സമ്പൂര്‍ണ വാരഫലം, അശ്വതി മുതൽ രേവതി വരെ; April 21-April 27, 2024, Weekly Horoscope

ആദിത്യൻ മേടം രാശിയിൽ അശ്വതി ഞാറ്റുവേലയിൽ സഞ്ചരിക്കുന്നു. 27 ശനിയാഴ്ച ഉച്ചമുതൽ ആദിത്യൻ ഭരണി ഞാറ്റുവേലയിൽ പ്രവേശിക്കുകയാണ്. ചന്ദ്രൻ ഉത്രം മുതൽ കേട്ട വരെയുള്ള നക്ഷത്രമണ്ഡലങ്ങളിൽ സഞ്ചരിക്കുന്നു. ഏപ്രിൽ 23ന് മേടപ്പത്തും ചിത്രാപൗർണമിയും കൂടിയ ദിവസമാണ്. ഏപ്രിൽ 24 മുതൽ കൃഷ്ണപക്ഷം തുടങ്ങുന്നു. 

ഏപ്രിൽ 23 ന് ചൊവ്വ കുംഭം രാശിയിൽ നിന്നും മീനം രാശിയിൽ പ്രവേശിക്കുന്നു. 24ന് ശുക്രൻ മീനം രാശിയിൽ നിന്നും മേടം രാശിയിൽ സംക്രമിക്കുകയാണ്. ബുധൻ നീചസ്ഥനായി മീനം രാശിയിൽ രേവതി നക്ഷത്രത്തിൽ തുടരുന്നു. ശനി കുംഭം രാശിയിൽ പൂരൂരുട്ടാതി നക്ഷത്രത്തിലും വ്യാഴം മേടം രാശിയിൽ കാർത്തിക നക്ഷത്രത്തിലുമാണ്. രാഹു മീനം രാശിയിൽ രേവതി നക്ഷത്രത്തിലും കേതു കന്നിരാശിയിൽ അത്തം നക്ഷത്രത്തിലും സഞ്ചരിക്കുന്നു. 

ഈയാഴ്ചയിലെ അഷ്ടമരാശിക്കൂറ് ഇപ്രകാരമാണ്. ഞായറും തിങ്കളും കുംഭക്കൂറുകാർക്കാണ് അഷ്ടമരാശി വരുന്നത്. ചൊവ്വയും ബുധനും മുഴുവനും വ്യാഴം രാവിലെ വരെയും മീനക്കൂറുകാർക്ക് അഷ്ടമരാശി ഭവിക്കുന്നു. തുടർന്ന് ശനി അർദ്ധരാത്രി വരെ മേടക്കൂറുകാർക്കാണ് അഷ്ടമരാശി സംഭവിക്കുന്നത്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നക്ഷത്രങ്ങളിൽ ജനിച്ചവരുടെ വാരഫലം ഇവിടെ അപഗ്രഥിക്കുന്നു.

അശ്വതി

ന്യായമായ ആഗ്രഹങ്ങൾ നേടിയെടുക്കാൻ കഴിയുന്ന വാരമാണ്. സ്വന്തം താത്പര്യങ്ങൾ സംരക്ഷിക്കപ്പെടും. ശരിയായ ദിശയിൽ കൂടിയാണ് ജീവിതം പുരോഗമിക്കുന്നതെന്ന് ബോധ്യമാകുന്നതാണ്. ആഢംബര വസ്തുക്കൾ വാങ്ങിയേക്കും. കർമ്മരംഗത്ത് അഭംഗുരമായ മുന്നേറ്റം നടത്തുന്നതാണ്. ദാമ്പത്യം സമാധാനപൂർണമാകും. കുടുംബത്തിൻ്റെ ആവശ്യങ്ങൾ നിറവേറ്റും. സാമ്പത്തികമായി മെച്ചപ്പെട്ട വാരമാണ്. കലാപരമായ സിദ്ധികൾക്ക് പ്രോൽസാഹനം ലഭിക്കും. വാരാന്ത്യത്തിന് മികവ് കുറയുന്നതാണ്.

ഭരണി

നക്ഷത്രാധിപനായ ശുക്രന് ജന്മരാശിയിലേക്ക് മാറ്റം വരുന്ന വാരമാണ്. സ്വാഭിപ്രായം വിലമതിക്കപ്പെടും. സമൂഹത്തിൻ്റെ ആദരം ലഭിക്കുന്നതാണ്. ഇഷ്ടവസ്തുക്കൾ വാങ്ങാനാവും. സഹജമായ കഴിവുകൾ പുറത്തെടുക്കാൻ സന്ദർഭം ഉണ്ടാവും. ബിസിനസ്സിൽ പുരോഗതി ദൃശ്യമാകുന്നതാണ്. പ്രണയികൾക്ക് സന്തോഷമുണ്ടാവും. ദാമ്പത്യത്തിൽ പാരസ്പര്യം വർദ്ധിക്കും. ഭൂമിയിടപാടുകളിൽ അമളി പിണയാനിടയുണ്ട്. വെള്ളി, ശനി ദിവസങ്ങളിൽ ശുഭാരംഭം ഒഴിവാക്കുന്നത് ഉചിതം.

കാർത്തിക

സ്ഥിരോത്സാഹം പ്രകടിപ്പിക്കും. കാര്യവിഘ്നമുണ്ടാവില്ല. സഹജസിദ്ധികൾ തിരിച്ചറിയുന്നതാണ്. എതിരാളിയുടെ കരുനീക്കങ്ങൾ പ്രതിരോധിക്കും. കുടുംബ ജീവിതത്തിൽ ശാന്തതയുണ്ടാവും. നവസംരംഭങ്ങൾ തുടങ്ങാൻ വേണ്ട അറിവുകൾ സമ്പാദിക്കും. സഹപ്രവർത്തകർക്കൊപ്പം യാത്രകൾ നടത്തും.  സർക്കാരിൽ നിന്നും ലഭിക്കേണ്ട അനുവാദം, രേഖ മുതലായവ കൈവശമെത്തിച്ചേരും. ധനവിനിയോഗത്തിൽ ജാഗ്രത വേണം. സ്വതന്ത്ര നിലപാടുകൾ മൂലം വേണ്ടപ്പെട്ടവരിൽ നിന്നുള്ള എതിർപ്പുകൾ സമ്പാദിച്ചേക്കും.

രോഹിണി

വിജയപ്രതീക്ഷ സഫലമാകും. രാഷ്ട്രീയ ഭിന്നതകൾ സൗഹൃദത്തെ ബാധിക്കുന്നതാണ്. സ്ത്രീകളിൽ നിന്നും പ്രതീക്ഷിച്ച സഹായം ലഭിക്കണമെന്നില്ല. ആകസ്മിക യാത്രകൾ വേണ്ടിവരുന്നതാണ്. ദൂരദിക്കിലേക്ക് സ്ഥലം മാറ്റത്തിനുള്ള സാഹചര്യം ഒരുങ്ങും. പിതൃപുത്രബന്ധത്തിൽ പിണക്കം ഏർപ്പെടാനിടയുണ്ട്. ഭൂമിയിൽ നിന്നും ആദായം ഉണ്ടാകും. വിരുദ്ധഭക്ഷണം ആരോഗ്യപ്രശ്നങ്ങൾ സൃഷ്ടിച്ചേക്കാം. ഭോഗവിഘാതം, അമിതവ്യയം ഇവ സാധ്യതകളാണ്. നിഗൂഢമായ വഴികളിൽ സഞ്ചരിക്കുന്നതിൽ ആഹ്ളാദം കണ്ടെത്തും.

മകയിരം

ഉത്കൃഷ്ടമായ ആശയങ്ങളും സമീപനങ്ങളും പുലർത്തും. പ്രായോഗികമായി ചിലപ്പോൾ അവ വെല്ലുവിളി നേരിടുന്നതാണ്. പുതിയ സാഹചര്യങ്ങളുമായി വേഗം പൊരുത്തപ്പെടും. വാഹനത്തിനോ വീടിനോ അറ്റകുറ്റപ്പണി വേണ്ടി വരാം. സഹോദരരുമായി ഒത്തുചേർന്നുള്ള ബിസിനസ്സിൽ പ്രശ്നങ്ങൾ ഉദയം ചെയ്യാം. ബന്ധുക്കളെ ഉപദേശിക്കുന്നത് അനിഷ്ടത്തിന് കാരണമാകുന്നതാണ്. വൃദ്ധജനങ്ങളുടെ ചികിൽസാമാറ്റം ഗുണകരമാവും. ഏജൻസി / ഡീലർഷിപ്പ് ലാഭകരമാകുന്നതാണ്.

തിരുവാതിര

ഉപരിവിദ്യാഭ്യാസത്തിന് ഒരുങ്ങുന്നവർ പരിശ്രമവും പരിശീലനവും തുടരും. ജോലി തേടുന്നവർക്ക് പുതിയ അവസരങ്ങൾ സിദ്ധിക്കാവുന്നതാണ്. കുടുംബാംഗങ്ങളുടെ ഇടയിലെ അനൈക്യം പരിഹരിക്കാൻ മുൻകൈയ്യെടുക്കും. പിതാവിൻ്റെ പിന്തുണയുണ്ടാവും. ഉദ്യോഗസ്ഥർക്ക് പദവിയിൽ ഉയർച്ച പ്രതീക്ഷിക്കാം. സംഘടനയുടെ നേതൃസ്ഥാനത്തേക്ക് പരിഗണിക്കപ്പെടും. ഗൃഹനിർമ്മാണത്തിൽ പുരോഗതിയുണ്ടാവും. ലോട്ടറി, ചിട്ടി മുതലായവയിൽ നിന്നും ധനാഗമം വന്നെത്തും. ശത്രുക്കളുടെ പ്രവർത്തനം അലോസരമുണ്ടാക്കാം.

പുണർതം

ആലോചനയും പുനരാലോചനയും അനിവാര്യമായ സന്ദർഭമാണ്. ഏകപക്ഷീയമായ തീരുമാനങ്ങൾക്ക് കുടുംബാംഗങ്ങളുടെ പിന്തുണ ലഭിച്ചേക്കില്ല. സുഹൃത്തുക്കളുടെ സഹായം സമയോചിതമായി വന്നെത്തുന്നതാണ്. അനുബന്ധ വരുമാന മാർഗങ്ങൾ നേട്ടങ്ങളുണ്ടാക്കും. വിദേശ പഠനത്തിനുള്ള സാഹചര്യം അനുകൂലമാവും.  കർമ്മരംഗത്ത് ചില തടസ്സങ്ങൾ അനുഭവപ്പെടുന്നതാണ്. മകളുടെ ഗൃഹനിർമ്മാണത്തിന് മുൻകൈയ്യെടുക്കും.

പൂയം

അപ്രതീക്ഷിത കേന്ദ്രങ്ങളിൽ നിന്നും സഹകരണവും പിന്തുണയും വന്നെത്തുന്നതാണ്. പൂർവ്വസുഹൃത്തുക്കളെ കണ്ടെത്താനാവും. സമൂഹത്തിനുകൂടി പ്രയോജനം ചെയ്യുന്ന കാര്യങ്ങളിൽ മുഴുകും. വളർത്തുമൃഗങ്ങളുടെ പരിപാലനത്തിൽ താല്പര്യം വർദ്ധിക്കും. വമ്പിച്ച മുതൽമുടക്കുകൾ ഗുണമുണ്ടാക്കിയെന്ന് വന്നേക്കില്ല. എന്നാൽ ചെറുകിട സംരംഭങ്ങൾ ആദായകരമാക്കും. തൊഴിൽ യാത്രകൾ ഗുണകരമാവും. കുടുംബജീവിതത്തിൽ സ്വസ്ഥതയുണ്ടാവും. മാതാവിൻ്റെ ആരോഗ്യപ്രശ്നങ്ങൾക്ക് ചികിൽസാമാറ്റം വേണ്ടിവരുന്നതാണ്.

ആയില്യം

നക്ഷത്രനാഥനായ ബുധന് നീചമൗഢ്യാദികൾ തുടരുന്നതിനാൽ കർമ്മരംഗത്ത് തടസ്സങ്ങളുണ്ടാവും. ആശയവിനിമയത്തിൽ പാളിച്ചകൾ വരാം. പത്തിലെ ആദിത്യസ്ഥിതി രാഷ്ട്രീയ നേട്ടങ്ങൾക്ക് കാരണമാകുന്നതാണ്. ഉന്നതരുടെ സൗഹൃദം ലഭിച്ചേക്കാം. ആസൂത്രണ മികവ് പ്രായോഗികമായി വിജയിക്കാൻ സഹായിക്കും. ബന്ധുക്കളുടെ നിസ്സഹകരണം തുടരപ്പെടുന്നതാണ്. ജീവിതപങ്കാളിയുടെ ജോലിക്കാര്യം സഫലമാവും. നവീനമായ ഗൃഹോപകരണങ്ങൾ സ്വന്തമാക്കിയേക്കും. ആരോഗ്യപരമായി സമ്മിശ്രമായ വാരമാണ്.

മകം

വാക്സ്ഥാനത്ത് കേതുവുള്ളതിനാൽ സംഭാഷണത്തിൽ ശ്രദ്ധ വേണം. നേട്ടങ്ങൾ തടസ്സപ്പെടാനിടയുണ്ട്. ധനവരവ് പതുക്കെയായേക്കും. വാരമദ്ധ്യത്തിൽ ന്യായമായ കാര്യങ്ങൾ നടന്നുകിട്ടും. സുഹൃത്തുക്കളുടെ വിശ്വാസം നേടിയെടുക്കാൻ കഴിയുന്നതാണ്. ഉദ്യോഗസ്ഥരുടെ കൃത്യനിഷ്ഠ അംഗീകരിക്കപ്പെടും. കലാസാഹിത്യ പ്രവർത്തനങ്ങളിൽ ഔൽസുക്യമേറും. വാരാന്ത്യത്തിൽ അനാവശ്യ ചെലവുകൾ വന്നേക്കും. മനക്ലേശമുണ്ടാകും. മാതാവിൻ്റെ ക്ഷേമത്തിനായി പ്രവർത്തിക്കുന്നതാണ്.

പൂരം

നക്ഷത്രനാഥന് ഭാഗ്യസ്ഥാനസ്ഥിതി വരുന്നതിനാൽ ഭാഗ്യാനുഭവങ്ങൾ ഉണ്ടാവും. അവഗണിച്ചവർ പരിഗണിക്കുന്നതാണ്. ഔദ്യോഗിക കൃത്യങ്ങൾ ഭംഗിയായി പൂർത്തിയാക്കും.  കുടുംബത്തിലെ സ്ത്രീകളുടെ പിന്തുണ ലഭിക്കുന്നതാണ്. പുതിയ ഗാർഹികോപകരണങ്ങൾ വാങ്ങാനാവും. സഹോദരരുടെ പ്രശ്നങ്ങൾ പരിഹരിക്കുന്നതിൽ വിജയിക്കുന്നതാണ്.  വിൽക്കാനിട്ട ഭൂമി വാങ്ങാനാളെത്തും. കാമുകീ കാമുകന്മാർക്കിടയിൽ ഹൃദയബന്ധം ദൃഢമാകും. വീടുവിട്ടു നിൽക്കുന്നവർക്ക് വീട്ടിലേക്ക് മടങ്ങാനാവും.

ഉത്രം

കർമ്മരംഗത്ത് ശോഭിക്കാൻ കഴിയുന്ന വാരമാണ്. തൊഴിലിടത്തിൽ സമാധാനപൂർണ്ണമായ അന്തരീക്ഷം പ്രതീക്ഷിക്കാം. ഉദ്യോഗസ്ഥർക്ക് മേലധികാരികളുടെ പ്രീതിയും പരിഗണനയും ഉണ്ടാവുന്നതാണ്. പ്രൊഫഷണൽ വിദ്യാഭ്യാസത്തിന് ഒരുങ്ങുന്നവർക്ക് വ്യക്തത വന്നെത്തും. പിതൃപുത്രബന്ധം രമ്യമാകും. പിണങ്ങിയ കമിതാക്കൾ വീണ്ടും ഇണങ്ങുന്നതാണ്. ദാമ്പത്യത്തിൽ അനുരഞ്ജനമാർഗം പുലർത്തും. ആത്മീയ താല്പര്യങ്ങൾ വർദ്ധിക്കും. ബന്ധുക്കളുടെ ആതിഥ്യം മനസ്സന്തോഷമേകും.

അത്തം

മനസ്സുഖം കുറയാനിടയുണ്ട്. അനാവശ്യമായ തിടുക്കം കാട്ടും. ദൂരയാത്രകൾക്ക് സാധ്യതയുള്ള വാരമാണ്. ക്ഷിപ്രസാധ്യങ്ങളായ കാര്യങ്ങൾ നേടിയെടുക്കാൻ കൂടുതൽ സമയവും അധ്വാനവും ആവശ്യമായി വരുന്നതാണ്. തൊഴിലിൽ ലാഭം കുറയുന്നത് കർമ്മമേഖലയോട് മടുപ്പുണ്ടാക്കും. കലാപ്രവർത്തകർക്ക് കൂടുതൽ അനുകൂലമായ കാലമാണ്. നല്ല അവസരങ്ങൾ തേടിയെത്തും. വെള്ളി, ശനി ദിവസങ്ങളിൽ സുഹൃൽസംഗമവും സന്തോഷാനുഭവങ്ങളും ഉണ്ടാകുന്നതാണ്.

ചിത്തിര

നക്ഷത്രനാഥനായ ചൊവ്വയ്ക്ക് രാഹുയോഗം വരുന്നതിനാൽ ക്ലേശങ്ങളുണ്ടാവും. മനസ്സ് മ്ളാനമായേക്കാം.  അനിഷ്ടന്മാരുമായി കൂട്ടുകൂടേണ്ടി വരുന്നതാണ്. പുതിയ കാര്യങ്ങൾ തുടങ്ങുക കരുതിയതുപോലെ സുഗമമല്ലെന്നറിയും. പരീക്ഷ എഴുതുന്നവർക്ക് പൂർണതൃപ്തി ഉണ്ടാവില്ല. ബിസിനസ്സിൽ മുന്നേറ്റം കുറഞ്ഞേക്കാം. സാധാരണ ചെയ്യുന്ന കാര്യങ്ങൾ മുടക്കം കൂടാതെ നടക്കും. അത്യാവശ്യങ്ങൾക്ക് ധനം തടസ്സമാവില്ല. കുടുംബത്തിൻ്റെ പിന്തുണ കരുത്താകും.

ചോതി

സാമ്പത്തികമായി മെച്ചപ്പെട്ട വാരമാവും. ഊഹക്കച്ചവടത്തിൽ നേട്ടങ്ങൾ കൈവരിക്കുന്നതാണ്. ഓൺലൈനിലൂടെ നടത്തുന്ന ബിസിനസ്സിൽ നേട്ടം വന്നുചേരും. ജീവിത പങ്കാളിക്ക് പുതിയ ജോലി ലഭിച്ചേക്കാം. അന്യദിക്കിൽ മകൾക്ക് ഉപരിപഠനം തുടരുവാനാവും. പിതൃബന്ധുക്കളെ സന്ദർശിക്കുന്നതാണ്. ഭൂമി വിൽക്കാനുള്ള തീരുമാനത്തിന് കുടുംബാംഗങ്ങളുടെ അംഗീകാരം ലഭിക്കും. ക്ഷേത്രാടനത്തിനും ദൈവ സമർപ്പണത്തിനും അവസരം വന്നുചേരും. വെള്ളി, ശനി ദിവസങ്ങളിൽ അലച്ചിലേറുന്നതാണ്.

വിശാഖം

നല്ലതുടക്കം ലഭിക്കുന്ന വാരമാണ്. സന്തോഷാനുഭവങ്ങൾ വന്നുചേരും. ആസൂത്രണം ചെയ്ത കാര്യങ്ങൾ നടപ്പിലാക്കുവാനാവും. വാഗ്ദാനങ്ങൾ പാലിക്കപ്പെടും. സംഘടനാ രംഗത്ത് സജീവമാകുന്നതാണ്. സുഹൃത്തുക്കളുടെ കാര്യങ്ങൾക്കായി കൂടുതൽ സമയം കണ്ടെത്തിയേക്കും. ആഢംബരവസ്തുക്കൾ പാരിതോഷികമായി ലഭിക്കുന്നതാണ്. വിരുന്നുകളിൽ പങ്കെടുക്കും. വിനോദയാത്രകൾ സംഘടിപ്പിക്കുന്നതിൽ മുഖ്യപങ്കു വഹിക്കും. അനുബന്ധ തൊഴിൽ വേണ്ടത്ര പുരോഗമിക്കാത്തത് ആശങ്കയുയർത്തും.

അനിഴം

പത്താം ഭാവാധിപനായ ആദിത്യൻ ഉച്ചരാശിയിൽ സ്ഥിതി ചെയ്യുകയാൽ കർമ്മമേഖല ശോഭനമാവും. ഉദ്യോഗസ്ഥന്മാർക്ക് കഴിവ് തെളിയിക്കാൻ അവസരമുണ്ടാവും. മത്സരങ്ങളിൽ നല്ല മുന്നേറ്റമുണ്ടാക്കും. കച്ചവടത്തിൽ വിപുലീകരണം സാധ്യമാകുന്നതാണ്. ഉപഭോക്താക്കളുടെ പ്രീതി നേടും. പിതാവിൻ്റെ സ്വത്ത് സംബന്ധിച്ച തർക്കങ്ങളിൽ അനുകൂലത നേടും. സ്ത്രീകളുടെ വിരോധമോ എതിർപ്പോ നേടാനിടയുണ്ട്. വാരമധ്യത്തിൽ അലച്ചിലുണ്ടാവാൻ സാധ്യത കാണുന്നു.

തൃക്കേട്ട

നേട്ടങ്ങൾക്കൊപ്പം കോട്ടങ്ങളും ഉണ്ടാവുന്ന വാരമാണ്. തൊഴിൽ പരമായി മെച്ചമുണ്ടാവും. പാരമ്പര്യ തൊഴിലുകൾ ചെയ്യുന്നവർക്ക് വായ്പകൾ പ്രയോജനപ്പെടുത്താൻ കഴിഞ്ഞേക്കും. പുതുസംരംഭങ്ങൾ ബാലാരിഷ്ടകൾ കടന്ന് നല്ലഫലം നൽകി തുടങ്ങും. പിതാവുമായുള്ള ബന്ധം മെച്ചപ്പെടും. തൊഴിൽ അവസരങ്ങൾ തേടുന്നവർക്ക് നിരാശപ്പെടേണ്ടി വരില്ല. അന്യദേശത്ത് പഠനത്തിന് സാഹചര്യം അനുകൂലമാവാം. കുടുംബജീവിതത്തിൽ അസ്വസ്ഥതകൾ വരാം. മക്കൾക്കിടയിലെ അനൈക്യം വിഷമിപ്പിക്കുന്നതാണ്.

മൂലം

പ്രവർത്തനമികവ് ഉണ്ടാവും. ഔദ്യോഗിക ജീവിതം സന്തോഷകരമാവും. ആലോചനാ യോഗങ്ങളിൽ മുഖ്യത്വം സിദ്ധിക്കുന്നതാണ്. അപ്രതീക്ഷിത സാമ്പത്തിക ലാഭം വന്നുചേരാം. ആഢംബര വസ്തുക്കൾ പാരിതോഷികമായി ലഭിക്കുന്നതാണ്. പുതിയ കാര്യങ്ങൾ പഠിക്കാനുള്ള ആർജ്ജവമുണ്ടാവും. ഗൃഹത്തിൽ സമാധാനക്കുറവ് അനുഭവപ്പെടും.'വർക്ക് അറ്റ് ഹോം' രീതിയിൽ പ്രവർത്തിച്ചു കൊണ്ടിരുന്നവർക്ക് ജോലിസ്ഥലത്തേക്ക് മടങ്ങേണ്ടി വന്നേക്കും.

പൂരാടം

നല്ലതുടക്കവും കഴിവുകൾക്ക് പ്രോൽസാഹനവും കിട്ടുന്ന വാരമാണ്. കർമ്മരംഗത്ത് അധീശത്വം പ്രകടിപ്പിക്കാനാവും. മേലധികാരികളുടെ പ്രീതി നേടുന്നതാണ്.  ബിസിനസ്സ് യാത്രകൾ പ്രയോജനം ചെയ്യുന്നതാണ്. ചിലർക്ക് വീടുവിട്ടു നിൽക്കേണ്ട സ്ഥിതിയുണ്ടാവും. വാഹന യാത്രയിൽ ഏറ്റവും കരുതൽ വേണം. കുടുംബത്തിൽ 'തലമുറകൾ തമ്മിലുള്ള വിടവ്' വർദ്ധിക്കുന്നതാണ്. മനസ്സ് അശാന്തമായേക്കും. പൊതു പ്രവർത്തകർക്ക് മടുപ്പ് അനുഭവപ്പെടാം.

ഉത്രാടം

ആദിത്യൻ്റെ ഉച്ചസ്ഥിതി മൂലം ആത്മവിശ്വാസമുണ്ടാവും. അതിൻ്റെ പ്രതിഫലനം എല്ലാ രംഗത്തും  പ്രകടമാവും. പരീക്ഷയിൽ  ഉയർന്ന വിജയം കരസ്ഥമാക്കുന്നതാണ്. സംഘടനകളിൽ പദവി ഉയരുന്നതാണ്. കച്ചവടത്തിൽ ലാഭം അധികരിച്ചേക്കും. പുതിയ ശാഖ തുറക്കുന്നത് പരിഗണനയിൽ ഉണ്ടാവും. ബന്ധുക്കളുമായി കലഹിച്ചേക്കും. ദാമ്പത്യത്തിൽ സ്വൈരക്കേടുകൾ വർദ്ധിക്കാം. വാരാന്ത്യത്തിൽ പാഴ്ച്ചെലവുകൾ വരും.

തിരുവോണം

സ്വതസ്സിദ്ധമായ കർമ്മകുശലത അനുമോദിക്കപ്പെടും.  ഉദ്യോഗസ്ഥർക്ക് സഹപ്രവർത്തകരുടെ പിന്തുണയുണ്ടാവും. പുതിയ ആശയങ്ങളും പരിഷ്കാരങ്ങളും ബിസിനസ്സ് രംഗത്ത് ആവിഷ്കരിക്കും. ഓൺലൈൻ ബിസിനസ്സ് പുഷ്ടിപ്പെടുന്നതാണ്. മകളുടെ ജോലിസ്ഥലം സന്ദർശിക്കും. കൂട്ടുകാരുമൊത്ത് വിനോദിക്കാൻ അവസരം വന്നെത്തും. കടബാധ്യതകൾ തീർക്കാൻ കൊണ്ടുപിടിച്ച ശ്രമം നടത്തും. സർക്കാരിൽ നിന്നും ലഭിക്കേണ്ട ലൈസൻസ് ലഭിക്കാൻ വൈകും. പിതാവിൻ്റെ ആരോഗ്യകാര്യത്തിൽ ജാഗ്രതവേണം.

അവിട്ടം

പരിശ്രമിച്ച് ഉപേക്ഷിച്ച കാര്യങ്ങളിൽ വീണ്ടും ശ്രമിക്കുന്ന പക്ഷം വിജയം നേടാനാവും. കരാർ ജോലിചെയ്യുന്നവർ സ്ഥിരനിയമനത്തിന് പരിഗണിക്കപ്പെടാം. പ്രണയികൾക്കിടയിൽ ഹൃദയബന്ധം ദൃഢമാകുന്നതാണ്. മാതാപിതാക്കളെ ജോലിസ്ഥലത്ത് താമസിപ്പിച്ചേക്കും. രാഷ്ട്രീയമായ എതിർപ്പുകളെ ശക്തമായി നേരിടുവാൻ കഴിയും. സ്ത്രീ സുഹൃത്തുക്കളുടെ സഹായം ലഭിക്കുന്നതാണ്. വസ്തുവ്യാപാരത്തിലെ തടസ്സം നീങ്ങും. അശനശയന സൗഖ്യം ഭവിക്കുന്നതാണ്. പുതിയ വാഹനം വാങ്ങാൻ തീരുമാനിക്കും.

ചതയം

സമ്മർദ്ദങ്ങളുണ്ടായാലും കർമ്മമേഖലയിൽ ആശ്വാസം വന്നെത്തും. ജന്മരാശിയിൽ നിന്നും ചൊവ്വ മാറുന്നത് പല നിലയ്ക്കും  ഗുണകരമാവും. മുതിർന്നവരുടെ ആരോഗ്യസ്ഥിതി മെച്ചപ്പെടുന്നതാണ്. ഉപരിപഠനത്തിന് തയ്യാറെടുപ്പുകൾ നടത്തും. കുടുംബത്തിൽ മംഗളകാര്യങ്ങൾ നടക്കാം. വിദേശത്തു കഴിയുന്നവർക്ക് വിസ സംബന്ധിച്ച പ്രശ്നങ്ങൾ പരിഹരിക്കാനാവും. പാർട്ണർഷിപ്പുകളിൽ നിന്നും ആദായം കുറഞ്ഞേക്കും. ഞായർ, തിങ്കൾ ദിവസങ്ങളിൽ ശുഭത്വം മന്ദീഭവിക്കാം.

പൂരൂരുട്ടാതി

ശനിയും ചൊവ്വയും  പൂരൂരുട്ടാതിയിൽ സഞ്ചരിക്കുകയാൽ പലതരം സമ്മർദ്ദങ്ങൾ വന്നുചേരുന്നതാണ്. ജോലിയിൽ നിരുന്മേഷത ഭവിക്കാം. സാധാരണ കാര്യങ്ങൾ ഒരുവിധം നടന്നുകൂടും. വാക് ബലം കൊണ്ട് എതിർപ്പുകളെ മറികടക്കുന്നതാണ്. കമ്മീഷൻ പ്രവർത്തനം ലാഭകരമായേക്കാം. വാഹനത്തിൻ്റെ അറ്റകുറ്റപ്പണി കഴിയും. കലഹപ്രേരണയുണ്ടാകുന്നതാണ്. സാമ്പത്തിക ഞെരുക്കത്തിന് തെല്ല് അയവ് വരാം. നവസംരംഭങ്ങൾ തുടങ്ങാൻ ഗ്രഹാനുകൂലം ഇല്ലാത്ത കാലമാണ്.

ഉത്രട്ടാതി

ഏഴ്, എട്ട്, ഒമ്പത് ഭാവങ്ങളിൽ ചന്ദ്രൻ സഞ്ചരിക്കുകയാൽ സാമാന്യമായ സുഖവും ഗുണവും സിദ്ധിക്കും. ലക്ഷ്യം നേടാൻ കൂടുതൽ സമയം വേണ്ടി വന്നേക്കും. ദമ്പതികൾക്കിടയിൽ അനുരഞ്ജനം കുറഞ്ഞും കൂടിയുമിരിക്കും. പ്രതീക്ഷിച്ച സ്ഥാനക്കയറ്റം കിട്ടിയേക്കില്ല. വിലപിടിച്ച വസ്തുക്കൾ കൈമോശം വരാനിടയുണ്ട്. വാഗ്ദാനങ്ങൾ പാലിക്കാൻ കഴിയണമെന്നില്ല. ഭൂമിവ്യാപാരത്തിൽ ലാഭം വിചാരിച്ചത്ര ഉണ്ടാവില്ല. വൃദ്ധജനങ്ങൾക്ക് ചികിൽസാ മാറ്റം ഫലവത്താകും.

രേവതി

ഉന്നത പഠനത്തിനുള്ള തയ്യാറെടുപ്പുകൾ സുഗമമാവും. 'വർക്ക് ഫ്രം ഹോം' രീതിയിൽ നിന്നും മാറേണ്ടി വരുന്നതാണ്.  സ്വർണ്ണപ്പണയത്തിലൂടെ അത്യാവശ്യങ്ങൾക്ക് പണം കണ്ടെത്തും. സ്വന്തം ബിസിനസ്സിൽ പാർട്ണർമാരെ തേടുന്നതാണ്. സ്വഭാവത്തിലെ വൈരുദ്ധ്യങ്ങൾ  ചൂണ്ടിക്കാണിക്കപ്പെടും. പ്രണയത്തിൽ പരാജയം സംഭവിക്കാനിടയുണ്ട്. രാഹു ജന്മനക്ഷത്രത്തിൽ തുടരുകയാൽ നിരുന്മേഷതയുണ്ടാവും. സമയബന്ധിതമായി ജോലികൾ ചെയ്യുന്നതിൽ പരാജയമേറ്റുവാങ്ങും. വീടുപണി ഇഴഞ്ഞുനീങ്ങുന്നതാണ്.

Check out MoreHoroscope Columns Here 

• വാരഫലം, മൂലം മുതൽ രേവതി വരെ; April 21-April 27, 2024, Weekly Horoscope
• വാരഫലം, അശ്വതി മുതൽ ആയില്യം വരെ; April 21-April 27, 2024, Weekly Horoscope
• Jupiter Transit 2024: വ്യാഴം ഇടവം രാശിയിലേക്ക് സംക്രമിക്കുന്നു-അശ്വതി മുതല്‍ രേവതി വരെയുള്ള നക്ഷത്രക്കാരുടെ ഫലം
• Vishu Phalam 2024: സമ്പൂർണ വിഷു ഫലം 2024-അശ്വതി മുതൽ രേവതി വരെ