Jupiter Transit 2024: വ്യാഴം ഇടവം രാശിയിലേക്ക് സംക്രമിക്കുന്നു-അശ്വതി മുതല്‍ രേവതി വരെയുള്ള നക്ഷത്രക്കാരുടെ ഫലം

കഴിഞ്ഞ ഒരു വർഷമായി മേടം രാശിയിലൂടെ സഞ്ചരിക്കുന്ന വ്യാഴം അഥവാ ഗുരു (രാശി ചക്രത്തിലെ 'ഗു' എന്ന അക്ഷരം സൂചിപ്പിക്കുന്ന ഗ്രഹം വ്യാഴം അഥവാ ഗുരുവാണ്) 2024 മേയ് മാസം 1-ാം തീയതി / കൊല്ലവർഷം 1199 മേടമാസം 18-ാം തീയതി ബുധനാഴ്ച ഇടവം രാശിയിലേക്ക് പ്രവേശിക്കുന്നു. 

ജ്യോതിഷപരമായി പ്രാധാന്യമുള്ളതാണ് വ്യാഴത്തിൻ്റെ രാശിമാറ്റം അഥവാ രാശിപ്പകർച്ച. വർഷത്തിലൊരിക്കലാണ് വ്യാഴം രാശി മാറുന്നത്.

 മേടം മുതൽ മീനംവരെയുള്ള പന്ത്രണ്ടുരാശികൾ അടങ്ങുന്ന രാശിചക്രം ചുറ്റിവരാൻ വ്യാഴത്തിന് പന്ത്രണ്ടു വർഷം വേണ്ടി വരുന്നു. ഇതിനെ ജ്യോതിഷത്തിലും സാഹിത്യത്തിലും 'വ്യാഴവട്ടം' എന്നുപറയും. 2024 മേയ് ഒന്നിന് ഇടവത്തിൽ പ്രവേശിക്കുന്ന വ്യാഴം 2025 മേയ് - ജൂൺ വരെ  ഒരു കൊല്ലം ഇടവം രാശിയിൽ സഞ്ചരിക്കും എന്നാണ് മനസ്സിലാക്കപ്പെടേണ്ട ആശയം.

വ്യാഴം ഓരോ രാശിയിലും സഞ്ചരിക്കുമ്പോൾ മേടക്കൂറു മുതൽ മീനക്കൂറുവരെയുള്ള പന്ത്രണ്ടുകൂറുകളിൽ ജനിച്ചവർക്ക് (പന്ത്രണ്ടുകൂറുകളിലായി വരുന്ന അശ്വതി മുതൽ രേവതി വരെയുള്ള 27 നക്ഷത്രങ്ങളിൽ ജനിച്ചവർക്ക്) എന്തൊക്കെ അനുഭവങ്ങൾ വരിക എന്നത് ജ്യോതിഷത്തിലെ വാർഷിക ഫലനിരൂപണത്തിൽ പ്രധാനമാണ്. 

പ്രായേണ വ്യാഴം അവരവരുടെ ജന്മരാശിയുടെ അഥവാ ജനിച്ച കൂറിൻ്റെ 2, 5, 7, 9, 11 എന്നീ അഞ്ച് രാശികളിലൂടെ സഞ്ചരിക്കുമ്പോഴാണ് ഗുണം നൽകുക. അപ്രകാരം ചിന്തിക്കുമ്പോൾ മേടം (രണ്ടാംകൂറിൽ), കർക്കടകം ( പതിനൊന്നാംകൂറിൽ), കന്നി (ഒമ്പതാം കൂറിൽ), വൃശ്ചികം (ഏഴാംകൂറിൽ), മകരം ( അഞ്ചാം കൂറിൽ) എന്നീ കുറുകളിൽ ജനിച്ചവർക്കാണ് വ്യാഴത്തിൻ്റെ ഇടവം രാശിയിലേക്കുള്ള മാറ്റം ഗുണം ചെയ്യുക.  

വ്യാഴം ജന്മരാശിയിലും (ഇടവക്കൂറുകാർക്കും), മൂന്നാം രാശിയിലും (മീനക്കൂറുകാർക്കും), നാലാം രാശിയിലും (കുംഭക്കൂറുകാർക്കും), ആറാം രാശിയിലും  (ധനുക്കൂറുകാർക്കും), എട്ടാം രാശിയിലും (തുലാക്കൂറുകാർക്കും), പത്താം രാശിയിലും (ചിങ്ങക്കൂറുകാർക്കും), പന്ത്രണ്ടാം രാശിയിലും (മിഥുനക്കൂറുകാർക്കും) ഗുണരഹിതനാണ് അഥവാ ദോഷപ്രദനാണ്.  ഗ്രഹനില അഥവാ ജാതകം അനുസരിച്ച് നല്ലദശയും അപഹാരവുമൊക്കെയാണ് നടക്കുന്നതെങ്കിൽ വ്യാഴമാറ്റം കൊണ്ടുള്ള ദോഷാനുഭവങ്ങൾ ലഘൂകരിക്കപ്പെടും.

ജീവിതത്തെ ഉയർത്തുകയും ഭൗതികവും ആത്മികവുമായ വളർച്ച നൽകുകയും ചെയ്യുന്ന ഗ്രഹമാണ് വ്യാഴം. തടസ്സങ്ങൾ അകന്ന് ജീവിതത്തിൻ്റെ സമസ്ത മേഖലകളും അഭ്യുദയത്തിലെത്താൻ വ്യാഴം ഏവരേയും അനുഗ്രഹിക്കുന്നതായി സങ്കല്പിക്കപ്പെടുന്നു. നവഗ്രഹങ്ങളിൽ ഈശ്വരാംശം ഏറ്റവും കൂടുതലുള്ളത് വ്യാഴഗ്രഹത്തിനാണ്. 'സർവ്വേശ്വരകാരകൻ' എന്ന് വ്യാഴം വിളിക്കപ്പെടുന്നുണ്ട്. എല്ലാ ഈശ്വരന്മാരുടെയും പ്രതിനിധിയാണ് വ്യാഴം എന്നാണ് ആ വിശേഷണത്തിൻ്റെ സാരം. 

മേടക്കൂറ് മുതൽ മീനക്കൂറുവരെയുള്ള പന്ത്രണ്ടു കുറുകളിൽ ജനിച്ചവരുടെ വ്യാഴമാറ്റം മൂലമുള്ള വാർഷിക ഫലം ഇവിടെ വിവരിക്കപ്പെടുന്നു.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

കഴിഞ്ഞ ഒരു വർഷമായി ജന്മരാശിയിൽ തുടരുന്ന വ്യാഴം വളർച്ചയ്ക്ക് പ്രതിബന്ധം സൃഷ്ടിച്ചിരുന്നു. വ്യാഴം അനുകൂലഭാവമായ രണ്ടാം ഭാവത്തിലേക്ക് / ഇടവം രാശിയിലേക്ക് മാറുന്നതിനാൽ ഗുണാധിക്യം എല്ലാ മേഖലയിലും വന്നെത്തും. തെളിഞ്ഞ ചിന്തയുണ്ടാവും. ആശയവിനിമയശേഷി വർദ്ധിക്കും. പുരോഗതിയിലേക്ക് വഴി തുറക്കപ്പെടും. അഭിലഷിച്ച വിഷയത്തിൽ ഉന്നത വിദ്യാഭ്യാസത്തിന് അവസരം ലഭിക്കുന്നതാണ്. തൊഴിൽ തേടുന്നവർക്ക് അർഹമായ അവസരങ്ങൾ വന്നെത്തും. ഉദ്യോഗസ്ഥർക്ക് സ്ഥാനക്കയറ്റം, വേതന വർദ്ധനവ്, ഇഷ്ട സ്ഥലത്തേക്ക് സ്ഥലംമാറ്റം എന്നിവ പ്രതീക്ഷിക്കാം. സ്വകാര്യ സ്ഥാപനത്തിൽ ജോലി ചെയ്യുന്നവർക്ക് സ്വതന്ത്ര ചുമതല വഹിക്കാനാവും. അവിവാഹിതർക്ക് വിവാഹ ജീവിതത്തിൽ പ്രവേശിക്കാൻ കഴിയുന്നതാണ്. മനക്ലേശങ്ങളും 
വിഷാദ ഭാവങ്ങളും പിൻവാങ്ങുന്നതായിരിക്കും.

ഇടവക്കൂറിന് (കാർത്തിക 2, 3, 4 പാദങ്ങൾ, രോഹിണി, മകയിരം 1,2 പാദങ്ങൾ) 

ഇടവക്കൂറുകാർക്ക് വ്യാഴം പന്ത്രണ്ടാം രാശിയിൽ നിന്നും ജന്മരാശിയിലേക്കാണ് സംക്രമിക്കുന്നത്. ജന്മരാശിയിൽ സഞ്ചരിക്കുന്ന വ്യാഴം  മാനസിക പിരിമുറുക്കം സൃഷ്ടിക്കും. തെറ്റായ തീരുമാനങ്ങൾ കൈക്കൊള്ളാൻ പ്രേരണയേകുന്നതാണ്. കർമ്മരംഗത്ത് ഉദാസീനതയുണ്ടാവും. അന്യദിക്കിലേക്ക് സ്ഥലംമാറ്റം വരാം.  സാമ്പത്തികമായ ക്ലേശങ്ങൾ തുടരപ്പെടുന്നതാണ്. ദുർവ്യയം അധികരിക്കാം. കുടുംബാംഗങ്ങൾക്കിടയിൽ രമ്യത കുറയാനിടയുണ്ട്. നിലവിലെ ജോലി ഉപേക്ഷിക്കുന്നത് കരുതലോടെയാവണം. അന്യനാട്ടിൽ പഠനം, തൊഴിൽ ഇവയ്ക്ക് സാധ്യതയുണ്ട്. ഏജൻസി പ്രവർത്തനം, ദിവസവേതനക്കാർ, വഴിനടന്നുള്ള കച്ചവടം ചെയ്യുന്നവർ തുടങ്ങിയവർക്ക് തരക്കേടില്ലാത്ത വരുമാനം പ്രതീക്ഷിക്കാം. മക്കൾക്ക് ശ്രേയസ്സുണ്ടാവും. അവിവാഹിതർക്ക് വിവാഹ സാധ്യതയുണ്ട്. വിവാഹിതർക്ക് ദാമ്പത്യസുഖം പ്രതീക്ഷിക്കാം. വലിയ രീതിയിൽ മുതൽ മുടക്കിയുള്ള ബിസിനസ്സിൽ ഏർപ്പെടുന്നത് കരണീയമല്ല. വസ്തുതർക്കങ്ങൾ വ്യവഹാരത്തിലേക്ക് നീങ്ങാനിടയുണ്ട്.

മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

വ്യാഴം പതിനൊന്നാം ഭാവത്തിൽ നിന്നും പന്ത്രണ്ടാം ഭാവത്തിൽ സഞ്ചരിക്കുകയാണ്. വ്യയം, പതനം, സ്ഥാനചലനം ഇവയൊക്കെ പന്ത്രണ്ടിലെ വ്യാഴത്തിൻ്റെ പൊതുവായ ഫലങ്ങളാണ്. വളരെ ശ്രദ്ധയും സൂക്ഷ്മതയും ആവശ്യമുള്ള കാലഘട്ടമാണ്. പലതരം നേട്ടങ്ങളുണ്ടാകുന്നതാണ്. പക്ഷേ അവയ്ക്ക് തെളിച്ചം കുറവായിരിക്കും. വരവ് മോശമാവില്ല. എന്നാൽ ചെലവ് അധികരിക്കുന്നതാണ്. ഗൃഹനിർമ്മാണത്തിൽ പ്രതീക്ഷിച്ചതിലധികം വ്യയം ഏർപ്പെടും. കാലതാമസവും ഒരു സാധ്യതയാണ്. ജീവകാരുണ്യ പ്രവർത്തനങ്ങൾക്ക്, ക്ഷേത്രസംബന്ധിയായ കാര്യങ്ങൾക്ക് ഒക്കെ മനസ്സറിഞ്ഞ് ഉദാരമായ സംഭാവനകൾ ചെയ്യും. വൃദ്ധജനങ്ങളെ സംരക്ഷിക്കുന്നതിൽ പ്രത്യേകമായ താല്പര്യം കൈക്കൊള്ളും. ആശുപത്രി, ചികിൽസാ ചെലവുകൾ ഉയരും. നിക്ഷേപങ്ങളിൽ നിന്നും പണം പിൻവലിച്ചക്കാം. അന്യദേശ യാത്രയ്ക്ക് സന്ദർഭം ഒരുങ്ങും. വിദേശത്തുള്ളവർ അവിടെത്തന്നെ തൽകാലം തുടരാൻ തീരുമാനിക്കുന്നതാണ്.

കർക്കടകക്കൂറിന് (പുണർതം 4-ാം പാദം, പൂയം, ആയില്യം)

പത്താം ഭാവത്തിൽ നിന്നും വ്യാഴം പതിനൊന്നാം ഭാവത്തിൽ സഞ്ചരിക്കുകയാൽ ഗുണാനുഭവങ്ങളും നേട്ടങ്ങളും മേൽക്കൈ നേടുന്നതാണ്. വിദ്യാർത്ഥികൾക്ക് മികച്ച പരീക്ഷാവിജയം, ഉന്നത വിദ്യാഭ്യാസാർഹത എന്നിവ ഭവിക്കും. തൊഴിൽ രംഗത്തിലെ അശാന്തി അവസാനിച്ചേക്കും. കൃഷികാര്യങ്ങളിൽ താല്പര്യവും തന്മൂലം നേട്ടവും പ്രതീക്ഷിക്കാം. തൊഴിൽ തേടുന്നവർക്ക് അർഹതയ്ക്ക് അനുസരിച്ചുള്ള അവസരങ്ങൾ ലഭിക്കുന്നതാണ്. ഉദ്യോഗസ്ഥർക്ക് വേതനം ഉയരും. സ്ഥാനക്കയറ്റത്തിനും ഇഷ്ടസ്ഥലത്തിലേക്ക് മാറ്റത്തിനും സാധ്യത കാണുന്നു. സാമ്പത്തിക നില ഉയർന്നേക്കും. അവിവാഹിതർക്ക് ദാമ്പത്യത്തിൽ പ്രവേശിക്കാനാവും. പ്രണയസാഫല്യം വരാം. സന്താനങ്ങളില്ലാതെ വിഷമിക്കുന്നവർക്ക് സന്താനപ്രാപ്തി ഉണ്ടാവുന്നതാണ്. ബിസിനസ്സിൽ മുതൽമുടക്കുകൾക്ക് അനുസരിച്ചുള്ള ലാഭമുണ്ടാവും. രോഗാവസ്ഥയ്ക്ക് ലഘുത്വം വരുന്നതാണ്. ന്യായമായ ആവശ്യങ്ങൾ നിറവേറ്റാൻ കഴിയുന്ന സാഹചര്യം ഉരുത്തിരുഞ്ഞു വന്നേക്കും. സാമൂഹികമായ അംഗീകാരമുണ്ടാകും. 

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ഒമ്പതാമെടത്തുനിന്നും പത്താമെടത്തിലേക്ക് വ്യാഴം സംക്രമിക്കുന്നു. ഭാഗ്യാനുഭവങ്ങൾക്ക് തടസ്സം അനുഭവപ്പെടാം. കർമ്മരംഗത്ത് ഉദാസീനതയും ഉന്മേഷരാഹിത്യവും ഉണ്ടായേക്കും. നിലവിലെ ജോലി ഉപേക്ഷിക്കുന്നത് ഗുണകരമായേക്കില്ല. തൊഴിൽ തേടുന്നവർക്ക് അല്പം നിരാശയുണ്ടാവും. യോഗ്യതക്കനുസരിച്ചുള്ള ജോലി കിട്ടണമെന്നില്ല. നവസംരംഭങ്ങൾക്ക് ബാലാരിഷ്ടയുണ്ടാവും. വിദ്യാഭ്യാസത്തിൽ തൃപ്തി കുറയുന്നതാണ്. മാതാപിതാക്കളോട് കലഹിച്ചേക്കും. വസ്തുവ്യാപാരത്തിൽ നഷ്ടത്തിനിടയുണ്ട്. പരമ്പരാഗത തൊഴിലുകളിൽ നിന്നും ആദായമുണ്ടാകും.  ഊഹക്കച്ചവടം, ഇൻഷ്വറൻസ്, ചിട്ടി, കമ്മീഷൻ മുതലായവ സാമ്പത്തിക നേട്ടമുണ്ടാക്കും. ക്ഷേത്രഭരണം,  നടത്തിപ്പ് മുതലായവയിൽ സൽപ്പേരുണ്ടാവും. ഋണബാധ്യത പരിഹരിക്കുന്നതിൽ ഭാഗികമായി വിജയിക്കുന്നതാണ്. ദാമ്പത്യജീവിതത്തിൽ പിണക്കവും ഇണക്കവും തുടർക്കഥയായേക്കും. ഗവേഷകർക്കും കലാകാരന്മാർക്കും പ്രശസ്തി നേടാനാവും.

കന്നിക്കൂറിന് (ഉത്രം 2, 3, 4 പാദങ്ങൾ, അത്തം, ചിത്തിര 1, 2 പാദങ്ങൾ)

അനിഷ്ടസ്ഥാനമായ എട്ടാം ഭാവത്തിൽ നിന്നും ഇഷ്ടസ്ഥാനമായ ഒമ്പതാം ഭാവത്തിലേക്കാണ് വ്യാഴത്തിൻ്റെ സഞ്ചാരം. കാര്യവിളംബം അകന്ന് കാര്യലാഭം ഭവിക്കാം. സംരംഭങ്ങളിൽ നിന്നും നേട്ടങ്ങൾ വന്നെത്തും. ഉദ്യോഗസിദ്ധി, ഉദ്യോഗത്തിൽ അഭ്യുദയം ഇവയുണ്ടാകുന്നതാണ്. സമൂഹമധ്യത്തിൽ ആദരവും അംഗീകാരവും ലഭിക്കും. ലഘുപ്രയത്നം കൊണ്ട് വലുതായ നേട്ടങ്ങൾ ആർജ്ജിക്കും. റിയൽ എസ്റ്റേറ്റ് ബിസിനസ്സിൽ പുഷ്ടിയുണ്ടാകും. കുടുംബ സ്വത്തിൽ അർഹമായ വിഹിതം ലഭിക്കുന്നതായിരിക്കും. വിദ്യാർത്ഥികൾക്ക് ഉന്നത വിജയം കരസ്ഥമാക്കാനാവും. പ്രണയ സാഫല്യം, വിവാഹ യോഗം, സന്താനഭാഗ്യം എന്നിവ പ്രതീക്ഷിക്കാം. 
വിദേശത്തുനിന്നും മടങ്ങിയവർക്ക് നാട്ടിൽ കഴിവിനനുസരിച്ചുള്ള തൊഴിലിൽ മുഴുകാനാവും. മാതാപിതാക്കളുടെ ആരോഗ്യപ്രശ്നങ്ങൾ ചികിത്സാമാറ്റത്തിലൂടെ ഭേദമാകാം. ജീവിത പങ്കാളിക്ക് ഉദ്യോഗസിദ്ധി / വളർച്ച സാധ്യതയാണ്. ധനക്ലേശം കുറയും. ന്യായമായ സമ്പാദ്യം വന്നുചേരും. മനസ്സമാധാനമുണ്ടാവും.

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1, 2, 3 പാദങ്ങൾ)

ശുഭഭാവമായ ഏഴാമെടത്തിൽ നിന്നും അശുഭ ഭാവമായ എട്ടാമെടത്തിലേക്കാണ് വ്യാഴം സംക്രമിക്കുന്നത്. നേട്ടങ്ങൾ മന്ദഗതിയിലായേക്കും. അനായാസേന നേടിയിരുന്നവ പ്രയത്നിച്ച് നേടേണ്ടതായി വരും. കൂട്ടുകച്ചവടത്തിൽ പാളിച്ചവരാനിടയുണ്ട്. ബിസിനസ്സ്പരമായോ ഔദ്യോഗികമായോ ഉള്ള യാത്രകൾ കൊണ്ട് മെച്ചം കുറയുന്നതാണ്. പലപ്പോഴും സഹിഷ്ണുത പരീക്ഷിക്കപ്പെടാം. കുടുംബബന്ധങ്ങളിലെ താളപ്പിഴകൾ പരിഹരിക്കുക ക്ലേശകരമാവും. രാഷ്ട്രീയ നിലപാടുകളെ അണികൾ തന്നെ ചോദ്യം ചെയ്തെന്നുവരാം. സസ്പെൻഷൻ, ഡീപ്രമോഷൻ തുടങ്ങിയവ ചില സാധ്യതകളാണ്. സഹപ്രവർത്തകരുടെ പിന്തുണ കുറയാം. ഏജൻസി, കമ്മീഷൻ ഏർപ്പാടുകളിൽ വിജയിക്കുന്നതാണ്. മകൻ്റെ സാമ്പത്തിക സഹായം കടം വീട്ടാനുതകും. പിതൃസ്വത്തുക്കൾ പണയപ്പെടുത്തി മകളുടെ വിവാഹം നടത്തിയേക്കും. വിദേശജോലിക്കുള്ള ശ്രമം വിജയിക്കാം. താത്കാലികമായോ പാർട്ട്ടൈം ആയോ ഉള്ള ജോലികൾ ലഭിക്കുന്നതാണ്.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

ആറാം ഭാവത്തിൽ നിന്നും വ്യാഴം ഏഴാം ഭാവത്തിലേക്ക് സംക്രമിക്കുന്നു. വ്യാഴത്തിൻ്റെ രാശിമാറ്റം വൃശ്ചികക്കൂറിലെ നക്ഷത്രങ്ങളിൽ ജനിച്ചവർക്ക് ഏറ്റവും അനുഗുണമായ ഫലങ്ങൾ നൽകും. ബിസിനസ്സുകാർക്ക് വിപുലീകരണം സാധ്യമാകുന്നതാണ്. പാർട്ണർഷിപ്പുകൾ പ്രയോജനകരമാവും.  തൊഴിൽപരമായ യാത്രകൾ കൂടുതലാവും. അവയാൽ പ്രയോജനം സിദ്ധിക്കുന്നതുമാണ്. ഔദ്യോഗിക ജീവിതം സംതൃപ്തികരമാവും. ചുമതലകൾ ഭംഗിയായി നിർവഹിക്കാൻ കഴിയുന്നതാണ്. ഏഴാമെടം പ്രണയം, വിവാഹം, ദാമ്പത്യം ഇവയുമായി ബന്ധമുള്ളതാകയാൽ  പ്രണയ സാഫല്യം ഉണ്ടാകും. പിണങ്ങിപ്പിരിഞ്ഞവർക്ക് വീണ്ടും ഇണങ്ങാനാവും. ജീവിത പങ്കാളിയുടെ സ്വത്തോ സമ്പാദ്യമോ ആവശ്യത്തിന് ഉതകും. സകുടുംബം വിദേശത്ത് വിനോദയാത്ര നടത്തുവാൻ അവസരം സിദ്ധിക്കും. ഊഹക്കച്ചവടത്തിൽ വിജയിക്കുന്നതാണ്. സൗഹൃദം പുഷ്ടിപ്പെടും. ഗൃഹനിർമ്മാണത്തിന് തുടക്കമിടാം. ആരോഗ്യപരമായി സമ്മിശ്രമായ കാലഘട്ടമായിരിക്കും.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

അഞ്ചാം ഭാവത്തിൽ നിന്നും ആറാം ഭാവത്തിലാണ് വ്യാഴത്തിൻ്റെ സഞ്ചാരം. പ്രതിലോമ ഭാവങ്ങളാണ് ആറാമെടം കൊണ്ട് അധികവും ചിന്തിക്കപ്പെടുന്നത്. ഋണബാധ്യത പരിഹരിക്കാൻ അത്യദ്ധ്വാനം വേണ്ടതുണ്ട്. സ്വകാര്യ സ്ഥാപനത്തിൽ നിയമനം കിട്ടാം. ജോലി ഉപേക്ഷിക്കുന്നവർക്ക് പുതുതൊഴിൽ ലഭിക്കുവാൻ ക്ലേശിക്കും. ക്ഷോഭം നിയന്ത്രിക്കപ്പെടണം. സഹപ്രവർത്തകരെ പിണക്കുന്നത് മൂലം ഔദ്യോഗിക രംഗം അശാന്തമാവാം. കൂടുതൽ വരുമാനത്തിനായി  ചില അനുബന്ധ ജോലികളിൽക്കൂടി ഏർപ്പെടുന്നതാണ്. ചിട്ടി, ഊഹക്കച്ചവടം, കമ്മീഷൻ, ഇൻഷ്വറൻസ് ഇത്യാദികൾ പ്രയോജനം ചെയ്തേക്കും. സുഹൃത്തിനെയോ ബന്ധുവിനെയോ ആശ്രയിക്കേണ്ടി വന്നേക്കാം. ചിലർക്ക് വീടുവിട്ട് താമസിക്കേണ്ട സ്ഥിതിയുണ്ടാവും. ചോരഭീതിയ്ക്ക് സാധ്യത കാണുന്നു. വഞ്ചിക്കപ്പെടാനോ ഉപജാപങ്ങളിൽ പെടാനോ ഇടയുണ്ട്. യോഗ, ധ്യാനം, മോട്ടിവേഷൻ ക്ളാസ്സുകൾ ഇവയിൽ ചേർന്ന് പരിശീലനം നേടുന്നത് നന്നായിരിക്കും.

മകരക്കൂറിന്ന് (ഉത്രാടം 2, 3,4 പാദങ്ങൾ, തിരുവോണം, അവിട്ടം 1, 2 പാദങ്ങൾ)

നാലാം ഭാവത്തിൽ നിന്നും അഞ്ചാം ഭാവത്തിലേക്കാണ് വ്യാഴമാറ്റം. ഗുണകരവും അഭ്യുദയം നൽകുന്നതുമായ മാറ്റമാണത്. ഇച്ഛാജ്ഞാനക്രിയാ ശക്തികളെ ഏകോപിപ്പിക്കാനാവും. ഉപരിവിദ്യാഭ്യാസത്തിന് മികച്ച അവസരം സംജാതമാകുന്നതാണ്. പ്രണയസാഫല്യം, വിവാഹസിദ്ധി, ദാമ്പത്യ സൗഖ്യം ഇവ പ്രതീക്ഷിക്കാം. സന്താനജന്മം ധന്യതയേകും.  സാമ്പത്തികമായി സുസ്ഥിരത്വം സിദ്ധിക്കുന്നതാണ്. താത്കാലിക ജോലിയിൽ സ്ഥിരത്വം ലഭിച്ചേക്കും. വിദേശത്ത് ജോലി ചെയ്യുന്നവർക്ക് പുതു അവസരങ്ങൾ വന്നെത്തും. അനുദിക്കിൽ നിന്നും  സ്വദേശത്തേക്ക് മാറ്റം കിട്ടാം. ഭാവനാസിദ്ധി ഉയരും. കലാപ്രവർത്തകർക്ക് ധാരാളം അവസരങ്ങൾ കൈവരിക്കനാവും. പൊതുപ്രവർത്തകർക്ക് അംഗീകാരമുണ്ടാകും. ജീവകാരുണ്യപരമായ കർമ്മങ്ങൾ ചെയ്യും. ഗൃഹനിർമ്മാണത്തിലെ തടസ്സം നീങ്ങുന്നതാണ്. പുതിയ ഭാഷയോ സാങ്കേതിക വിഷയങ്ങളോ പഠിക്കാൻ സന്ദർഭം ഉരുത്തിരിയാം. ഭൗതിക നേട്ടങ്ങൾക്കൊപ്പം ആത്മീയമായ വളർച്ചയും കൈവരുന്ന  വർഷമാണിത്.

കുംഭക്കൂറിന് (അവിട്ടം 3, 4 പാദങ്ങൾ, ചതയം, പൂരുരുട്ടാതി 1,  2,  3 പാദങ്ങൾ)

മൂന്നാം ഭാവത്തിൽ നിന്നും നാലാം ഭാവത്തിലേക്കാണ് വ്യാഴമാറ്റം. മാനസിക ക്ലേശങ്ങൾക്ക് കുറശ്ശെ അയവുണ്ടാകും. സുഹൃത്തുക്കളുടെയും ബന്ധുക്കളുടെയും പിന്തുണ ലഭിക്കും. ദാമ്പത്യത്തിൽ സമ്മിശ്രമായ അനുഭവങ്ങൾ വരാം.  വമ്പിച്ച മുതൽമുടക്കിയുള്ള ബിസിനസ്സ് ആരംഭിക്കുന്നത് ഗുണകരമായേക്കില്ല. സ്വകാര്യ സ്ഥാപനത്തിലെ ജോലിയിൽ അസംതൃപ്തിയുണ്ടാവും. വ്യവഹാരങ്ങൾക്ക് മുതിരുന്നത് ഗുണകരമായേക്കില്ല. സർക്കാരിൽ നിന്നും ലൈസൻസ്, രേഖകൾ ഇവ വൈകിയേക്കും. അലസത കർമ്മരംഗത്തെ ബാധിച്ചേക്കാം. പാർട്ണർഷിപ്പ് കച്ചവടം നഷ്ടത്തിലാവാൻ സാധ്യതയുണ്ട്. ഉന്നത പഠനത്തിന് ഇഷ്ടവിഷയങ്ങൾക്ക് പ്രവേശനം കിട്ടണമെന്നില്ല. അന്യനാട്ടിൽ പഠനത്തിന് അവസരം ഉണ്ടാകും. ആരോഗ്യപ്രശ്നങ്ങൾ ഉണ്ടാവാനിടയുണ്ട്. മാതാവിൻ്റെ സ്വത്ത് സംബന്ധിച്ചുള്ള തർക്കങ്ങൾ വിഷമിപ്പിക്കും.  വാഹനം വാങ്ങാനുള്ള ശ്രമം വിജയകരമാവും. മൃഗ- പക്ഷി പരിപാലനത്തിൽ താല്പര്യമേറും. 

മീനക്കൂറിന് (പൂരൂരുട്ടാതി നാലാം പാദം, ഉത്രട്ടാതി, രേവതി)

രണ്ടാം ഭാവത്തിൽ നിന്നും മൂന്നാം ഭാവത്തിലേക്കാണ് വ്യാഴമാറ്റം വരുന്നത്. 3, 6, 8,12  ഭാവങ്ങളിൽ സഞ്ചരിക്കുന്ന വ്യാഴം പ്രായേണ അശുഭഫലങ്ങൾ/ മിശ്രഫലങ്ങൾ നൽകും. സാമ്പത്തിക സ്രോതസ്സിന് ശക്തി കുറയാം. അർഹതയും അവകാശവുമുള്ള പലതും കൈവശമെത്താൻ കാലവിളംബം ഉണ്ടാകും.  ബാഹ്യശക്തികളുടെ ഇടപെടൽ തടുക്കാൻ സാധിക്കുന്നതാണ്. സഹോദരരുമായുള്ള ബന്ധത്തിൽ വിള്ളലുണ്ടാകും.  നല്ല തൊഴിൽ അവസരങ്ങൾക്കായി കാത്തിരുപ്പ് തുടരപ്പെടും. പാരമ്പര്യ തൊഴിലുകൾ മെച്ചപ്പെടുന്നതാണ്. ചെറുകിട സംരംഭങ്ങൾ പുഷ്ടിപ്പെടും. ലോൺ, ചിട്ടി മുതലായവ വ്യാപാര വിപുലീകരണത്തിന് ഉതകും. പണയ വസ്തുക്കളുടെ തിരിച്ചടവ് സമ്മർദ്ദമുണ്ടാക്കും. ദാമ്പത്യജീവിതത്തിൽ പരസ്പരൈക്യം  വർദ്ധിക്കുന്നതാണ്. സ്വയം അദ്ധ്വാനിച്ചുള്ള കൃഷിയിൽ ലാഭം പ്രതീക്ഷിക്കാം. അന്യദേശത്ത് കഴിയുന്നവർക്ക് പുതുജോലികൾക്കായി ശ്രമിക്കേണ്ടി വന്നേക്കാം. സാമ്പത്തിക അച്ചടക്കം, സ്ഥിരോത്സാഹം, സാഹസങ്ങൾ ഒഴിവാക്കൽ, ദൈവിക സമർപ്പണം തുടങ്ങിയവ അനിഷ്ടഫലങ്ങളെ പ്രതിരോധിച്ച് മുന്നേറാൻ ഉതകുന്നതാണ്

Read More

Daily Horoscope April 18, 2024: നിങ്ങളുടെ ഇന്നത്തെ ദിവസം, രാശി ഫലം

Vishu Phalam 2024: സമ്പൂർണ വിഷു ഫലം 2024-അശ്വതി മുതൽ രേവതി വരെ

ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 April 15 to April 21

Weekly Horoscope (April 14– April 20, 2024): ഈ ആഴ്‌ച നിങ്ങൾക്കെങ്ങനെ?