ഈ ഭക്ഷണങ്ങൾക്കൊപ്പം പഴങ്ങൾ കഴിക്കാൻ പാടില്ല, അറിയാമോ?

പഴങ്ങൾ ഏതു സമയത്തും കഴിക്കാൻ അനുയോജ്യമാണ്. ചിലർ പ്രഭാതഭക്ഷണത്തിനും ഉച്ചഭക്ഷണത്തിനും അത്താഴത്തിനും ഒപ്പം പഴങ്ങൾ കഴിക്കാറുണ്ട്. എന്നാൽ, എല്ലാ ഭക്ഷണങ്ങൾക്കൊപ്പവും പഴങ്ങൾ കഴിക്കാൻ പാടില്ല. പഴങ്ങളിൽ വിറ്റാമിനുകളും പോഷകങ്ങളും അടങ്ങിയിട്ടുണ്ടെങ്കിലും ചില ഭക്ഷണങ്ങൾക്കൊപ്പം ചേർക്കുന്നത് അവയിലെ പോഷകഗുണത്തെ കുറയ്ക്കും. 

പ്രോട്ടീനുകൾക്കും കാർബോഹൈഡ്രേറ്റുകൾക്കും ഒപ്പം പഴങ്ങൾ ഉൾപ്പെടുത്തുന്നത് ദഹനത്തെ തടസപ്പെടുത്തുമെന്ന് ഡോ.ഡിംപിൾ ജംഗ്‌ദ അഭിപ്രായപ്പെട്ടു. കാരണം പഴങ്ങൾ പെട്ടെന്ന് ദഹിക്കുന്നു, പ്രോട്ടീനുകളും കാർബോഹൈഡ്രേറ്റുകളും ദഹിക്കാൻ സമയമേറെ എടുക്കും. അതിനാൽ, ഇവയ്ക്കൊപ്പം പഴങ്ങൾ കഴിക്കുമ്പോൾ വയറിൽ തങ്ങികിടന്ന് വയറ്റിലെ ആസിഡുകളുമായി ഇടപഴകാൻ തുടങ്ങും. ഇത് ദഹനക്കേട്, വയറിളക്കം, അസിഡിറ്റി തുടങ്ങിയ ചില പ്രശ്നങ്ങൾക്ക് കാരണമാകും. കൂടാതെ, ആ പഴങ്ങൾ ദഹിക്കുമ്പോൾ, ദഹിക്കാത്ത പ്രോട്ടീനുകളും കാർബോഹൈഡ്രേറ്റുകളും ചെറുകുടലിലേക്ക് തള്ളിവിടുകയും കൂടുതൽ ദഹനപ്രശ്നങ്ങൾക്ക് കാരണമാവുകയും ചെയ്യുമെന്ന് അവർ വ്യക്തമാക്കി.

പഴങ്ങൾ ദഹനവ്യവസ്ഥയിൽ കൂടുതൽ നേരം തങ്ങി നിൽക്കുമ്പോൾ, അവ പുളിക്കാൻ തുടങ്ങുന്നു. ഇത് ഗ്യാസിനും വയർവീർക്കലിനും അസ്വസ്ഥതയ്ക്കും കാരണമാകുന്നു. ഇതിനൊരു ഉദാഹരണമാണ് മുന്തിരി. കൂടുതൽ പുറത്ത് ഇരുന്നാൽ പുളിക്കാൻ തുടങ്ങും. വിദഗ്ധരുടെ അഭിപ്രായത്തിൽ നമ്മുടെ ശരീരത്തിലും ഇതേ പ്രക്രിയ സംഭവിക്കുന്നു. പ്രോട്ടീനുകളും കാർബോഹൈഡ്രേറ്റുകളും പോലുള്ള ഭക്ഷണങ്ങൾക്കൊപ്പം പഴങ്ങൾ കഴിക്കുമ്പോൾ ശരീരത്തിന് ഇരുമ്പും കാൽസ്യവും ഫലപ്രദമായി ആഗിരണം ചെയ്യുന്നത് ബുദ്ധിമുട്ടുണ്ടാക്കും. ഇത് വിവിധ ആരോഗ്യപ്രശ്നങ്ങൾക്ക് ഇടയാക്കും.

View this post on Instagram

A post shared by Dimple Jangda (@dimplejangdaofficial)

പോഷകങ്ങൾ പരമാവധി ആഗിരണം ചെയ്യാൻ വെറും വയറ്റിൽ പഴങ്ങൾ കഴിക്കണമെന്ന് ആരോഗ്യ വിദഗ്ധർ നിർദേശിക്കുന്നു. ഭക്ഷണത്തിനിടയിൽ ഒരു ലഘുഭക്ഷണമായി അവ ആസ്വദിക്കാം. നാലു മണിക്ക് സ്നാക്സിനു പകരം പഴങ്ങൾ കഴിക്കാം. കട്ടിയുള്ള ഭക്ഷണങ്ങളുമായി അവ കലർത്താതിരിക്കാൻ ശ്രദ്ധിക്കുക. നട്സ്, വിത്തുകൾ എന്നിവയ്ക്കൊപ്പം പഴങ്ങൾ കഴിക്കാം. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• വാഴപ്പഴം ജലദോഷത്തിനും ചുമയ്ക്കും കാരണമാകുമോ?
• ശരീര ഭാരം കുറയ്ക്കാനൊരു എളുപ്പ വഴി; ഭക്ഷണം നന്നായി ചവച്ചരച്ച് കഴിക്കാം
• പ്രഭാത ഭക്ഷണം വൈകി കഴിക്കുന്നത് ആരോഗ്യത്തിന് നല്ലതോ?
• ഒരു കഷ്ണം ഡാർക്ക് ചോക്ലേറ്റ് കഴിക്കാം; ശരീര ഭാരം നിയന്ത്രിക്കും, ഹൃദയത്തിനും ചർമ്മത്തിനും ഗുണകരം