'4 ഗ്രാം പ്രോട്ടീൻ' അടങ്ങിയ ഒരേയൊരു പഴം; പ്രമേഹമുള്ളവർ ഒരിക്കലും ഒഴിവാക്കരുത്

പ്രോട്ടീൻ അടങ്ങിയ ഭക്ഷണത്തിന് ഏതു പ്രായത്തിലും പ്രാധാന്യം കൊടുക്കണം. പ്രോട്ടീന്റെ മികച്ച ഉറവിടമുള്ള ഒരു പഴമാണ് പേരയ്ക്ക. ന്യൂട്രീഷ്യനിസ്റ്റ് ലീമ മഹാജന്റെ അഭിപ്രായത്തിൽ 4 ഗ്രാം പ്രോട്ടീൻ ഉള്ള ഒരേയൊരു പഴം പേരയ്ക്കയാണ്. 1 കപ്പ് പേരയ്ക്കിൽ 4 ഗ്രാം പ്രോട്ടീനുണ്ട് (ഏകദേശം പകുതി വേവിച്ച മുട്ടയ്ക്ക് തുല്യം). പ്രോട്ടീനിനപ്പുറം, പേരയ്ക്ക പ്രമേഹമുള്ളവർക്ക് അനുയോജ്യമായ ഒരു പഴമാണെന്നും, പേര ഇല തിളപ്പിച്ച വെള്ളം കുടിക്കുന്നത് നല്ലതാണെന്നും അവർ വ്യക്തമാക്കി. 

പേരയ്ക്ക പ്രോട്ടീൻ അടങ്ങിയ പഴമാണോ?

ഒരു കപ്പിൽ ഏകദേശം 4 ഗ്രാം പ്രോട്ടീൻ അടങ്ങിയിരിക്കുന്നതിനാൽ പഴങ്ങളിൽ വച്ച് സവിശേഷമാണിത്. “എന്നിരുന്നാലും, പ്രോട്ടീൻ അടങ്ങിയ ഒരേയൊരു പഴമല്ല ഇത്. അവക്കാഡോ, ചക്ക തുടങ്ങിയ മറ്റു പഴങ്ങളിലും ഇവ അടങ്ങിയിട്ടുണ്ട്. പ്രോട്ടീൻ, നാരുകൾ, വൈറ്റമിൻ സി, വളരെ കുറഞ്ഞ ഗ്ലൈസെമിക് സൂചിക എന്നിവയാണ് പേരയ്ക്കയെ സവിശേഷമാക്കുന്നത്. ഇവയെല്ലാം ഒരു പഴത്തിൽ തന്നെ അടങ്ങിയിരിക്കുന്നു എന്നതാണ് ഇതിന് കാരണം. അതുകൊണ്ടാണ് പ്രമേഹമുള്ളവർക്ക് ഇത് അനുയോജ്യമാകുന്നത്," താനെയിലെ കിംസ് ഹോസ്പിറ്റലിലെ ഡോ. വിജയ് നെഗളൂർ പറഞ്ഞു.

Also Read: വെളുത്ത അരിക്ക് പകരം മില്ലറ്റുകൾ, എന്നിട്ടും ബ്ലഡ് ഷുഗർ കുറയുന്നില്ലേ? ഇതാവാം കാരണം

"പേരയ്ക്കയിലെ നാരുകളുടെ അളവ് കാർബോഹൈഡ്രേറ്റ് ആഗിരണം മന്ദഗതിയിലാക്കുകയും ഭക്ഷണത്തിനു ശേഷമുള്ള രക്തത്തിലെ പഞ്ചസാരയുടെ വർധനവ് തടയാൻ സഹായിക്കുകയും ചെയ്യുന്നു. കൂടാതെ, പേരയ്ക്കയിലെ ആന്റിഓക്‌സിഡന്റുകൾ പ്രമേഹത്തിനുള്ള ഒരു കാരണമായ ഓക്‌സിഡേറ്റീവ് സമ്മർദം കുറയ്ക്കുന്നു," ഡോ.നെഗളൂർ പറഞ്ഞു.

Also Read: ഇരുമ്പിന്റെ കുറവുണ്ടോ? മരുന്ന് വേണ്ട, ഈ ജ്യൂസ് മതി

പേര ഇലകളുടെ കാര്യമോ?

ഇൻസുലിൻ സെൻസിറ്റിവിറ്റി മെച്ചപ്പെടുത്തുകയും ഭക്ഷണത്തിനുശേഷം ഗ്ലൂക്കോസിന്റെ അളവ് കുറയ്ക്കുകയും ചെയ്യുന്ന ബയോആക്ടീവ് സംയുക്തങ്ങളാൽ സമ്പന്നമാണ് പേരയുടെ ഇലകളെന്ന് ഡോ.നെഗളൂർ അഭിപ്രായപ്പെട്ടു. “പേര ഇല തിളപ്പിച്ചുള്ള വെള്ളത്തിന് ഗുണങ്ങളുണ്ടെന്ന് ക്ലിനിക്കൽ പഠനങ്ങളിൽ തെളിഞ്ഞിട്ടുണ്ട്. ഇത് മരുന്നുകൾക്ക് പകരമാകരുത്, പക്ഷേ സ്വാഭാവിക രീതിയിൽ പ്രമേഹ നിയന്ത്രണത്തിന് സഹായിക്കും,” ഡോ.നെഗളൂർ വിശദീകരിച്ചു.

ശ്രദ്ധിക്കേണ്ട കാര്യം എന്താണ്?

പേരയ്ക്കയ്ക്ക് ആരോഗ്യ ഗുണങ്ങളുണ്ടെങ്കിലും മിതത്വം പ്രധാനമാണ്. ഒരു ദിവസം ഒരു ഇടത്തരം പേരയ്ക്ക കഴിക്കുന്നതാണ് ഉത്തമം. പ്രമേഹരോഗികൾ നല്ലവണ്ണം പഴുത്ത പേരയ്ക്ക കഴിക്കുന്നത് ഒഴിവാക്കണമെന്ന് ഡോ. നെഗളൂർ പറഞ്ഞു. അവ മധുരമുള്ളതും പഞ്ചസാരയുടെ അളവ് വേഗത്തിൽ വർധിപ്പിക്കുന്നതുമാണ്. 

View this post on Instagram

A post shared by Leema Mahajan | Nutritionist & Weight loss specialist (@leemamahajan)

Also Read: 21 ദിവസം കൊണ്ട് 7 കിലോ കുറച്ചു, അരക്കെട്ട് 2 ഇഞ്ച് കുറഞ്ഞു; സഹായിച്ചത് ഈ എഐ ഡയറ്റ്

പ്രമേഹരോഗികൾ പഴങ്ങളെക്കുറിച്ച് പൊതുവെ എന്താണ് അറിഞ്ഞിരിക്കേണ്ടത്?

പഴങ്ങൾ കഴിക്കുമ്പോൾ സമയവും ഭാഗിക നിയന്ത്രണവും എപ്പോഴും പരിഗണിക്കുക. “ജ്യൂസിന് പകരം മുഴുവൻ പഴങ്ങളും കഴിക്കുക. ഒരേസമയം കഴിക്കുന്നതിനുപകരം ഇടയ്ക്കിടെ കുറച്ച് വീതം കഴിക്കുക. പേരയ്ക്ക മികച്ചതാണെങ്കിലും, സമീകൃതാഹാരം, വ്യായാമം, ചികിത്സാ രീതി എന്നിവയിലും ശ്രദ്ധ വേണമെന്ന കാര്യം ഓർമ്മിക്കുക,” ഡോ.നെഗളൂർ അഭിപ്രായപ്പെട്ടു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: മദ്യപിച്ചശേഷം ചായയോ കാപ്പിയോ കുടിച്ചാൽ എന്ത് സംഭവിക്കും?