കർക്കടകത്തിൽ കുടുംബത്തിൽ സമാധാനം ഏതൊക്കെ നാളുകാർക്ക്?

പുണർതം

സ്വന്തം കഴിവുകളിൽ വിശ്വസിക്കും. സ്വാശ്രയ ബിസിനസ്സിൽ നടത്തിയ പരിഷ്കാരങ്ങൾ ഫലം കാണുന്നതാണ്.സ്വകാര്യ കമ്പനികളിൽ ജോലിചെയ്യുന്നവർക്ക് / സാങ്കേതിക വിദഗ്ദ്ധന്മാർക്കസ്വതന്ത്രചുമതലകളോ വേതന വർദ്ധനവോ പ്രതീക്ഷിക്കാം. പുതുതലമുറയുടെ കാര്യത്തിൽ ശുഭവാർത്തകൾ കേൾക്കും.കുടുംബത്തിൽ സമാധാനമുണ്ടാവും. അഭിപ്രായസ്വാതന്ത്ര്യത്തിൽ വിശ്വസിക്കുന്നതിനാൽ ശത്രുക്കളും കുറയില്ല. പഠനത്തിൽ സാമാന്യമായ പുരോഗതി ഉണ്ടായേക്കും.ഭോഗസുഖം, സുഹൃത്തുക്കളുമായി ഉല്ലാസം ഇവയ്ക്ക് അവസരം സംജാതമാകും. കൊടുക്കാനുള്ള ധനത്തിൻ്റെ കുറച്ചുഭാഗം കൊടുക്കാനായേക്കും. എന്നാൽ കിട്ടാനുള്ള ധനത്തിന് അവധി പറയപ്പെടും. പതിവ് ആരോഗ്യ പരിശോധനകളിൽ അലംഭാവമരുത്.

Also Read: സമ്പൂർണ വർഷഫലം; അശ്വതി മുതൽ രേവതി വരെ

ചോതി

ആദിത്യൻ പത്താമെടത്തിൽ സഞ്ചരിക്കുന്നതിനാൽ തൊഴിൽ മേഖലയിലെ കുഴപ്പങ്ങൾ പരിഹരിക്കപ്പെടും. പുതുതൊഴിൽ ലഭിക്കാം. അർഹമായ സ്ഥാനമാനങ്ങളും കൈവരുന്നതാണ്.  ഒമ്പതിലെ ശുക്രഗുരുയോഗം ഭാഗ്യാനുഭവങ്ങൾ വർദ്ധിക്കാനിടയാക്കും. ധനസ്ഥിതി ഉയരാം. ചിട്ടി, നറുക്കെടുപ്പ്, ഇൻഷ്വറൻസ് തുടങ്ങിയവയിലൂടെ ധനാഗമം പ്രതീക്ഷിക്കാം. സംരംഭങ്ങളുമായി മുന്നോട്ടു പോകാനാവും. കുടുംബ ജീവിതത്തിൽ സമാധാനം വന്നെത്തും. മനസ്സിൽ സന്തോഷം ഉണ്ടാക്കുന്ന ബന്ധങ്ങൾ പുഷ്ടിപ്പെടുന്നതാണ്. രോഗക്ലേശിതർക്ക് ആശ്വാസം അനുഭവപ്പെടും. ശത്രുക്കളുടെ നാവിൽ നിന്നു തന്നെ പരാജയസമ്മതം കേൾക്കാനാവും. പൊതുവേ അമിതമായ അധ്വാനം ഉണ്ടാവില്ല. ജീവിതം പുരോഗതിയുടെ പാതയിലാണെന്ന് സ്വയം ബോധ്യമാകുന്നതാണ്.

Also Read: ശുക്രൻ കർക്കടകം, ചിങ്ങം രാശികളിലേക്ക്; അശ്വതി മുതൽ രേവതി വരെ

മൂലം

ആദിത്യസഞ്ചാരം എട്ടാമെടത്തിലാകയാൽ ഔദ്യോഗികമായി അലച്ചിലുണ്ടാവും.  മേലധികാരികളുടെ ഇഷ്ടക്കേട് പ്രകടമാവും. സർക്കാർ മുഖാന്തിരം നേടേണ്ട  കാര്യങ്ങളിൽ കാലവിളംബം വന്നേക്കും. വസ്തുക്കളുടെ ക്രയവിക്രയത്തിൽ തടസ്സം നേരിടാം. ബിസിനസ്സിൽ വിപണന തന്ത്രങ്ങൾ ഫലിക്കുന്നില്ലെന്നു വരാം. പാർട്ണർഷിപ്പ് ബിസിനസ്സിൽ കൂടുതൽ സമയം ചെലവഴിക്കും. കുടുംബകാര്യങ്ങളിൽ സമാധാനമുണ്ടാവും. ജീവിതപങ്കാളിയുടെ പിന്തുണ എത്ര വിലപ്പെട്ടതെന്ന് ബോധ്യമാവും. അനുരാഗികൾക്ക് വിഘ്നങ്ങൾ ഒഴിയുന്നതാണ്. വിദ്യാർത്ഥികൾക്ക് വിദേശ പഠനത്തിനോ സാങ്കേതിക മുഖ്യത്വമുള്ള കോഴ്സിനോ അവസരം വന്നെത്തുന്നതാണ്.  സാമ്പത്തിക കാര്യങ്ങളിൽ കരുതൽ അനിവാര്യം.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ഉത്രട്ടാതി

ആദിത്യൻ്റെ അഞ്ചിലെ സഞ്ചാരത്താൽ ജീവിതത്തിന് വലിയ മാറ്റം ഉണ്ടാവണമെന്നില്ല. കുറ്റമറ്റ രീതിയിൽ പ്രവർത്തിച്ചാലും ദോഷൈകദൃക്കുകൾ ആരോപണങ്ങൾ ഉന്നയിക്കാം. പാരമ്പര്യമഹിമകൾ ചിലപ്പോൾ വിലപ്പോയില്ലെന്ന് വരാം. കാര്യനിർവഹണം മെല്ലെയാവുന്നതാണ്. പുതിയ സംരംഭങ്ങൾ പ്രാവർത്തികമാക്കുക എളുപ്പമാവില്ല. ഗൃഹത്തിൽ സമാധാനം പുലരുന്നതാണ്. ആഘോഷങ്ങൾ, മംഗളകർമ്മങ്ങൾ ഇവ നടക്കാം. രഹസ്യ നിക്ഷേപങ്ങളിലൂടെ ധനസ്ഥിതി ഉയരാം. കിട്ടാക്കടങ്ങൾ തേടിവരും. രണ്ടാം പകുതിയിൽ ചൊവ്വ ഏഴിൽ സഞ്ചരിക്കുകയാൽ ഗാർഹിക ജീവിത്തിൽ സ്വൈരം കുറയുന്നതാണ്. അനുരഞ്ജനത്താൽ പ്രശ്നങ്ങൾ പരിഹരിക്കും.

Also Read: 'അച്ഛനെയാണെനിക്കിഷ്ടം...' അച്ഛനും മക്കളും ജ്യോതിഷവും