Mercury Transit 2025: ജനുവരിയിൽ ബുധന്റെ രാശിമാറ്റം: ഗുണം ആർക്കൊക്കെ?

ജനുവരി മാസം തുടങ്ങുമ്പോൾ ബുധൻ (Mercury) വൃശ്ചികം രാശിയിലാണ്. രണ്ടുമാസത്തോളമായി ബുധൻ വൃശ്ചികരാശിയിൽ തുടരുകയാണ്. സാധാരണ ഒരു മാസത്തിൽ താഴെ ദിവസങ്ങൾ മാത്രമാണ് ബുധൻ ഒരു രാശിയിൽ സഞ്ചരിക്കുന്നത്. ഇത്തവണ ആ പതിവ് തെറ്റുന്നു.

2025 ജനുവരി 4 ന് ഉച്ചയ്ക്ക് ബുധൻ വൃശ്ചികം രാശിയിൽ നിന്നും ധനുരാശിയിൽ പ്രവേശിക്കുന്നു. ഏതാണ്ട് 20 ദിവസം മാത്രം ധനുരാശിയിൽ തുടരുന്ന ബുധൻ, ജനുവരി 24 ന് വൈകുന്നേരം മകരം രാശിയിൽ പ്രവേശിക്കുന്നു. അതായത് ജനുവരി മാസത്തിൽ ബുധൻ വൃശ്ചികം, ധനു, മകരം എന്നീ മൂന്നു രാശികളിലൂടെ ക്രമത്തിൽ സഞ്ചരിക്കുകയാണ്. 

ഈ രാശികളിൽ വരുന്ന തൃക്കേട്ട, മൂലം, പൂരാടം, ഉത്രാടം, തിരുവോണം എന്നീ അഞ്ച് നക്ഷത്രമണ്ഡലങ്ങളിൽ കൂടി ബുധൻ കടന്നുപോകുന്നു. വൃശ്ചികം രാശിയിൽ സഞ്ചരിച്ച അവസാന ഒരു മാസക്കാലം ബുധന് മൗഢ്യം ഉണ്ടായിരുന്നില്ല. ധനുരാശിയിൽ പ്രവേശിച്ചതോടെ ബുധന് സൂര്യയോഗം ഉണ്ടാവുന്നു. സൂര്യനുമായി അടുത്തു സഞ്ചരിക്കുമ്പോഴാണ് എല്ലാ ഗ്രഹങ്ങൾക്കും മൗഢ്യം അഥവാ പാട് ഭവിക്കുക. ജനുവരി 20 ന് ബുധന് വീണ്ടും മൗഢ്യം (combust) തുടങ്ങുകയാണ്.

ബുധൻ വിദ്യാഭ്യാസം, കച്ചവടം, പാണ്ഡിത്യം, ബന്ധുക്കൾ, സംഭാഷണം, പ്രസംഗം, ബുദ്ധി, കളി, കൗശലം, അറിവ് നേടൽ, ഗണിതം, ജ്യോതിഷം, ത്വക്ക്,
വളർത്തു പക്ഷികൾ, സൗമ്യശീലം, ഹാസ്യം, ഹാസ്യാനുകരണം എന്നിവയുടെ വക്താവായ, കാരകനായ ഗ്രഹമാണ്. ബുധൻ്റെ ബലാബലത്തെ മുൻനിർത്തിയാണ് മേല്പറഞ്ഞ കാര്യങ്ങളുടെ അനുഭവതലം ഒരാളുടെ ജീവിതത്തിൽ തെളിയുന്നത്.

2025 ജനുവരിയിൽ മൂന്നുരാശികളിലും അഞ്ചു നക്ഷത്രങ്ങളിലും ആയി കടന്നുപോകുന്ന ബുധൻ്റെ രാശിചക്രസഞ്ചാരം മേടക്കൂറു മുതൽ മീനക്കൂറു വരെയുള്ള പന്ത്രബുരാശികളിലെ അശ്വതി മുതൽ രേവതി വരെയുള്ള  ഒന്‍പത് നക്ഷത്രങ്ങളിൽ ജനിച്ചവരെ എങ്ങനെ സ്വാധീനിക്കുന്നു എന്ന അന്വേഷണമാണ് ഈ ലേഖനം.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

ബുധൻ ജന്മരാശിയുടെ 8,10 ഭാവങ്ങളിൽ ഗുണപ്രദനാണ്. ഒമ്പതാം ഭാവത്തിൽ ഗുണരഹിതനും. ആകയാൽ ജനുവരി 4 വരെയും ജനുവരി 20 നു ശേഷവും ബുധൻ അനുകൂലഫലങ്ങളേകും. കച്ചവടത്തിൽ ഉയർച്ച പ്രതീക്ഷിക്കാം. വിദ്യാഭ്യാസത്തിൽ മികവുണ്ടാവും. വിശേഷിച്ചും ഗണിതം, ഹ്യൂമാനിറ്റീസ് തുടങ്ങിയ വിഷയങ്ങളിൽ.  മത്സരങ്ങളിൽ അന്തിമ വിജയം നേടിയെടുക്കും. വാർത്താ വിനിമയശേഷിയാൽ ഏവരുടെയും പ്രശംസ നേടുന്നതാണ്. പുതിയ കാര്യങ്ങൾ പഠിക്കാൻ നേരം കണ്ടെത്തും. ബന്ധുക്കളുമായുള്ള പിണക്കം അവസാനിക്കുന്നതാണ്. ദൂരദേശ യാത്രകൾക്ക് കളമൊരുങ്ങാം. ബുദ്ധിപരമായ വിനോദങ്ങളിൽ മെച്ചപ്പെടും. നവസംരംഭങ്ങൾക്ക് സർക്കാരിൽ നിന്നുള്ള അനുമതി ലഭിച്ചേക്കും. ജനുവരി 5 മുതൽ 20 വരെ ദിവസങ്ങളിൽ ബന്ധുവിരോധം, ദേഹക്ലേശം, കാര്യതടസ്സം ഇവ സാധ്യതകൾ. പ്രമാണങ്ങളിലും കരാറുകളിലും ഏർപ്പെടുമ്പോൾ ശ്രദ്ധയുണ്ടാവണം.

ഇടവക്കൂറിന് (കാർത്തിക 2, 3, 4 പാദങ്ങൾ, രോഹിണി, മകയിരം 1,2 പാദങ്ങൾ)

ബുധൻ 7, 9 ലും സഞ്ചരിക്കുമ്പോൾ അനുകൂലനല്ല. അതായത് ജനുവരി 4 വരെ വൃശ്ചികം രാശിയിലും ജനുവരി 20 നു ശേഷം മകരം രാശിയിലും സഞ്ചരിക്കുമ്പോൾ. ജനുവരി 5 മുതൽ 20 വരെ എട്ടാമെടമായ ധനുരാശിയിൽ ബുധൻ ഗുണാനുഭവങ്ങൾ സമ്മാനിക്കുന്നു. സ്വതസ്സിദ്ധമായ കഴിവുകൾ വർദ്ധിക്കും. കാര്യാലോചനകളിൽ ബുദ്ധിപൂർവ്വം സംസാരിക്കുന്നതിനാൽ അധികാരികളുടെ പ്രീതി നേടുന്നതാണ്. കൂട്ടുകച്ചവടം വിജയിക്കുവാൻ ആവശ്യമായ തന്ത്രങ്ങൾ ആവിഷ്ക്കരിക്കും. കലാപരമായ നേട്ടങ്ങൾക്ക് സാധ്യതയുണ്ട്. സംവാദങ്ങളിൽ ശോഭിക്കുന്നതാണ്. ബന്ധുകലഹത്തിൽ മാധ്യസ്ഥം നിൽക്കും. വിജ്ഞാനസമ്പാദനത്തിൽ വിട്ടുവീഴ്ചയുണ്ടാവില്ല. സാമ്പത്തിക സ്ഥിതി മെച്ചപ്പെടുന്നതാണ്. കടബാധ്യതകൾ വീടാനാവും. വൈവിധ്യപൂർണമായ കർമ്മങ്ങൾ ചെയ്ത് സമൂഹത്തിൻ്റെ അംഗീകാരം നേടും.

മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1, 2, 3 പാദങ്ങൾ)

മിഥുനക്കൂറുകാർക്ക് ജനുവരിയിൽ ബുധൻ അനുകൂലഫലങ്ങൾ നൽകുക തുടക്കത്തിലെ നാല് ദിവസവും ഒടുവിലെ പത്തുദിവസവുമാണ്. ഇക്കാലഘട്ടത്തിൽ ആത്മവിശ്വാസം വർദ്ധിക്കുന്നതാണ്. തൊഴിലിടത്തിലെ പ്രശ്നങ്ങൾ പരിഹരിക്കാൻ സാധിക്കും. ബിസിനസ്സിൽ ഫലവത്തായ കൂട്ടുകെട്ടുകളുണ്ടാവും. ഊഹക്കച്ചവടത്തിൽ ആദായം പ്രതീക്ഷിക്കാം. വ്യാപാരിഭിവൃദ്ധിക്കായി യാത്രകൾ വേണ്ടിവരും. ഗവേഷണം പൂർത്തീകരിക്കും. വിദ്യാർത്ഥികളുടെ പഠന നിലവാരം ഉയരുന്നതായിരിക്കും. സാഹിത്യകാരന്മാരുടെ സർഗവൈഭവം ഉയരുന്നതാണ്. സംഭാഷണ ശക്തി സദസ്സിൻ്റെ കൈയ്യടി നേടുന്നതായിരിക്കും. സ്വന്തമാവശ്യങ്ങൾ മേലധികാരിയുടെ മുന്നിൽ ചാതുര്യത്തോടെ അവതരിപ്പിക്കും.  തിരിച്ചടികളെ ഫലിതബോധത്തോടെ നേരിടാനുള്ള മനസ്സുണ്ടാവും. ജീവിതശൈലീ രോഗങ്ങൾക്ക് ചികിത്സ വേണ്ടിവരുന്നതാണ്.

കർക്കടകക്കൂറിന് (പുണർതം നാലാം പാദം, പൂയം, ആയില്യം)

ബുധൻ കർക്കടകക്കൂറുകാർക്ക് ജനുവരിമാസത്തിൽ 5, 6, 7 ഭാവങ്ങളിലായി സഞ്ചരിക്കുന്നു. ഇതിൽ ശുഭത്വം ഭവിക്കുന്നത് ആറാം ഭാവത്തിലാണ്. ജനുവരി 5 മുതൽ 20 വരെ ബുധസഞ്ചാരം ഏറ്റവും അനുകൂലമായ അനുഭവങ്ങൾക്ക് കാരണമാകും. പദവികളോ ചുമതലയോ ഉയരാം. സഹപ്രവർത്തകർ നിർദ്ദേശങ്ങൾ സ്വീകരിക്കും. വ്യാപാര-വ്യവസായം ആലസ്യം നീങ്ങി പുഷ്ടിപ്പെടുന്നതാണ്. വളർച്ചക്കാവശ്യമായ അച്ചടക്കം സ്വയം പുലർത്തും. സാമ്പത്തിക കാര്യങ്ങളിൽ കൃത്യത വേണ്ടതുണ്ട്. സാങ്കേതിക വിജ്ഞാനം നേടാൻ പരിശ്രമിക്കുന്നതാണ്. ഉപഭോക്താക്കളെ ആകർഷിക്കുന്ന തന്ത്രങ്ങൾ നടപ്പിലാക്കും. കുടുംബ ജീവിതത്തിൽ സ്വസ്ഥതയുണ്ടാവും. ജീവിത പങ്കാളിയുടെ സഹകരണം വിജയത്തെ കൂടുതൽ മാധുര്യമുള്ളതാക്കും. ചെറുപ്പക്കാർക്ക് മത്സരം, അഭിമുഖം തുടങ്ങിയവയിൽ സ്വന്തം കഴിവുകൾ തെളിയിക്കാനാവും. വായ്പകൾ ലഭിക്കാനിടയുണ്ട്. സുഹൃത്തുക്കളുടെ ആശയങ്ങൾ സ്വീകാര്യമായിരിക്കും.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ചിങ്ങക്കൂറുകാർക്ക് ബുധൻ ജനുവരി 4 വരെയും ജനുവരി 20 നു ശേഷവും ഗുണം നൽകുന്ന നിലയിലാണ് സഞ്ചരിക്കുന്നത്. കുടുംബത്തിൽ സമാധാനമുണ്ടാവും. ഇക്കാലയളവിൽ വസ്തുതർക്കത്തിന് പരിഹാരമായേക്കും. മേലധികാരികളുടെ സംശയം ദൂരികരിക്കാനാവും. തൊഴിൽ തേടുന്ന ചെറുപ്പക്കാർക്ക് പിടിച്ചു നിൽക്കാനുള്ള അവസരമുണ്ടായേക്കും. ചിട്ടി,ഇൻഷ്വറൻസ് ഇവയിൽ നിന്നും ധനലാഭം വരുന്നതാണ്. സമാധാനാന്തരീക്ഷം വീട്ടിലും പ്രതീക്ഷിക്കാം.  മകൻ്റെ ഉപരിപഠനം സംബന്ധിച്ച ആശയക്കുഴപ്പം അവസാനിക്കുന്നതാണ്. പിണങ്ങിക്കഴിഞ്ഞ ബന്ധുക്കൾ ഇണക്കത്തിലാവും. മംഗളകർമ്മങ്ങളിൽ പങ്കെടുക്കാൻ അവസരം ലഭിക്കുന്നതാണ്. വാക്കുകൾ, അക്ഷരം, ശബ്ദം, എഴുത്ത് എന്നിവയുമായി ബന്ധപ്പെട്ട ജോലികളിൽ കൂടുതൽ ഉയർച്ച പ്രതീക്ഷിക്കാം. നവസംരംഭങ്ങൾക്ക് മോശമല്ലാത്ത സ്വീകാര്യത ലഭിക്കുന്നതാണ്.

കന്നിക്കൂറിന് (ഉത്രം 2,3,4 പാദങ്ങൾക്ക്., അത്തം, ചിത്തിര 1,2 പാദങ്ങൾ)

2025 ജനുവരി മാസത്തിൽ  ബുധൻ മൂന്നു രാശികളിൽ സഞ്ചരിക്കുന്നു. കന്നിക്കൂറുകാർക്ക് ബുധൻ അനുകൂലനാവുന്നത് ജനുവരി 4 മുതൽ 20 വരെ ധനു രാശിയിൽ സഞ്ചരിക്കുമ്പോഴാണ്.  ന്യായമായ ആഗ്രഹങ്ങൾ നിറവേറപ്പെടുന്ന കാലമായിരിക്കും.ഗൃഹസൗഖ്യമുണ്ടാവും. കുടുംബത്തിലെ അനൈക്യം നീങ്ങിയേക്കും. മനസ്സ് കാറൊഴിഞ്ഞ ആകാശം പോലെ പ്രസന്നമാവും. മനസ്സിനിണങ്ങിയ സുഹൃത്തുക്കളെ ലഭിക്കുന്നതാണ്. കർമ്മരംഗത്തെ തടസ്സങ്ങൾ അകലുന്നതാണ്. അദ്ധ്യാനഭാരം പാഴാവുകയില്ല. ചുമതലകൾ ഭംഗിയായി നിർവഹിച്ച് അഭിനന്ദനം നേടുന്നതാണ്. പഠനമികവുണ്ടാവും. പുതിയ കാര്യങ്ങൾ പഠിച്ചറിയാൻ ഔത്സുക്യമുണ്ടായിരിക്കും.  ബന്ധുക്കളുടെ പൂർണ്ണ പിന്തുണ വന്നുചേരും. സാഹിത്യം, കല തുടങ്ങിയ മേഖലകളിൽ വിജയമുണ്ടാവും. ജനുവരി 4 വരെയും ജനുവരി 20 നു ശേഷവും സാമ്പത്തിക അമളികൾ ഉണ്ടാവാനിടയുണ്ട്. ആരോഗ്യപരമായി കരുതൽ വേണ്ടതുണ്ട്.

തുലാക്കൂറുകാർക്ക് (ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)

ജനുവരി 4 വരെയും ജനുവരി 20 ന് ശേഷവും ബുധൻ ശുഭഫലങ്ങൾ നൽകുന്നതാണ്. ഉദ്യോഗസ്ഥർക്ക് മേലധികാരികളുടെ പ്രീതി നേടാൻ കഴിയും. തൊഴിലിടത്തിൽ സ്വസ്ഥത വന്നെത്തും. ഒപ്പമുള്ളവരുടെ സഹകരണം ലഭിക്കുന്നതായിരിക്കും. പണ്ഡിതോചിതമായി സംസാരിക്കുന്നതാണ്. സ്വന്തം അറിവുകൾ മറ്റുള്ളവർക്ക് മനസ്സിലാക്കിക്കൊടുക്കാൻ മടിക്കില്ല. പ്രസംഗം, സംവാദം ഇവയിൽ ശോഭിക്കുവാനാവും. പൊതുപ്രവർത്തകർക്ക് അനുയായികളുടെ എണ്ണം കൂടും. തിമിര ശസ്ത്രക്രിയ വിജയകരമാവും. ധനാഗമത്തിലെ തടസ്സങ്ങൾ അകലുന്നതാണ്. അനുബന്ധ ജോലി പുരോഗതിയിലെത്തും. ഉപരിപഠനം സംബന്ധിച്ച ആശയക്കുഴപ്പം നീങ്ങുന്നതാണ്. ദമ്പതികൾക്കിടയിലെ അസ്വാരസ്യം മാറി ഇണക്കം വർദ്ധിക്കും. ജനുവരി 5 -20 തീയതികൾക്കുള്ളിൽ വിവാദങ്ങളിൽ നിന്നും അകന്നുനിൽക്കണം. ബന്ധുക്കൾ പിണങ്ങാനിടയുണ്ട്. പിന്തുണ നൽകിയവർ അവ പിൻവലിച്ചേക്കാം.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

ബുധൻ ജന്മരാശിയിലും രണ്ടിലും മൂന്നിലുമായി സഞ്ചരിക്കുന്നു. ഇതിൽ രണ്ടാം ഭാവമായ ധനുരാശിയിൽ സഞ്ചരിക്കുന്ന ജനുവരി 5 മുതൽ 20 വരെയുള്ള ദിവസങ്ങൾ കർമ്മഗുണമുള്ളവയാണ്. പ്രവർത്തനങ്ങൾ തടസ്സമില്ലാതെ മുന്നോട്ടുപോകും. പ്രധാന തീരുമാനങ്ങൾ കുടുംബാംഗങ്ങളുടെ പിന്തുണയോടെ കൈക്കൊള്ളാൻ സാധിക്കുന്നതാണ്. പ്രൊഫഷണലുകൾക്ക് കിടമത്സരങ്ങളിൽ വിജയമുണ്ടാവും. സംഭാഷണ ചാതുര്യത്താൽ ശത്രുപക്ഷത്തെ നിസ്തേജമാക്കും. ചെയ്തുവരുന്ന ബിസിനസ്സിന് വായ്പാ സഹായം ലഭിക്കുന്നതാണ്. പ്രോജക്ട് റിപ്പോർട്ടുകൾ അംഗീകരിക്കപ്പെടും. ബിസിനസ്സ് യാത്രകൾ ഗുണകരമാവും. മുഖാഭരണങ്ങൾ പാരിതോഷികമായി ലഭിച്ചേക്കാം. ഇ.എൻ.ടി സംബന്ധിച്ച അസുഖങ്ങൾക്ക് ഫലപ്രദമായ ചികിൽസ കിട്ടുന്നതാണ്. ജനുവരി 4 വരെയും ജനുവരി 20 നു ശേഷവും ബന്ധുകലഹം, വാഗ്വാദം, കരാറുകൾ ലഭിക്കാതിരിക്കുക എന്നിവ സാധ്യതകളാണ്.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

ബുധൻ ജന്മരാശിയുടെ പന്ത്രണ്ടിലും ജന്മരാശിയിലും രണ്ടിലും സഞ്ചരിക്കുന്നു. ജനുവരി 20 മുതൽ ബുധൻ രണ്ടാം ഭാവത്തിലാകയാൽ അക്കാലം മാത്രമാണ് ഗുണകാലമാവുന്നത്. മാസത്തിലെ ആദ്യ 20 ദിവസങ്ങളിൽ ആലസ്യം ഭവിക്കും. ശത്രുക്കളുടെ ഉപദ്രവം നേരിടേണ്ടി വരാം. ബന്ധുക്കളുടെ പിണക്കത്തിൻ്റെ കാരണമറിയാതെ വിഷമിക്കും. സുഹൃത്തുക്കളുടെ ഉപദേശങ്ങൾ അസ്വീകാര്യമാവാനിടയുണ്ട്. പണവരവിൽ തടസ്സങ്ങൾ വരും. ചെലവധികരിച്ചേക്കും. വിദ്യാർത്ഥികൾക്ക് ഏകാഗ്രത കുറയുന്നതാണ്. മാസാന്ത്യത്തിലെ 10 ദിവസങ്ങളിൽ കർമ്മരംഗത്ത് ഉന്മേഷം അനുഭവപ്പെടും. വ്യാപാരത്തിൽ അഭിവൃദ്ധി സംജാതമാകുന്നതാണ്. പാരിതോഷികങ്ങൾ ലഭിച്ചേക്കാം. ദൂരദിക്കുകളിൽ ജോലി ചെയ്യുന്നവർക്ക് നാട്ടിൽ കുടുംബത്തോടൊപ്പം കഴിയാൻ അവസരം കിട്ടുന്നതാണ്. ഭാവിയെക്കുറിച്ച് നല്ല തീരുമാനങ്ങൾ കൈക്കൊള്ളും.

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

ബുധൻ പതിനൊന്നിൽ സഞ്ചരിക്കുന്ന മാസത്തിലെ ആദ്യ നാലഞ്ചു ദിവസങ്ങൾ മാത്രമാണ് ഗുണപ്രദം. ജനുവരി 20 വരെ പഠനാവശ്യങ്ങൾക്കായി ചെലവധികരിക്കും. പഠനോപകരണങ്ങൾ വാങ്ങുക, പഠന യാത്ര മുതലായവയും അതിലുൾപ്പെടും. കച്ചവടക്കാർക്ക് കൂടുതൽ പണം മുതൽമുടക്കേണ്ടി വന്നേക്കും. അനുമതിപത്രം ലഭിക്കാൻ ബന്ധപ്പെട്ട സ്ഥാപനത്തിൽ പലപാട് പോകേണ്ടി വരുന്നതാണ്. സർക്കാരുമായുള്ള വിഷയങ്ങളിൽ ജാഗ്രത പുലർത്തണം. രാഷ്ട്രീയ പ്രവർത്തനത്തിൽ മടുപ്പ് അനുഭവപ്പെടും. ജനുവരി 21-30 വേളയിൽ ആരോഗ്യപരമായി ജാഗ്രത വേണം. ക്രയവിക്രയങ്ങളിൽ അമളി വരാനിടയുണ്ട്. ജനുവരി ആദ്യവാരത്തിൽ ബന്ധുസമാഗമത്തിൽ സന്തോഷമുണ്ടാവും. എഴുത്തോ പ്രസംഗമോ അഭിനന്ദനം നേടാം. പ്രതീക്ഷിച്ചതിലും ധനാഗമം ഉണ്ടായേക്കും.

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

ബുധൻ കുംഭക്കൂറിൻ്റെ 10,11 ഭാവങ്ങളിൽ സഞ്ചരിക്കുന്ന ജനുവരി 20 വരെ അനുകൂലവും അതിനുശേഷം ബുധൻ പന്ത്രണ്ടാം ഭാവത്തിൽ സഞ്ചരിക്കുകയാൽ സമ്മിശ്രവുമായ ഫലങ്ങളാണ്.  കലാമത്സരങ്ങളിൽ വിജയം, പഠനത്തിലും ഗവേഷണത്തിലും ആഭിമുഖ്യം എന്നിവ അനുകൂലതകളിൽ ഉൾപ്പെടും. ഉദ്യോഗസ്ഥർക്ക് സ്വതന്ത്രമായി തീരുമാനം കൈക്കൊള്ളാനുള്ള അധികാരം കൈവരും. വ്യാപാരികൾക്കും വ്യവസായികൾക്കും വിപണനം അധികരിക്കും. അവരുടെ ഉല്പന്നങ്ങളുടെ കമ്പോളമൂല്യം ഉയരുന്നതാണ്. നിക്ഷേപങ്ങൾ നടത്താനാവും. ഭൂമിയിൽ നിന്നുമുള്ള ആദായം കൂടിയേക്കും. വിലയേറിയ വസ്തുക്കൾ പാരിതോഷികമായി കൈവശമെത്തും. സാമൂഹികമായ അംഗീകാരം ഭവിക്കുന്നതാണ്. ജനുവരി 20 ന് ശേഷം സാമ്പത്തിക ഇടപാടുകളിൽ കരുതൽ ഉണ്ടാവണം. ഉറ്റവരുമായുള്ള ബന്ധം താത്കാലികമായി ഉലയാനിടയുണ്ട്. ദേഹാരോഗ്യത്തിൽ ശ്രദ്ധ പുലർത്തണം.

മീനക്കൂറിന് (പൂരൂരുട്ടാതി, ഉത്രട്ടാതി, രേവതി)

ബുധൻ പത്താം ഭാവമായ ധനുരാശിയിൽ സഞ്ചരിക്കുന്ന ജനുവരി 5 മുതൽ 20 വരെയുള്ള രണ്ടാഴ്ചക്കാലത്തിന് ഗുണപുഷ്കലതയുണ്ട്. വാഗ്ദാനം പാലിക്കാനാവും.  വ്യവഹാരങ്ങൾ അനുകൂലമായേക്കും. ശത്രുപക്ഷത്തെ തിരിച്ചറിയുന്നതും സമർത്ഥമായി പ്രതിരോധിക്കുന്നതുമാണ്. അത്മസുഹൃത്തുക്കൾ മുന്നോട്ടു വെക്കുന്ന നിർദ്ദേശങ്ങൾ സ്വീകാര്യമാവും. യാഥാർത്ഥ്യബോധം കർമ്മരംഗത്തിൽ പ്രതിഫലിക്കും. ധനപരമായി പ്രതീക്ഷയുള്ള കാലമാണ്. പുതുസംരംഭങ്ങൾ ബാലാരിഷ്ടകളെ മറികടന്ന് മുന്നോട്ടുപോകും.  സാങ്കേതിക വിദ്യാഭ്യാസത്തിൽ ഉയർച്ചയുണ്ടാവും. ജനുവരി 4 വരെയും ജനുവരി 20 ന് ശേഷവും കാര്യതടസ്സം മനക്ലേശമുണ്ടാക്കും. ആലോചിക്കാതെ കൈക്കൊള്ളുന്ന തീരുമാനങ്ങൾ പാളിപ്പോകുന്നതാണ്. ബന്ധുവിരോധത്തിന് സാധ്യതയുണ്ട്. ബഹുമാന്യരായ വ്യക്തികളെ നിന്ദിക്കേണ്ടി വന്നതിൽ പശ്ചാത്തപം തോന്നും. ആലസ്യം അനുഭവപ്പെടുന്നതാണ്.

Read More

• Mercury Transit 2025: ജനുവരിയിൽ ബുധന്റെ രാശിമാറ്റം: ഗുണം ആർക്കൊക്കെ?
• Monthly Horoscope January 2025: ജനുവരി മാസത്തെ സമ്പൂർണ നക്ഷത്ര ഫലം
• Monthly Horoscope for Dhanu: ധനു മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ
• Weekly Horoscope (December 29 – January 04, 2024): ഈ ആഴ്‌ച നിങ്ങൾക്കെങ്ങനെ?