ഭക്ഷണത്തോടൊപ്പം 1 സ്‌പൂൺ നെയ്യ് കഴിക്കൂ, ഹൃദയത്തിനും കുടലിനും ഗുണകരം

നെയ്യ് കഴിക്കുന്നത് ദഹനം, ഉപാപചയപ്രവർത്തനം, ഹൃദയാരോഗ്യം എന്നിവയ്ക്ക് ഗുണം ചെയ്യുന്നുണ്ട്. അവശ്യ ഫാറ്റി ആസിഡുകൾ, കൊഴുപ്പ് ലയിക്കുന്ന വിറ്റാമിനുകൾ (എ, ഡി, ഇ, കെ), ആന്റിഓക്‌സിഡന്റുകൾ എന്നിവയാൽ സമ്പന്നമാണ് നെയ്യ്. പ്രോസസ്ഡ് ഓയിലുകളിൽ നിന്ന് വ്യത്യസ്തമായി, നെയ്യിൽ ഷോർട്ട്-ചെയിൻ, മീഡിയം-ചെയിൻ ഫാറ്റി ആസിഡുകൾ അടങ്ങിയിട്ടുണ്ട്. ഇത് പെട്ടെന്നുള്ള ഊർജം നൽകുകയും ഉപാപചയ പ്രവർത്തനങ്ങളെ സഹായിക്കുകയും ചെയ്യുന്നു.

നെയ്യും കുടലിന്റെ ആരോഗ്യവും

കുടലിന്റെ ആരോഗ്യം നിലനിർത്തുന്നതിൽ പ്രധാന പങ്ക് വഹിക്കുന്ന ഒരു ഷോർട്ട്-ചെയിൻ ഫാറ്റി ആസിഡായ ബ്യൂട്ടൈറേറ്റിന്റെ മികച്ച ഉറവിടമാണ് നെയ്യ്. ബ്യൂട്ടൈറേറ്റ് കുടൽ കോശങ്ങളെ പോഷിപ്പിക്കുകയും ദഹനനാളത്തിലെ വീക്കം കുറയ്ക്കുകയും കുടലിലെ നല്ല ബാക്ടീരിയകളുടെ വളർച്ചയെ പ്രോത്സാഹിപ്പിക്കുകയും ചെയ്യുന്നു. ദഹനം സുഗമമാക്കുന്നതിനും സഹായിക്കുന്നു. അസിഡിറ്റി, വയർ വീർക്കൽ, അല്ലെങ്കിൽ ഇറിറ്റബിൾ ബവൽ സിൻഡ്രോം (ഐബിഎസ്) പോലുള്ള അവസ്ഥകളുള്ള വ്യക്തികൾക്ക് നെയ്യ് കഴിക്കുന്നത് ഗുണം ചെയ്യും.

നെയ്യ് കൊഴുപ്പിൽ ലയിക്കുന്ന വിറ്റാമിനുകളുടെ ആഗിരണം വർധിപ്പിക്കുന്നു. ഇതിലൂടെ നമ്മൾ കഴിക്കുന്ന ഭക്ഷണത്തിൽ നിന്നുള്ള പോഷകങ്ങൾ ശരീരം ഫലപ്രദമായി ഉപയോഗിക്കുന്നുവെന്ന് ഉറപ്പാക്കാം. ഭക്ഷണത്തോടൊപ്പം കുറച്ച് നെയ്യ് കഴിക്കുന്നത് ദഹന എൻസൈമുകളും പിത്തരസവും ഉത്പാദിപ്പിക്കാൻ സഹായിക്കും, ഇത് ദഹനം കൂടുതൽ മെച്ചപ്പെടുത്തും. വിശപ്പിനെ നിയന്ത്രിക്കുകയും സംതൃപ്തി നൽകുകയും ചെയ്യുന്നു.

നെയ്യ് ഹൃദയാരോഗ്യത്തിന് സുരക്ഷിതമാണോ?

മിതമായ അളവിൽ നെയ്യ് കഴിക്കുന്നത് ഹൃദ്രോഗത്തിന് കാരണമാകില്ലെന്ന് സമീപകാല ഗവേഷണങ്ങൾ സൂചിപ്പിക്കുന്നു. നെയ്യ് ദോഷകരമായ കൊളസ്ട്രോൾ (LDL) കുറയ്ക്കാൻ സഹായിച്ചേക്കാം, അതേസമയം, നല്ല കൊളസ്ട്രോൾ (HDL) വർധിപ്പിക്കുന്നു. എങ്കിലും, അമിതമായി കഴിക്കുന്നത്, പ്രത്യേകിച്ച് ഉയർന്ന പഞ്ചസാരയോ ഉയർന്ന കാർബോഹൈഡ്രേറ്റ് ഭക്ഷണമോ ഉള്ള ഭക്ഷണത്തോടൊപ്പം കഴിക്കുമ്പോൾ, ശരീരഭാരം വർധിക്കുന്നതിനും ഹൃദയ സംബന്ധമായ പ്രശ്നങ്ങൾക്കും കാരണമാകും.

ദിവസവും എത്ര നെയ്യ് കഴിക്കണം?

വ്യക്തിഗത ജീവിതശൈലി, മെറ്റബോളിസം, ഭക്ഷണശീലങ്ങൾ എന്നിവയെ അടിസ്ഥാനമാക്കി ഓരോരുത്തർക്കും നെയ്യ് കഴിക്കുന്ന അളവ് വ്യത്യാസപ്പെടുന്നു. മിക്ക വ്യക്തികൾക്കും പ്രതിദിനം 1 മുതൽ 2 ടീസ്പൂൺ വരെ (5 –10 ഗ്രാം) കഴിക്കാം. നിലവിൽ ഹൃദയ സംബന്ധമായ അസുഖങ്ങളോ ഉയർന്ന കൊളസ്ട്രോളോ ഉള്ള ആളുകൾ, നെയ്യ് കഴിക്കുന്നതിനു മുമ്പ് ഒരു ഡോക്ടറെ സമീപിക്കുക.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• എണ്ണ ചേർക്കാതെ ജീരകം വറുക്കുക, ബിപി കുറയ്ക്കാൻ ഒരു എളുപ്പവഴി
• തൈറോയ്ഡ് പ്രശ്നമുണ്ടോ? ഈ പ്രകൃതിദത്ത പാനീയങ്ങൾ കുടിച്ചോളൂ
• വയർ കുറയ്ക്കാൻ ജിമ്മിൽ പോകേണ്ട, ഇതാ 5 വഴികൾ
• പ്രമേഹമുള്ളവർ വേനൽക്കാലത്ത് കഴിക്കാൻ പാടില്ലാത്ത 8 ഭക്ഷണങ്ങൾ