പ്രമേഹമുള്ളവർക്ക് രാവിലെ ഇഡ്ഡലിയോ ദോശയോ കഴിക്കാമോ?

പ്രമേഹമുള്ളവർ ദൈനംദിന ജീവിതശൈലിയിൽ മാറ്റങ്ങൾ വരുത്തേണ്ടതുണ്ട്. ഭക്ഷണകാര്യത്തിലും അവർ പ്രത്യേക ശ്രദ്ധ ചെലുത്തേണ്ടതുണ്ട്. പലരുടെയും വീടുകളിൽ സാധാരണ പ്രഭാതഭക്ഷണമായ ഇഡ്ഡലി, ദോശ തുടങ്ങിയ കാർബോഹൈഡ്രേറ്റുകൾ അവർക്ക് കഴിക്കാൻ കഴിയുമോ എന്നതാണ് ഏറ്റവും സാധാരണമായ ചോദ്യങ്ങളിലൊന്ന്. പ്രമേഹമുള്ളവർക്ക് ഈ ഭക്ഷണങ്ങൾ കഴിക്കാമെന്നാണ് താനെയിലെ കിംസ് ഹോസ്പിറ്റലിലെ ചീഫ് ഡയറ്റീഷ്യൻ ഡോ. ഗുൽനാസ് ഷെയ്ഖ് പറയുന്നത്. 

''പുളിപ്പിച്ച അരിയും ഉഴുന്നും ഉപയോഗിച്ചാണ് ഇഡ്ഡലിയും ദോശയും തയ്യാറാക്കുന്നത്. ഇതിലൂടെ അവ ഭാരം കുറഞ്ഞതും ദഹിക്കാൻ എളുപ്പവുമുള്ളതാകുന്നു. പ്രമേഹരോഗികൾക്ക് കഴിക്കാവുന്ന അളവ് നിയന്ത്രിച്ച് അവ കഴിക്കാവുന്നതാണ്. പരിമിതമായ അളവിൽ കഴിച്ചാൽ ആരോഗ്യകരമായ പ്രഭാതഭക്ഷണത്തിന്റെ ഭാഗമാക്കാം,” ഷെയ്ഖ് പറഞ്ഞു.

Also Read: വിരലുകൾ അനക്കാൻ ബുദ്ധിമുട്ടുണ്ടോ? പ്രമേഹരോഗികൾ ശ്രദ്ധിക്കുക

പ്രമേഹരോഗികൾ ഇഡ്ഡലിയോ ദോശയോ കഴിക്കുമ്പോൾ എന്താണ് ശ്രദ്ധിക്കേണ്ടത്?

ഇഡ്ഡലിയിൽ ഉയർന്ന അളവിൽ കാർബോഹൈഡ്രേറ്റ് അടങ്ങിയിട്ടുണ്ട്. ഇത് വലിയ അളവിൽ കഴിച്ചാൽ രക്തത്തിലെ പഞ്ചസാര വർധിപ്പിക്കും. ഇവ ആരോഗ്യകരമാക്കാൻ, സാമ്പാർ, മിതമായ അളവിൽ തേങ്ങാ ചട്ണി, അല്ലെങ്കിൽ ഒരു പാത്രം മുളപ്പിച്ചത് പോലുള്ള ഉയർന്ന പ്രോട്ടീൻ സമ്പുഷ്ടമായ വിഭവങ്ങളോടൊപ്പം കഴിക്കുക. അതേസമയം, നെയ്യ് ചേർത്ത മസാല ദോശ പോലുള്ളവ ഒഴിവാക്കാൻ ഡോ. ഷെയ്ഖ് നിർദേശിച്ചു.

കാർബോഹൈഡ്രേറ്റ് അടങ്ങിയ ഭക്ഷണങ്ങൾ ഉൾപ്പെടുത്തുന്നതിൽ എന്തെങ്കിലും ഗുണമുണ്ടോ?

ഫെർമെന്റേഷൻ പ്രക്രിയ കുടലിന്റെ ആരോഗ്യം വർധിപ്പിക്കുകയും പോഷകങ്ങളുടെ ജൈവ ലഭ്യത വർധിപ്പിക്കുകയും ചെയ്യുന്നുവെന്ന് ഷെയ്ഖ് പറഞ്ഞു. “സാമ്പാർ കഴിക്കുന്നതിലൂടെ പയർവർഗങ്ങളുടെ ഗുണങ്ങൾ നൽകുന്നു, പച്ചക്കറികൾ നാരുകളും പ്രോട്ടീനും നൽകുന്നു, ഇത് ഗ്ലൂക്കോസിന്റെ റിലീസ് മന്ദഗതിയിലാക്കുന്നു. സമീകൃതാഹാരത്തിന്റെ ഭാഗമായി ഇഡ്ഡലിയോ ദോശയോ കഴിക്കുന്നത് പഞ്ചസാരയുടെ അളവ് കൂട്ടാതെ തന്നെ സുസ്ഥിരമായ ഊർജം നൽകും, പ്രത്യേകിച്ച് പ്രോട്ടീനും നാരുകളും അതോടൊപ്പം ഉണ്ടാകുമ്പോൾ,” ഷെയ്ഖ് പറഞ്ഞു.

Also Read: ചായയോ കാപ്പിയോ? രാവിലെ കുടിക്കാൻ ഏതാണ് നല്ലത്?

ഈ ഭക്ഷണങ്ങളുടെ കാര്യത്തിൽ ആരാണ് കൂടുതൽ ശ്രദ്ധിക്കേണ്ടത്?

രക്തത്തിലെ പഞ്ചസാരയുടെ അളവ് നിയന്ത്രണാതീതമായി തുടരുന്നവരോ അല്ലെങ്കിൽ ഭക്ഷണത്തിനു ശേഷമുള്ള വർധന് നിയന്ത്രിക്കാൻ ബുദ്ധിമുട്ടുള്ളവരോ പ്രത്യേകം ശ്രദ്ധിക്കണമെന്ന് ഷെയ്ഖ് പറഞ്ഞു. “പൊണ്ണത്തടി അല്ലെങ്കിൽ ഉയർന്ന കൊളസ്ട്രോൾ പോലുള്ള മറ്റ് അവസ്ഥകളുള്ള രോഗികളും അവയുടെ അളവിൽ ജാഗ്രത പാലിക്കേണ്ടതുണ്ട്,” ഷെയ്ഖ് പറഞ്ഞു.

Also Read: 6 മാസം കൊണ്ട് യുവതി കുറച്ചത് 13 കിലോ; വണ്ണം കുറയ്ക്കാൻ ചെയ്തത് 3 കാര്യങ്ങൾ

പ്രമേഹരോഗികൾക്ക് എത്ര കഴിക്കാം?

രണ്ട് ഇടത്തരം ഇഡ്ഡലി അല്ലെങ്കിൽ ഒരു പ്ലെയിൻ ദോശ ധാരാളം സാമ്പാർ ചേർത്ത് കഴിക്കുന്നത് മിക്ക പ്രമേഹരോഗികൾക്കും സുരക്ഷിതമാണ്. “വയർ നിറയുമ്പോൾ ഭക്ഷണം കഴിക്കുന്നത് നിർത്തുക, ഈ ഭക്ഷണങ്ങൾ എല്ലാ ദിവസവും വലിയ അളവിൽ കഴിക്കരുത് എന്നതാണ് പ്രധാന നിയമം. ഓട്സ്, പച്ചക്കറികൾ ചേർത്ത ഉപ്പുമാവ് തുടങ്ങിയ കുറഞ്ഞ ഗ്ലൈസെമിക് ഭക്ഷണങ്ങൾക്കൊപ്പം ദിവസം മാറി മാറി കഴിക്കുകയാണ് വേണ്ടതെന്ന് ഷെയ്ഖ് പറഞ്ഞു.

"അളവ് നിയന്ത്രണം, പ്രോട്ടീനുമായി സംയോജിപ്പിക്കൽ, ശ്രദ്ധാപൂർവ്വമായ പാചക രീതികൾ എന്നിവ ഇഡ്ഡലിയോ ദോശയോ സുരക്ഷിതവും ആരോഗ്യകരവുമായ ഒരു ഓപ്ഷനാക്കി മാറ്റും," ഷെയ്ഖ് പറഞ്ഞു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഒരാഴ്ചത്തേക്ക് എല്ലാ ദിവസവും പനീർ കഴിച്ചാൽ എന്ത് സംഭവിക്കും?