ദിവസവും കഴിക്കുന്നത് ഒരേ ഭക്ഷണം; പച്ചക്കറികൾ കൂടുതൽ കഴിക്കും: സാമന്ത

2022 ലാണ് നടി സാമന്ത റൂത്ത് പ്രഭുവിന് പേശികളുടെ ശക്തിയെ ബാധിക്കുന്ന ഓട്ടോഇമ്മ്യൂൺ രോഗമായ മയോസിറ്റിസ് കണ്ടെത്തുന്നത്. അന്നുമുതൽ നടി തന്റെ ആരോഗ്യകാര്യത്തിൽ വളരെയധികം ശ്രദ്ധാലുവാണ്. തന്റെ ഫിറ്റ്നസിനെയും മൊത്തത്തിലുള്ള ആരോഗ്യത്തെയും മാറ്റിമറിച്ച ഭക്ഷണശീലങ്ങളെക്കുറിച്ച് അടുത്തിടെ സെലിബ്രിറ്റി ന്യൂട്രീഷ്യനിസ്റ്റ് റയാൻ ഫെർണാണ്ടോയുമായുള്ള അഭിമുഖത്തിൽ സാമന്ത തുറന്നു പറഞ്ഞിരുന്നു.

തന്റെ ഭക്ഷണക്രമം വളരെ കർശനമാണെന്നും എല്ലാ ദിവസവും ഒരേ തരം ഭക്ഷണമാണ് കഴിക്കുന്നതെന്നും സാമന്ത വെളിപ്പെടുത്തി. "എന്റെ ഭക്ഷണക്രമം കുറച്ച് കർശനമാണ്. കൗമാരപ്രായത്തിലെന്നപോലെയല്ല ഇപ്പോഴത്. ഞാനൊരു ഭക്ഷണപ്രിയയായിരുന്നു. ജങ്ക് ഫുഡ് ഒരുപാട് കഴിക്കുമായിരുന്നു. ചെറുപ്പത്തിൽ മെലിഞ്ഞ പ്രകൃതമായതിനാൽ വണ്ണം വയ്ക്കില്ലെന്ന് കരുതി ഇഷ്ടമുള്ളതെന്തും കഴിക്കുമായിരുന്നു."

Also Read: എല്ലാ ദിവസവും ചോറ് കഴിച്ചിട്ടും കുറച്ചത് 18 കിലോ; ശ്രദ്ധിച്ചത് ഒരേയൊരു കാര്യമെന്ന് യുവതി

ഇപ്പോഴത്തെ തന്റെ ഭക്ഷണരീതിയെക്കുറിച്ചും സാമന്ത വ്യക്തമാക്കി. ഇപ്പോൾ താൻ ആന്റി-ഇൻഫ്ലമേറ്ററി ചേരുവകൾ മാത്രമേ ഉപയോഗിക്കുന്നുള്ളൂവെന്ന് അവർ പറഞ്ഞു, "എന്റെ ഭക്ഷണക്രമം കൂടുതലും ആന്റി-ഇൻഫ്ലമേറ്ററി ആണ്. നിങ്ങൾക്ക് അനുയോജ്യമല്ലാത്തത് കണ്ടെത്തി അതൊഴിവാക്കുക എന്നതാണ് അടിസ്ഥാനപരമായി ഇതിന്റെ ലക്ഷ്യം. ചീറ്റ് ഡേകൾ എനിക്ക് ഇല്ല, എല്ലാ ദിവസവും ഒരേ തരത്തിലുള്ള ഭക്ഷണമാണ് കഴിക്കുന്നത്. ഇപ്പോൾ എനിക്കതൊരു ശീലമായി മാറിയിട്ടുണ്ട്."

Also Read: വയറിലെ കൊഴുപ്പ് പെട്ടെന്ന് ഉരുകും, ചുമരിൽ ചാരി നിന്ന് ഇങ്ങനെ ചെയ്യൂ

"കോളിഫ്ലവർ, ബ്രോക്കോളി, ബ്രസ്സൽസ് സ്പ്രൗട്സ് പോലുള്ള ക്രൂസിഫറസ് പച്ചക്കറികൾ എന്റെ അടുക്കളയിൽ നിങ്ങൾക്ക് കാണാനാകും. സ്പിനചും കാലെയും എനിക്ക് ശരിയാകില്ല, ഇത് ആളുകൾക്ക് എങ്ങനെ വിശദീകരിക്കണമെന്ന് എനിക്കറിയില്ല. സെലറി, അക്കായ് ബെറി, മഞ്ഞൾ, നെയ്യ്, കോൾഡ് പ്രസ്ഡ് ഓയിലുകൾ, ധാരാളം നല്ല കൊഴുപ്പുകൾ എന്നിവയും നിങ്ങൾക്ക് കാണാം. നിങ്ങൾക്ക് ഗ്ലൂറ്റൻ കണ്ടെത്താനാവില്ല. എനിക്ക് ഓർഗാനിക് ഷോപ്പിങ് നടത്താൻ ഇഷ്ടമാണ്, പക്ഷേ ചിലപ്പോൾ അത് സാധ്യമല്ല," സാമന്ത പറഞ്ഞു.

താൻ ഒരിക്കലും ഭക്ഷണം ഒഴിവാക്കാറില്ലെന്നും പ്രഭാതഭക്ഷണം, ഉച്ചഭക്ഷണം, അത്താഴം എന്നീ മൂന്ന് ഭക്ഷണങ്ങളും കഴിക്കുന്നുണ്ടെന്ന് സാമന്ത സമ്മതിച്ചു. "ഞാൻ പ്രഭാതഭക്ഷണം, ഉച്ചഭക്ഷണം, അത്താഴം എന്നിവ കഴിക്കാറുണ്ട്. ഒരുപക്ഷേ എന്റെ പ്രഭാതഭക്ഷണം കൂടുതലും സ്മൂത്തികളായിരിക്കാം. അതിനുശേഷം ഉച്ചഭക്ഷണവും അത്താഴവും കഴിക്കും."

Also Read:രാത്രിയിൽ നെഞ്ചിൽ നെയ്യ് പുരട്ടുന്നതിന്റെ ഗുണങ്ങൾ അറിയാമോ?

View this post on Instagram

A post shared by Samantha (@samantharuthprabhuoffl)

"എനിക്ക് ഒരു ഫാൻസി ഷെഫ് ഇല്ല, പക്ഷേ കാപ്പി ഉണ്ടാക്കാൻ അറിയാത്ത എന്റെ അസിസ്റ്റന്റ് അത്ഭുതകരമെന്ന് പറയട്ടെ, ഞാൻ കഴിക്കുന്ന എല്ലാ ഭക്ഷണവും ഉണ്ടാക്കാൻ പഠിച്ചു. സെറ്റിൽ എനിക്ക് വേണ്ടി അദ്ദേഹം പാചകം ചെയ്തു തരാറുണ്ട്," സാമന്ത വെളിപ്പെടുത്തി. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: വണ്ണം ഒരിക്കലും കുറയില്ല, ഈ 6 കാര്യങ്ങൾ ചെയ്യാതിരിക്കൂ