിപഠനത്തെക്കുറിച്ച് വീട്ടിൽ ചർച്ചകൾ ഉയരുന്നതാണ്. പതിവിലധികം സഞ്ചാരം വേണ്ടി വരും. ഉദ്യോഗസ്ഥർക്ക്  ജോലി കൂടുതൽ ദുർഘടമായി തോന്നിയേക്കാം. പ്രണയാനുഭവങ്ങൾക്ക് സാധ്യത കാണുന്നു. ജീവിതച്ചെലവുകൾ കൂട്ടിമുട്ടിക്കാൻ കൈവായ്പകളെ ആശ്രയിക്കേണ്ട സ്ഥിതി വന്നേക്കാം.  വാഹനം ഉപയോഗിക്കുന്നതിൽ ഏറ്റവും ജാഗ്രത വേണം. കിടപ്പുരോഗികൾക്ക് ആശ്വാസം അനുഭവപ്പെടുന്നതാണ്.

തിരുവാതിര

അകാരണമായി മനക്ലേശമുണ്ടാകും. കരുതി വെച്ച ധനം മറ്റാവശ്യങ്ങൾക്കായി ഉപയോഗിക്കേണ്ടി വരാം. പ്രതീക്ഷിച്ച അവസരങ്ങൾ തടയപ്പെടുന്നതായി തോന്നുന്നതാണ്. ഹൃദയ വികാരങ്ങൾ പങ്കുവെച്ചാൽ തെറ്റിദ്ധരിച്ചാലോ എന്ന് വിഷമിച്ചേക്കും. പിതാവിൻ്റെ ആരോഗ്യകാര്യത്തിൽ ശ്രദ്ധയുണ്ടാവണം. ഗവേഷകർക്ക് പ്രബന്ധം സമർപ്പിക്കാൻ നിർദ്ദേശം വന്നെത്തും. പഴയ കുടിശ്ശിക അടയ്ക്കാൻ സർക്കാർ സ്ഥാപനങ്ങളിൽ നിന്നും നോട്ടീസ് ലഭിച്ചേക്കും. വാരാന്ത്യം പലനിലയ്ക്കും ഭേദപ്പെട്ടതാവും.

പുണർതം

സാധാരണ കാര്യങ്ങൾ അഭംഗുരം ചെയ്യാൻ കഴിയുന്ന വാരമാണ്. കരാർ പണികൾ പുതുക്കപ്പെടാം. ചെറുപ്പക്കാർക്ക് അഭിമുഖങ്ങളിൽ പ്രതീക്ഷയുണ്ടാവും. വീടുപണി സംബന്ധിച്ച ആലോചനകൾ എങ്ങുമെത്തുകയില്ല. സ്വകാര്യ കമ്പനികളിൽ ജോലിചെയ്യുന്നവർക്ക് ഷിഫ്റ്റ് സമ്പ്രദായത്തിൽ പണിയെടുക്കേണ്ടി വരുന്നതാണ്. വിദേശത്ത് ജോലി ചെയ്യുന്നവർക്ക് അവധി അനുവദിച്ചു കിട്ടുന്നതായിരിക്കും. അടുക്കള കൃഷി, മട്ടുപ്പാവ് കൃഷി പോലുള്ളവയിൽ താല്പര്യം ഉണ്ടാകുന്നതാണ്.

പൂയം

നക്ഷത്രനാഥനായ ശനിക്ക് ഒരു മാസത്തിലധികമായി തുടർന്നുവരുന്ന മൗഢ്യാവസ്ഥ മാറുന്നത് ശുഭസൂചനയാണ്. തടസ്സങ്ങൾ സ്വാഭാവികമായിത്തന്നെ മാറും. മനോബലം തിരികെ കിട്ടുന്നതാണ്. പഠനത്തിൽ / പരീക്ഷയിൽ ഏകാഗ്രതയുണ്ടാവും. എട്ടാം ഭാവത്തിൽ ചൊവ്വ കൂടിയുള്ള സ്ഥിതിക്ക് ആരോഗ്യത്തിൽ പ്രത്യേകമായ ശ്രദ്ധ ആവശ്യമുണ്ട്. ഭൂമി വ്യവഹാരം നീണ്ടുപോയേക്കാം. സഹോദരർക്ക് തെറ്റിദ്ധാരണ വരാം. ഒമ്പതിൽ പാപഗ്രഹങ്ങൾ ഉള്ളതിനാൽ ആത്മീയ സാധനകൾ തടസ്സപ്പെടുവാൻ സാധ്യതയുണ്ട്.

ആയില്യം

സഹജമായ പ്രത്യുല്പന്നമതിത്വം കൊണ്ട് പ്രശ്നങ്ങളെ മറികടക്കുന്നതാണ്. വരവുചെലവുകൾ തുല്യമായേക്കും. ബിസിനസ്സിലെ പരീക്ഷണങ്ങൾ  ചെറിയ തോതിൽ വിജയിക്കുന്നതാണ്. ബന്ധുവിൻ്റെ വിവാഹത്തിന് മുഖ്യചുമതല വഹിക്കും. രാഷ്ട്രീയാഭിപ്രായം തുറന്നടിക്കുന്നതിനാൽ വീട്ടിൽ /ജോലിസ്ഥലത്ത് ഭിന്നസ്വരങ്ങൾ ഉയരുന്നതാണ്. ഹൃദയരോഗങ്ങൾക്ക് വൈദ്യസഹായം വേണ്ടിവരാം. സമയപരിധിക്കുള്ളിൽ പ്രധാന രേഖകൾ പുതുക്കുന്നതിൽ മറവി പറ്റാനിടയുണ്ട്.  
മുൻപ് നിശ്ചയിച്ച യാത്ര മാറ്റിവെക്കുന്നതാണ്.

മകം

ലാഭകരവും ഗുണകരവുമായ അനുഭവങ്ങൾക്ക് മുൻതൂക്കമുണ്ടാവും. സാമ്പത്തികം മോശമാവില്ല. ചിട്ടി/വായ്പ/ ഊഹക്കച്ചവടം ഇവയിലൂടെ ധനാഗമം ഉണ്ടാവുന്നതാണ്. സംഘടനകളിൽ ആധിപത്യം സ്ഥാപിക്കുവാൻ എല്ലാ വഴികളും നോക്കും. പിതാവിൻ്റെ ഉപദേശം കേൾക്കാൻ തയ്യാറാവുന്നതാണ്. ദാമ്പത്യത്തിൽ താൽകാലികമായ പിണക്കം വരാനിടയുണ്ട്. റൊമാൻസുകൾ പരാജയപ്പെടാം. പരീക്ഷാർത്ഥികൾക്ക് സാമാന്യം ഭേദപ്പെട്ട ആഴ്ചയാണ്.

പൂരം

ധനപരമായി മെച്ചമുണ്ടാവും. പ്രതീക്ഷിച്ചതിലധികം വരവുണ്ടാവുന്നതാണ്. ഗാർഹിക രംഗത്ത് ചില വിയോജിപ്പുകൾ ദൃശ്യമാകും. ഏറ്റവും വിലയില്ലാത്ത വസ്തുവാണ് ഉപദേശം എന്ന് അനുഭവത്തിലൂടെ തിരിച്ചറിയാനാവും. ആരോഗ്യപരമായി ഗുണം കുറഞ്ഞ കാലമാണെന്നത് മറക്കരുത്. കലാപ്രവർത്തനത്തിൽ ഏകാഗ്രത കുറയും. സുഹൃത്തുക്കളുടെ പ്രലോഭനത്തിൽ വശംവദരായേക്കും. വാരാന്ത്യത്തിൽ ചെലവുകളിൽ നിയന്ത്രണം വേണം. പ്രയത്നങ്ങളിൽ ഊർജ്ജനഷ്ടവും സമയനഷ്ടവും ഫലം.

ഉത്രം

സ്വന്തം തീരുമാനം ഭംഗിയായി നടപ്പിലാക്കും. ലക്ഷ്യത്തിലുള്ള ശ്രദ്ധ കൊണ്ട് മാർഗ്ഗഭ്രംശങ്ങളെ അറിഞ്ഞെന്നുവരില്ല. എതിർപ്പുകളെ തൃണവൽഗണിക്കും. ബിസിനസ്സ് രംഗം ഉണരുന്നതാണ്. ആദായം മോശമാവില്ല. പിണങ്ങിയ സുഹൃത്തുക്കളെ അനുനയിപ്പിക്കാനുള്ള ശ്രമം തുടരുന്നതാണ്. വിശ്രമിക്കാനും സുഖഭക്ഷണത്തിനും വിനോദിക്കാനും അവസരമുണ്ടാവും. പരീക്ഷാർത്ഥികൾക്ക് നല്ലവാരം തന്നെയാണ്. കാലഹരണപ്പെട്ട രേഖകൾ പുതുക്കാൻ അലച്ചിലുണ്ടാവും. വെള്ളി, ശനി ദിവസങ്ങളിൽ ചെലവേറുന്നതാണ്.

അത്തം

നക്ഷത്രനാഥനായ ചന്ദ്രൻ പക്ഷബലവാനായി അനുകൂല ഭാവങ്ങളിൽ സഞ്ചരിക്കുകയാൽ സന്തോഷത്തിനും സംതൃപ്തിക്കും മുൻതൂക്കം ഉണ്ടാവും.  പരിശ്രമങ്ങൾ പാഴാവുകയില്ല. ധനപരമായ ഞെരുക്കത്തിന് അയവുണ്ടാകും. മനസ്സിനിഷ്ടമുള്ള വസ്തുക്കൾ വാങ്ങാനാവും. യാത്രകൾ പ്രയോജനം ചെയ്യുന്നതാണ്. മററുള്ളവർ തന്നെക്കുറിച്ച് എന്തുപറയുന്നു എന്ന ചിന്ത ഉപേക്ഷിക്കും. വിരുന്നുകളിലും മംഗളകർമ്മങ്ങളിലും പങ്കെടുക്കുന്നതാണ്. മകൻ്റെ ഉപരിപഠനക്കാര്യത്തിൽ  ആശയക്കുഴപ്പങ്ങൾ തുടരാം.

ചിത്തിര

നക്ഷത്രനാഥനായ ചൊവ്വയ്ക്ക് ശനിയോഗം ഉള്ളതിനാൽ അപ്രിയ സുഹൃത്തുക്കളുമായി സഹകരിക്കേണ്ടി വരുന്നതാണ്. കുടുംബ ജീവിതത്തിൽ സ്വാസ്ഥ്യം കുറയാം. ഉദ്യോഗസ്ഥർക്ക് മോശം സമയമല്ല. ഇഷ്ടദിക്കിലേക്ക് സ്ഥലം മാറ്റത്തിന് സാധ്യതയുണ്ട്. ഉത്തരവാദിത്വങ്ങൾ തിടുക്കപ്പെട്ട് ഏല്പിക്കപ്പെടാം. കലാപ്രവർത്തകർക്ക് പറഞ്ഞുവെച്ച അവസരങ്ങൾ അല്പം വൈകുന്നതായിരിക്കും. ഉത്സവങ്ങൾക്ക് ചുമതലയുണ്ടാവും. അഹോരാത്രം അധ്വാനിക്കേണ്ട സ്ഥിതിവരുന്നതാണ്.

ചോതി

തടസ്സങ്ങളുണ്ടായാലും മുന്നേറ്റം സാധ്യമാകും. സാധാരണ ചെയ്യുന്ന പ്രവൃത്തികൾക്ക് മുടക്കം വരുന്നതല്ല. പ്രണയത്തിൽ വീണ്ടും മുഴുകുന്നതാണ്. അഞ്ചാം ഭാവത്തിൽ കുജശനി യോഗം ഉള്ളതിനാൽ മക്കളുമായി ഭിന്നപക്ഷത്തിന് കാരണങ്ങൾ വന്നെത്തും. പണം ഇല്ല എന്നതിനാൽ പൊതുവേ കാര്യമുടക്കം ഉണ്ടാവുന്നതല്ല. ജീവിതപങ്കാളിയുടെ ആരോഗ്യപ്രശ്നങ്ങൾ പരിഹരിക്കുന്നതാണ്. വാടക വീട്ടിലേക്ക് മാറാൻ തീരുമാനിച്ചേക്കും. പുതുവാഹനം വാങ്ങാനുള്ള ശ്രമം വിജയിക്കുന്നതാണ്. മനസ്സിൻ്റെ ചാഞ്ചാട്ടങ്ങൾ നിയന്ത്രിക്കാൻ ക്ലേശിക്കും.

വിശാഖം

മുന്നോട്ടുവെച്ച കാൽ പിന്നിലേക്ക് എടുക്കേണ്ടി വരാം. വീട്ടിൽനിന്നും എതിർപ്പ് പല കാര്യങ്ങളിൽ ഉയർന്നേക്കാം.  കൂട്ടുകാരനു വേണ്ടി ജാമ്യം നിൽക്കേണ്ട സ്ഥിതിയുണ്ടാകുന്നതാണ്. അപവാദങ്ങളെ നേരിടാൻ കരുത്തുണ്ടാവില്ല. ഭൂമിയുടെ കച്ചവടത്തിൽ ലാഭം കുറയുന്നതാണ്. സഹോദരനുമായി കൂട്ടുകച്ചവടത്തിന് ആലോചനകൾ ഉയരും. പൊതുപ്രവർത്തകർക്ക് അണികളുടെ പിന്തുണ വേണ്ടത്രയില്ലെന്ന തോന്നൽ ശക്തമാകും. കമ്മീഷൻ / ഏജൻസി ഏർപ്പാടുകളിൽ നിന്നും ലാഭം പ്രതീക്ഷിക്കാം.

അനിഴം

എപ്പോഴാണ് ഈ ദുരിതങ്ങൾ തീരുക എന്ന് ചിന്തിച്ചുപോകും. ശരീരസൗഖ്യം കുറയും. സാമ്പത്തികമായിട്ടുള്ള ആവശ്യങ്ങൾ കൂടുന്നതാണ്. വീട്ടിൽ അംഗങ്ങൾക്കിടയിൽ അശാന്തിയുണ്ടാവാം. ചെറിയ സുഖങ്ങൾ, ചെറിയ ആദായം എന്നിവകൊണ്ട് തൃപ്തിപ്പെടേണ്ടി വരുന്നതാണ്. ഇഷ്ടവസ്തുക്കൾ വാങ്ങാൻ കൂടുതൽ വിലനൽകേണ്ടി വരാം. ബുധൻ മുതൽ കുറച്ചൊക്കെ അനുകൂലസ്ഥിതിയും മനസ്സന്തോഷവും ഉണ്ടാവുന്നതാണ്. സ്വാഭാവികമായ ജീവിതതാളം വീണ്ടെടുക്കാൻ കഴിഞ്ഞേക്കും.

തൃക്കേട്ട

ചിന്താപൂർവ്വം തീരുമാനം കൈക്കൊള്ളേണ്ട സമയമാണ്. പ്രവൃത്തികൾ സഫലമാവാനും അംഗീകാരം ലഭിക്കുവാനും കാത്തിരിക്കേണ്ട സ്ഥിതിയുണ്ടാവാം. പരീക്ഷ എഴുതുന്നവർക്ക് പൂർണ്ണതൃപ്തി ഉണ്ടാവണമെന്നില്ല. വീടുപണിക്ക് പണം കണ്ടെത്താൻ വിഷമിച്ചേക്കും. അഭിപ്രായ പ്രകടനങ്ങളിൽ കരുതൽ വേണം. ബന്ധുക്കളുടെ നിലപാടുകൾ വേദനിപ്പിക്കാം. തർക്കം പാർത്തിരിക്കുന്ന ശത്രുക്കൾ ചുറ്റിനുമുണ്ടായേക്കും. ഞായർ, തിങ്കൾ ദിവസങ്ങൾക്ക് ശുഭത്വം കുറയുന്നതാണ്.

മൂലം

അറിവും കഴിവും അനുഭവസമ്പത്തും പ്രയോജനപ്പെടുത്തേണ്ട കാര്യത്തെക്കുറിച്ച് അവ്യക്തതയുണ്ടാവും. ജീവിതപങ്കാളിയുടെ പിന്തുണയും നിർേദ്ദശങ്ങളും സന്തോഷപൂർവ്വം സ്വീകരിക്കുന്നതാണ്. ബന്ധുഭവനത്തിലെ മംഗളകർമ്മങ്ങളിൽ പങ്കെടുക്കും. പഠനാദികളിൽ ഏകാഗ്രത കുറയാം. പങ്കുകച്ചവടത്തോട് താത്പര്യം മങ്ങിവരുന്നതാണ്. ഉപഭോക്തക്കളുടെ മനസ്സറിയുന്നതിൽ സാമാന്യം വിജയമുണ്ടാകും. കരാർ പണികളിൽ ഏർപ്പെട്ടിട്ടുള്ളവർക്ക് അവ പുതുക്കപ്പെടും. 
ബുധൻ, വ്യാഴം ദിവസങ്ങളിൽ കൂടുതൽ ജാഗ്രത വേണം.

പൂരാടം

നക്ഷത്രനാഥനായ ശുക്രൻ്റെ പാപഗ്രഹങ്ങളുമായുളള ചേർച്ച ഗുണകരമല്ല. കഴിവുകൾ പുറത്തെടുക്കാൻ പ്രയാസമുണ്ടാവും. ചില വിധേയത്വങ്ങളെ പൊട്ടിച്ചെറിയാൻ ക്ലേശിക്കുന്നതാണ്. കലാപ്രവർത്തകർക്ക് ഉറപ്പിച്ച അവസരങ്ങൾ വൈകിയേക്കും. അന്യനാട്ടിലെ താമസം അവസാനിപ്പിക്കാനുള്ള തീരുമാനം സ്വയം മാറ്റുന്നതാണ്. ഏജൻസി പ്രവർത്തനം ഫലപ്രദമാകും. ഇൻഷ്വറൻസ്, ചിട്ടി, ഊഹക്കച്ചവടം മുതലായവയിൽ നിന്നും വരവുണ്ടാകുന്നതാണ്. സഹപ്രവർത്തകരുടെ സഹകരണം സംതൃപ്തിയുണ്ടാക്കും.

ഉത്രാടം

നക്ഷത്രനാഥനായ ആദിത്യന് രാഹുയോഗം ഉള്ളതിനാൽ മനക്ലേശമുണ്ടാവും. സുഗമമെന്ന് കരുതിയ കാര്യങ്ങൾ ക്ലേശസാധ്യങ്ങളാവാം. ബന്ധുക്കളോടോ സുഹൃത്തുക്കളോടോ പ്രത്യേക കാരണമില്ലാതെ  പിണങ്ങേണ്ട സ്ഥിതിയുണ്ടാവും. വിദേശ യാത്രയ്ക്ക് കൂടുതൽ രേഖകൾ സമർപ്പിക്കേണ്ട സാഹചര്യം വരുന്നതാണ്. ആരോഗ്യപരമായി സമ്മിശ്രസ്ഥിതിയാണ് കാണുന്നത്. ചെലവ് നിയന്ത്രിക്കാൻ ഒട്ടൊക്കെ സാധിക്കുന്നതാണ്. വൃദ്ധജനങ്ങളുടെ ചികിൽസാരീതിയിലെ മാറ്റം ഗുണകരമായി അനുഭവപ്പെട്ടേക്കും

തിരുവോണം

പ്രവർത്തനത്തിൽ തടസ്സമുണ്ടാവില്ല. മുൻനിശ്ചയങ്ങൾ സാക്ഷാൽക്കരിക്കാൻ സാധിക്കും. പുതുജോലിക്ക് ശ്രമിക്കുന്നവർക്ക് ശുഭവാർത്തയുണ്ടാവും. സാമൂഹ്യ പ്രശ്നങ്ങളിൽ ഇടപെടുന്നതുമൂലം വാദപ്രതിവാദങ്ങളിൽ ഏർപ്പെടുന്നതാണ്. സാങ്കേതിക വിഷയങ്ങൾ ഉൾക്കൊള്ളാൻ ആത്മാർത്ഥമായ ശ്രമം നടത്തും. യുവതലമുറയുടെ അഭിപ്രായം കേട്ടില്ലെന്ന് നടിക്കും. ജീവിതപങ്കാളിക്ക്  ഇഷ്ടവസ്തുക്കൾ പാരിതോഷികം നൽകും. യാത്രാസാധ്യത കാണുന്നു.

അവിട്ടം

ഗ്രഹങ്ങൾ അനുകൂലാവസ്ഥയിൽ അല്ലാത്തതിനാൽ കാര്യതടസ്സം ഉണ്ടാകും. ചെറുനേട്ടങ്ങൾക്കായി കൂടുതൽ പ്രയത്നം ആവശ്യമായി വരുന്നതാണ്. അഡ്വാൻസ് നൽകിയ വസ്തു വേണ്ടെന്നുവച്ചേക്കാം. ഉദ്യോഗസ്ഥർക്ക് സ്ഥലംമാറ്റത്തിന്  സാധ്യതയുണ്ട്. പ്രണയികൾക്ക് മനക്ലേശമനുഭവപ്പെടാം. വിശ്രമം കുറയുന്നതാണ്. പിതാവിൻ്റെ അഭിപ്രായം അസ്വീകാര്യമായി തോന്നിയേക്കും. അകലങ്ങളിൽ കഴിയുന്നവർക്ക് നാട്ടിലേക്ക് വരാനായേക്കും. ധനവിഷയത്തിൽ സാമാന്യം തൃപ്തിയുണ്ടാവും.

ചതയം

പരുഷോക്തികൾ പറഞ്ഞ് ഉറ്റസുഹൃത്തുക്കളുടെ ശത്രുത നേടിയേക്കും. കാര്യസാധ്യത്തിനായി കളവ് പറയേണ്ടി വരാം. പഠനത്തിലെ ശ്രദ്ധയില്ലായ്മയുടെ കാരണം രക്ഷാകർത്താക്കൾ കണ്ടെത്തുന്നതാണ്. കച്ചവട സ്ഥാപനത്തിനുവേണ്ടി പുതിയ ബിസിനസ്സ് പങ്കാളികളെ ക്ഷണിച്ചേക്കും.  ദൈവിക സമർപ്പണത്തിന് ധാരാളം സമയം നീക്കിവെക്കുന്നതാണ്. സകുടുംബം ബന്ധുഗൃഹത്തിലെ വിരുന്നിൽ പങ്കെടുക്കും. വിവാഹാലോചന നീണ്ടുപോകുന്നതിൽ നിരാശ തോന്നും.

പൂരൂരുട്ടാതി

മുൻപിൻ നക്ഷത്രങ്ങളിൽ പാപഗ്രഹങ്ങൾ സഞ്ചരിക്കുകയാൽ അരക്ഷിതത്വം തോന്നും. ബുദ്ധിമാന്മാരായ സുഹൃത്തുക്കൾ പിന്തുണയ്ക്കുന്നത് പ്രതിസന്ധികളിൽ കരകയറാൻ സഹായകമാവുന്നതാണ്.  നവസംരംഭങ്ങളിൽ നേരിയ പുരോഗതി ഉണ്ടാവാം. മകൻ്റെ വിദേശയാത്രയ്ക്ക് ഒരുക്കം തുടങ്ങും. രഹസ്യപ്രണയം പരസ്യമായേക്കാം. ഭക്ഷണത്തിലെ ക്രമമില്ലായ്മ ആരോഗ്യത്തെ ബാധിക്കുന്നതാണ്. സംഘടനാ പ്രവർത്തനത്തിന് സമയം കണ്ടെത്താൻ വിഷമിച്ചേക്കും.

ഉത്രട്ടാതി

ജന്മരാശിയിൽ, ജന്മനക്ഷത്രത്തിൽ സൂര്യൻ സഞ്ചരിക്കുന്നതും ജന്മരാശിയിൽ രാഹുവുള്ളതും പ്രതികൂലതയാണ്. അതിനാൽ പൊതുവേ അകാരണമായ ഭയം, സമ്മർദ്ദം ഇവ ഉണ്ടാകുന്നതാണ്. അപ്രിയസുഹൃത്തുക്കളുടെ സഹായം തേടേണ്ടി വന്നേക്കും. ആരോഗ്യപരമായും അത്ര ഗുണമുള്ള സമയമല്ല. പരീക്ഷയിൽ സംതൃപ്തി കുറയുന്നതാണ്. ഉദ്യോഗസ്ഥർക്ക് കൂടുതൽ ചുമതലകൾ ഏറ്റെടുക്കേണ്ടിവരും. തടസ്സങ്ങൾ അനുഭവപ്പെട്ട കാര്യങ്ങൾ വാരാന്ത്യത്തിൽ സഫലമാകുന്നതാണ്.

രേവതി

വാരാദ്യത്തിന് മെച്ചം കുറയുന്നതാണ്. മനസ്സിനെ എന്തെങ്കിലും ഖേദം ബാധിച്ചേക്കാം. വീടുവിട്ടുനിൽക്കേണ്ട സാഹചര്യം സംജാതമായേക്കും. ആവശ്യങ്ങൾ കഷ്ടിച്ച് നിർവഹിക്കാനാവും. പുതുസംരംഭങ്ങൾ തുടങ്ങാൻ കാലം അനുകൂലമല്ല. അർഹമായ സ്ഥാനക്കയറ്റം വൈകിയേക്കും. സഭകളിലോ സംഘടനകളിലോ ആശയപരമായ തർക്കങ്ങൾ ഉടലെടുക്കുന്നതാണ്. പണയവസ്തുക്കളുടെ തിരിച്ചടവിന് കൂടുതൽ സമയം ലഭിക്കും. പിതാവിൻ്റെ അഭിപ്രായവുമായി പൊരുത്തപ്പെടില്ല. വാഹനയാത്രയിൽ ജാഗ്രത പുലർത്തണം.

Read More

weekly horoscope Horoscope Astrology

Stay updated with the latest news headlines and all the latest Lifestyle news. Download Indian Express Malayalam App - Android or iOS.

Follow us: