മുട്ടയുടെ വെള്ളയോ മഞ്ഞയോ: ഏതിലാണ് കൂടുതൽ പ്രോട്ടീനും പോഷകങ്ങളും ഉള്ളത്?

പോഷകസമൃദ്ധവും താങ്ങാനാവുന്ന വിലയുമുള്ള ചുരുക്കം ചില ഭക്ഷണങ്ങളിൽ ഒന്നാണ് മുട്ട. മികച്ച പ്രോട്ടീൻ സ്രോതസുകളിൽ ഒന്നായി മുട്ടയെ കണക്കാക്കുന്നു. വൈറ്റമിൻ ഡി, ബി 12, സെലിനിയം, അയഡിൻ, കോളിൻ എന്നിവയുൾപ്പെടെ 13-ലധികം അവശ്യ വൈറ്റമിനുകളും ധാതുക്കളും മുട്ട നൽകുന്നു. ഈ പോഷകങ്ങളുടെ ഉള്ളടക്കം മുട്ടയുടെ വെള്ളയിലും മഞ്ഞക്കരുവിലും വ്യത്യാസപ്പെട്ടിരിക്കുന്നു. മുട്ടയുടെ വെള്ളയും മഞ്ഞക്കരുവും പ്രോട്ടീനിലും പോഷകാഹാരത്തിലും എങ്ങനെ വ്യത്യാസപ്പെട്ടിരിക്കുന്നുവെന്ന് അറിയാം. 

മുട്ട പോഷകസമൃദ്ധമാണ്. ഉയർന്ന നിലവാരമുള്ള പ്രോട്ടീൻ, അവശ്യ കൊഴുപ്പുകൾ, വൈറ്റമിനുകൾ, ധാതുക്കൾ എന്നിവ അടങ്ങിയിരിക്കുന്നതിനാൽ അവയെ പലപ്പോഴും ഒരു സമ്പൂർണ ഭക്ഷണമായി വിളിക്കുന്നു. പ്രോട്ടീനിനു പുറമേ, തലച്ചോറിന്റെ ആരോഗ്യത്തിന് അത്യാവശ്യമായ ഒരു പോഷകമായ കോളിൻ മുട്ടയിൽ ധാരാളം അടങ്ങിയിട്ടുണ്ട്. മിതമായ അളവിൽ കഴിക്കുമ്പോൾ മുട്ട ഹൃദയാരോഗ്യത്തിനും ഗുണം ചെയ്യുന്നുണ്ട്. 

Also Read: ഒരു മാസം ദിവസവും പച്ച വെളുത്തുള്ളി കഴിച്ചാൽ എന്ത് സംഭവിക്കും?

മുട്ടയുടെ വെള്ളയിൽ അടങ്ങിയിരിക്കുന്നത് എന്താണ്?

കുറഞ്ഞ കാലറിയും കൊഴുപ്പും ഉള്ള ഉയർന്ന നിലവാരമുള്ള പ്രോട്ടീന്റെ ശുദ്ധമായ ഉറവിടമായി മുട്ടയുടെ വെള്ള അറിയപ്പെടുന്നു. മുട്ടയുടെ വെള്ളയിൽ പ്രോട്ടീൻ കൂടുതലാണ്. മുട്ടയുടെ വെള്ളയിൽ ചെറിയ അളവിൽ റൈബോഫ്ലേവിൻ (B2) അടങ്ങിയിരിക്കുന്നു, പൊട്ടാസ്യം, മഗ്നീഷ്യം, സോഡിയം തുടങ്ങിയ ധാതുക്കളും അടങ്ങിയിരിക്കുന്നു. കൊഴുപ്പിൽ ലയിക്കുന്ന വൈറ്റമിനുകൾ മുട്ടയുടെ വെള്ളയിൽ ഇല്ല. 

Also Read: റോഡ് ട്രിപ്പുകളിലെ വില്ലൻ; രക്തം കട്ടപിടിക്കുന്നത് തടയാനുള്ള 3 വഴികൾ

മുട്ടയുടെ മഞ്ഞക്കരുവിൽ എന്താണ് ഉള്ളത്?

വെള്ളയിൽ കൂടുതൽ പ്രോട്ടീൻ അടങ്ങിയിട്ടുണ്ടെങ്കിലും, മഞ്ഞക്കരുവിന് അൽപം ഉയർന്ന പ്രോട്ടീൻ സാന്ദ്രതയുണ്ട്. മുട്ടയുടെ മഞ്ഞക്കരു വൈറ്റമിനുകൾ B6, B12, ഫോളേറ്റ്, സെലിനിയം, സിങ്ക്, ഇരുമ്പ്, ഫോസ്ഫറസ് തുടങ്ങിയ ധാതുക്കളാൽ സമ്പുഷ്ടമാണ്. മഞ്ഞക്കരുവിൽ കോളിൻ അടങ്ങിയിട്ടുണ്ട്. ഇത് തലച്ചോറിന്റെ വികസനത്തിനും കരൾ പ്രവർത്തനത്തിനും അത്യാവശ്യമായ ഒരു പോഷകമാണ്.

മുട്ടയുടെ വെള്ളയും മഞ്ഞക്കരുവും താരതമ്യം ചെയ്യുമ്പോൾ, രണ്ട് ഭാഗങ്ങളും വ്യത്യസ്തമായ പോഷക ഗുണങ്ങൾ നൽകുന്നുവെന്ന് വ്യക്തമാണ്. കുറഞ്ഞ കാലറി, കൊളസ്ട്രോൾ രഹിതം, ഉയർന്ന നിലവാരമുള്ള പ്രോട്ടീൻ എന്നിവയാൽ സമ്പുഷ്ടം എന്നിവയാണ് മുട്ടയുടെ വെള്ളയുടെ പ്രത്യേകത. മറുവശത്ത്, മുട്ടയുടെ പോഷക കാമ്പാണ് മഞ്ഞക്കരു. ഇതിൽ മൊത്തത്തിലുള്ള ആരോഗ്യത്തിന് കാരണമാകുന്ന വൈറ്റമിനുകൾ, ധാതുക്കൾ, ആരോഗ്യകരമായ കൊഴുപ്പുകൾ, ആന്റിഓക്‌സിഡന്റുകൾ എന്നിവ അടങ്ങിയിട്ടുണ്ട്. വെള്ള മൊത്തം പ്രോട്ടീൻ ഉള്ളടക്കത്തിന്റെ പകുതിയിലധികം നൽകുമ്പോൾ, മഞ്ഞക്കരു കൊഴുപ്പ് ലയിക്കുന്ന വൈറ്റമിനുകളും (എ, ഡി, ഇ, കെ) തലച്ചോറിന്റെയും കരളിന്റെയും ആരോഗ്യത്തെ പിന്തുണയ്ക്കുന്ന കോളിൻ പോലുള്ള അവശ്യ പോഷകങ്ങളും നൽകുന്നു.

Also Read: ഭക്ഷണം മാത്രമല്ല, ബ്ലഡ് ഷുഗർ നിയന്ത്രിക്കാൻ ഈ 5 കാര്യങ്ങളും ശ്രദ്ധിക്കണം

ഏത് ഭാഗത്താണ് കൂടുതൽ പ്രോട്ടീനും പോഷകവും ഉള്ളത്?

മുട്ടയുടെ വെള്ള പ്രോട്ടീൻ സമ്പുഷ്ടമാണെന്ന് വ്യാപകമായി അറിയപ്പെടുന്നു. എന്നാൽ, ഗ്രാമിന്റെ അടിസ്ഥാനത്തിൽ, മഞ്ഞക്കരുവിൽ കൂടുതലുണ്ട്. മുട്ടയുടെ വെള്ള 100 ഗ്രാമിന് ഏകദേശം 10.8 ഗ്രാം പ്രോട്ടീൻ നൽകുമ്പോൾ, മഞ്ഞക്കരുവിൽ 100 ​​ഗ്രാമിന് ഏകദേശം 16.4 ഗ്രാം അടങ്ങിയിരിക്കുന്നു. എന്നിരുന്നാലും, മുട്ടയുടെ മൊത്തം പ്രോട്ടീന്റെ വലിയൊരു പങ്ക് വെള്ളയാണ് നൽകുന്നത്. എന്നാൽ, വൈറ്റമിനുകൾ (എ, ഡി, ഇ, കെ), ബി വൈറ്റമിനുകൾ, സെലിനിയം, ഇരുമ്പ് പോലുള്ള ധാതുക്കൾ, ആരോഗ്യകരമായ കൊഴുപ്പുകൾ, ഒമേഗ-3 ഫാറ്റി ആസിഡുകൾ എന്നിവയുൾപ്പെടെ അവശ്യ പോഷകങ്ങൾ നിറഞ്ഞിരിക്കുന്നതിനാൽ മൊത്തത്തിലുള്ള പോഷകാഹാര സാന്ദ്രതയുടെ കാര്യത്തിൽ, മഞ്ഞക്കരു മുന്നിലാണ്.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക. 

Read More: കൊളസ്ട്രോൾ കുറച്ച് ആരോഗ്യം മെച്ചപ്പെടുത്താം, രാവിലെ വെള്ളത്തിൽ ഇത് ചേർത്തു കുടിക്കൂ