ജൂൺ മാസത്തെ സമ്പൂർണ നക്ഷത്രഫലം: June Month 2023 Astrological Predictions

June Month 2023 Astrological Predictions: 2023 ജൂൺ ഒന്നാം തീയതി വരുന്നത് 1198 ഇടവം 18 വ്യാഴാഴ്ചയാണ്. മിഥുനം 15 വരെ ജൂൺ മാസം തുടരുന്നു. സൂര്യൻ ഇടവം- മിഥുനം രാശികളിൽ സഞ്ചരിക്കുന്നു. രോഹിണി, മകയിരം, തിരുവാതിര എന്നീ ഞാറ്റുവേലകളുണ്ട്, ഇതിൽ. ജൂൺ ഒന്നിനു ചന്ദ്രൻ ചിത്തിരയിലും ജൂൺ മുപ്പതിനു ഒരുവട്ടം രാശിചക്രഭ്രമണം പൂർത്തിയാക്കി വിശാഖത്തിലുമാണ്. ജൂൺ 7 ന് ബുധൻ ഇടവത്തിലും 24 ന് മിഥുനത്തിലും പ്രവേശിക്കുന്നു. ചൊവ്വ കർക്കടകത്തിൽ തുടരുകയാണ്. ജൂൺ 19 ന് ശനിക്ക് വക്രഗതി തുടങ്ങുന്നു.

രാഹു, വ്യാഴം എന്നിവ മേടത്തിലും കേതു തുലാത്തിലും ശുക്രൻ കർക്കടകത്തിലും സഞ്ചരിക്കുന്നു. ഈ ഗ്രഹനിലയുടെ പശ്ചാത്തലത്തിൽ മേടം മുതൽ മീനം വരെ പന്ത്രണ്ടു കൂറുകളിൽ വരുന്ന അശ്വതി മുതൽ രേവതി വരെയുള്ള 27 നക്ഷത്രക്കാരുടേയും 2023 ജൂൺ മാസത്തിലെ അനുഭവങ്ങൾ എന്തായിരിക്കുമെന്നുള്ള അന്വേഷണവും വിശകലനവുമാണ് ഇവിടെ അവതരിപ്പിക്കുന്നത്.

Astrological Predictions for Aswathi: അശ്വതി

രാശിനാഥൻ ആയ ചൊവ്വ നീചാവസ്ഥയിൽ നാലിൽ തുടരുകയാൽ ആത്മാഭിമാനത്തിന് ഭംഗം വരാം. വീടു വിട്ടുനിൽക്കേണ്ട സാഹചര്യം ഉരുത്തിരിഞ്ഞേക്കാം. സാമ്പത്തികമായി നേട്ടങ്ങൾ തന്നെയാവും വരിക. പാരമ്പര്യ വസ്തുക്കളിൽ നിന്നും ലാഭം പ്രതീക്ഷിക്കാം. ബുധൻ രണ്ടാമെടത്തേക്ക് വരികയാൽ വിദ്യാഗുണം, പ്രതീക്ഷിച്ച വിഷയങ്ങളിൽ ഉപരിപഠനം എന്നിവയുണ്ടാവും. ബന്ധുക്കളുടെയും സുഹൃത്തുക്കളുടെയും പിന്തുണ ലഭിക്കുന്നതാണ്. സർക്കാരിൽ നിന്നുമുള്ള അനുമതി, ആനുകൂല്യങ്ങൾ എന്നിവ മാസമദ്ധ്യം വരെ കാത്തിരിക്കേണ്ടി വന്നേക്കും. ആരോഗ്യപ്രശ്നങ്ങളിൽ ജാഗ്രത അനിവാര്യമാണ്.

Astrological Predictions for Bharani: ഭരണി

നക്ഷത്രനാഥൻ ആയ ശുക്രൻ മാസം മുഴുവൻ ചൊവ്വയുമായി ചേർന്ന് സഞ്ചരിക്കുകയാൽ ഗുണാനുഭവങ്ങൾ തെല്ല് മങ്ങാം. പിന്നീട് വേണ്ടിയിരുന്നില്ലെന്ന് തോന്നാവുന്ന ചില കൂട്ടുകെട്ടുകൾ ഭവിക്കാം. പഠനമികവ് ആദരം നേടുന്നതാണ്. ഉന്നതവിദ്യാഭ്യാസത്തിന് പ്രവേശം ലഭിക്കും. ധനപരമായി നേട്ടങ്ങൾ ഉണ്ടാവും. കിട്ടേണ്ട പണം വന്നുചേരും. മുതിർന്നവരുടെ ആരോഗ്യകാര്യത്തിൽ മാസം പകുതിയോടെ നേരിയ ആശ്വാസം അനുഭവപ്പെടുന്നതാണ്. സ്ഥലം മാറ്റം അനുകൂലമായിത്തീരാം. ചെറുപ്പക്കാരുടെ വിവാഹകാര്യത്തിൽ പുരോഗതിയുണ്ടാവും

Astrological Predictions for Karthika: കാർത്തിക

ജന്മസൂര്യൻ അലച്ചിലിനും നിഷ്പ്രയോജന യാത്രകൾക്കും കാരണമാകാം. ബുധൻ ജന്മരാശിയിൽ പ്രവേശിക്കുന്നതിനാൽ ബന്ധുക്കളാൽ ചില പ്രശ്നങ്ങൾ ഉദയം ചെയ്യാം. കർമ്മരംഗത്ത് മുന്നേറ്റം ഉണ്ടാകുന്നതാണ്. വ്യാപാരത്തിൽ ചില നവീകരണങ്ങൾ നടത്തും. സുരക്ഷാ മാനദണ്ഡങ്ങൾ പാലിക്കുന്നതിൽ വിളംബം അരുത്. തൊഴിൽ തേടുന്നവർക്ക് അന്യനാട്ടിൽ നല്ല അവസരം ഉണ്ടാകുന്നതാണ്. കരാർ പണികൾ പുതുക്കിക്കിട്ടും. ദിവസവേതനം ഉയർന്നേക്കും. സൽകർമ്മങ്ങൾക്കായി ചെലവുണ്ടാകാം. വിവാഹ തീരുമാനത്തിൽ പുനരാലോചനകൾ വേണ്ടിവരാം.

Astrological Predictions for Rohini: രോഹിണി

ജോലിസംബന്ധിച്ച തിരക്കുകൾ വർദ്ധിക്കാം. യാത്രകളും അലച്ചിലും കൂടിയേക്കും. പ്രതീക്ഷിച്ച സ്ഥാനക്കയറ്റം വൈകാനിടയുണ്ട്. കുടുംബത്തിൽ നിന്നും പുറത്തു നിന്നും വലിയതോതിലുള്ള പിന്തുണ ലഭിച്ചേക്കാം. വിദ്യാഭ്യാസപരമായി കാലം അനുകൂലമാണ്. ഗവേഷകർക്ക്
ഉയർന്ന ബിരുദം നേടാൻ സാധിക്കും. പിതാവിന്റെ ആരോഗ്യകാര്യത്തിൽ ശ്രദ്ധവേണ്ട കാലമാണ്. അധികാരികളുമായി തർക്കങ്ങൾക്ക് മുതിരാതിരിക്കുന്നതാണ് കാമ്യം. സാമ്പത്തികമായി മെച്ചം വരുമെങ്കിലും ചെലവിന്റെ കാര്യത്തിൽ നിയന്ത്രണം അനിവാര്യമാണ്.

Astrological Predictions for Makayiram: മകയിരം

മൂല്യാധിഷ്ഠിതജീവിതം ആദർശമാണെങ്കിലും ചില മാർഗഭ്രംശങ്ങൾ അനിവാര്യമാകും. കൂട്ടുകെട്ടുകളുടെ പേരിൽ ചെറുപ്പക്കാർ പഴി കേൾക്കാം. വിദ്യാഭ്യാസപരമായി ചില ആശയക്കുഴപ്പങ്ങൾ ഉണ്ടാകാനിടയുണ്ട്. തൊഴിലിൽ ഉത്തരവാദിത്വമേറും. എന്നാൽ അത് നിർവഹിക്കുന്നതിൽ മാനസികക്ലേശം ഭവിക്കും. നിക്ഷേപങ്ങളിൽ നിന്നും ആദായം വർദ്ധിച്ചേക്കും. എന്നാൽ ചെലവ് അനിയന്ത്രിതമാകാനിടയുണ്ട്. ആരോഗ്യപരമായി വളരെ ജാഗ്രത വേണം. പൊതുവേ ഗുണദോഷസമ്മിശ്രമായ സമയമാണ്. സാഹസങ്ങൾ ഒഴിവാക്കണം. ഊഹക്കച്ചവടത്തിൽ സൂക്ഷ്മതയുണ്ടാവണം

Astrological Predictions for Thiruvathira: തിരുവാതിര

രണ്ടാം ഭാവത്തിലെ ശുക്ര- കുജ സ്ഥിതി കാരണം ചിലപ്പോൾ പരുഷമായും ചിലപ്പോൾ മധുരമായും സംസാരിക്കും. ക്രയവിക്രയങ്ങളിൽ ലാഭത്തിനാണ് മുൻതൂക്കം. എന്നാൽ സർക്കാർ കാര്യങ്ങളിൽ ശ്രദ്ധവേണം. പ്രതീക്ഷിച്ച അനുമതികൾ വൈകാം. ഭൂമിയിടപാടുകൾ നടന്നുകിട്ടുമെങ്കിലും നിയമപ്രശ്നങ്ങളിൽ കുരുങ്ങാനിടയുണ്ട്. കുടുംബകാര്യങ്ങൾ സന്തോഷപ്രദമാകും. മംഗളകർമ്മങ്ങളിൽ പങ്കെടുക്കുന്നതാണ്. മക്കളുടെ വിദ്യാഭ്യാസത്തിൽ പുരോഗതി സിദ്ധിക്കും. പ്രണയബന്ധങ്ങളിൽ ഹൃദയൈക്യം വന്നേക്കും.

Astrological Predictions for Punartham: പുണർതം

ചടുലമായ തീരുമാനങ്ങൾ കൈക്കൊള്ളും. മുൻപിൻനോക്കാതെ അവ പ്രാവർത്തികമാക്കുകയും ചെയ്യും. വ്യാപാരകാര്യങ്ങളിൽ പുതിയ അവസരങ്ങൾ തുറന്നുകിട്ടും. അന്യദേശ യാത്രകൾ വിജയപ്രദമാകുന്നതാണ്. ഊഹക്കച്ചവടത്തിൽ ലാഭം ഉണ്ടാകുന്നതാണ്. ഉദ്യോഗത്തിൽ സ്ഥാനക്കയറ്റത്തിന് വിളംബം ഭവിച്ചേക്കാം. ഗവൺമെന്റ് കാര്യങ്ങളിൽ പൊതുവേ തടസ്സങ്ങൾ വന്നെത്തിയേക്കും. സഹപ്രവർത്തകരുടെ പിന്തുണ ദുർബലമാകുന്നതാണ്. തർക്കങ്ങൾക്ക് മുതിരാതിരിക്കുകയാവും കരണീയം. വയോജനങ്ങളുടെ ആരോഗ്യപരിപാലനത്തിൽ ജാഗ്രത വേണം.

Astrological Predictions for Pooyam: പൂയം

ജൂൺ ആദ്യവാരത്തിനുശേഷം ചൊവ്വ പൂയത്തിൽ നിന്നും മാറുന്നത് ആശ്വാസമാകും. ശാരീരികക്ലേശങ്ങൾ കുറയും. മാനസികമായ അസ്വസ്ഥതകൾ നീങ്ങും. സമ്മർദ്ദങ്ങളില്ലാതെ കൃത്യനിർവഹണത്തിൽ മുഴുകാനാവും. സാമ്പത്തിക സ്ഥിതി സമ്മിശ്രമായിരിക്കുന്നതാണ്. തൊഴിലിൽ പുരോഗതി വന്നുചേരും. വിദ്യാർത്ഥികൾക്ക് ഇച്ഛയനുസരിച്ച് പഠന വിഷയങ്ങൾ തെരഞ്ഞെടുക്കാനായേക്കും. ഉപാസനാദികളിൽ വിഘ്നം വരിനിടയുണ്ട്. തീർത്ഥാടനത്തിനുള്ള തീരുമാനം പിന്നീടത്തേക്ക് നീട്ടാം. വാഹനയാത്രയിൽ ജാഗ്രത അനിവാര്യം. കലഹപ്രേരണകളെ നിയന്ത്രിക്കേണ്ടതുണ്ട്.

Astrological Predictions for Ayilyam: ആയില്യം

ഉദ്യോഗസ്ഥർക്ക് ഉയർച്ചയുണ്ടാകും. സ്വയം തൊഴിൽ ചെയ്യുന്നവർക്ക് കരാറുകളിൽ നിന്നും ലാഭം വന്നുചേരുന്നതാണ്. ഗൃഹം വൈദ്യുതീകരിക്കാനോ അടുക്കള പുതുക്കാനോ ശ്രമം തുടങ്ങും. പണം മുടക്കിയുള്ള വ്യാപാരസംരംഭങ്ങൾക്ക് കാലം അനുകൂലമല്ല. സാമ്പത്തികസ്ഥിതി മോശമാകാം. മിതവ്യയം ജീവിതത്തിന്റെ ഭാഗമാക്കേണ്ടതുണ്ട്. വിദ്യാർത്ഥികൾക്ക് ഉപരിപഠനത്തിന് ഇഷ്ടവിഷയങ്ങൾ ലഭിക്കാൻ സാധ്യത കുറഞ്ഞേക്കും. കുടുംബകാര്യങ്ങളിൽ ചില സമ്മർദ്ദങ്ങൾ ഉയരാം. വൈകാരിക സമീപനം ശത്രുക്കളെ സൃഷ്ടിക്കാനിടയുണ്ട്.

Astrological Predictions for Makam: മകം

സൂര്യൻ പത്തിലും പതിനൊന്നിലുമായി സഞ്ചരിക്കുകയാൽ നേട്ടങ്ങൾക്ക് മുൻതൂക്കം ഉള്ള കാലമാണ്. അച്ഛനിൽ നിന്നും വസ്തു, സമ്പത്ത് തുടങ്ങിയവയിൽ അവകാശം സിദ്ധിക്കും. രാഷ്ട്രീയമായ വളർച്ചയുണ്ടാകും. പദവികൾ ലഭിക്കുന്നതാണ്. ദേഹാരോഗ്യത്തിൽ ശ്രദ്ധ വേണ്ടതുണ്ട്. സഞ്ചാരത്തിൽ ജാഗ്രത അനിവാര്യമാണ്. ചിലവും അധികരിക്കാം. ആഡംബരവസ്തുക്കൾ വാങ്ങുവാൻ പണച്ചെലവേറും. ദാമ്പത്യത്തിലെ സ്വൈരക്കേടുകൾ തുടർന്നേക്കും. മക്കൾക്ക് അഭിമാനകരമായ നേട്ടങ്ങൾ വന്നുചേരുന്നതാണ്

Astrological Predictions for Pooram: പൂരം

കർമ്മഗുണം ഉള്ള കാലമാണ്. തൊഴിലിൽ വിജയിക്കാനാവും. തൊഴിൽ തേടുന്നവർക്ക് ഉചിത സന്ദർഭങ്ങൾ സഞ്ജാതമാകും. കച്ചവടം വിപുലീകരിക്കാൻ ബാങ്ക് / സർക്കാർ മുതലായവയിൽ നിന്നും ധനസഹായം കൈവരും. പൊതുപ്രവർത്തകർക്ക് സംഘടനകളുടെ നേതൃനിരയിൽ എത്താൻ സാധിക്കും. ശത്രുക്കളുടെ ഉപജാപങ്ങളെ സമർത്ഥമായി പ്രതിരോധിക്കാൻ സാധിക്കും. സാമ്പത്തികഗുണം ഉണ്ടാകുമെങ്കിലും വ്യയം അധികരിക്കുന്നതാണ്. പന്ത്രണ്ടിലെ ചൊവ ശരീരക്ഷീണം, വിഴ്ച എന്നിവയ്ക്ക് കാരണമാകാം. പതിവ് ആരോഗ്യപരിശോധനകളിൽ മുടക്കം വരാതിരിക്കാൻ കരുതൽ വേണ്ടതാണ്.

Astrological Predictions for Uthram: ഉത്രം

നേട്ടങ്ങൾ പലതും വന്നു ചേരും. എന്നാൽ മത്സരങ്ങളെ അഭിമുഖീകരിക്കേണ്ടി വരുന്നതാണ്. കലാകാരന്മാർക്ക് സമൂഹത്തിന്റെ അംഗീകാരം കൈവരും. ഉദ്യോഗത്തിനുള്ള നിയമന ഉത്തരവ് ലഭിക്കും. നിയമ നീതിന്യായരംഗങ്ങളിൽ ശോഭിക്കാനാവും. കച്ചവടം വികസിപ്പിക്കുന്നതിന്റെ ഭാഗമായി മറ്റു പങ്കാളികളെ കൂടി ക്ഷണിക്കുന്നതാണ്. മക്കളുടെ വിവാഹകാര്യത്തിൽ തടസ്സങ്ങൾ ഉണ്ടാവുന്നത് വിഷമിപ്പിക്കും. സ്നേഹിതരുമായി ഉല്ലാസയാത്രകൾ നടത്തും. ധനപരമായി കൂടുതൽ ശ്രദ്ധവെക്കുന്നത് ഉചിതം.

Astrological Predictions for Atham: അത്തം

ശുക്രനും ചൊവ്വയും പതിനൊന്നാമെടത്തിലാണ് മാസം മുഴുവൻ. അതിനാൽ കർമ്മഗുണവും ഭാഗ്യപുഷ്ടിയും ഉണ്ടാകുന്ന മാസമാണ്. ആരോഗ്യസൗഖ്യം പ്രതീക്ഷിക്കാം. സാമ്പത്തികമായി മുന്നേറാനുള്ള സന്ദർഭം വന്നുചേരും. പ്രധാനപ്പെട്ട വ്യക്തികളുടെ പിന്തുണ ആർജ്ജിക്കാൻ സാധിക്കും. മാസം പകുതി മുതൽ ആദിത്യനും പ്രവൃത്തിസ്ഥാനത്ത് വരുന്നതിനാൽ സർക്കാർ കാര്യങ്ങളിൽ നേട്ടമുണ്ടാകുന്നതാണ്. നാലാം ഭാവാധിപൻ അഷ്ടമത്തിൽ തുടരുന്നതിനാൽ കുടുംബപരമായ ചില പ്രശ്നങ്ങൾ അപരിഹൃതമാകും. ഗൃഹനിർമ്മാണം മന്ദീഭവിക്കാം.

Astrological Predictions for Chithira: ചിത്തിര

വലിയ തോതിലുള്ള മുതൽ മുടക്കുകൾക്ക് കാലം അനുകൂലമല്ല. ചെറിയ കരാറുകൾ ഗുണകരമാവും. കന്നിക്കൂറുകാരായ ചിത്തിര നാളുകാർക്ക് ധനലാഭമുണ്ടാകും. കിടപ്പ് രോഗികൾക്ക് ആശ്വാസമുണ്ടാകുന്നതാണ്. അഭീഷ്ടവിഷയങ്ങളിൽ ഉപരിപഠനം നടത്താൻ സാധിക്കും. തുലാക്കൂറുകാർ ഊഹക്കച്ചവടത്തിന് മുതിരരുത്. ഭൂമി സംബന്ധിച്ച ഇടപാടുകൾ അവസാനനിമിഷം തടസ്സപ്പെടാം. ചെറുപ്പക്കാരുടെ വിവാഹ വിഷയത്തിൽ കാലം ഒട്ടൊക്കെ അനുകൂലമാണ്. ചില കൂട്ടായ സംരംഭങ്ങളിൽ പങ്കെടുത്തേക്കും.

Astrological Predictions for Chothi: ചോതി

ഉദ്യോഗസ്ഥർക്ക് സ്ഥാനച്യുതി വരാം. ഉത്തരവാദിത്വങ്ങൾ നിറവേറ്റുന്നതിൽ വേണ്ടത്ര വിജയിക്കണമെന്നില്ല. കച്ചവടത്തിൽ മാന്ദ്യമനുഭവപ്പെടും. എന്നാൽ ഇടക്കിടെ ചില പുരോഗതികളും ദൃശ്യമാകുന്നതാണ്. അന്യദേശത്ത് ഉന്നതപഠനത്തിന് അവസരം വന്നെത്തും. കുടുംബജീവിതത്തിൽ സംതൃപ്തി അനുഭവപ്പെടുന്നതാണ്. പ്രശ്നങ്ങളെ വൈകാരികമായി സമീപിക്കുന്നത് അലോസരങ്ങൾ സൃഷ്ടിക്കും. ചെറുപ്പക്കാർക്ക് പ്രണയസാഫല്യം ഭവിച്ചേക്കാം. വയോജനങ്ങളുടെ ആരോഗ്യ കാര്യത്തിൽ ശ്രദ്ധ വേണ്ടതുണ്ട്.

Astrological Predictions for Visakham: വിശാഖം

ചില കാര്യങ്ങളിൽ ഇരുമനസ്സുണ്ടാവും. ഏൽപ്പിച്ച ദൗത്യം പാതിവഴിയിൽ ഉപേക്ഷിച്ചേക്കും. അപ്രസക്ത കാര്യങ്ങൾക്കായി ധാരാളം സമയവും ഊർജ്ജവും ചെലവഴിക്കും. തൊഴിലിടത്തിൽ സമ്മർദ്ദങ്ങൾ വരാവുന്നതാണ്. പുതിയ സൗഹൃദങ്ങൾ ഗുണകരമാവണമെന്നില്ല. പുതിയ തൊഴിലിനായി നിലവിലെ തൊഴിൽ ഉപേക്ഷിക്കുന്നത് ആശാസ്യമാവില്ല. വിദ്യാഭ്യാസത്തിന് അനുകൂലമായ കാലമാണ്. ഗൃഹസ്ഥർക്ക് കുടുംബ ബന്ധങ്ങൾ താങ്ങും തണലുമാകുന്നതാണ്. സാമ്പത്തിക ഇടപാടുകളിൽ സൂക്ഷ്മത വേണം.

Astrological Predictions for Anizham: അനിഴം

പ്രതീക്ഷകൾ ചിലതൊക്കെ സഫലമാകുന്നതാണ്. അനീതികൾക്കെതിരെ ശബ്ദമുയർത്താം. കലാപരമായ തൊഴിലുകളിൽ ഏർപ്പെട്ടവർക്ക് വരുമാന വർദ്ധനവ് പ്രതീക്ഷിക്കാം. നിക്ഷേപങ്ങളുടെ നിർജ്ജീവാവസ്ഥ വിഷമിപ്പിച്ചേക്കും. ഗാർഹികാന്തരീക്ഷത്തിൽ ഒറ്റപ്പെട്ടുപോകുന്ന അവസ്ഥയുണ്ടാകാം. വാഹനങ്ങൾ, യന്ത്രോപകരണങ്ങൾ എന്നിവയ്ക്ക് അറ്റകുറ്റപ്പണി വേണ്ടിവരാം. ഭാഗ്യാനുഭവങ്ങളും ശക്തമായ സാധ്യതയാണ്. വിദ്യാഭ്യാസപരമായി പുതിയ അവസരങ്ങൾ സിദ്ധിച്ചേക്കും.

Astrological Predictions for Thrikketta: തൃക്കേട്ട

ഉപരിപഠന സാധ്യത അന്യനാട്ടിലാണെന്ന് വരാം. സാങ്കേതിക വിഷയങ്ങളിൽ ശ്രദ്ധ നേടും. ലക്ഷ്യം നേടിയെടുക്കാൻ അധ്വാനം കൂടുന്നതാണ്. വിജ്ഞാന യാത്രകൾക്ക് സാധ്യത കാണുന്നു. ഉദ്യോഗസ്ഥർക്ക് ശരാശരിക്കാലമാണ്. സൗഹൃദങ്ങൾ ശക്തി പകരും. വസ്തു വിൽക്കാനുള്ള ശ്രമം ഭാഗികമായി വിജയിക്കുന്നതാണ്. മാനസിക സന്തോഷം ഉണ്ടാകും. സാമൂഹ്യ കാര്യങ്ങളിൽ ഏറ്റവും നീതിയുക്തമായ തീരുമാനങ്ങൾ കൈക്കൊള്ളുന്നതാണ്. സർക്കാർ കാര്യങ്ങൾക്കായി അലച്ചിലേറുന്നതാണ്.

Astrological Predictions for Moolam: മൂലം

തൊഴിലിൽ കൂടുതൽ ശ്രദ്ധ കേന്ദ്രീകരിക്കേണ്ട സമയമാണ്. വിദഗ്ദ്ധോപദേശം വേണ്ടിവരും, ചില കാര്യങ്ങൾക്ക്. പ്രൊഫഷണലുകൾക്ക് വിജയിക്കാനും സാമ്പത്തിക നേട്ടമുണ്ടാക്കാനും സാഹചര്യമൊരുങ്ങും. സർക്കാരിൽ നിന്നും ആദായം / ആനുകൂല്യം എന്നിവക്ക് സാധ്യതയുണ്ട്. ഉപരിപഠന കാര്യങ്ങൾക്ക് നല്ല തീരുമാനം ഉണ്ടാവും. സകുടുംബയാത്രകൾ സന്തോഷമേകും. വൃദ്ധജനങ്ങളുടെ ആരോഗ്യകാര്യത്തിൽ ശ്രദ്ധ വേണം. ചെലവുകൾ കൂടുതലാവാം.

Astrological Predictions for Pooradam: പൂരാടം

നക്ഷത്ര നാഥനായ ശുക്രനും ചൊവ്വയും മാസം മുഴുവൻ ഒരുമിക്കുകയാൽ പഠനം, തൊഴിൽ എന്നിവയിലെല്ലാം അലസത ഒഴിവാക്കണം. ആവശ്യവും അനാവശ്യവും തിരിച്ചറിയണം. പണവരവുണ്ടാവും. ദുർവ്യയവും വന്നേക്കും. ചിലരുമായുള്ള സഹകരണം നിഷ്പ്രയോജനകരമെന്ന് മനസ്സിലാക്കും. ഉദ്യോഗസ്ഥർക്ക് ജോലിഭാരം കൂടാം. ആരോഗ്യപരമായി ശ്രദ്ധവേണം. കുടുംബാംഗങ്ങളുമായി സന്തോഷനിമിഷങ്ങൾ പങ്കിടും.

Astrological Predictions for Uthradam: ഉത്രാടം

മാധ്യസ്ഥശ്രമങ്ങളിൽ വിജയിക്കും. കഴിവും സമർപ്പണവും വേണ്ടപ്പെട്ടവർ തിരിച്ചറിഞ്ഞേക്കും. ജോലിക്കയറ്റമോ ചില പദവികളോ വരാം. യുവാക്കളുടെ വിവാഹകാര്യത്തിൽ ഉചിതമായ തീരുമാനങ്ങൾ ഉണ്ടാവും. ഉപരിപഠനത്തിനുള്ള ശ്രമം വിജയിക്കും. ദേശാന്തര യാത്ര വന്നുചേരുന്നതാണ്. ഋണബാദ്ധ്യതകൾ പരിഹരിക്കാൻ തീവ്രശ്രമം നടത്തിയേക്കും. ഭൂമിസംബന്ധിച്ച തർക്കങ്ങൾ ഒരു സാധ്യതയാണ്. കച്ചവട കാര്യത്തിനായി വായ്പകൾ നേടാൻ അലച്ചിലുണ്ടാവാം. വാഹന യാത്രയിൽ കരുതൽ വേണം.

Astrological Predictions for Thiruvonam: തിരുവോണം

ദാമ്പത്യത്തിൽ സ്നേഹവും പാരസ്പര്യവും കുറയുന്നതായി തോന്നാം. തൊഴിലിൽ വേണ്ടത്ര അംഗീകാരം കിട്ടുന്നില്ലെന്ന് വന്നേക്കാം. പുതുസംരംഭങ്ങളിൽ ഇനിയും മികവ് ഉപയോഗിക്കേണ്ടിവരും. സാങ്കേതികജ്ഞാനം നേടാൻ പരിശ്രമം തുടരും. ജീവിതശൈലീ രോഗങ്ങൾ വിഷമിപ്പിക്കാം. ധനസ്ഥിതി മോശമാവില്ല. ന്യായമായ ആവശ്യങ്ങൾ നടന്നുകിട്ടുന്നതാണ്. ആഢംബര വസ്തുക്കൾ വാങ്ങും. ചെറുയാത്രകൾ ആവശ്യമായി വരുന്നതാണ്. വിരുന്നുകളിൽ സംബന്ധിക്കും.

Astrological Predictions for Avittam: അവിട്ടം

കാര്യവിളംബം ഭവിക്കാം. ലക്ഷ്യം നേടാൻ കൂടുതൽ വിയർപ്പൊഴുക്കേണ്ടിവരും. സഹപ്രവർത്തകർ വേണ്ടത്ര പിൻതുണ നൽകുന്നില്ലെന്ന ഖേദമുണ്ടാവും. പ്രതീക്ഷിച്ച ശമ്പള വർദ്ധനവ് വൈകിയേക്കും. വസ്തുതർക്കങ്ങളിൽ നിയമസഹായം ആവശ്യമാവും. മക്കളുടെ വിവാഹകാര്യത്തിൽ ശുഭസൂചന ഉണ്ടാവും. മുൻകൂട്ടി തീരുമാനിച്ച ചില ഇടപാടുകൾ നടത്താൻ പണം കടം വാങ്ങേണ്ടി വരാം. പഠനകാര്യത്തിനായി അന്യനാട്ടിൽ താമസിക്കേണ്ട സാഹചര്യം ഉരുത്തിരിയാം. നവസൗഹൃദങ്ങൾ മനസ്സിന് സന്തോഷമേകുന്നതായിരിക്കും. വൈദ്യപരിശോധനകളിൽ അലംഭാവമരുത്.

Astrological Predictions for Chathayam: ചതയം

ശത്രൂപദ്രവങ്ങളെ തിരിച്ചറിയാനും പ്രതിരോധിക്കാനുമാവും. കടബാധ്യത തീർക്കാനുള്ള വഴിതെളിയും. പുതുജോലികൾ തേടുന്നവർക്ക് മെച്ചപ്പെട്ട അവസരങ്ങളുണ്ടാവും. മക്കളുടെ കാര്യങ്ങൾക്കായി കുറച്ച് അലച്ചിലും യാത്രയും വേണ്ടിവന്നേക്കും. എതിർലിംഗ സൗഹൃദങ്ങൾ മനോവിഷമത്തിന് കാരണമാകാം. വ്യാപാര കാര്യങ്ങൾക്ക് വായ്പ ലഭിക്കുന്നതാണ്. പൊതുരംഗത്തിൽ പ്രവർത്തിക്കുന്നവരുടെ സ്വാധീനം ഉയരും. ആർഭാടച്ചെലവുകൾ അധികരിക്കാനിടയുണ്ട്. സഹോദരരിൽ നിന്നും ഉറച്ച പിൻബലം പ്രതീക്ഷിക്കാം.

Astrological Predictions for Pooruttathi: പൂരുരുട്ടാതി

പഠന വിജയത്തിൽ അഭിമാനിക്കും. ഉപരി വിദ്യാഭ്യാസത്തിന്ന നല്ല അവസരങ്ങൾ വന്നെത്തും. ജീവിത യാഥാർത്ഥ്യങ്ങൾ അറിഞ്ഞ് പെരുമാറും. ധനവരവ് മോശമാകില്ല. അറിഞ്ഞും കണ്ടും ചെലവഴിക്കും. ചില കൂട്ടുകെട്ടുകൾ വേണ്ടിയിരുന്നില്ലെന്ന് തോന്നും. കർമ്മരംഗം പുരോഗതിയിലേക്ക് നീങ്ങുന്നതാണ്. എന്നാൽ ചില പരിഷ്കാരങ്ങൾ ആവശ്യമാണെന്ന് ബോധ്യമായേക്കും. പ്രണയബന്ധം പരാജയപ്പെടുമോ എന്ന് ആശങ്കപ്പെടും. കുടുംബജീവിതത്തിൽ പിണക്കങ്ങളും ഇണക്കങ്ങളും ഒരു തുടർക്കഥയാവും.

Astrological Predictions for Uthrattathi: ഉത്രട്ടാതി

സത്യം പറയണം എന്ന് ഉറപ്പിക്കും; എന്നാൽ കള്ളം പറയാനും സാഹചര്യം ഉണ്ടാവും. മുതിർന്നവരെ ഉപദേശിക്കാൻ പുറപ്പെടും. വിവാഹകാര്യങ്ങൾക്ക് വിളംബം വന്നേക്കാം. തൊഴിൽ തേടുന്നവർക്ക് നല്ല അവസരങ്ങൾ കിട്ടുന്നതാണ്. മികച്ച രീതിയിൽ പഠനത്തുടർച്ചയുണ്ടാകുന്നതാണ്. ഉദ്യോഗസ്ഥർ സഹപ്രവർത്തകരുടെ പിൻതുണ തേടും. വയോജനങ്ങളുടെ ആരോഗ്യത്തിൽശ്രദ്ധ പുലർത്തണം. പല കാര്യങ്ങൾക്ക് അലച്ചിൽ ഉണ്ടാവുന്നതാണ്. സാമ്പത്തിക കാര്യങ്ങളിൽ കണിശത പാലിക്കണം.

Astrological Predictions for Revathi: രേവതി

ആത്മവിശ്വാസം വർദ്ധിക്കുന്നതാണ്. ഇടപാടുകൾ പരസ്യപ്പെടുത്താൻ തയ്യാറാവില്ല. അകലങ്ങളിൽ നിന്നും നല്ല സന്ദേശം വന്നെത്തും. സന്താനങ്ങളുടെ കാര്യത്തിൽ സന്തോഷാനുഭവങ്ങൾ പ്രതീക്ഷിക്കാം. എതിർപ്പുകൾക്ക് ഉറച്ച മറുപടി നൽകും. വ്യാപാര വിഷയകമായി ദൂരയാത്രകളുണ്ടായേക്കും. സാമ്പത്തിക ക്ലേശത്തിന് പരിഹാരം കണ്ടെത്താൻ തീവ്രശ്രമങ്ങൾ നടത്തുന്നതാണ്. ആരോഗ്യകാര്യങ്ങൾക്ക് കാര്യമായ പരിഗണന കൊടുക്കേണ്ട സന്ദർഭമാണ്.