വാഴപ്പഴം ജലദോഷത്തിനും ചുമയ്ക്കും കാരണമാകുമോ?

പ്രായഭേദമന്യേ എല്ലാവരും ഇഷ്ടപ്പെടുന്ന ഒന്നാണ് വാഴപ്പഴം. കഴിക്കാൻ എളുപ്പവുമാണ്, നിറയെ പോഷകഗുണങ്ങളും ഉണ്ട്. വാഴപ്പഴത്തിൽ പൊട്ടാസ്യം, മഗ്നീഷ്യം, ഫൈബർ തുടങ്ങിയ അവശ്യ പോഷകങ്ങൾ അടങ്ങിയിട്ടുണ്ട്. കൂടാതെ, ഊർജം വർദ്ധിപ്പിക്കുന്നതിനും ദഹനത്തെ സഹായിക്കുന്നതിനും അവ മികച്ചതാണ്. മറ്റേതൊരു പഴത്തെയുംപോലെ വാഴപ്പഴത്തെ ചുറ്റിപ്പറ്റിയും ചില തെറ്റിദ്ധാരണകൾ നിലനിൽക്കുന്നുണ്ട്. 

വാഴപ്പഴം കഴിക്കുന്നത് ജലദോഷത്തിനും ചുമയ്ക്കും കാരണമാകും എന്നതാണ് അതിലൊന്ന്. ന്യൂട്രീഷ്യനിസ്റ്റ് അമിത ഗാദ്രെ ഇതിനെക്കുറിച്ച് ഇൻസ്റ്റഗ്രാമിൽ പങ്കുവച്ച വീഡിയോയിൽ വിശദീകരിച്ചിട്ടുണ്ട്. ജലദോഷവും ചുമയും ഉണ്ടാകുന്നത് നമ്മുടെ ചുറ്റുമുള്ള വായുവിൽ അടങ്ങിയിരിക്കുന്ന വൈറസുകൾ കാരണമാണെന്നും അല്ലാതെ വാഴപ്പഴം മൂലമല്ലെന്നും അമിത പറഞ്ഞു. കാലാവസ്ഥ മാറ്റത്തിന് അനുസരിച്ച് ഉണ്ടാകുന്ന സീസണൽ രോഗങ്ങൾക്ക് വാഴപ്പഴത്തെ കുറ്റപ്പെടുത്തരുതെന്നും അവർ പറഞ്ഞു. 

രോഗമുള്ള ഒരാളാണെങ്കിൽ, പ്രത്യേകിച്ച് ജലദോഷമുണ്ടെങ്കിൽ വാഴപ്പഴം മ്യൂക്കസ് ഉൽപാദനം വർധിപ്പിക്കും. എന്നാൽ, അവയല്ല രോഗത്തിന് കാരണം. ആസ്ത്മയോ അലർജിയോ ഉള്ള ആളുകൾക്ക് വാഴപ്പഴം കഴിച്ചതിന് ശേഷം ചില അസ്വസ്ഥതകൾ അനുഭവപ്പെടാം. അതിന് വാഴപ്പഴത്തെ കുറ്റപ്പെടുത്താതെ പോഷക സമ്പന്നമായ ഭക്ഷണങ്ങൾ കഴിക്കുന്നതിൽ ശ്രദ്ധ കേന്ദ്രീകരിക്കാൻ അവർ നിർദേശിച്ചു.

View this post on Instagram

A post shared by Amita Gadre | Nutritionist (@amitagadre)

ജലദോഷവും ചുമയും അകറ്റാൻ സഹായിക്കുന്ന ഭക്ഷണങ്ങൾ

ജലദോഷവും ചുമയും അകറ്റാൻ പ്രകൃതിദത്തമായി നിരവധി ഭക്ഷണങ്ങൾ സഹായിക്കും. ഇതിനായി വെളുത്തുള്ളി, മഞ്ഞൾ, തുളസി, ബദാം, നെല്ലിക്ക, നാരങ്ങ, മധുരക്കിഴങ്ങ് എന്നിവ ഭക്ഷണത്തിൽ ഉൾപ്പെടുത്തുക. ഈ ഭക്ഷണങ്ങളിൽ അവശ്യ വിറ്റാമിനുകളും പോഷകങ്ങളും അടങ്ങിയിട്ടുണ്ട്. വർഷം മുഴുവൻ, പ്രത്യേകിച്ച് ശൈത്യകാലത്ത് പ്രതിരോധശേഷി വർധിപ്പിക്കുന്നതിനുള്ള മികച്ച മാർഗങ്ങളാണിവ. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ശരീര ഭാരം കുറയ്ക്കാനൊരു എളുപ്പ വഴി; ഭക്ഷണം നന്നായി ചവച്ചരച്ച് കഴിക്കാം
• പ്രഭാത ഭക്ഷണം വൈകി കഴിക്കുന്നത് ആരോഗ്യത്തിന് നല്ലതോ?
• ഒരു കഷ്ണം ഡാർക്ക് ചോക്ലേറ്റ് കഴിക്കാം; ശരീര ഭാരം നിയന്ത്രിക്കും, ഹൃദയത്തിനും ചർമ്മത്തിനും ഗുണകരം
• മലബന്ധം എളുപ്പത്തിൽ അകറ്റാം, ചില സിംപിൾ ടിപ്‌സുകൾ