മീനമാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: 1199 Monthly Horoscope for Meenam

കൊല്ലവർഷത്തിലെ എട്ടാമത്തെ മാസമാണ് മീനം. 2024 മാർച്ച് 14  മുതൽ ഏപ്രിൽ 13 വരെ  മീനമാസം നീളുന്നു. 31 തീയതികളുണ്ട്. തലയും വാലും വിപരീത ദിശകളിലായി ജലാശയത്തിൽ കിടക്കുന്ന ഇരുമത്സ്യങ്ങളാണ് മീനം രാശിയുടെ സ്വരൂപമായി പരിഗണിക്കപ്പെടുന്നത്. രാശിചക്രത്തിലെ പന്ത്രണ്ടാം രാശിയാണ് മീനം (Pisces) എന്നതും പ്രസ്താവ്യം. 

സൂര്യൻ മീനം രാശിയിൽ സഞ്ചരിക്കുന്ന കാലത്തെ മീനം രാശിയായി കണക്കാക്കിപ്പോരുന്നു. ഇന്ത്യൻ സംവത്സരമായ ശകവർഷം തുടങ്ങുന്നതു മീനമാസത്തിലാണ്. ചാന്ദ്രവർഷം തുടങ്ങുന്നതും മീനമാസത്തിലാണെന്ന സവിശേഷതയുമുണ്ട്.  60 ചാന്ദ്ര സംവത്സരങ്ങളിൽ ഒന്നായ 'ശോഭകൃത്' വർഷം മീനമാസത്തിലെ കറുത്തവാവിന് അവസാനിക്കും. പിറ്റേന്നുമുതൽ, അതായത് വെളുത്ത പ്രഥമ തിഥി മുതൽ 'ക്രോധി' എന്നുപേരുള്ള വർഷം തുടങ്ങും.

പൂരൂരുട്ടാതി, ഉത്രട്ടാതി,രേവതി ഞാറ്റുവേലകൾ മീനമാസത്തിൽ കടന്നുവരുന്നുണ്ട്. വ്യാഴം മേടം രാശിയിൽ ഭരണി നക്ഷത്രത്തിൽ സഞ്ചരിക്കുകയാണ്. ശനി കുംഭം രാശിയിലുണ്ട്. മാസാവസാനം ചതയത്തിൽ നിന്നും പൂരൂരുട്ടാതിയിലേക്ക്  പകരുന്നു. മീനം 5 ന് ഒരു മാസക്കാലത്തിലധികം നീണ്ട ശനിയുടെ മൗഢ്യം അവസാനിക്കുകയുമാണ്. രാഹു മീനം രാശിയിൽ രേവതിയിലും കേതു കന്നിരാശിയിൽ അത്തത്തിലും തുടരുന്നു. 

മീനം 2 ന് ചൊവ്വ മകരത്തിൽ നിന്നും കുംഭത്തിൽ പ്രവേശിക്കുകയാണ്. ചൊവ്വ ഉച്ചരാശിയിൽ നിന്നും മാറുന്നുവെന്നർത്ഥം. മീനം 12ന് ബുധൻ നീചരാശിയായ മീനത്തിൽ നിന്നും മേടത്തിലേക്ക് സംക്രമിക്കുകയാണ്. മീനം 1 മുതൽ 22 വരെ ബുധന് മൗഢ്യമില്ല. അതിനുശേഷം മൗഢ്യം സംഭവിക്കുന്നു. മീനം 27 ന് ബുധൻ വക്രഗതിയിൽ മേടത്തിൽ നിന്നും മീനത്തിലേക്ക് വീണ്ടും നിഷ്ക്രമിക്കുന്നു. കുംഭം രാശിയിൽ തുടരുന്ന ശുക്രൻ മീനം 18 ന് തൻ്റെ ഉച്ചരാശിയായ മീനം രാശിയിലേക്ക് പ്രവേശിക്കുകയാണ്. 

ചന്ദ്രസഞ്ചാരം ഇപ്രകാരമാണ്: മീനം ഒന്നിന് ഭരണി നക്ഷത്രത്തിൽ നിന്നും യാത്ര തുടങ്ങുന്ന ചന്ദ്രൻ മീനം 31 ആകുമ്പോൾ ഒരുവട്ടം രാശിചക്രഭ്രമണം പൂർത്തിയാക്കി മകയിരം നക്ഷത്രത്തിൽ എത്തുന്നു. ശുക്ലപഞ്ചമിയിലാണ് മാസത്തിൻ്റെ തുടക്കവും ഒടുക്കവും. മീനം12 ന് വെളുത്തവാവ് വരുന്നു. മീനം 26 ന് കറുത്തവാവ് സംഭവിക്കുകയാണ്. 

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതിവരെയുള്ള 27 നക്ഷത്രങ്ങളിൽ ജനിച്ചവരുടേയും മീനമാസത്തിലെ സമ്പൂർണ്ണ നക്ഷത്രഫലം ഇവിടെ അപഗ്രഥിക്കുന്നു

അശ്വതി

സൂര്യനും രാഹുവും ബുധനും പന്ത്രണ്ടിലും ശനിയും ചൊവ്വയും ശുക്രനും പതിനൊന്നിലും വ്യാഴം രണ്ടിലും സഞ്ചരിക്കുകയാൽ ഗുണദോഷസമ്മിശ്രമായ കാലമായിരിക്കും. ഉദ്യോഗസ്ഥർക്ക്  ദുർഘടമുള്ള ദൗത്യങ്ങൾ ഏറ്റെടുക്കേണ്ടി വരാം. ചില അവിചാരിതമായ തൊഴിൽ യാത്രകൾക്കും സാധ്യത കാണുന്നുണ്ട്.

അത്യാവശ്യമായിട്ടുള്ള അനുമതി രേഖകൾ  കൈവശം വന്നുചേരാനും താമസമുണ്ടാവും. സാമ്പത്തികമായി ഗുണകരമായ കാലമാണ്. ചെയ്യുന്ന തൊഴിൽ ചെറുതോ വലുതോ ആകട്ടെ ആദായം വർദ്ധിക്കും. പുതുജോലികൾക്ക് ശ്രമിക്കുന്നവർക്ക് അതിനവസരം കൈവരുന്നതാണ്. സാമൂഹ്യമായ അംഗീകാരം തിരിച്ചുകിട്ടുവാനിടയുണ്ട്. പ്രണയികളുടെ  ശുഭസാഹസങ്ങൾ വിജയകരമാവുന്നതാണ്. കിട്ടാക്കടം ഭാഗികമായിട്ടെങ്കിലും ലബ്ധമാകും. ഊഹക്കച്ചവടം ഗുണകരമാവും.

ഭരണി

പതിനൊന്നിലും പന്ത്രണ്ടിലും മൂന്നുഗ്രഹങ്ങൾ വീതമുണ്ട്. വ്യാഴം ജന്മരാശിയിൽ, ജന്മനക്ഷത്രത്തിലുമാണ്. അനുകൂലമായ സാഹചര്യങ്ങൾക്കാണ് മുൻതൂക്കം ലഭിച്ചിരിക്കുന്നത്. തൊഴിലിൽ ഏർപ്പെടുന്ന മാന്ദ്യം, തടസ്സം ഇവയെ പ്രായോഗിക ബുദ്ധി കൊണ്ട് മറികടക്കുവാൻ കഴിയുന്നതാണ്.

പാഴ്‌ചെലവുകൾ കുറേയുണ്ടാവും. എന്നാലും ധനപരമായി മുൻതൂക്കമുണ്ട്. ധനം സമാഹരിക്കുവാനാവും. വസ്തുവില്പനയിലെ തടസ്സം നീങ്ങുന്നതാണ്. കൂടിയാലോചനകളിൽ സ്വാഭിപ്രായം വിലമതിക്കപ്പെടും. ഭോഗസുഖം പ്രതീക്ഷിക്കാം. കൂടുംബജീവിതം സ്വച്ഛന്ദമാവുന്നതാണ്. ഉദ്യോഗപരമായ യാത്രകൾ വേണ്ടിവന്നേക്കും. വിദ്യാർത്ഥികൾ പരീക്ഷാ തയ്യാറെടുപ്പുകൾ കൂടുതൽ ഊർജ്ജിതമാക്കേണ്ടതുണ്ട്.

കാർത്തിക

രണ്ടുരാശികളിൽ ത്രിഗ്രഹയോഗങ്ങൾ ഉള്ളതിനാൽ ഗുണഫലങ്ങളും ദോഷഫലങ്ങളുമുണ്ട്. കാർത്തിക ഇരുകൂറുകളിലായി വരുന്ന നക്ഷത്രമാകയാൽ പ്രായേണ ഈ മാസം മീനക്കൂറുകാർക്കാവും ഗുണക്കൂടുതൽ. തൊഴിലിൽ വളരെ ശ്രദ്ധിക്കണം.  സഹപ്രവർത്തകരുടെ പിന്തുണ കിട്ടിയേക്കില്ല.

സർക്കാർ കാര്യങ്ങളിൽ മെല്ലപ്പോക്ക് തുടരും. ബിസിനസ്സ് വിപുലീകരിക്കാൻ കടമ്പകളുണ്ടാവും.  പഠനം, തൊഴിൽ ഇവയുമായി ബന്ധപ്പെട്ടുളള വിദേശയാത്രയ്ക്ക് ഒരുങ്ങുന്നവർക്ക് അതിനവസരം സംജാതമായേക്കും. സാമ്പത്തികമായി തരക്കേടില്ലാത്ത കാലമാണ്. ഭൂമിയിൽ നിന്നും ആദായം ഉണ്ടാകും. പാരമ്പര്യ വസ്തുക്കൾ, ജീവിതപങ്കാളിയുടെ ധനം ഇവ അനുഭവത്തിലെത്തും. എന്നാൽ ധനപരമായി പറ്റിക്കപ്പെടാനും തെറ്റായ നിക്ഷേപങ്ങളിൽ ഏർപ്പെടാനും സാധ്യതയും കാണുന്നു.

രോഹിണി

അനുകൂലമായിട്ടുള്ള ഗ്രഹനില ജീവിതത്തിൽ മുന്നേറാൻ സുവർണാവസരമൊരുക്കും. പതിനൊന്നിലെ സൂര്യ-രാഹു-ബുധ യോഗം തുടക്കത്തിൽ തന്നെ ചില ശുഭലക്ഷണങ്ങളേകും. തൊഴിൽ പരമായ പരിശ്രമങ്ങൾ പാഴാകുന്നില്ലെന്നത് കൂടുതൽ ഊർജ്ജമേകും.  അധികാരികളുടെ അപ്രീതി നീങ്ങും.

തടസ്സങ്ങളും തഴയപ്പെടുന്നതായ അനുഭവങ്ങളും ഉണ്ടാകുമെങ്കിലും അവയെ പിന്തള്ളി മുന്നേറാൻ കരുത്തുണ്ടാകും. സ്ത്രീകളുടെ  സഹായ സഹകരണം ഗുണകരമായിത്തീരും. കുടുംബത്തിൽ അനുകൂലമായ അന്തരീക്ഷമുണ്ടാകും. എതിർചേരിയിൽ നിന്നവർ പോലും പ്രയോജനകരമായ നിലപാടെടുക്കും. വിവാദങ്ങളിലും മത്സരങ്ങളിലും വിജയിക്കുന്നതാണ്. കിടപ്പുരോഗികൾക്ക് ആശ്വാസം ഭവിക്കും. മകൻ്റെ / മകളുടെ ശ്രേയസ്സിൽ ചാരിതാർത്ഥ്യം ഉണ്ടാകും.

മകയിരം

തൊഴിൽപരമായി കുറച്ചു കാലം കൊണ്ട് അനുഭവിച്ചിരുന്ന ദുരിതങ്ങൾക്ക് ഉപശാന്തിയാകും. നവസംരംഭങ്ങൾ ബാലാരിഷ്ടകൾ പിന്നിട്ട് മുന്നേറുന്നതാണ്. സ്ഥാനക്കയറ്റം, സ്ഥലംമാറ്റം ഇത്യാദികളിൽ പ്രതീക്ഷിച്ച അളവിലല്ലെങ്കിലും ഗുണപരമായ വ്യത്യാസം പ്രതീക്ഷിക്കാം.

ഊഹക്കച്ചവടത്തിൽ ലാഭമുണ്ടാകുന്നതാണ്. ആഢംബര വസ്തുക്കൾ, വിലകൂടിയതും മോഹിച്ചതുമായ ഇലക്ട്രോണിക് ഉപകരണങ്ങൾ ഇവ വാങ്ങാനായേക്കും. ആലസ്യം, മറവി എന്നിവ വിദ്യാർത്ഥികൾക്ക് വെല്ലുവിളി ഉയർത്തും. സൽകാര്യങ്ങൾ ചെയ്യുന്നതിന് ചില തടസ്സങ്ങൾ ഉള്ളതായി അനുഭവപ്പെടും. രാഷ്ട്രീയ ഇടപെടലുകളും തുറന്ന സംസാരവും പ്രത്യക്ഷവും പരോക്ഷവുമായ ശത്രുക്കളെ സൃഷ്ടിച്ചെന്നു വരാം. ആരോഗ്യപരമായി ഏറ്റവും ശ്രദ്ധ വേണ്ടുന്ന കാലം കൂടിയാണ്.

തിരുവാതിര

പത്താം ഭാവത്തിലെ ആദിത്യനും ഒമ്പതിലെ ശുക്രനും പതിനൊന്നിലെ ഗുരുവും അനുകൂലഫലദാതാക്കളാണ്. നിരന്തര പരിശ്രമം നടത്തിയിട്ടും മുൻപ് വിജയിക്കാത്തവ ചെറുപ്രയത്നം കൊണ്ടുതന്നെ  നേടിയെടുക്കാനാവും. കർമ്മരംഗത്ത് അനിഷേധ്യതയുണ്ടാവുന്നതാണ്. തൊഴിൽപരമായ നുണുങ്ങുവിദ്യകൾ പുതുതലമുറയ്ക്ക് പറഞ്ഞുകൊടുക്കുവാനുള്ള ശ്രമം അഭിനന്ദിക്കപ്പെടും.

ഒമ്പതിൽ സ്ഥിതിചെയ്യുന്ന ചൊവ്വ പിതാവുമായുള്ള ചില അഭിപ്രായ വ്യത്യാസങ്ങൾക്ക് വഴിയൊരുക്കുന്നതാണ്. ആരോഗ്യപരമായും പിതാവിന് അത്ര മേന്മയില്ലാത്ത സമയമാണിപ്പോൾ. ആത്മീയ യാത്രകൾക്ക് പുതിയ കൂട്ടുകാരെ കണ്ടെത്തുന്നതാണ്. ബുധന് മൗഢ്യസ്ഥിതി മാറുകയാൽ വിദ്യാർത്ഥികളുടെ ഓർമ്മശക്തി മെച്ചപ്പെടും. ന്യായമായ രീതികളിലൂടെ ലഭിക്കേണ്ട വരുമാനം കൈവശമെത്തും.

പുണർതം

തൻ്റെയും കുടുംബത്തിൻ്റെയും ഭാവിക്കായി നല്ല തീരുമാനങ്ങൾ കൈക്കൊള്ളുവാൻ കഴിയും. പുതിയ വ്യാപാരക്കരാറുകളിൽ ഏർപ്പെടുന്നതാണ്. മനസ്സിൻ്റെ ഉണർവും ഉന്മേഷവും നിലനിർത്തും. ഉദ്യോഗസ്ഥർക്ക് ആദിത്യ - രാഹു യോഗം നല്ലഫലം നൽകണമെന്നില്ല. ക്ലേശാനുഭവങ്ങൾ സൃഷ്ടിച്ചേക്കാം. തൻ്റെ അധ്വാനഫലം മറ്റാരോ കവരുന്നതായി തോന്നാനിടയുണ്ട്.

പ്രൊഫഷണലുകൾക്ക് കർമ്മരംഗത്ത് എതിർപ്പുയർന്നേക്കും. അതിനാൽ മത്സരം നിറഞ്ഞ അന്തരീക്ഷത്തെ നേരിടേണ്ട സ്ഥിതിയുണ്ടാകും. ഗവേഷകർക്ക് വേഗത്തിൽ പ്രബന്ധം സമർപ്പിക്കാൻ നിർദ്ദേശം ലഭിക്കുന്നതാണ്. പൂർവ്വിക സ്വത്തുക്കളുമായി ബന്ധപ്പെട്ട വ്യവഹാരത്തിനുള്ള സാധ്യത തള്ളിക്കളയാനാവില്ല. ജീവിതപങ്കാളിയുടെ പിന്തുണ വലിയ ശക്തി പകരും.

പൂയം

രണ്ടുപാപഗ്രഹങ്ങൾ എട്ടിലും രണ്ടുപാപഗ്രഹങ്ങൾ ഒമ്പതിലും സഞ്ചരിക്കുന്നു. അനുകൂലത തീരെക്കുറവായ കാലഘട്ടമാണെന്ന് അറിയേണ്ടതുണ്ട്. സാമ്പത്തിക ഇടപാടുകളിൽ കൃത്യത ഉണ്ടാവണം. തൊഴിൽ രംഗത്തെ ഉണർവ്വില്ലായ്മ നിരാശപ്പെടുത്താം. ഉദ്യോഗം തേടുന്നവർക്ക് അവസരം അവസാന നിമിഷത്തിൽ നഷ്ടപ്പെടുന്ന സ്ഥിതിവന്നേക്കാം.  

വലിയ ദൗത്യങ്ങൾ ഏറ്റെടുക്കാതിരിക്കുന്നത് നന്ന്. വാഗ്ദാനലംഘനം വിഷമിപ്പിക്കാം. വ്യവഹാരങ്ങളിൽ നീതി നീണ്ടുപോകാനിടയുണ്ട്. കുടുംബ സുഖവും ദാമ്പത്യത്തിൻ്റെ ദാർഢ്യവും ആപൽ സന്ധികളിൽ വലിയ മുതൽക്കൂട്ടാവും. ആരോഗ്യകാര്യത്തിൽ ശ്രദ്ധ ഉണ്ടാവണം. പരീക്ഷാർത്ഥികൾക്ക് മോട്ടിവേഷൻ അനിവാര്യമായ സന്ദർഭമാണ്.

• Weekly Horoscope (March 3– March 9, 2024): ഈ ആഴ്‌ച നിങ്ങൾക്കെങ്ങനെ?
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 March 04 to March 10

ആയില്യം

നക്ഷത്രനാഥനായ ബുധൻ്റെ നീചാവസ്ഥയാലും മറ്റു ഗ്രഹങ്ങളുടെ പ്രതികൂലതയാലും ആത്മശക്തി പരീക്ഷിക്കപ്പെടുന്ന കാലഘട്ടമാണ്. ഉദ്യോഗസ്ഥർക്ക് പ്രതീക്ഷിക്കാത്ത ദിക്കിലേക്ക് സ്ഥലം മാറ്റമുണ്ടാവാനിടയുണ്ട്. ദുർഘടങ്ങളായ ദൗത്യങ്ങൾ നിർവഹിക്കേണ്ടി വന്നേക്കും. കരാറുകളിൽ കബളിപ്പിക്കപ്പെടാൻ സാധ്യതയുണ്ട്.

വിശ്വസ്തരായ സുഹൃത്തുക്കളുടെ പിന്തുണ വൈകി മാത്രം കൈവരുന്നതാണ്. പണയവസ്തുക്കൾ ലേല / ജപ്തി നടപടികളിലേക്ക് നീങ്ങാം. വിദ്യാർത്ഥികൾക്ക് ഏകാഗ്രത കുറഞ്ഞേക്കും. കലാപ്രവർത്തകർക്ക് ഗുണകരമായ സാഹചര്യമാണുള്ളത്. വിദേശത്ത് കഴിയുന്നവർക്ക് നാട്ടിലേക്ക് മടങ്ങാൻ സാധിക്കുന്നതാണ്. പ്രണയികൾക്ക് ആഹ്ളാദിക്കാനാവും. മകൻ / മകളുടെ വിവാഹകാര്യത്തിൽ ശുഭതീരുമാനം കൈക്കൊള്ളാൻ മാതാപിതാക്കൾ നിർബന്ധിതരാവും.

മകം

ആദർശം ഉപേക്ഷിക്കാൻ തയ്യാറാവില്ല. തന്മൂലം പ്രായോഗികമായ പ്രശ്നങ്ങൾ വന്നെത്തും. നേട്ടങ്ങൾ ശിഥിലമായിട്ടാവും അനുഭവത്തിലെത്തുന്നത്. ധനപരമായി മെച്ചം കാലമല്ല. ചെലവിൽ ശ്രദ്ധ വേണം. അഷ്ടമത്തിലെ സൂര്യരാഹുയോഗം അനിഷ്ടഫലമുണ്ടാക്കാം. സാംക്രമിക രോഗങ്ങൾ വരാനിടയുണ്ട്.

വാഹനയാത്രയിൽ, രാത്രി കാലത്ത് ഒക്കെ ജാഗ്രത അനിവാര്യം. പിതാവിൻ്റെ ആരോഗ്യം, പദവി ഇവയിൽ ചാഞ്ചല്യത്തിന് സാധ്യതയുണ്ട്. സ്വന്തം ശക്തി മുഴുവൻ കർമ്മരംഗത്ത് തെളിയിക്കാൻ കഴിഞ്ഞേക്കില്ല. ദാമ്പത്യത്തിൽ അസംതൃപ്തി തുടർന്നേക്കും. പ്രണയികൾ അനുകൂലത പ്രതീക്ഷിക്കേണ്ടതില്ല. പുതിയ സംരംഭങ്ങൾ ആരംഭിക്കാൻ സർക്കാരിൽ നിന്നും എതിർപ്പുണ്ടായേക്കും.

പൂരം

നക്ഷത്രനാഥനായ ശുക്രന് പാപയോഗം തുടരുകയാൽ കൂട്ടുകെട്ടുകൾ ദോഷത്തിന് കാരണമാകാം. അപവാദങ്ങളെ നേരിടേണ്ടി വരുന്നതാണ്. ഉദ്യോഗസ്ഥർക്ക് സഹപ്രവർത്തകരുടെ പിന്തുണ കിട്ടിയേക്കില്ല. തൊഴിലന്വേഷണം തടസ്സപ്പെടാം. അനുവദിക്കപ്പെട്ട വായ്പ കൈവശമെത്താൻ കാലതാമസം നേരിടുന്നതാണ്. ഗാർഹികാന്തരീക്ഷം കലുഷമായേക്കാം.

കൂട്ടുകച്ചവടം നടത്തുന്നവർക്ക് പരസ്പരം വിരോധമുണ്ടാവും. പരീക്ഷാർത്ഥികളുടെ ഏകാഗ്രത നഷ്ടപ്പെടാനിടയുണ്ട്. നിത്യവേതനക്കാർ, കമ്മീഷൻ വ്യാപാരം നടത്തുന്നവർ, കരാർ പണിക്കാർ തുടങ്ങിയവർക്ക് തരക്കേടില്ലാത്ത കാലമാണ്. ചെറിയ കാര്യങ്ങൾ, ചെറിയ നേട്ടം എന്ന നിലയ്ക്കാവും പൊതുവേയുള്ള വിലയിരുത്തൽ.

ഉത്രം

അദ്ധ്വാനം നിരന്തരമായിരിക്കും. എന്നാൽ വിജയത്തിന് തിളക്കം വേണ്ടത്ര ഇല്ലെന്ന് തോന്നും. കെടുകാര്യസ്ഥത തൊഴിലാക്കിയവരെ പരിഹസിക്കും. 'മോട്ടിവേഷൻ ക്ളാസ്സുകളിൽ' പങ്കെടുക്കുന്നതാണ്. അതിലേക്ക് സുഹൃത്തുക്കളേയും പ്രേരിപ്പിച്ചേക്കും. നക്ഷത്രനാഥനായ ആദിത്യന് രാഹുയോഗം വരികയാൽ കള്ളം പറയാനോ, വളഞ്ഞ വഴികൾ സ്വീകരിക്കാനോ നിർബന്ധിതനാവും.

കുടുംബ ജീവിതത്തിൽ ഇക്കാലയളവ് ഒരു പരീക്ഷണ കാലഘട്ടം ആയിത്തോന്നും. അടുത്തറിഞ്ഞാലും അപരിചിതത്വം ഉണ്ടാവുന്നതാണ്. ബിസിനസ്സ് യാത്രകൾ പതിവിലും വേണ്ടിവരും. പണമെടപാടുകളിൽ കൃത്യത പാലിക്കണം. ഭൂമിയിൽ നിന്നും നാമമാത്രമായ ആദായം പ്രതീക്ഷിച്ചാൽ മതിയാകുന്നതാണ്.

അത്തം

സ്വന്തം കാര്യം മറക്കുകയും നാട്ടുകാര്യങ്ങളിൽ മുഴുകുകയും ചെയ്യും.  രാശിനാഥനായ ബുധൻ്റെ നീചസ്ഥിതി മൂലം തീരുമാനങ്ങളിൽ ആശയക്കുഴപ്പം ഏർപ്പെടും. വ്യവസായത്തിൽ /വ്യാപാരരംഗത്തിൽ പുരോഗതി മിതമായ നിലയിലായിരിക്കും. ശത്രുക്കളുടെ പ്രവർത്തനത്തെ കഷ്ടിച്ച് പ്രതിരോധിക്കാനാവും. നാട്ടുത്സവങ്ങളിൽ സജീവമാവുന്നതാണ്.

പൊതുപ്രവർത്തകർക്ക് ജനപിന്തുണ കൂടുകയാണോ കുറയുകയാണോ എന്ന് ഉറപ്പിക്കാനാവാത്ത സ്ഥിതിയുണ്ടാവും. സഹോദരരുടെ പിന്തുണ പ്രതീക്ഷിക്കാം. ഗവേഷണ പ്രബന്ധം പൂർത്തീകരിക്കാൻ ശ്രമം തുടരുന്നതാണ്. മാസത്തിൻ്റെ മൂന്നാം ആഴ്ച മുതൽ ശുക്രൻ ഉച്ചത്തിൽ വരികയാൽ കലാപരമായ നേട്ടങ്ങൾ വർദ്ധിക്കും. ജീവിത നിലവാരത്തിലും മാറ്റങ്ങൾ വന്നുചേരും.

ചിത്തിര

കൃത്യനിർവഹണത്തിൽ വിട്ടുവീഴ്ചയുണ്ടാവില്ല. സാധാരണ കർമ്മങ്ങൾ എല്ലാം തന്നെ പൂർത്തീകരിക്കും. സംഘടനയിൽ ചില ചുമതലകൾ ലഭിക്കാം. നക്ഷത്രനാഥനായ ചൊവ്വയ്ക്ക് ശനിയുമായി യോഗം വരികയാൽ തമ്മിലിണങ്ങാത്ത വരെ കൂട്ടിയോജിപ്പിക്കേണ്ട ദൗത്യമുണ്ടാവും. തുലാക്കൂറുകാരായ ചിത്തിരക്കാർക്ക് ഔദ്യോഗികമായി സ്ഥാനക്കയറ്റം പ്രതീക്ഷിക്കാം.

വീട്ടിലും പുറത്തുമായി എതിർക്കുന്നവരെ കാര്യം പറഞ്ഞ് ബോധിപ്പിക്കുന്നതിൽ വിജയിക്കുന്നതാണ്. സാമ്പത്തിക സ്ഥിതി മോശമാവില്ല. ചെലവുകളുടെ കൂട്ടത്തിൽ ചെറിയ തോതിൽ ആശുപത്രിച്ചെലവിനും സാധ്യത കാണുന്നു. സഹോദരിയുടെ വിവാഹത്തിന് തയ്യാറെടുപ്പുകൾ തുടരുന്നതാണ്.

ചോതി

ആറാം ഭാവത്തിലെ സൂര്യരാഹുയോഗം അനുകൂലമാണ്. സ്വന്തം താല്പര്യത്തിന് ഹാനിയുണ്ടാവാത്ത വിധം പ്രവർത്തിക്കാൻ കഴിയും. കച്ചവടം നടത്തുന്നവർക്ക് പൊതുവേ ഭേദപ്പെട്ട സമയമാണ്. ഉപഭോക്താക്കളുടെ പ്രീതിയുണ്ടാവും.  സാമ്പത്തികമായ ചാഞ്ചാട്ടം ഉണ്ടാവില്ല. ഇൻഷ്വറൻസ്, ചിട്ടി തുടങ്ങിയവയിൽ നിന്നും ധനം കൈവരും. ശുക്രൻ്റെ കുംഭം- മീനം രാശികളിലെ സഞ്ചാരത്താൽ ഭാവനാശക്തി ഉണർന്നു പ്രവർത്തിക്കും.  

കലാകാരന്മാർക്ക് നല്ല അവസരങ്ങൾ സൃഷ്ടിക്കപ്പെടാം. സാങ്കേതിക കാര്യങ്ങൾ ഉൾക്കൊള്ളാൻ ശ്രമം നടത്തുന്നതാണ്. വീടുവിട്ടു നിൽക്കുന്നവർക്ക് വീട്ടിലേക്ക് മടങ്ങാനാവും. കുടുംബന്ധങ്ങളുടെ ദൃഢതയെ ബാധിക്കുന്ന വിഷയങ്ങളെ സമർത്ഥമായി പ്രതിരോധിക്കുന്നതാണ്.

വിശാഖം

തുലാക്കൂറുകാർക്ക് അനുകൂല സാഹചര്യമാണ്. തൊഴിൽ മുന്നേറ്റമുണ്ടാകും. പഠനം / പരീക്ഷ ഇവയിൽ വിദ്യാർത്ഥികൾക്ക് മികവ് തെളിയിക്കാനാവും. സ്വന്തം വ്യാപാരത്തിൽ വിപുലീകരണം സാധിക്കുന്നതാണ്. കൃഷിയിൽ താല്പര്യമുണ്ടാവും. മട്ടുപ്പാവ് /അടുക്കള  കൃഷിക്ക് കൂടുതൽ സമയം കണ്ടെത്തും. ബന്ധുക്കളുമൊത്ത് തീർത്ഥയാത്രയ്ക്ക് പദ്ധതിയിടും.

സംവാദങ്ങളിൽ രാഷ്ട്രീയ പ്രതിയോഗികളുമായി വാക്പ്പോരിലേർപ്പെടും. പരസ്പരം പൊരുത്തമില്ലാത്ത കാര്യങ്ങൾ ചെയ്ത് പരിഹാസം നേരിടാനും സാധ്യത കാണുന്നു. പങ്കാളിത്ത ബിസിനസ്സ്, ഊഹക്കച്ചവടം ഇവ ലാഭദായകമാവാം. വിശ്രമം, വിനോദം, മൗനം, സമയനിഷ്ഠ തുടങ്ങിയവയും കൂടി ചേരുമ്പോഴാണ് ജീവിതം ജീവിതമാവുക എന്ന് ഓർമ്മിക്കും.

അനിഴം

സഹായസ്ഥാനത്ത് ഉച്ചനായി നിന്ന രാശിനാഥൻ ചൊവ്വ ശത്രുപാളയത്തിൽ ശത്രുവിനോടൊപ്പം ചേരുകയാണ്. സ്വന്തം നിലപാടുകളിൽ വെള്ളം ചേർക്കേണ്ടിവരും. മാനസികപ്പൊരുത്തം കുറഞ്ഞ വ്യക്തികളുമായി ഐക്യപ്പെടേണ്ടി വരുന്നതാണ്. ചിലപ്പോൾ ബന്ധുവാര്? ശത്രുവാര്? എന്ന ബോധ്യം മാറിമറിയാം. ആലോചനകൾ അനന്തമായി നീളുന്നതാണ്. പ്രവർത്തിയിൽ തന്മൂലം വിളംബമേർപ്പെടാം.

മാതാവിൻ്റെയോ അടുത്ത മാതൃബന്ധുക്കളുടെയോ ആരോഗ്യം, തൊഴിൽ, പദവി എന്നിവ സംബന്ധിച്ച വ്യാകുലതകൾക്ക് അവകാശമുണ്ട്. അത്യാവശ്യങ്ങൾക്കുള്ള ധനം കൈവശം വന്നെത്തും. മാസത്തിൻ്റെ രണ്ടാം പകുതി എല്ലാനിലയ്ക്കും ഭേദപ്പെട്ടതായിരിക്കും.

തൃക്കേട്ട

നക്ഷത്രനാഥനായ ബുധന് നീചസ്ഥിതിയാണ്. കൂടാതെ രാഹുയോഗവുമുണ്ട്. രാശിനാഥനായ ചൊവ്വയുടെ ശനിയോഗവും കൂടിയാവുമ്പോൾ തൃക്കേട്ട നാളുകാർക്ക് അനുകൂലമല്ലാഞ്ഞ പരിതസ്ഥിതി സൃഷ്ടിക്കപ്പെടാം. തിടുക്കത്തിലുള്ള തീരുമാനങ്ങൾ തെറ്റിപ്പോയെന്നുവരാം. പ്രശ്നപരിഹാരത്തിൽ കൈക്കൊള്ളുന്ന വൈകാരിക സമീപനവും പാളിപ്പോകാൻ ഇടയുണ്ട്.

സാമ്പത്തിക കാര്യങ്ങളിൽ ഏറ്റവും സൂക്ഷ്മത ആവശ്യമാണ്. മാസപ്പകുതിക്കുമേൽ ശുക്രന് ഉച്ചബലം വരികയാൽ ആശയങ്ങളുടെ പുതുമ, മനസ്സിൻ്റെ ഊർജ്ജസ്വലത എന്നിവ സമന്വയിപ്പിക്കാനും ക്രിയാത്മകത നിലനിർത്താനും സാധിക്കുന്നതാണ്. കലാകാരന്മാർക്ക് മികച്ച അവസരങ്ങൾ സ്വാഭാവികമായിത്തന്നെ സംജാതമാകും.

മൂലം

ശനി-ചൊവ്വ ഗ്രഹങ്ങളുടെ മൂന്നാം ഭാവത്തിലെ സഞ്ചാരം ആത്മശക്തി ഉയർത്തുന്നതാണ്. മടിച്ചുനിന്ന നല്ലകാര്യങ്ങൾക്ക് മുന്നിട്ടിറങ്ങും. സമൂഹത്തിൻ്റെ പിന്തുണ ലഭിക്കുന്നതാണ്. നാലാം ഭാവത്തിൽ ആദിത്യരാഹുയോഗം ഗുണകരമായേക്കില്ല. ഗൃഹസൗഖ്യം കുറയാം. ചെറിയ കാര്യത്തിന് പോലും തർക്കമോ കലഹമോ ഉയർന്നേക്കും.

ഉപരിവിദ്യാഭ്യാസത്തിന് യോഗ്യത നേടാൻ കഠിനമായ പരിശ്രമം ആവശ്യമാണ്. സാമ്പത്തിക പരാധീനതകൾക്ക് അയവുണ്ടാകും. ഇഷ്ടസുഹൃത്തുക്കളുമായി യാത്രകൾക്ക് ഒരുങ്ങുന്നതാണ്. അശ്രദ്ധയും ഏകാഗ്രതയില്ലായ്മയും  പിടികൂടാം. കരാറുകളിലെ നിബന്ധനകൾ വായിച്ചുനോക്കിയ ശേഷമാവണം ഒപ്പിടാൻ.

പൂരാടം

കർമ്മരംഗത്ത് സക്രിയരാവും. ന്യായമായ രീതിയിൽ വളർച്ച പ്രതീക്ഷിക്കാം. പ്രശ്നങ്ങൾ പരിഹരിക്കാൻ സധൈര്യം മുന്നിട്ടിറങ്ങുന്നതാണ്. കുടുംബത്തിൻ്റെ പിന്തുണ ഭാഗികമായി മാത്രം പ്രതീക്ഷിച്ചാൽ മതി. മാനസികാരോഗ്യം ചിലപ്പോൾ ബാധിക്കപ്പെടാം. മകൻ്റെ ഉപരിപഠനത്തിലെ തടസ്സങ്ങൾ നീങ്ങുന്നത് ആശ്വാസകരമാവും. വീട് പുതുക്കുന്നതിന് പ്രതീക്ഷിച്ചതിലും കൂടുതൽ ചെലവേർപ്പെട്ടേക്കും.

സ്നേഹിതരുടെ ആത്മാർത്ഥതയിൽ സന്ദേഹികളാവും. ദൈവിക സമർപ്പണം, ആത്മീയ കാര്യങ്ങൾ എന്നിവയ്ക്ക് നേരം നീക്കിവെക്കുന്നതാണ്. മാസത്തിൻ്റെ മൂന്നാം പകുതി മുതൽ ക്ലേശങ്ങൾക്ക് അയവുണ്ടായേക്കും. നക്ഷത്രനാഥനായ ശുക്രൻ്റെ ഉച്ചസ്ഥിതി ഭൗതികമായി ഗുണകരമാവും.

ഉത്രാടം

ത്രിഗ്രഹയോഗങ്ങളാണ് ഗുണത്തിനും ദോഷത്തിനും ഈ മാസം കാരണമായിരിക്കുന്നത്. നക്ഷത്രനാഥനായ സൂര്യന് രാഹു- ബുധയോഗം ഉണ്ട്. സൗഹൃദങ്ങൾ കൊണ്ട് ദോഷാനുഭവങ്ങൾക്കും സാധ്യത കാണുന്നു. ഇഷ്ടകാര്യങ്ങൾ ചെയ്യാനാവാതെ കുഴങ്ങുന്നതാണ്. പ്രതീക്ഷിക്കാത്ത വ്യക്തികളിൽ നിന്നും ശക്തമായ പിന്തുണ, അംഗീകാരം എന്നിവയ്ക്കും സാധ്യത തള്ളിക്കളയാനാവില്ല.

ബിസിനസ്സിൽ ചെറിയ നേട്ടമെങ്കിലും ഭവിക്കും. മകരക്കൂറുകാർക്ക് സർക്കാരിൽ നിന്നും പ്രതീക്ഷിക്കുന്ന സേവനങ്ങൾ തടസ്സമില്ലാത്ത വന്നെത്തുന്നതാണ്. സഹോദരരുടെ ആനുകൂല്യവും അവസരോചിതമായ ഇടപെടലുകളും പ്രസ്താവ്യമാണ്. രോഗക്ലേശത്താൽ വലയുന്നവർക്ക് ചികിൽസാ മാറ്റത്താൽ ഗുണമുണ്ടായേക്കും.

തിരുവോണം

ഗുണാനുഭവങ്ങൾക്ക് മുഖ്യത്വം സിദ്ധിക്കുന്നതാണ്. നിസ്സാരമായിക്കരുതി അവഗണിച്ചവരെക്കൊണ്ട് സഹായമുണ്ടാവും. സർക്കാർ സേവനങ്ങൾ പ്രതീക്ഷിച്ചതിലും വേഗത്തിൽ കരഗതമാവും.  ഗാർഹികാന്തരീക്ഷം സമാധാനപൂർണമാകും. മംഗളകർമ്മങ്ങൾ സഫലമാകുന്നതാണ്. അതിഥി സൽകാരം സന്തോഷമേകും.

അവിവാഹിതർക്ക് ശുഭതീരുമാനങ്ങൾ ഉണ്ടായേക്കും. സന്താനഭാഗ്യത്തിന് കാത്തിരിക്കുന്നവർക്കും ഗ്രഹാനുകൂല്യം ഉള്ള സമയമാണ്. പരുക്കൻ സംസാരം കൊണ്ട് ശത്രുക്കൾ സൃഷ്ടിക്കപ്പെടാം. നിക്ഷേപങ്ങൾക്ക് മുതിരും മുൻപ് വിദഗ്ദ്ധാഭിപ്രായം സ്വീകരിക്കുന്നത് ഉചിതമായിരിക്കും. സ്വഭാവത്തിലെ പൊരുത്തക്കേടുകൾ കുടുംബാംഗങ്ങൾ ചൂണ്ടിക്കാണിച്ചേക്കും.

അവിട്ടം

നക്ഷത്രനാഥൻ ചൊവ്വ നക്ഷത്രത്തിൽ തന്നെ സഞ്ചരിക്കുന്നു. വൈകാരിക തീരുമാനങ്ങൾ കൈക്കൊള്ളാൻ പ്രേരണയേറുന്നതാണ്. തൊഴിലിടത്തിൽ ശ്രദ്ധ കുറയരുത്. കമ്മീഷൻ സംബന്ധിച്ച ജോലികൾ ലാഭകരമായേക്കാം. കരാർപണികൾ പുതുക്കപ്പെടാൻ സാധ്യത കാണുന്നു. പക്ഷേ മുതൽമുടക്കിന് കാലം യോജിച്ചതല്ല.

വാക്പാരുഷ്യം ചിലപ്പോൾ കലഹം, കാര്യനഷ്ടം തുടങ്ങിയവയ്ക്ക് കാരണമാകുന്നതാണ്. ഭൂമിയിൽ നിന്നും പ്രതീക്ഷിച്ച ആദായം ഉണ്ടായേക്കില്ല. സമൂഹമാധ്യമങ്ങളിലെ അഭിപ്രായങ്ങൾക്ക് ഖണ്ഡനമേറുന്നതാണ്. മാനസികപ്പൊരുത്തം ഇല്ലാത്തവരുമായി സഹകരിക്കേണ്ടി വരാം. ദാമ്പത്യത്തിലും സമ്മിശ്രമായ അനുഭവങ്ങൾ ഭവിക്കുന്നതാണ്. മകരക്കൂറുകാർക്ക് ഗുണാനുഭവങ്ങൾ കൂടാം.

ചതയം

പാപഗ്രഹങ്ങൾ ജന്മനക്ഷത്രത്തിൻമേൽ തീവ്രസ്വാധീനം ചെലുത്തുന്ന കാലമാണ്. ആകയാൽ മനോവാക്കർമ്മങ്ങളിൽ ഏറ്റവും ജാഗ്രത വേണം. പഠനത്തിൽ ശ്രദ്ധ കുറയാം. പരീക്ഷയിൽ പഠനമികവ് പ്രതിഫലിപ്പിക്കാൻ കഴിയാത്ത സ്ഥിതി വരാം. ആത്മസംയമനം നഷ്ടമാകാം. കലഹപ്രേരണകളെ നിയന്ത്രിക്കാൻ ക്ലേശിച്ചേക്കും. ഇഷ്ടവസ്തുക്കൾ കളവുപോകാനിടയുണ്ട്. കച്ചവടത്തിൽ മാത്രമല്ല

ഏതു ജോലിയിലും അധ്വാനം വർദ്ധിക്കുന്നതാണ്. അതിനനുസരിച്ചുള്ള ലാഭം / വേതനം സിദ്ധിക്കണമെന്നില്ല. കുടുംബത്തിൻ്റെ പിന്തുണ ശക്തിയേകും. മിതവ്യയം നിർബന്ധമാക്കണം. മാസത്തിൻ്റെ രണ്ടാം പകുതി മുതൽ ചെറിയ ആശ്വാസം ലഭിച്ചു തുടങ്ങുന്നതാണ്.

പൂരൂരുട്ടാതി

പ്രായോഗിക സമീപനം കൈക്കൊള്ളുന്നതിനാൽ ഒരുവിധം കാര്യങ്ങൾ നടന്നുപോകും. ലക്ഷ്യമോ പ്രധാനം മാർഗ്ഗമോ പ്രധാനം എന്ന വിധത്തിലുള്ള ചർച്ചകളിൽ നിന്നും തലയൂരുന്നതാണ്. കുറശ്ശൊക്കെ അലച്ചിലും കാര്യക്ലേശവും ഭവിക്കാതിരിക്കില്ല. അധികാരഭാവം  ശത്രുക്കളെ സൃഷ്ടിച്ചേക്കാം.

വാഗ്ദാനങ്ങൾ പാലിക്കാൻ കഴിയില്ല. സ്വന്തം സ്ഥാപനത്തിൽ മോഷണത്തിന് സാധ്യതയുണ്ട്. കുടുംബത്തിലെ വൃദ്ധജനങ്ങളുടെ പരിരക്ഷയ്ക്ക് പ്രത്യേക സേവനം ഏർപ്പെടുത്തേണ്ടി വരാം. മകൻ്റെ ഉപരിപഠനം സംബന്ധിച്ച ചെലുവകൾക്ക് പോംവഴി തേടുന്നതാണ്.  പ്രതീക്ഷിത സ്ഥാനക്കയറ്റം വൈകാം. പൈതൃകവസ്തുക്കളിൽ നിന്നും ആദായം ഉണ്ടാകുന്നതാണ്.

ഉത്രട്ടാതി

ജന്മരാശിയിൽ ആദിത്യൻ, രാഹു, ബുധൻ എന്നീ ഗ്രഹങ്ങൾ യോഗം ചെയ്യുകയാൽ ആത്മസംഘർഷമുണ്ടാവാം. തെറ്റായ തീരുമാനങ്ങൾ കൈക്കൊള്ളാൻ സാധ്യത കാണുന്നു. തൊഴിലിടത്തിൽ സംതൃപ്തി കുറയും. തന്നെക്കാൾ കഴിവ് കുറഞ്ഞവർ ഉയർന്ന പദവിയിലേക്ക് പരിഗണിക്കപ്പെടാം. പ്രതിഷേധങ്ങൾ വനരോദനമായി കലാശിക്കുവാൻ ഇടയുണ്ട്.

പന്ത്രണ്ടിലെ ത്രിഗ്രഹ യോഗം കാരണം നിഷ്പ്രയോജനകരമായ ആവർത്തിത യാത്രകൾ വേണ്ടിവരും. ചെലവ് കൂടുന്നതാണ്. മാസത്തിൻ്റെ പകുതിക്കു ശേഷം ശുക്രൻ ജന്മരാശിയിലേക്ക് വരുന്നതും ആദിത്യൻ ജന്മനക്ഷത്രത്തിൽ നിന്നും മാറുന്നതും ദുർഘടാവസ്ഥയെ ലഘൂകരിക്കും. ധനപരമായി ആശ്വസിക്കാനും കർമ്മരംഗത്ത് സജീവമാകാനും കഴിയും.

രേവതി

ഗ്രഹങ്ങളുടെ, വിശേഷിച്ചും പാപഗ്രഹങ്ങളുടെ സഞ്ചാരം അനിഷ്ടസ്ഥാനങ്ങളിലൂടെയാകയാൽ തൊഴിൽ തടസ്സങ്ങളെ അഭിമുഖീകരിക്കേണ്ടി വരുന്നതാണ്. സഹപ്രവർത്തകർ  പരാതികൾ ഉയർത്താം. കർമ്മപരാങ്മുഖത്വത്തിൻ്റെ പിടിയിലാവും. വ്യക്തിപരമായ ശുഭതീരുമാനങ്ങൾക്കും ഉചിത സന്ദർഭമല്ല. വിവാഹാലോചനകളിൽ പുരോഗതി ഉണ്ടാവണമെന്നില്ല. 

സുഹൃത്തുക്കൾ സന്ദർഭം മനസ്സിലാക്കി പെരുമാറിയില്ലെന്ന്  വരാം. ഉഷ്ണ/വാത/പകർച്ചവ്യാധികൾ ഉപദ്രവിച്ചേക്കാം. വീടുവിട്ട് നിൽക്കുന്നവർക്ക് പുനസ്സമാഗമം നീളുന്നതാണ്. അന്യനാട്ടിലേക്ക് പോകുന്നവർ നിയമാനുസൃതമാണ് യാത്രയെന്ന് ഉറപ്പുവരുത്തേണ്ടതുണ്ട്. ദിവസ വേതനക്കാർ, കമ്മീഷൻ ഏജൻ്റന്മാർ,  കരാർ പണികൾ ചെയ്യുന്നവർ എന്നിങ്ങനെയുള്ളവർക്ക് സംതൃപ്തിയുണ്ടാവും.

Read More

• മീനമാസത്തെ നക്ഷത്രഫലം, അശ്വതി മുതൽ ആയില്യം വരെ: Monthly Horoscope for Meenam
• മീനമാസത്തെ നക്ഷത്രഫലം, മകം മുതൽ തൃക്കേട്ട വരെ: Monthly Horoscope for Meenam
• മീനമാസത്തെ നക്ഷത്രഫലം, മൂലം മുതൽ രേവതി വരെ: Monthly Horoscope for Meenam
• സമ്പൂർണ്ണ വാരഫലം, അശ്വതി മുതൽ രേവതി വരെ; March 03-March 09, 2024, Weekly Horoscope