കുംഭ മാസത്തെ നക്ഷത്രഫലം, അശ്വതി മുതൽ രേവതിവരെ

Monthly Horoscope for Kumbham Aswathy to Revathy: മേടത്തിലാരംഭിച്ച് മീനത്തിലവസാനിക്കുന്ന പന്ത്രണ്ട് രാശികളിൽ 11-ാം രാശിയാണ് കുംഭം രാശി. എന്നാൽ കൊല്ലവർഷം ചിങ്ങം മാസം മുതൽ കണക്കാക്കുകയാൽ ഏഴാം മാസമായി വരും, കുംഭമാസം. മകരം 30 ന്, അതായത് ജനുവരി 12 ന്, രാത്രി 10 മണി അടുപ്പിച്ചാണ് കുംഭസംക്രമം വരുന്നത്. സൂര്യൻ മകരം രാശിയിൽ നിന്നും കുംഭം രാശിയിൽ പ്രവേശിക്കുന്നത് അപ്പോഴാണ് എന്നർത്ഥം. പിറ്റേപ്പകൽ കുംഭമാസം ഒന്നാം തീയതിയായി പരിഗണിക്കുന്നു. 

2025 ഫെബ്രുവരി 13ന്, വ്യാഴാഴ്ചയാണ് 1200 കുംഭം ഒന്നാം തീയതി വരുന്നത്. തുടർന്ന് സൂര്യൻ മീനം രാശിയിൽ പ്രവേശിക്കുന്നതു വരെയുള്ള കാലഘട്ടം കുംഭം മാസമായി പരിഗണിക്കുന്നു. കുംഭമാസം 30 തീയതികളുണ്ട്. ( ഫെബ്രുവരി 13 മുതൽ മാർച്ച് 14 വരെ). കുംഭം 7-ാം തീയതി വരെ അവിട്ടം ഞാറ്റുവേലയും, 20-ാം തീയതി വരെ ചതയം ഞാറ്റുവേലയും, തുടർന്ന് പൂരൂരുട്ടാതി ഞാറ്റുവേലയും വരുന്നു. സൂര്യൻ ഏതേതു നക്ഷത്രമണ്ഡലങ്ങളിലൂടെ കടന്നുപോകുന്നു എന്നതാണ് ഞാറ്റുവേല എന്ന പേരിൻ്റെ അർത്ഥം. 

മാസാരംഭത്തിൽ ചന്ദ്രൻ കറുത്ത പക്ഷത്തിലാണ്. കുംഭമാസം 15 ന് കറുത്തവാവ് അഥവാ അമാവാസി വരുന്നു. കുംഭം 29-30 ന് ആണ് വെളുത്തവാവ് അഥവാ പൗർണമി. ശനി കുംഭം രാശിയിൽ പൂരൂരുട്ടാതി നക്ഷത്രത്തിലാണ്. കുംഭം 12 ന് ഉദയത്തിന് ശനിയുടെ മൗഢ്യം തുടങ്ങുന്നു. സൂര്യനുമായി 15 ഡിഗ്രി സമീപത്തിലെത്തുമ്പോൾ ശനിക്ക് മൗഢ്യം (Combust/Combustation) എന്ന അവസ്ഥ തുടങ്ങുന്നു. ശനിയുടെ പ്രഭാവം നിസ്തേജമാകുന്ന അവസ്ഥയാണിത്. വർഷത്തിൽ ഒരിക്കലാണ് ഇതുണ്ടാവുക. 

മീനം 16 വരെ ശനിയുടെ മൗഢ്യം തുടരും. വ്യാഴം ഇടവം രാശിയിൽ രോഹിണി നക്ഷത്രത്തിലാണ്. ശുക്രൻ ഉച്ചരാശിയായ മീനത്തിൽ ഉത്രട്ടാതി നക്ഷത്രത്തിൽ സഞ്ചരിക്കുന്നു. ചൊവ്വ മിഥുനം രാശിയിൽ പുണർതം നക്ഷത്രത്തിലാണ്. കുംഭം 15 വരെ വക്രഗതിയിലും (Retrograde motion), തുടർന്ന് നേർഗതിയിലും(Direct motion) സഞ്ചരിക്കുന്നു. ബുധൻ മാസാദ്യത്തിൽ കുംഭം രാശിയിലാണ്. 

കുംഭം 16 ന് മീനം രാശിയിലേക്ക് മാറുന്നു. മീനം രാശി ബുധൻ്റെ നീചരാശിയാണെന്നത് പ്രസ്താവ്യമാണ്. കുംഭം 2 വരെ അവിട്ടത്തിലും തുടർന്ന് കുംഭം 10 വരെ ചതയത്തിലും തുടർന്ന് കുംഭം 17 വരെ പൂരൂരുട്ടാതിയിലും, തുടർന്ന് ഉത്രട്ടാതിയിലും സഞ്ചരിക്കുന്നു. കുംഭം 12 വരെ ബുധന് ക്രമമൗഢ്യം ഉണ്ടെന്നും ഓർക്കണം. രാഹു മീനം രാശിയിൽ ഉത്രട്ടാതിയിലും കേതു കന്നി രാശിയിൽ ഉത്രം നക്ഷത്രത്തിലും തുടരുന്നു. രാഹുവും കേതുവും 
പ്രതിലോമഗതിയിൽ (Anti- clockwise) സഞ്ചരിക്കുന്ന ഗ്രഹങ്ങളാണെന്നതും പ്രസ്താവ്യമാണ്.

• Love Horoscope in malayalam: പ്രണയിക്കുന്നവർക്ക് ഈ വർഷം എങ്ങനെ?

ഈ ഗ്രഹനിലയുടെ പശ്ചാത്തലത്തിൽ 1200 കുംഭമാസത്തിലെ അശ്വതി മുതൽ രേവതി വരെയുള്ള നാളുകാരുടെ നക്ഷത്രഫലം ഇവിടെ അവതരിപ്പിക്കുന്നു.

അശ്വതി

പതിനൊന്നിലെ ഗ്രഹസമൃദ്ധി - ശനി, സൂര്യൻ, ബുധൻ എന്നീ ഗ്രഹങ്ങളുടെ സാന്നിദ്ധ്യം - നേട്ടങ്ങൾ അനുഭവത്തിലെത്തിക്കുന്നതായിരിക്കും. കാര്യതടസ്സങ്ങൾ കെട്ടുകഥയാവും. പരസ്യ - രഹസ്യ ശത്രുക്കുളെ പരാജയപ്പെടുത്തും. നിലപാടുകൾക്കും നയങ്ങൾക്കും പ്രവർത്തനരംഗത്ത് വലിയ സ്വീകാര്യത വന്നുചേരുന്നതാണ്. സാമ്പത്തികമായ ആശങ്കകൾ അസ്ഥാനത്തെന്ന് തെളിയും. ഔദ്യോഗികരംഗത്തെന്നപോലെ വ്യാപാര മേഖലയിലും പുഷ്ടിയുണ്ടാകും. ഗാർഹികമായ സ്വൈരം പ്രതീക്ഷിക്കാം. പിണക്കം തീർന്ന് ഭാര്യാപുത്രാദികൾക്കൊപ്പം കഴിയാനാവും. വസ്തുവാങ്ങാനുള്ള സുവർണ്ണാവസരമാണ് സംജാതമാവുന്നത്. പന്ത്രണ്ടാം ഭാവത്തിലെ രാഹു- ശുക്ര യോഗം നന്നല്ല. അനാവശ്യ കാര്യങ്ങളിൽ ചിലവ് വന്നേക്കും. കൂട്ടുകെട്ടുകളുടെ കാര്യത്തിൽ ജാഗ്രത പുലർത്തണം. സുഹൃത്തുക്കൾ ദുസ്സ്വാധീനം ചെലുത്തുകയാണോ എന്ന് സ്വയം പരിശോധിക്കേണ്ടതു മുണ്ട്.

ഭരണി

ആദിത്യനും ശനിയും പതിനൊന്നിലും വ്യാഴം രണ്ടിലും ചൊവ്വ മൂന്നാം ഭാവത്തിലും സഞ്ചരിക്കുന്നതിനാൽ പലനിലയ്ക്കും വിജയിക്കാനും ലക്ഷ്യപ്രാപ്തി കൈവരിക്കാനുമാവും. തടസ്സങ്ങൾ ഉണ്ടാവില്ലെന്നല്ല. അവയെ അനായാസം മറികടക്കാൻ കഴിയുന്നതാണ്. സർക്കാർ കാര്യങ്ങളിൽ നേട്ടം ഭവിക്കും. പാരമ്പര്യ തൊഴിലിൽ നിന്നും ലാഭമുണ്ടാവും. കുടുംബത്തിലെ വയോജനങ്ങളുടെ ആരോഗ്യസ്ഥിതി മെച്ചപ്പെടുന്നതാണ്.  വ്യവഹാരത്തിൽ അനുകൂലത പ്രതീക്ഷിക്കാം. വിദ്യാഭ്യാസത്തിലും ഗവേഷണത്തിലും ഉറച്ച മനസ്സോടെ മുന്നോട്ടു പോകാൻ കഴിയുന്നതാണ്. നിഗൂഢ ശത്രുക്കളെ പ്രതിരോധിക്കാനാവും. പന്ത്രണ്ടിൽ ശുക്രനും രാഹുവും തുടരുന്നത് ആഢംബരച്ചെലവുകൾക്ക് കാരണമായേക്കും.  ദുശ്ശീലങ്ങൾ ഉണ്ടെങ്കിൽ സ്വയം നിയന്ത്രണം ആവശ്യമാണ്. വ്യയം, ദുർവ്യയമാകുന്നില്ല എന്ന് ഉറപ്പുവരുത്തുക അഭിലഷണീയം.

കാർത്തിക

കർമ്മമേഖലയിൽ വിജയം നേടുന്നതാണ്. തൊട്ടതെല്ലാം പൊന്നാക്കും. പരാശ്രയം ഒഴിവാക്കി സഹജമായ കഴിവുകൾ  പ്രയോജനപ്പെടുത്തും. തൊഴിൽ തേടുന്നവർക്ക് സ്വകാര്യ സ്ഥാപനത്തിൽ ജോലി ലഭിക്കുന്നതാണ്.  വ്യാപാര-വാണിജ്യ മേഖലകളിൽ നിന്നും ആദായം കൂടും. നിക്ഷേപങ്ങൾ സാധ്യമാവും. രാഷ്ട്രീയത്തിൽ പ്രവർത്തിക്കുന്നവർക്ക് ഉയർച്ച പ്രതീക്ഷിക്കാം. ജനസ്വാധീനം വർദ്ധിക്കുന്നതാണ്. നവസംരംഭങ്ങൾ  സാക്ഷാല്കരിക്കാൻ കഴിഞ്ഞേക്കും. അതിനുവേണ്ട സർക്കാർ അനുമതി ക്ലേശം കൂടാതെ കൈവരുന്നതാണ്. പ്രണയത്തിൽ വിജയം, സുഖഭോഗം, എന്നിവയും ഫലങ്ങൾ. ഇടവക്കൂറുകാർക്ക് ദേഹക്ലേശത്തിന് സാധ്യതയുണ്ട്. ചൊവ്വ രണ്ടാം ഭാവത്തിൽ തുടരുകയാൽ വാക്കുകൾ ശത്രുക്കളെ സൃഷ്ടിച്ചേക്കാം.  മേടക്കൂറുകാർ ആഢംബരച്ചെലവുകൾ കുറയ്ക്കുന്നത് നന്നായിരിക്കും.

രോഹിണി

പത്താമെടത്തിൽ ശനിക്കൊപ്പം ആദിത്യ ബുധന്മാർ സഞ്ചരിക്കുകയാൽ ആത്മവിശ്വാസം നിറയും. പുരോഗതിക്കുള്ള ആലോചനകളിൽ മുഴുകുന്നതിനാവും. പാരമ്പര്യമായിട്ടുള്ള തൊഴിലുകളിൽ ഏർപ്പെട്ടവർക്ക് ധാരാളം അവസരങ്ങൾ സിദ്ധിക്കുന്നതാണ്. തൊഴിൽരാഹിത്യം മൂലമുള്ള വിഷമം തീരും. അർഹതയ്ക്ക് ഉപരിയായ തൊഴിൽ ലഭിക്കുവാനിടയുണ്ട്. ഗവേഷണം പൂർത്തീകരിക്കും. സാങ്കേതികജ്ഞാനം കൈവരിക്കുന്നതാണ്. പതിനൊന്നിൽ രാഹു-ശുക്രസ്ഥിതി ഭൗതിക നേട്ടങ്ങൾക്ക് കാരണമാകും. പ്രണയബന്ധം ദൃഢപ്പെടും. വിവാഹസാഫല്യം പ്രതീക്ഷിക്കാം. നേർവഴിയിലൂടെയും അല്ലാതെയും വരുമാനം വന്നുചേരുന്നതാണ്. വീടിൻ്റെ പണി പൂർത്തിയാക്കി കേറിത്താമസിക്കാൻ സാധിക്കും. വിലകൂടിയ വസ്തുക്കൾ പാരിതോഷികമായി ലഭിക്കാം. ചൊവ്വ അനിഷ്ടനാകയാൽ വാഹന, യന്ത്ര ഉപയോഗത്തിൽ ശ്രദ്ധവേണ്ടതുണ്ട്.

മകയിരം

സ്വയം തൊഴിലിൽ കൂടുതൽ ശ്രദ്ധിക്കണം. ധനപരമായി ജാഗ്രത പുലർത്തണം. കഴിവുകൾ നല്ലകാര്യങ്ങൾക്കാണ് പ്രയോജനപ്പെടുത്തുന്നത് എന്ന് ഉറപ്പിക്കേണ്ടതുണ്ട്. വീട്ടിലെ സാഹചര്യം സമ്മിശ്രമായിരിക്കും. സഹോദരർക്കിടയിൽ ഐക്യം കുറയും. ജോലി തേടുന്നവർക്ക് താത്കാലികമായ വരുമാനം ലഭിച്ചേക്കാം. കൂട്ടുബിസിനസ്സിൽ സംതൃപ്തി കുറയും. വാടകക്കെട്ടിടം ഒഴിയാൻ തീരുമാനിക്കും. കലാപ്രവർത്തനത്തിൽ പുരസ്കാരം പ്രതീക്ഷിക്കാം. കലാകാരന്മാർക്ക് അവസരങ്ങൾ നിരന്തരമാവും. വിനോദ യാത്രകളിൽ സന്തോഷിക്കും. സ്ത്രീ സൗഹൃദം ഹൃദയബന്ധമായേക്കാം. മുന്തിയ ആടയാഭരണങ്ങൾ വാങ്ങിയേക്കും. സഹപ്രവർത്തകരുടെ വാക്കുകൾ വിഷമിപ്പിക്കും. വാഹനം വാങ്ങുന്നതിന് കാത്തിരിക്കേണ്ടി വരുന്നതാണ്.

തിരുവാതിര

സ്ഥിരവരുമാനമുള്ള ജോലിക്കായി നടത്തിക്കൊണ്ടിരുന്ന പരിശ്രമങ്ങൾ വിജയിക്കുന്നതാണ്. സ്വന്തമായി വ്യാപാരം ചെയ്യുന്നവർക്ക് തടസ്സങ്ങൾ അകലും. നക്ഷത്രാധിപനായ രാഹുവിന് ശുക്രയോഗം ഭവിക്കുകയാൽ സൗഹൃദം പുഷ്ടിപ്പെടും. മിത്രങ്ങൾ മൂലം നേട്ടങ്ങൾ / അവസരങ്ങൾ കരഗതമാവുന്നതാണ്. കടബാധ്യതകൾ ഭാഗികമായിട്ടെങ്കിലും പരിഹരിക്കാനാവും. അവിവാഹിതർക്ക് മാലയോഗം തെളിയാം. ദൂരയാത്രകൾ കാംക്ഷിക്കുന്നവർക്ക് കാത്തിരിപ്പ് സഫലമാവുന്നതാണ്. ജന്മത്തിൽ ചൊവ്വയും നാലിൽ കേതവും സഞ്ചരിക്കുന്നതിനാൽ  വാഹനം വാങ്ങാനുള്ള തീരുമാനം നീളാം. സാമ്പത്തിക മാനേജുമെൻ്റിൽ അമളി പറ്റാനിടയുണ്ട്. ബന്ധുക്കളാൽ ചില സ്വൈരക്കേടുകൾ വരുന്നതാണ്. വ്യവഹാരങ്ങൾക്ക് മുതിരരുത്. ജീവകാരുണ്യ പ്രവർത്തനം മനസ്സമാധാനം നൽകുന്നതായിരിക്കും.

പുണർതം

പുതിയ ജോലി ലഭിച്ചേക്കും.  സ്വയം തൊഴിലിലും ദോഷമില്ലെന്ന സ്ഥിതിയുണ്ടാവും. ഒപ്പമുള്ളവരെ വിശ്വാസത്തിലെടുക്കും. നിലവിലെ ജോലിയിൽ പ്രൊമോഷൻ പ്രതീക്ഷിക്കുമെങ്കിലും അതിനുള്ള സാധ്യത വിരളമാണ്. സന്താനങ്ങളുടെ ശ്രേയസ്സിൽ സംതൃപ്തിയുണ്ടാവും.  പൂർവ്വികസ്വത്ത് വിൽക്കാൻ ശ്രമിക്കുന്നതാണ്. എന്നാൽ  വില ഒത്തുവരാത്തതുമൂലം കച്ചവടം നടന്നേക്കില്ല. വാടകക്കാരെ ഒഴിപ്പിക്കാൻ നിയമവശം തേടുന്നതാണ്. ഉപരിപഠനത്തിന് വ്യക്തത കൈവരും. മത്സരാധിഷ്ഠിത കരാറുകളിൽ നിന്നും പിന്മാറിയേക്കും. മകളോടൊപ്പം അന്യ സംസ്ഥാനത്ത് താമസിക്കേണ്ട കുടുംബസാഹചര്യം ഉദയംചെയ്യും. ആത്മീയ കാര്യങ്ങൾ, തീർത്ഥാടനാദികൾ എന്നിവ വിജയിക്കും. സാമ്പത്തിക കാര്യങ്ങളിൽ കരുതൽ അനിവാര്യമാണ്.

പൂയം

ലക്ഷ്യപ്രാപ്തിക്ക് കൂടുതൽ അദ്ധ്വാനം ആവശ്യമായി വരുന്ന സാഹചര്യമാണുള്ളത്. പ്രതീക്ഷിച്ച ജോലിയുടെ നിയമനോത്തരവ് നീളാനിടയുണ്ട്. സ്വാശ്രയ വ്യാപാരത്തിലും കരാർ പണികളിലും സാമാന്യമായ ലാഭം വന്നുചേരുന്നതാണ്. നേർവഴി കൊണ്ടു കാര്യമില്ലെന്ന് നിരാശപ്പെടാം. ക്ഷമ ആവശ്യമായ കാലഘട്ടമാണ്. കിട്ടാനുള്ള സാമ്പത്തികം ഭാഗികമായി പിരിഞ്ഞുകിട്ടും. പഠിത്തത്തിൽ കൂടുതൽ ഏകാഗ്രത ഉണ്ടാവണം. മകളുടെ വിവാഹം  ഉറപ്പിക്കാനാവും. ആദിത്യൻ അഷ്ടമത്തിൽ സഞ്ചരിക്കുന്നത് പിതാവിന് അനുകൂലമല്ല. പിതാവിൻ്റെ ആരോഗ്യകാര്യത്തിൽ ശ്രദ്ധയുണ്ടാവണം. രാഷ്ട്രീയ പ്രവർത്തനത്തിൽ മനക്ലേശമുണ്ടാവും. സ്വന്തക്കാരെ സാമ്പത്തികമായി സഹായിക്കേണ്ടി വന്നേക്കും.

ആയില്യം

വ്യാഴം പതിനൊന്നാം ഭാവത്തിൽ നേർഗതി തുടരുകയാൽ സാമ്പത്തികമായ സ്വയംപര്യാപ്തത വന്നുചേരുന്നതാണ്. ആസൂത്രണം ചെയ്ത കാര്യങ്ങൾ ഒട്ടൊക്കെ പൂർത്തീകരിക്കും. ആദിത്യൻ എട്ടാമെടത്തിൽ സഞ്ചരിക്കുന്നത് സർക്കാരുമായി ബന്ധപ്പെട്ടുള്ള കാര്യങ്ങൾ സഫലമാവാൻ വൈകുമെന്നതിൻ്റെ സൂചനയാണ്. മനസ്സിന് ഉന്മേഷം തരുന്ന പ്രവൃത്തികളിൽ ഏർപ്പെടുവാനാവും. പതിവിലും കൂടുതൽ സഞ്ചരിക്കേണ്ടി വന്നേക്കാം. വീടുവിട്ടു നിൽക്കുന്നവർക്ക് കൂടിച്ചേരൽ വൈകുന്നതാണ്. പ്രണയിക്കുന്നവർക്ക് തടസ്സങ്ങളെ മറികടക്കാനാവും. ഭൂമിവ്യാപാരത്തിൽ  മുതൽമുടക്കുന്നത് ഇപ്പോഴത്തെ സാഹചര്യത്തിൽ ഗുണകരമായേക്കില്ല. വ്യവഹാര സാധ്യതകൾ ഒഴിവാക്കേണ്ടതുണ്ട്. ഗുരുജനങ്ങളെ സതീർത്ഥ്യർക്കൊപ്പം സന്ദർശിക്കുന്നതാണ്. സഹോദര ബന്ധത്തിൽ ദാർഢ്യം കുറയാനിടയുണ്ട്.

മകം

ഏഴാം ഭാവത്തിൽ മൂന്നുഗ്രഹങ്ങളും, എട്ടാം ഭാവത്തിൽ രണ്ടുഗ്രഹങ്ങളും, പത്തിലും പതിനൊന്നിലും ഓരോ ഗ്രഹവും സഞ്ചരിക്കുന്നു. നിരന്തര പരിശ്രമങ്ങൾ വിജയത്തിലെത്തിക്കും. നേട്ടങ്ങൾക്ക് കുറുക്കുവഴിയില്ലെന്ന് ഓർമ്മിക്കുക. ഒപ്പമുള്ളവരെ വിമർശിക്കും മുൻപ് സ്വയം തിരുത്തലുകൾ  വരുത്തുവാൻ സന്നദ്ധതയുണ്ടാവണം. സുഹൃത്തിൽ നിന്നും ആവശ്യപ്പെട്ട സാമ്പത്തിക സഹായം കിട്ടിയേക്കും. കൂട്ടുബിസിനസ്സിൽ പുനശ്ചിന്തയുണ്ടാവും.  വിപുലീകരണം ആഗ്രഹിക്കും. എന്നാൽ ഇപ്പോൾ തൽസ്ഥിതി തുടരുകയാവും സമുചിതം. വ്യക്തിപരവും ഔദ്യോഗികവും ആയ യാത്രകൾ നിരന്തരമാവും. ഉദ്യമങ്ങൾ ഭാഗികമായി ഫലവത്തായേക്കും. കുടുംബകാര്യങ്ങളിൽ ശ്രദ്ധ കുറയരുത്. മകൻ്റെ പഠനത്തിലും കൂട്ടുകെട്ടിലും നിരീക്ഷണം ആവശ്യമാണ്. തത്രപ്പാടുകൾക്കിടയിൽ സ്വന്തം മാനസിക - ശാരീരിക ആരോഗ്യപാലനവും പ്രധാനമാണെന്നത് വിസ്മരിക്കരുത്.

പൂരം

ജന്മനക്ഷത്രത്തിൻ്റെ അധിപൻ ശുക്രൻ്റെ ഉച്ചസ്ഥിതിയാൽ വ്യക്തിപ്രഭാവം ഉയരുന്നതാണ്. പ്രവർത്തന മികവ് സമൂഹത്തിൽ സംസാര വിഷയമാവും. ധനപരമായ ക്ലേശങ്ങൾ ഉണ്ടാവുമെങ്കിലും അവയെ മറികടക്കും. പുതിയ കാലത്തിൻ്റെ ആവശ്യങ്ങൾ കണ്ടറിയുന്നതാണ്. ഗൃഹനിർമ്മാണം പുനരാരംഭിച്ചേക്കും. മുന്തിയ ഇലക്ട്രോണിക് ഉല്പന്നങ്ങൾ വാങ്ങും. ഭൂമിവ്യാപാരം ലാഭം നേടിത്തരുന്നതാണ്. മത്സരങ്ങളിലും അഭിമുഖങ്ങളിലും വിജയിക്കാനാവും.  കൂട്ടുകച്ചവടത്തിൽ വേണ്ടത്ര ആദായം കിട്ടിക്കൊള്ളണമെന്നില്ല. പകരക്കാരെ ചുമതല ഏല്പിച്ചേക്കും. പഠനത്തിനോ തൊഴിലിനോ ദേശാന്തര യാത്രകൾക്ക് കളമൊരുങ്ങുന്നതാണ്. വീട്ടുകാര്യങ്ങളിൽ താല്പര്യം കുറയാം. കടമകൾ മറക്കരുത് എന്ന് ആരെങ്കിലും ഉപദേശിച്ചേക്കും. ആരോഗ്യധനവും സർവ്വധനാൽ പ്രധാനമാണ്.

ഉത്രം

ഊഷരാവസ്ഥ മാറി മനസ്സ് മുന്നേപ്പോലെ ഉന്മേഷഭരിതമാവും. സാഹചര്യങ്ങൾ അല്പാല്പമായി അനുകൂലമാവുന്നതാണ്. കാര്യതടസ്സങ്ങൾ ഒരു പഴങ്കഥയാവും. ചെറുപ്പക്കാർ സമൂഹത്തോട് ഇണങ്ങാൻ സ്വയം തയ്യാറാവും. ബന്ധുക്കളുമായുള്ള സ്വത്തുതർക്കത്തിൽ പരിഹാരം തെളിയുന്നതാണ്. ജോലിയില്ലാതെ വിഷമിക്കുന്നവർക്ക് സ്വന്തം കാലിൽ നിൽക്കാൻ സാഹചര്യം അനുകൂലമായി വന്നേക്കും. പൈതൃക സ്വത്ത് അനുഭവ അവകാശത്തിൽ വരുന്നതാണ്. സുഹൃത്തുക്കൾ പ്രശ്ന പരിഹാരത്തിന് മുന്നിൽ നിൽക്കുന്നതായിരിക്കും. വീടുവിട്ടുപോയവർക്ക് വീണ്ടും ഒത്തുചേരാൻ കഴിയുന്നതാണ്. ഉപരിപഠന കാര്യത്തിൽ വ്യക്തത വരും. ദാമ്പത്യത്തിലെ അലോസരങ്ങൾക്ക് അധികം നിലനിൽപ്പുണ്ടാവില്ല. പണമെടപാടിൽ സൂക്ഷ്മതയുണ്ടാവണം.

അത്തം

ആദിത്യൻ ആറിലും ഗുരു ഒമ്പതിലും സഞ്ചരിക്കുകയാൽ ആത്മവിശ്വാസം വർദ്ധിക്കുന്നതാണ്. തൊഴിൽ രംഗത്ത് ഉണർവ്വുണ്ടാകും. പ്രധാനകാര്യങ്ങളിൽ വ്യക്തമായ തീരുമാനം കൈക്കൊള്ളും. ഭാഗ്യപുഷ്ടിയുള്ള കാലമാകയാൽ കർമ്മത്തിൽ വിജയിക്കാനാവും. സാമ്പത്തിക ഞെരുക്കം മാറിക്കിട്ടുന്നതാണ്. വിരഹത്തിൻ്റെ കാലഘട്ടം അവസാനിച്ച് കാമുകീകാമുകന്മാർക്ക് ഒരുമിക്കാനാവും.  കർമ്മരംഗത്തെ പ്രയത്നങ്ങൾ സഫലമാവുന്നതാണ്. വിരോധത്തിലിരുന്നവർ അനുകൂലികളായേക്കും. സ്വതസ്സിദ്ധമായ കഴിവുകൾ പ്രയോജനപ്പെടുത്താൻ സാധിക്കുന്നതാണ്. രാഷ്ട്രീയമായും ഗുണകരമായ കാലഘട്ടമാണ്. പാരമ്പര്യസ്വത്തുക്കളിൽ നിന്നും ആദായം വന്നെത്തും. കബളിപ്പിക്കാൻ ശ്രമിക്കുന്നവരെ തിരിച്ചറിയുന്നതാണ്.

ചിത്തിര

സാമൂഹ്യ പ്രശ്നങ്ങളിൽ സക്രിയമായ ഇടപെടലുകൾ നടത്തുന്നതാണ്. എതിർപ്പുകളെ തുച്ഛീകരിച്ച് മുന്നേറും. ആത്മവിശ്വാസം അമിതവിശ്വാസം ആകാതിരിക്കാൻ ശ്രദ്ധയുണ്ടാവണം. ഉദ്യോഗസ്ഥർക്ക് സഹപ്രവർത്തകരുടെ സഹകരണത്തോടെ വലിയ ദൗത്യങ്ങൾ പൂർത്തീകരിക്കാൻ കഴിയുന്നതാണ്. മുതൽ മുടക്കിയ പ്രോജക്ടുകളിൽ നിന്നും ലാഭം കിട്ടിത്തുടങ്ങാം. മക്കളുടെ പഠനകാര്യത്തിലും കൂട്ടുകെട്ട് മുതലായവയിലും ശ്രദ്ധയുണ്ടാവണം. രണ്ടിടത്തായി ജോലിചെയ്യുന്ന ഭാര്യാഭർത്താക്കന്മാർക്ക് ഒരിടത്തേക്ക് സ്ഥലംമാറ്റം മാസാവസാനത്തോടെ കിട്ടിയേക്കാം. ചെറുപ്പക്കാരുടെ വിവാഹകാര്യത്തിൽ തീരുമാനം നീണ്ടേക്കാം. മത്സരാധിഷ്ഠിതമായ കരാറുകളിൽ വിജയിക്കുന്നതാണ്. വീടുപണിക്കായി  സാമ്പത്തികം സ്വരൂപിക്കാൻ കിണഞ്ഞ് പരിശ്രമിക്കും.

ചോതി

സ്വാഭാവികമായ പ്രവർത്തന ശൈലിയും ആർജവവും സമൂഹത്തിൻ്റെ അഭിനന്ദനം ഏറ്റുവാങ്ങും. പുതിയ കാര്യങ്ങൾ പഠിച്ചുൾക്കൊള്ളാൻ തുടർച്ചയായ ശ്രമം നടത്തുന്നതാണ്. സ്വകാര്യ സ്ഥാപനത്തിൽ പുതിയ ജോലിയിൽ പ്രവേശിക്കാനാവും. പാർട്ണർഷിപ്പ് വ്യാപാരത്തിൽ നിന്നും അല്പലാഭം പ്രതീക്ഷിച്ചാൽ മതി. നവസംരംഭങ്ങൾ തുടങ്ങാൻ കുറച്ചു കൂടി കാത്തിരിപ്പ് ആവശ്യമാണ്. ആറാമെടത്തിലെ ശുക്രൻ സ്ത്രീകളിൽ നിന്നുമുള്ള ശത്രുത സൃഷ്ടിച്ചേക്കാം. രോഗഗ്രസ്തർക്ക് ചികിൽസാ മാറ്റത്താൽ ഗുണം ഭവിക്കുന്നതാണ്. ഭൂമി വ്യാപാരത്തിൽ ആദായം ഉണ്ടാവുമെങ്കിലും കബളിപ്പിക്കപ്പെടാൻ സാധ്യതയുണ്ട്. പ്രണയവിഘ്നം മനക്ലേശം വരുത്താം. ദാമ്പത്യത്തിൽ അനുരഞ്ജനമാർഗം അനിവാര്യമാണ്.

വിശാഖം

ജീവിതത്തിൻ്റെ സ്വാഭാവിക ഗതി തുടരുന്നതാണ്. പ്രവർത്തന രംഗത്തിൽ കയറ്റിറക്കങ്ങൾ ആവർത്തിച്ചേക്കാം. എന്നാൽ മാനസിക ശക്തി ചോരുകയില്ല. നിലവിലെ തൊഴിൽ ഉപേക്ഷിച്ചുകൊണ്ട് പുതിയ ജോലി തേടുന്നത് ചിലപ്പോൾ ദോഷകരമാവും. ജീവിത പങ്കാളി നടത്തുന്ന ഓൺലൈൻ വ്യാപാരം മെച്ചപ്പെടുന്നതാണ്. പൈതൃകസ്വത്ത് മകളുടെ വിവാഹത്തിനായി വിൽക്കാൻ തീരുമാനിച്ചേക്കും.  വാഗ്ദാനങ്ങൾ പാലിക്കാൻ ക്ലേശിക്കുന്നതാണ്. കലാകാരന്മാർക്ക് അഞ്ചാം ഭാവത്തിലെ ഉച്ചസ്ഥനായ ശുക്രനാൽ നല്ല അവസരങ്ങൾ ലഭ്യമായേക്കും. ക്ഷേത്രോത്സവാദികളുടെ നടത്തിപ്പിന് സമയം കണ്ടെത്തുന്നതാണ്. വിദേശത്തുള്ള ബന്ധു / സുഹൃത്ത് ധനപരമായി സഹായിക്കുവാൻ സാധ്യത കാണുന്നു. ആരോഗ്യ പരിശോധനയിൽ അലംഭാവമരുത്.

അനിഴം

ലക്ഷ്യം നേടാൻ ആവർത്തിത ശ്രമം ആവശ്യമായി വരുന്ന കാലഘട്ടമാണ്. അദ്ധ്വാനഭാരം ചിലപ്പോൾ മടുപ്പുളവാക്കാം. ഔദ്യോഗിക യാത്രകൾ കൂടുന്നത് ദേഹക്ഷീണത്തിന് കാരണമാകുന്നതാണ്. ഏജൻസി / കമ്മീഷൻ / ചെറുകിട വ്യാപാരം എന്നിവ ലാഭകരമായേക്കും. സ്വകാര്യസ്ഥാപനത്തിലെ ജോലിയിൽ വേതനം വർദ്ധിക്കാനിടയുണ്ട്. ബിസിനസ്സ് വിപുലീകരണത്തിന് സുഹൃൽ സഹായം തേടുന്നതാണ്. ബന്ധുക്കളുടെ പ്രശ്നങ്ങളിൽ ഇടപെടുന്നത് കരുതലോടെ വേണം. ദുരാരോപണങ്ങൾ ഉന്നയിക്കപ്പെടാം. വാഹനം മോടിപിടിപ്പിക്കും. നവീനമായ ഇലക്ട്രോണിക് ഉല്പന്നങ്ങൾ പ്രതിമാസ അടവിൽ വാങ്ങുന്നതാണ്. വിദ്യാർത്ഥികൾക്ക് പഠനത്തിൽ ഉത്സാഹമേറാം. വ്യവഹാരങ്ങൾ കോടതിക്ക് പുറത്ത് രാജിയായേക്കും. മകളുടെ ജോലിസ്ഥലത്ത് താമസിക്കേണ്ട സാഹചര്യം വരാം.

തൃക്കേട്ട

പ്രവർത്തനരംഗത്ത്  മികവ് തുടരുന്നതാണ്. കഴിവ് പ്രദർശിപ്പിക്കാനുള്ള കൂടുതൽ അവസരങ്ങൾ ലഭിച്ചേക്കും. സാമൂഹിക മേഖലയിൽ നീതിബോധവും മനുഷ്യപ്പറ്റും കൈവിടില്ല. സഹപ്രവർത്തകരുടെ പ്രശ്നങ്ങളിൽ ഇടപെടുകയാൽ മേലധികാരികളുടെ വിരോധം നേടിയേക്കും. വ്യാഴം, ശുക്രൻ എന്നീ ഗ്രഹങ്ങളുടെ ഇഷ്ടഭാവ സഞ്ചാരത്താൽ കലാരംഗത്തുള്ളവർക്ക് കഴിവുകൾക്ക് അർഹമായ പുരസ്കാരം ലഭിക്കാനിടയുണ്ട്. കുടുംബത്തിലെ കൊച്ചുകൊച്ചു സന്തോഷങ്ങൾ ഊർജ്ജം പകരുന്നതാണ്. അന്യദേശത്ത് പഠന - തൊഴിൽ സാധ്യതകൾ ആരായും. സിമ്പോസിയങ്ങളിൽ / സമ്മേളനങ്ങളിൽ പങ്കെടുക്കാൻ അവസരം കൈവരുന്നതാണ്. ചൊവ്വ അഷ്ടമത്തിൽ സഞ്ചരിക്കുകയാൽ ആരോഗ്യ ജാഗ്രത പുലർത്തണം. വസ്തുവ്യാപാരം കൊണ്ട് നഷ്ടം വരാനിടയുണ്ട്.

മൂലം

കഴിഞ്ഞ ഒന്നുരണ്ടു മാസങ്ങളെ അപേക്ഷിച്ച് മെച്ചപ്പെട്ട സ്ഥിതിയുണ്ടാവും. കാര്യസാധ്യത്തിന് വലിയ തടസ്സങ്ങളുണ്ടാവില്ല. ലഘുപ്രയത്നം കൊണ്ടുതന്നെ അർഹമായ നേട്ടങ്ങൾ വരികയും ചെയ്യും. എതിർ ചേരിയിൽ നിന്നവർ പോലും സഹായിച്ചേക്കാം.  സർക്കാരിൽ നിന്നും ലഭിക്കേണ്ട പേപ്പറുകൾ, അനുമതികൾ ഇവ കൈവരുന്നതാണ്. ഉന്നത വിദ്യാഭ്യാസത്തിന് ബാങ്കിൽ നിന്നും വായ്പ നേടാനാവും. സ്വാശ്രയ പ്രസ്ഥാനങ്ങൾ അരിഷ്ടകളൊഴിഞ്ഞ് മുന്നോട്ടു പോകുന്നതാണ്. സംഘടന, സമരസമിതി, ഉൽസവ കമ്മിറ്റി ഇത്യാദികളിൽ പൂർവ്വാധികം ശക്തമായി പ്രവർത്തിക്കും. ഗൃഹനിർമ്മാണത്തിന് ധനം സമാഹരിക്കാൻ സാധിക്കുന്നതാണ്. ഏഴാം ഭാവത്തിൽ ചൊവ്വ തുടരുകയാൽ ദാമ്പത്യത്തിൽ അനൈക്യം കടന്നുവരാം. പരസ്പരം മനസ്സിലാക്കാനുള്ള ശ്രമവും വിട്ടുവീഴ്ചകളും പരിഹാരമാർഗങ്ങളായി കരുതാം.

പൂരാടം

ബഹുവിധ കാര്യങ്ങളുടെ ഏകോപനം ഏറ്റെടുക്കേണ്ടി വരും. അവയ്ക്കായി ധാരാളം സമയവും ഊർജ്ജവും ചെലവഴിക്കപ്പെടും. ആത്മാർത്ഥത തിരിച്ചറിയപ്പെടുന്നതാണ്. ഔദ്യോഗികമായി വളർച്ചയുണ്ടാവുന്ന കാലം എത്തിക്കഴിഞ്ഞു. വ്യാപാരരംഗത്തിലെ മുരടിപ്പ് മാറിയേക്കും.  നവീകരണ ശ്രമങ്ങൾക്ക് ലക്ഷ്യപ്രാപ്തി കൈവരിക്കാനാവും. സുഹൃത്ബന്ധം ആശ്വാസമേകും. വിശിഷ്യാ സ്ത്രീസൗഹൃദം. ഗാർഹികമായ പൊരുത്തക്കേടുകൾ തുടരുമെങ്കിലും അവയോട് പൊരുത്തപ്പെട്ട് മുന്നേറാൻ മനസ്സിന് സാധിച്ചേക്കും. രാഷ്ട്രീയ പ്രവർത്തകർ കൂടുതൽ ജനകീയരാവും. ഏതു തൊഴിലിലും ആത്മവിശ്വാസം ഭവിക്കുന്ന കാലമാണ്. മക്കളുടെ ഭാവികാര്യത്തിൽ നല്ല സൂചനകൾ വന്നെത്തും. ധനപരമായ ഞെരുക്കത്തിന് അയവുണ്ടായേക്കും.

ഉത്രാടം

ധനുക്കൂറുകാർക്ക് മെച്ചപ്പെട്ട ഫലങ്ങളും മകരക്കൂറുകാർക്ക് സമ്മിശ്രാനുഭവങ്ങളും വന്നെത്തുന്നതാണ്. ജന്മനക്ഷത്രാധിപനായ സൂര്യന് ശനി - ബുധയോഗം വരുന്നു. അതിനാൽ കൂട്ടുകെട്ടുകൾ വർദ്ധിക്കും. പ്രവർത്തന മേഖല വിശാലമായേക്കും. പ്രതികൂല ശക്തികളെ പ്രതിരോധിക്കാൻ കൂടുതൽ വിയർപ്പൊഴുക്കേണ്ടി വരുന്നതാണ്. മേലുദ്യോഗസ്ഥരുടെ മാർഗദർശിത്വം ലഭിക്കും. സഹപ്രവർത്തകർ വേണ്ടത്ര സഹകരിച്ചേക്കില്ല. സ്വാർജ്ജിത ധനം സംരംഭങ്ങൾക്ക് മുതൽമുടക്കും മുൻപ് സാമ്പത്തിക നിപുണരുടെ അഭിപ്രായം തേടുന്നത് ഉചിതമായിരിക്കും. വേണ്ടപ്പെട്ടവർ ചൂണ്ടിക്കാട്ടുകയാൽ ചില ശീലങ്ങൾ വെടിയാൻ തയ്യാറാവുന്നതാണ്. കുടുംബ ജീവിതത്തിൽ സാമാന്യമായ സംതൃപ്തി പ്രതീക്ഷിക്കാം. ആഗ്രഹിച്ചിരുന്ന വിലകൂടിയ ഇലക്ട്രോണിക് ഉല്പന്നങ്ങൾ സ്വന്തമാക്കാനാവും.

തിരുവോണം

ആദിത്യൻ ജന്മരാശിയിൽ നിന്നും മാറുന്നത് കുറച്ചൊക്കെ ഗുണകരമാണ്. കാര്യസാധ്യത്തിന് ഇനി അലച്ചിലുണ്ടാവില്ല. പ്രയത്നം അവഗണിക്കപ്പെടില്ല. ബുധൻ്റെ രണ്ടാം ഭാവസ്ഥിതിയാൽ വിദ്യാവിജയം സൂചിതമാണ്. ബന്ധുക്കളുടെ നിർലോഭമായ പിന്തുണയുണ്ടാവും. വചനങ്ങൾ ശ്രോതാക്കളെ സന്തോഷിപ്പിക്കും. മൂന്നാം ഭാവത്തിലെ രാഹുശുക്ര യോഗം സഹോദരീസഹോദര രുടെ അഭ്യുദയത്തെ വ്യക്തമാക്കുന്നു. അഞ്ചാം ഭാവത്തിലെ വ്യാഴസ്ഥിതി മക്കളുടെ ശ്രേയസ്സിന് കാരണമാകും. സൽകാര്യങ്ങളിൽ ശ്രദ്ധയുണ്ടാവും. ആറിൽ കുജൻ തുടരുന്നത് ശത്രുവിജയത്തിന് കളമൊരുക്കുന്നതാണ്. ഭൂമി വ്യാപാരത്തിൽ കരുതിയതിലധികം ലാഭം വന്നേക്കാം. നവീനമായ ഉദ്യമങ്ങൾ ആദായകരമാവും. ആലോചനാശൂന്യതയാൽ കാര്യതടസ്സം, ആരോഗ്യപ്രശ്നങ്ങൾ എന്നിവ സംബന്ധിച്ച ജാഗ്രതയും വേണ്ടതുണ്ട്.

അവിട്ടം

അനുകൂല പ്രതികൂലതകൾ ഒരുപോലെ അനുഭവത്തിൽ വരുന്ന കാലമാണ്. സ്വന്തം തൊഴിൽ സ്ഥാപനത്തിന് മറ്റൊരു ശാഖ തുറക്കാനുള്ള ശ്രമം വിജയിക്കും.  ഉദ്യോഗസ്ഥർക്ക് ചുമതലകൾ വർദ്ധിക്കുന്നതാണ്. എന്നാൽ പദവിയിൽ ഉയർച്ച ഉണ്ടാവണമെന്നില്ല. താത്കാലികമായ സാമ്പത്തിക ലാഭം വന്നുചേരുന്നതാണ്. വാടകവീടുമാറേണ്ട സാഹചര്യം ഉയരാം. പരോക്ഷ ശത്രുക്കളുടെ പ്രവർത്തനം വിഷമിപ്പിക്കുന്നതാണ്. ഓൺലൈൻ വിനോദങ്ങളിലൂടെ ധനനഷ്ടം വരാനിടയുണ്ട്. അക്കാര്യത്തിൽ ജാഗ്രതയുണ്ടാവണം. കുടുംബ ജീവിതത്തിലെ അസംതൃപ്തികൾ മനോനിലയെ ബാധിച്ചേക്കാം. സാമ്പത്തികമായി അത്ര മോശം സമയമാണെന്ന് പറയാനാവില്ല. പണം തരാനുള്ളവരിൽ നിന്നും കുറച്ചൊക്കെ വസൂലാക്കാനാവും.

ചതയം

ജന്മരാശിയിൽ പാപഗ്രഹങ്ങൾ സഞ്ചരിക്കുകയാൽ കാലം അനുകൂലമല്ലെന്ന് ഓർമ്മിക്കണം. സാഹസങ്ങൾക്ക് മുതിരരുത്. പ്രധാന കാര്യങ്ങൾ വളരെ ആലോചിച്ചാവണം തീരുമാനിക്കാൻ. രോഗഗസ്തർക്ക് ചികിൽസാ മാറ്റം വലിയ ഗുണം ചെയ്തേക്കില്ല. നിർബന്ധശീലം ശത്രുക്കളെ സൃഷ്ടിക്കുന്നതാണ്. എന്നാൽ വരുമാനത്തിൽ കുറവുണ്ടാവില്ല. സാമ്പത്തികമായി തൽസ്ഥിതി തുടരും.  ന്യായമായ ചെലവുകൾ മുടങ്ങിയേക്കില്ല. കുടുംബത്തിൻ്റെ പിന്തുണ ശക്തിയേകും. മുതിർന്നവരുടെ കാര്യങ്ങളിൽ ശ്രദ്ധയുണ്ടാവുന്നത്  നന്ന്. ചെറുപ്പക്കാർക്ക് പുതിയ ജോലി ലഭിക്കുന്നത് ദൂരസ്ഥലത്താവാം. തന്മൂലം തുടരാനും ഉപേക്ഷിക്കാനും കഴിയാത്ത സ്ഥിതിയുണ്ടാവും.  ക്ഷമാശീലമാണ് ഏറ്റവും വലിയ വിജയമന്ത്രമെന്നത് മറക്കരുത്.

പൂരൂരുട്ടാതി

ജന്മനക്ഷത്രത്തിൽ ശനി സഞ്ചരിക്കുന്നു. സൂര്യനും രാഹുവും മുൻ-പിൻ നക്ഷത്രങ്ങളിലുമുണ്ട്. ആകയാൽ പലതരം സമ്മർദ്ദങ്ങൾ ഉണ്ടാവാം. ചെറിയ കാര്യങ്ങൾ പോലും ജാഗ്രതയോടെ കൈകാര്യം ചെയ്യേണ്ടതുണ്ട്. കൂട്ടുകെട്ടുകളിൽ നിന്നും മാറാൻ ശ്രമിച്ചാലും കഴിഞ്ഞേക്കില്ല. ധനപരമായി ജാഗരൂകത വേണ്ട സന്ദർഭമാണ്. സ്വനിക്ഷേപങ്ങളുടെ സുരക്ഷിതത്വം ഉറപ്പുവരുത്തണം. വിദ്യാർത്ഥികൾക്ക് വിദേശ സർവ്വകലാശാലകളിൽ ഉപരിപഠനത്തിന് അവസരം ലഭിക്കാം. കുടുംബം താങ്ങും തണലുമായി ഒപ്പമുള്ളത് ആശ്വാസമേകും. സ്വയം സംരംഭകർക്ക് പ്രതീക്ഷക്ക് വകയുണ്ട്. അർഹതയുണ്ടായിട്ടും പ്രൊമോഷൻ കൈവരാത്തതിൽ വിഷമിക്കും. ജനകീയ പിന്തുണക്കുള്ള ശ്രമം ആരംഭിക്കുന്നതാണ്. സമാന മനസ്കരുടെ യോഗം വിളിക്കാൻ മുന്നോട്ടിറങ്ങും.

ഉത്രട്ടാതി

രാഹുവും ശുക്രനും ജന്മനക്ഷത്രത്തിൽ തുടരുന്ന കാലമാണ്. പിരിമുറുക്കവും അവയ്ക്ക് അയവും മാറി മാറി അനുഭവത്തിൽ വരും. ചിലപ്പോൾ സ്വന്തം കാര്യത്തിൽ രഹസ്യാത്മകത പുലർത്തുന്നതാണ്. പന്ത്രണ്ടിലെ സൂര്യൻ പതിവിലും കൂടുതൽ യാത്രകൾക്ക് കാരണമായേക്കും. തന്മൂലം ദേഹക്ലേശം അനുഭവത്തിൽ വരുന്നതാണ്. സർക്കാരിൽ നിന്നും ലഭിക്കേണ്ട അനുമതികൾ വൈകാനിടയുണ്ട്. പിതാവിൻ്റെ ആരോഗ്യകാര്യത്തിൽ ശ്രദ്ധിക്കുകയും വേണം. ജന്മശുക്രൻ്റെ സാന്നിദ്ധ്യത്താൽ തടസ്സങ്ങളെ അവഗണിച്ച് പ്രണയത്തിൽ ഉറച്ചുനിൽക്കാനാവും. വിലകൂടിയ ആടയാഭരണങ്ങൾ വാങ്ങിയേക്കും. സുഹൃത്തുക്കളുടെ നിലപാടുകൾ വിഷമിപ്പിക്കാനിടയുണ്ട്. വിദ്യാർത്ഥികൾക്ക് പഠനത്തിൽ ശ്രദ്ധ കുറഞ്ഞും കൂടിയുമിരിക്കും. സഹോദരഗുണം പ്രതീക്ഷിക്കാം.

രേവതി

സ്വയം നവീകരിക്കാൻ സന്നദ്ധതയുണ്ടാവും. ശുക്രൻ ജന്മരാശിയിൽ ഉച്ചസ്ഥിതിയിൽ സഞ്ചരിക്കുകയാൽ ഭൗതിക സാഹചര്യങ്ങൾ സാമാന്യമായി മെച്ചപ്പെടുന്നതാണ്. ശനിയും സൂര്യനും വ്യയഭാവത്തിൽ തുടരുന്നത്  ചില അനിഷ്ടങ്ങളേയും അഭിമുഖീകരിക്കേണ്ട സ്ഥിതിയുണ്ടാക്കും. വേണ്ടപ്പെട്ടവർ തെറ്റിദ്ധരിക്കാം. സുതാര്യമല്ലാത്ത പ്രവർത്തനങ്ങൾ അതിൻ്റെ ഒരു കാരണമാവും. സ്വത്തുസംബന്ധിച്ച പ്രശ്നങ്ങൾ ആഗ്രഹിക്കാതെ തന്നെ വ്യവഹാരങ്ങളിലേക്ക് തള്ളിവിട്ടേക്കും. അക്കാര്യത്തിൽ ജാഗ്രതയുണ്ടാവണം. ഔദ്യോഗിക മേഖലയിൽ സ്ഥലംമാറ്റം / പദവിമാറ്റം വരാനിടയുണ്ട്. സാമ്പത്തിക കണക്കുകൾ  കൃത്യമായി സൂക്ഷിക്കാൻ മറക്കരുത്. കുടുംബത്തെക്കൂടി വിശ്വാസത്തിലെടുത്ത് പ്രവർത്തിക്കുന്നത് ഗുണകരമാവും. പതിവായിട്ടുള്ള ആരോഗ്യപരിശോധന മുടക്കരുത്.

Read More

• Weekly Horoscope Feb 09-Feb 15: വാരഫലം, അശ്വതി മുതൽ ആയില്യം വരെ
• Daily Horoscope February 06, 2025: നിങ്ങളുടെ ഇന്നത്തെ ദിവസം, രാശി ഫലം
• Monthly Horoscope February 2025: ഫെബ്രുവരി മാസഫലം, അശ്വതി മുതൽ രേവതിവരെ
• Saturn Transit 2025: 2025ലെ ശനിയുടെ രാശി മാറ്റം; കണ്ടക ശനി, ഏഴര ശനി, അഷ്ടമ ശനി ആർക്കൊക്കെ?
• Weekly Horoscope Feb 02 -Feb 08: സമ്പൂർണ വാരഫലം, അശ്വതി മുതൽ രേവതി വരെ
• Weekly Horoscope (February 02 – February 08, 2025): ഈ ആഴ്‌ച നിങ്ങൾക്കെങ്ങനെ?