May Month 2023 Astrological Predictions: 2023 മേയ് ഒന്നാം തീയതി വരുന്നത് 1198 മേടം 17 തിങ്കളാഴ്ചയാണ്. മേയ് 15 ന് 1198 ഇടവമാസം തുടങ്ങുന്നു. സൂര്യൻ മേടം- ഇടവം രാശികളിലായി സഞ്ചരിക്കുകയാണ്. 2023 മേയ് ഒന്നിന് ചന്ദ്രൻ പൂരം നക്ഷത്രത്തിലും മേയ് 31 ന് ചന്ദ്രൻ ഒരു വട്ടം രാശിചക്രഭ്രമണം പൂർത്തിയാക്കി ചിത്തിര നക്ഷത്രത്തിലും എത്തുന്നു.
വ്യാഴം മേടത്തിലും ശനി കുംഭത്തിലും സഞ്ചരിക്കുന്നു. രാഹുവും കേതുവും യഥാക്രമം മേടത്തിലും തുലാത്തിലും ആയി സഞ്ചരിക്കുന്നു. ബുധൻ ഈ മാസം മുഴുവൻ മേടം രാശിയിൽ തന്നെയാണ്. ശുക്രൻ മേയ് 2 ന് ഇടവത്തിൽ നിന്നും മിഥുനത്തിലേക്കും ചൊവ്വ മേയ് 10 ന് മിഥുനത്തിൽ നിന്നും കർക്കടകത്തിലേക്കും സംക്രമിക്കുന്നു.
ഈ നവഗ്രഹ സ്ഥിതി മുൻനിർത്തി മേടം മുതൽ മീനം വരെയുള്ള പന്ത്രണ്ട് കൂറുകളിലും അശ്വതി മുതൽ രേവതി വരെ ഇരുപത്തിയേഴ് നക്ഷത്രങ്ങളിലും ജനിച്ചവരുടെ 2023 മേയ് മാസത്തിലെ സാമാന്യമായ അനുഭവങ്ങളാണ് ഇവിടെ പരിശോധിക്കുന്നത്.
അശ്വതി: വ്യാഴം, രാഹു എന്നീ ഗ്രഹങ്ങൾ അശ്വതിയിൽ സഞ്ചരിക്കുന്നു. രാഹു പിന്നിലേക്കും വ്യാഴം മുന്നിലേക്കും ആയിട്ടാണ് യാത്ര. അതിനാൽ പോസിറ്റീവും നെഗറ്റീവും ആയ രണ്ട് മനോഭാവങ്ങളും രണ്ട് കർമ്മരീതികളും അശ്വതി നാളുകാർ പിന്തുടരും. ആരോഗ്യപ്രശ്നങ്ങൾ ക്ലേശിപ്പിച്ചേക്കാം. പണവരവ് മോശമാകില്ല. വിട്ടുനിന്നവർക്ക് കുടുംബത്തോടൊപ്പം ചേരാൻ സാധിക്കും. ഉപരിപഠനം നാട്ടിൽ വേണോ മറുനാട്ടിൽ വേണോ എന്നതിൽ ആശയക്കുഴപ്പം ഉണ്ടാവാം. വിവാഹാലോചനകൾ ഏതാണ്ട് ഉറച്ചതുപോലെയാവും. കർമ്മരംഗത്ത് തിരക്കേറുന്നതാണ്.
ഭരണി: ജന്മരാശിയിൽ ശുഭഗ്രഹങ്ങളും പാപഗ്രഹങ്ങളും സഞ്ചരിക്കുകയാൽ പൊതുവേ കാലം അനുകൂലമാണെന്നോ പ്രതികൂലമാണെന്നോ പറയാനാവില്ല. തീരുമാനങ്ങൾ ആലോചിച്ച് വേണം നടപ്പിൽ വരുത്താൻ. ആരോഗ്യകാര്യത്തിൽ ശ്രദ്ധ വേണം. അലച്ചിലേറും. വിദ്യാർത്ഥികൾക്കും ഗവേഷകർക്കും നല്ലകാലമാണ്. കലാപ്രവർത്തനം മികവുറ്റതാവും. സാമ്പത്തികസ്ഥിതി മെച്ചപ്പെടും. പുതുജോലിയോ കരാർപണികളോ ലഭ്യമാവും. കുടുംബാംഗങ്ങൾക്കിടയിൽ രമ്യതയേറും. സാഹസങ്ങൾക്ക് മുതിരരുത്.
കാർത്തിക: ധാരാളം യാത്രകൾ വേണ്ടിവരും.ചെലവ് പല വഴികളിലൂടെയാവും. ലക്ഷ്യം നേടിയെടുക്കാൻ കൂടുതൽ വിയർപ്പൊഴുക്കേണ്ടതായി വന്നേക്കാം. എന്നാലും പ്രതികൂലതകളെ തരണം ചെയ്യുവാൻ സാധിക്കുന്നതാണ്. കുടുംബാംഗങ്ങളുടെ പിന്തുണ നേടും. തൊഴിലിൽ നേട്ടങ്ങൾ കൈവരിക്കും. വായ്പകളിലൂടെ ചിലവുകൾക്ക് വഴി കണ്ടെത്താനാവും. മത്സരങ്ങളിൽ വിജയിക്കും. പുതിയ കരാറുകളിൽ ഒപ്പുവെക്കാൻ കാലം അനുകൂലമല്ല. മെയ് 10 മുതൽ 25 വരെ കാർത്തിക ഞാറ്റുവേലയാകയാൽ സാഹസങ്ങൾക്ക് മുതിരരുത്. ആരോഗ്യപരിപാലന ത്തിന് പ്രാധാന്യം നൽകേണ്ടതുണ്ട്.
രോഹിണി: പന്ത്രണ്ടാം രാശിയിലെ ഗ്രഹാധിക്യം അനാവശ്യമായ ചെലവുകൾക്കും യാത്രകൾക്കും വഴിവെക്കും. മാനസിക സമ്മർദ്ദം ഉയരാം. ഉന്നതോദ്യോഗസ്ഥരുടെ അപ്രീതി നേടും. സാങ്കേതിക പഠനത്തിൽ നേട്ടങ്ങൾ ഉണ്ടാകുന്നതാണ്. അന്യനാട്ടിൽ പഠനം , തൊഴിൽ എന്നിവയ്ക്ക് അവസരം സിദ്ധിക്കാം. ഗൃഹവാഹനാദികളുടെ നവീകരണം ഒരു സാധ്യതയാണ്. ജന്മരാശിയുടെ അധിപനായ ശുക്രന് രണ്ടാം രാശിയിലേക്ക് മാറ്റം വരുന്നതിനാൽ വാക്കിൽ വിളങ്ങും. കുടുംബ ഭദ്രതയുണ്ടാകും. മംഗളകർമ്മങ്ങളിൽ പങ്കെടുക്കും. കലാരംഗം ഉന്മേഷഭരിതമാകും. സമയബന്ധിതമായ വൈദ്യപരിശോധനകൾ മുടക്കരുത്.
മകയിരം: ഇടവക്കൂറുകാർക്ക് ചില മാനസിക പിരിമുറുക്കങ്ങൾ ഉണ്ടായേക്കാം. ക്ഷോഭം നിയന്ത്രിക്കാൻ ക്ലേശിക്കുന്നതാണ്. പണച്ചെലവേറും. വലിയ മുതൽ മുടക്കുള്ള സംരംഭങ്ങൾക്ക് കാലം അനുകൂലമല്ല. മിഥുനക്കൂറുകാരായ മകയിരം നാളുകാർക്ക് അധികാരലബ്ധി, സ്ഥാനോന്നതി, മികച്ച പരീക്ഷാവിജയം ഇവ പ്രതീക്ഷിക്കാം. വരുമാനം വർദ്ധിക്കുന്നതാണ്. വീട്ടിലും നാട്ടിലും അംഗീകാരം സിദ്ധിക്കും. മക്കളുടെ ശ്രേയസ്സിൽ സന്തോഷിക്കാനാവും. മാസത്തിന്റെ രണ്ടാം ആഴ്ചമുതൽ നക്ഷത്രനാഥനായ ചൊവ്വയ്ക്ക് നീചം വരുന്നതിനാൽ ആരോഗ്യത്തിൽ കരുതൽ വേണം. ക്രയവിക്രയങ്ങളിൽ സൂക്ഷ്മത പാലിക്കണം.
തിരുവാതിര: നല്ല അനുഭവങ്ങൾക്കാവും മുൻതൂക്കം. മാസത്തിന്റെ ആദ്യപകുതിക്ക് മെച്ചമേറും. ആദായം കൂടുന്നതാണ്. നിക്ഷേപങ്ങളിൽ നിന്നും ലാഭം വർദ്ധിക്കാം. കച്ചവടം വിപുലീകരിക്കും. വിദ്യാർത്ഥികൾ പരീക്ഷകളിൽ ഉന്നതവിജയം നേടും. ന്യായമായ ആഗ്രഹങ്ങൾ അനായാസം നടന്നുകിട്ടും. മാസത്തിന്റെ രണ്ടാം പകുതിയിൽ ചെലവേറുന്നതാണ്. ഹൃദയ / ശിരോരോഗങ്ങൾ ക്ലേശിപ്പിക്കാം. വസ്തുസംബന്ധിച്ച കലഹമോ തർക്കമോ ഉണ്ടാവാനിടയുണ്ട്. സർക്കാർ അനുമതി ലഭിക്കാൻ വൈകുന്നതാണ്. സാമ്പത്തിക ഇടപാടുകളിൽ സൂക്ഷ്മത വേണ്ടതുണ്ട്.
പുണർതം: ലക്ഷ്യബോധത്തോടെയുള്ള പ്രവർത്തനങ്ങൾ വിജയംകാണും. മത്സരഫലം അനുകൂലമായിത്തീരും. മുതൽമുടക്കുകൾക്ക് നല്ല മൂല്യം പ്രതീക്ഷിക്കാം. സുഹൃത്തുക്കളും ബന്ധുക്കളും അകമഴിഞ്ഞ് സഹായിക്കുന്നതാണ്. കുടുംബസമേതം ഉല്ലാസയാത്രകൾ നടത്താൻ സാഹചര്യം ഒരുങ്ങും. യുവാക്കളുടെ വിവാഹകാര്യത്തിൽ നല്ല തീരുമാനങ്ങൾ വന്നുചേരും. മാസത്തിന്റെ രണ്ടാം പകുതിയിൽ ചെലവ് അധികരിക്കും. അനാവശ്യ വിവാദങ്ങളിൽ തലയിടും. ഉദ്യോഗസ്ഥർക്ക് സ്ഥലം മാറ്റത്തിന് സാധ്യതയുണ്ട്. ജോലിഭാരം കൂടുന്നതാണ്. ജീവിത ശൈലീരോഗങ്ങൾ വിഷമിപ്പിച്ചേക്കാം.
പൂയം: പരീക്ഷ/അഭിമുഖം/ മത്സരം ഇവകളിൽ പ്രശംസാർഹമായ വിജയം നേടും. ചില പദവികളൊക്കെ കൈവരും. അധ്വാനം വിലമതിക്കപ്പെടുന്നതാണ്. വ്യക്തിത്വം ആദരിക്കപ്പെടും. ധനസ്ഥിതി മോശമാവില്ല. സർക്കാരുമായി ബന്ധമുള്ള കാര്യങ്ങൾ ഭംഗിയായി നടന്നുകിട്ടും. കിടപ്പ് രോഗികൾക്ക് ആശ്വാസമുണ്ടാകുന്ന കാലമാണ്. തൊഴിൽ തേടുന്നവർക്ക് പ്രതീക്ഷയ്ക്ക് വകയുണ്ട്. ചൊവ്വ ജന്മരാശിയിലേക്ക് പകരുന്നതിനാൽ ആരോഗ്യകാര്യത്തിൽ പ്രത്യേകമായ ശ്രദ്ധ ആവശ്യമുണ്ട്. അഗ്നി, ആയുധം, യന്ത്രം, വൈദ്യുതി, വാഹനം എന്നിവ ഏറ്റവും കരുതലോടെ ഉപയോഗിക്കുകയും വേണം.
ആയില്യം: മുൻപ് അസാധ്യം എന്ന് അനുഭവപ്പെട്ടിരുന്ന ചില കാര്യങ്ങൾ ഇപ്പോൾ അനായാസം നടന്നുകിട്ടും. ഉദ്യോഗത്തിൽ ശോഭിക്കും. കർമ്മരംഗത്ത് ചില നൂതനത്വങ്ങൾ നടപ്പിൽ വരുത്തും. എതിർപ്പുകളെ ശക്തമായി പ്രതിരോധിക്കും. കച്ചവടത്തിൽ വരുമാനം വർദ്ധിക്കുന്നതാണ്. പിതൃസ്വത്തിന്മേലുള്ള തർക്കം പരിഹൃതമാകും. കിഴക്ക് ഭാഗത്തേക്കുള്ള യാത്രകൾ ഗുണകരമാവുന്നതാണ്. ഉപരിപഠനപ്രവേശം അനായാസമായി കൈവരും. മേയ് 10 ന് ശേഷം ചൊവ്വ കർക്കടകം രാശിയിലേക്ക് സംക്രമിക്കുകയാൽ ആരോഗ്യപ്രശ്നങ്ങൾ ഉടലെടുക്കാം. ക്ഷോഭവാസനകളെ നിയന്ത്രിക്കേണ്ടതുണ്ട്. സാഹസങ്ങൾക്ക് മുതിരരുത്.
മകം: ഭാഗ്യാനുഭവങ്ങൾ വർദ്ധിക്കും. ഉദ്യോഗത്തിൽ സ്ഥാനോന്നതി ഉണ്ടായേക്കും. സകുടുംബം തീർത്ഥാടനം നടത്തുന്നതാണ്. ചില തർക്കങ്ങൾക്ക് നല്ല പരിഹാരം കണ്ടെത്താൻ കഴിയും. രാഷ്ട്രീയത്തിൽ വിജയം ഭവിക്കുന്നതാണ്. ഗവേഷണ പഠനാദികൾക്ക് വായ്പാ സഹായം ലഭിക്കും. കരാറുകളിൽ ഒപ്പുവെക്കും. കൂട്ടുകച്ചവടത്തിനുള്ള ആലോചനകൾ മുന്നേറും. കൂട്ടുകാരിൽ നിന്നും നല്ല പിന്തുണ ലഭിച്ചേക്കും. ഭൂമിയിടപാടുകളിൽ നഷ്ടസാധ്യതയുണ്ട്. ആരോഗ്യപാലനത്തിൽ അലംഭാവമരുത്.
പൂരം: നക്ഷത്രനാഥനായ ശുക്രൻ മാസാദ്യം തന്നെ പതിനൊന്നിലേക്ക് വരികയിൽ ചില പാരിതോഷികങ്ങൾ ലഭിച്ചേക്കും. ഇഷ്ടവ്യക്തികളുടെ സ്നേഹം നേടും. വിദേശധനം വന്നുചേരുന്നതാണ്. കുടുംബാംഗങ്ങളുടെ ഇടയിലെ അനൈക്യം നയചാതുരിയോടെ കൈകാര്യം ചെയ്യും. അധികാരികളുടെ ‘നല്ല പുസ്തകത്തിൽ’ ഇടം പിടിച്ചേക്കും. സഹപ്രവർത്തകരുടെ പിന്തുണ പ്രയോജനപ്പെടുത്തും. മുടങ്ങിക്കിടന്ന കാര്യങ്ങളിൽ തീരുമാനമുണ്ടാകുന്നതാണ്. പൊതുരംഗത്ത് സജീവമാകാൻ കഴിയും. പഠനാവശ്യങ്ങൾക്ക് യാത്ര വേണ്ടിവന്നേക്കും. വ്യാപാരമേഖല വിപുലീകരിക്കും. കിടപ്പ് രോഗികൾക്ക് പുതുചികിൽസ ആശ്വാസമേകും.
ഉത്രം: ആത്മവിശ്വാസത്തോടെ കർമ്മരംഗത്ത് മുഴുകും. ഗ്രഹങ്ങളുടെ സദ്ഭാവസ്ഥിതികളാൽ കാര്യതടസ്സം നീങ്ങുന്നതാണ്. മുതൽമുടക്കുകൾ ലാഭകരമാവും. വസ്തു / വീട് വാങ്ങാൻ സാധ്യതയുള്ള സമയമാണ്. ഭാവികാര്യങ്ങൾ വ്യക്തമായി ആലോചിച്ച് തീരുമാനിക്കും. പ്രതികൂലതകളെ കൂസാതെ മുന്നോട്ട് നീങ്ങാൻ സാധിക്കുന്നതാണ്. അയൽതർക്കങ്ങളിൽ ഉറച്ച നിലപാടുകൾ കൈക്കൊള്ളും. അവിവാഹിതർക്ക് നല്ല വിവാഹാലോചന ഭവിക്കും. ജീവിത ശൈലീരോഗങ്ങൾക്ക് വൈദ്യസഹായം വേണ്ടി വരുന്നതാണ്. വാഗ്വാദങ്ങൾ ഒഴിവാക്കുന്നത് ഉചിതം.
അത്തം: ബൗദ്ധികമായി ഉണർന്നു പ്രവർത്തിക്കേണ്ടതുണ്ട്. സാമ്പത്തിക അച്ചടക്കം അനിവാര്യം. അലച്ചിൽ കൂടാം. പ്രതീക്ഷിച്ചവ കരഗതമാവാൻ വൈകിയേക്കും. ദിവസവേതനക്കാർക്ക് മുടങ്ങാതെ തൊഴിൽ ലഭിക്കും. വ്യാപാരത്തിൽ അധ്വാനത്തിന് അനുസൃതമായി പുരോഗതിയുണ്ടാവണം എന്നില്ല. സഹായ വാഗ്ദാനങ്ങൾ ഭാഗികമായിട്ടാവും കൈവരിക. വിദ്യാർത്ഥികൾക്ക് ചിലപ്പോൾ പ്രതീക്ഷിച്ച വിഷയങ്ങളിൽ ഉന്നതപഠനം സാധ്യമായില്ലെന്ന് വരാം. കുടുംബജീവിതത്തിൽ ചില സന്തോഷാനുഭവങ്ങൾ ഭവിക്കാം. ആറാം ഭാവാധിപൻ ബലവാനാകയാൽ രോഗം, ശത്രു, കടം ഇവ കുറയാം.
ചിത്തിര: കാര്യസാധ്യത്തിന് ശക്തമായ ഇടപെടലുകൾ നടത്തും. ഒപ്പമുള്ളവർക്ക് പ്രവർത്തനോർജ്ജം പകരും. വിശിഷ്ട വ്യക്തികളുടെ പിന്തുണ കരുത്ത് പകരും . പുതിയ സംരംഭങ്ങൾക്ക് തുടക്കം കുറിക്കും. വ്യാപാരം വിപുലികരിക്കാൻ യാത്രകൾ ചെയ്യും. വരുമാനം വർദ്ധിക്കുന്നതാണ്. കുടുംബകാര്യങ്ങൾക്ക് ചെലവേറുന്നതാണ്. ദാമ്പത്യ ജീവിത്തിലെ ദുർവാശികൾ അവസാനിപ്പിക്കും. മക്കളുടെ ഭാവികാര്യങ്ങൾ കൂട്ടായി ആലോചിച്ച് തീരുമാനിക്കും. ഗൃഹനിർമ്മാണത്തിന് ബാങ്കുകളുടെ സഹായം തേടും.
ചോതി: ഗുണദോഷസമ്മിശ്രമായ മാസമാണ്. ഏഴിലും എട്ടിലും ഉള്ള സൂര്യസഞ്ചാരം കലഹം, അനാവശ്യമായ അലച്ചിൽ എന്നിവയ്ക്ക് വഴിയൊരുക്കും. അധികാരികളുടെ അപ്രീതിയുണ്ടാകാം. മാനസികസമ്മർദ്ദം ദുർവഹമാകുന്നതാണ്. എന്നാൽ വ്യാഴാനുകൂല്യം ഉള്ളതിനാൽ എല്ലാ കാര്യങ്ങളിലും വിജയം നേടും. സജ്ജനങ്ങളുടെ പ്രത്യക്ഷസഹായം ശക്തിപകരും. മക്കൾക്ക് ശ്രേയസ്സുണ്ടാകും. ന്യായമായ ആവശ്യങ്ങൾക്ക് പണം വന്നെത്തുന്നതാണ്. കലാപഠനത്തിന് തുടക്കം കുറിക്കും. അവിവാഹിതർക്ക് വിവാഹബന്ധം ഉറച്ചേയ്ക്കും.
വിശാഖം: തടസ്സങ്ങളുണ്ടായാലും ലക്ഷ്യം നേടുന്നതായിരിക്കും. വ്യാപാരത്തിൽ ദീർഘകാലപദ്ധതികൾ ആവിഷ്കരിക്കും. ഗവേഷണപ്രബന്ധം / സാഹിത്യകൃതി പരക്കെയുള്ള അഭിനന്ദനം നേടും. ബൗദ്ധികമത്സരങ്ങൾക്ക് തയ്യാറെടുപ്പുകൾ നടത്തും. സാങ്കേതിക മേഖലയിൽ ഉപരിപഠനത്തിനൊരുങ്ങും. തൊഴിലില്ലാത്തവർക്ക് പുതിയ വരുമാനമാർഗം വന്നുചേരുന്നതാണ്. കടം വാങ്ങാനുള്ള പ്രേരണ നിയന്ത്രിക്കപ്പെടേണ്ടതുണ്ട്. എതിർപ്പുകളുടെ ഉറവിടം അറിയാത്തത് ചിത്തശല്യം ഉണ്ടാക്കാം. വാഹനം സ്വന്തമാക്കാൻ സാധിക്കുന്നതാണ്. കുടുംബത്തിലെ മുതിർന്ന അംഗങ്ങളുടെ ആരോഗ്യപരിപാലനത്തിൽ അലംഭാവമരുത്.
അനിഴം: ബന്ധുക്കൾ പിണക്കം വിട്ട് ഇണങ്ങും. പൂർവ്വകാല സൗഹൃദം വീണ്ടെടുക്കുന്നതാണ്. ചിലരുടെ കാര്യത്തിൽ അധികം താല്പര്യമെടുക്കുന്നത് അപവാദത്തിന് ഇടവരുത്താം. തൊഴിൽ മേഖലയിൽ പുരോഗതിയുണ്ടാകും. മുതൽമുടക്കുകൾക്ക് നല്ലലാഭം കിട്ടിത്തുടങ്ങും. രാഷ്ട്രീയമത്സരങ്ങളിൽ നിന്നും പിന്മാറില്ല. ചെറിയയാത്രകൾക്ക് മുതിരും. നല്ലകാര്യങ്ങൾക്ക് ചെലവ് വർദ്ധിച്ചേക്കും. കുടുംബാംഗങ്ങൾക്കൊപ്പം ഒത്തുകൂടുന്നതിൽ ഏറെ സന്തോഷിക്കാനാവും. മംഗളകർമ്മങ്ങളിൽ മുഖ്യത്വം വഹിക്കും. സാഹസങ്ങൾക്ക് മുതിരരുത്. ആരോഗ്യജാഗ്രത അനിവാര്യം.
തൃക്കേട്ട: വ്യക്തിപരമായും തൊഴിൽപരമായും ഉത്തരവാദിത്വങ്ങൾ വർദ്ധിക്കും. സ്വയം തിരുത്താനും നവീകരിക്കാനും ഉള്ള സാഹചര്യം സംജാതമാകുന്നതാണ്. സമയബന്ധിതമായി ജോലി പൂർത്തിയാക്കും. അന്യദേശ- വിദേശ പഠനത്തിന് സാഹചര്യം ഒരുങ്ങുന്നതാണ്. തൊഴിൽസംരംഭകർക്ക് മുന്നിൽ ചില വെല്ലുവിളികൾ ഉയരാം. പ്രോജക്ടുകൾക്ക് സർക്കാർ അനുമതി ലഭിക്കാൻ കാലവിളംബം ഉണ്ടായേക്കും. യുവാക്കളുടെ പ്രണയം കൂടുതൽ ദൃഢമാകുന്നതാണ്. വാഹനം, അഗ്നി എന്നിവയുടെ ഉപയോഗത്തിൽ ശ്രദ്ധ വേണം. കലാപ്രവർത്തനം ആദരിക്കപ്പെടും.
മൂലം: നാല് ഗ്രഹങ്ങൾ പതിനൊന്നാം ഭാവത്തിലേക്ക് നോക്കുന്നതിനാൽ വരുമാനം ഉയരും. സർക്കാർ ആനുകൂല്യം സിദ്ധിക്കും. കുടുംബാംഗങ്ങളുടെ സർവ്വാത്മനാ ഉള്ള പിന്തുണ കൈവരും. ന്യായമായ ആഗ്രഹങ്ങൾ നിറവേറും. പഠനം, കലാപ്രവർത്തനം എന്നിവയ്ക്ക് പാരിതോഷികം ലഭിക്കും. പ്രണയം ഹൃദയബന്ധമായി വികസിക്കും. രാഷ്ട്രീയ എതിരാളികളെ പരാജയപ്പെടുത്തും. എന്നാൽ ചില ആശയക്കുഴപ്പങ്ങൾ ഉണ്ടാവാനുമിടയുണ്ട്. മക്കൾക്ക് ഉന്നതപഠനത്തിന് ആശിച്ച കലാലയത്തിൽ പ്രവേശനം ലഭിക്കാം. ആരോഗ്യകാര്യത്തിലും ഭൂമിയിടപാടുകളിലും ശ്രദ്ധ വേണം.
പൂരാടം: സൽകർമ്മങ്ങളുടെ ഭാഗമാകും. സന്താനങ്ങളുടെ കാര്യത്തിൽ പ്രധാന തീരുമാനങ്ങൾ കൈക്കൊള്ളും. ദിശാബോധത്തോടെ പ്രവർത്തനങ്ങളിൽ മുഴുകുന്നതാണ്. പുതിയ ജോലിക്കുള്ള ശ്രമം വിജയം കാണും. ഭൗതികജീവിതത്തിൽ നേട്ടങ്ങൾ ഏറും. ആത്മീയ സാധനകൾ മാറ്റിവെക്കപ്പെടാം. വലിയ ദൗത്യങ്ങൾ ഇച്ഛാശക്തിയോടെ ഏറ്റെടുക്കും. ചെറുപ്പക്കാരുടെ വിവാഹകാര്യത്തിൽ തീരുമാനമുണ്ടാകുന്നതാണ്. നിക്ഷേപങ്ങൾ ലാഭകരമാവും. എതിർപ്പുകളെ ഭംഗിയായി പ്രതിരോധിക്കാൻ സാധിക്കും.
ഉത്രാടം: വ്യക്തിപ്രഭാവത്താൽ ഒപ്പമുള്ളവരുടെ ബഹുമാനം നേടും. നക്ഷത്രനാഥൻ ആയ സൂര്യൻ ശുക്രന്റെ നക്ഷത്രത്തിലും സ്വന്തം നക്ഷത്രത്തിലും സഞ്ചരിക്കുകയാൽ കലാമത്സരങ്ങളിൽ വിജയിക്കും. ഉദ്യോഗസ്ഥർക്ക് അധികാരം വർദ്ധിക്കുന്നതാണ്. ഗൃഹം മോടിപിടിപ്പിക്കാൻ ചെലവേറും. പ്രമാണങ്ങളിൽ ഒപ്പുവെക്കുമ്പോൾ സൂക്ഷ്മത വേണം. ബുധാദിത്യയോഗത്താൽ തൊഴിലിൽ നൈപുണ്യമേറും. കുടുംബാംഗങ്ങളുമായി വിനോദയാത്രകൾ നടത്തും. മുതിർന്ന അംഗങ്ങളുടെ ആരോഗ്യപരിപാലനത്തിൽ ജാഗ്രത വേണം. മാസാവസാനത്തിൽ അലച്ചിലുണ്ടാവാം.
തിരുവോണം: ഗാർഹികജീവിതത്തിൽ സ്വസ്ഥതയുണ്ടാവും. കുടുംബാംഗങ്ങളെ യോജിപ്പിച്ച് നിർത്തുന്നതിൽ വിജയിക്കും. മംഗളകർമ്മങ്ങളിൽ സജീവ സാന്നിധ്യമായിരിക്കും. പഴയകടങ്ങൾ തിരികെ കിട്ടുന്നതാണ്. പൊതുകാര്യങ്ങളിൽ ധൈര്യപൂർവ്വം ഇടപെടലുകൾ നടത്തും. ഊഹക്കച്ചവടത്തിൽ നേട്ടങ്ങൾ വരാം. പഠന ഗവേഷണാദികൾക്കായി യാത്രകൾ ചെയ്യും. അനാവശ്യതർക്കങ്ങൾ ഒഴിവാക്കണം. ചൊവ്വ ഏഴാം രാശിയിലേക്ക് മാറുന്നതിനാൽ ദാമ്പത്യരംഗം അല്പമൊന്ന് കലുഷിതമാവുന്നതാണ്
അവിട്ടം: ധാരാളം നേട്ടങ്ങൾ വന്നെത്തുന്ന കാലമാണ്. ബന്ധുമിത്രാദികളുടെ കൂടിച്ചേരലുകളിലൂടെ സന്തോഷിക്കാനവസരം കൈവരും. സാമ്പത്തികമായി മെച്ചമുണ്ടാകുന്നതാണ്. മക്കളുടെ വിവാഹാലോചനകളിൽ തീരുമാനമുണ്ടാകും. ശാസ്ത്ര സാങ്കേതിക വിഷയങ്ങളിൽ ഉപരിപഠനത്തിന് അവസരം സിദ്ധിക്കും. ഗവേഷണ പ്രബന്ധം സമർപ്പിക്കാൻ കഴിഞ്ഞേക്കും. യാത്രകൾ പ്രയോജനം ചെയ്യും. ഭൂമിയുടെ ക്രയവിക്രയത്തിൽ കൂടുതൽ ജാഗ്രത വേണം. ചിലരുടെ സഹായവാഗ്ദാനങ്ങൾ നിറവേറപ്പെടാത്തത് വിഷമിപ്പിക്കും. ജീവിതശൈലീ രോഗങ്ങൾക്ക് ചികിത്സ വേണ്ടിവന്നേക്കും,
ചതയം: വിപരീത സാഹചര്യങ്ങളെ മറികടക്കാൻ ഏറെ അധ്വാനം ആവശ്യമായി വരും. മേയ് ആദ്യപകുതിയിൽ ചിലരിൽ നിന്നും മാനസികപിന്തുണ കൈവരുന്നതാണ്.. അത് നല്ല ഊർജം പകരും. ഉദ്യോഗസ്ഥർക്ക് അധികാരികളുടെ പ്രീതിയുണ്ടാവും.കുടുംബജീവിതത്തിലെ പ്രശ്നങ്ങളെ സമചിത്തതയോടെ നേരിടും. ചില ഉപദേശങ്ങൾക്ക് തണുത്ത പ്രതികരണമാവും ലഭിക്കുക. വായ്പകൾ, ചിട്ടി ഇവ പ്രയോജനപ്പെടുത്തും. നിലവിലെ ജോലി ഉപേക്ഷിച്ചിട്ട് പുതുജോലിതേടുക ആശ്വാസമാവില്ല. ആരോഗ്യകാര്യത്തിൽ ശ്രദ്ധ വേണം. വലിയ തോതിലുള്ള മുതൽമുടക്കുകൾക്ക് കാലം അനുകൂലമല്ല.
പൂരുട്ടാതി: നക്ഷത്രനാഥനായ വ്യാഴത്തിന് രാഹുയോഗം വരുന്നതിനാൽ ഗുണാനുഭവങ്ങൾ പ്രതീക്ഷിച്ചത്ര ഉണ്ടാവില്ല. ചില കൂട്ടുകെട്ടുകൾ പരിശോധിക്കപ്പെടേണ്ടതാണ്. നവസംരംഭങ്ങൾ തുടങ്ങുവാനായി യാത്രകളുണ്ടാവും. സർക്കാർ അനുമതിക്ക് കാലവിളംബം ഏർപ്പെടാം. പരീക്ഷകളിൽ വിജയിച്ചെന്നാലും ഉന്നത പഠനത്തിന് ചില തടസ്സങ്ങൾ വരാം. മാനസികമായ ആലസ്യമുണ്ടാവും. ധനപരമായി ഗുണമുണ്ടാവുന്നതാണ്. സാമ്പത്തിക അച്ചടക്കം പുലർത്തും. കുടുംബത്തിന്റെ പിന്തുണ ശക്തിപകരും. ആരോഗ്യസ്ഥിതിയിൽ കരുതൽ വേണം.
ഉത്രട്ടാതി: ദാമ്പത്യത്തിലെ അലോസരങ്ങൾ നീങ്ങും. എതിർപ്പുകളെ അനുകൂലമാക്കി മാറ്റും. വാഹനം വാങ്ങാനുള്ള ആഗ്രഹം സഫലമാകുന്നതാണ്. സാമ്പത്തികസ്ഥിതി മെച്ചപ്പെടും. നക്ഷത്രാധിപനായ ശനി ബലവാനാകയാൽ ആത്മവിശ്വാസം വർദ്ധിക്കും. മത്സരങ്ങളിൽ വിജയിക്കും. വിദേശത്ത് കഴിയുന്നവർക്ക് നാട്ടിലേക്ക് മടങ്ങാനും മംഗളകർമ്മങ്ങളിൽ പങ്കെടുക്കാനും സാധിക്കും. വലിയ മുതൽമുടക്കുകൾക്ക് കാലം ഭാഗികമായി മാത്രം അനുകൂലമാണ്. കരാറുകളിൽ നേട്ടം പ്രതീക്ഷിക്കാം.
രേവതി: മൗഡ്യത്തിൽ തുടർന്ന വ്യാഴം നക്ഷത്രത്തിൽ നിന്നും മാറിയത് ആശ്വാസകരമാണ്. മുൻ പദ്ധതികൾ മുന്നോട്ട് കൊണ്ടുപോകാൻ സാധിക്കും. പുതിയ സൗഹൃദങ്ങൾ സന്തോഷമേകും. ചെറുപ്പക്കാരുടെ വിവാഹകാര്യത്തിൽ തീരുമാനം ഉണ്ടാകുന്നതാണ്. അന്യനാടുകളിൽ തൊഴിൽ സിദ്ധിച്ചേക്കും. സാമ്പത്തികമായി മെച്ചപ്പെട്ട സ്ഥിതി വരും. ചില അധികാര പദവികൾ ലഭിക്കാം. കുടുംബയോഗം, പൊതുസമ്മേളനം എന്നിവയിൽ ആദ്ധ്യക്ഷ്യം വഹിക്കുന്നതാണ്. അഷ്ടമകേതു തുടരുകയാൽ സാഹസങ്ങൾക്ക് മുതിരരുത്.
