പൂപോലുള്ള ഇഡ്ഡലി വേണോ? പച്ചരിയിലേയ്ക്ക് ഇത് കൂടി ചേർത്ത് മാവ് അരയ്ക്കൂ

ഇഡ്ഡലിയും സാമ്പാറും മലയാളികളുടെ പ്രധാന ബ്രേക്ക്ഫാസ്റ്റുകളിൽ ഒന്നാണ്. വളരെ കോമണായ പ്രഭാത ഭക്ഷണങ്ങളിൽ ഒന്നാണെങ്കിലും ഇഡ്ഡലി മാവ് തയ്യാറാക്കുക അത്ര എളുപ്പമല്ല. മാവ് തയ്യാറാക്കുമ്പോൾ വെള്ളം കൂടിപ്പോയാൽ പോലും ഇഡ്ഡലിയുടെ സ്വാദ് മാറും. അരി, ഉഴുന്ന് എന്നിവയുടെ അളവുകൾ കൃത്യമായിരിക്കുക എന്നതാണ് സോഫ്റ്റായ ഇഡ്ഡലിയ്ക്കു പിന്നിലെ പ്രധാന രസക്കൂട്ട്. അരിയുടെ പകുതിയളവിൽ ഉഴുന്ന് എന്നതാണ് ഇഡ്ഡലി മൃദുവാകാൻ വേണ്ട ചേരുവ കണക്ക്. എന്നാൽ അതുമാത്രം പോര പഞ്ഞിപോലുള്ള ഇഡ്ഡലി തയ്യാറാക്കാൻ മാവ് അരയ്ക്കുമ്പോൾ മറ്റൊരു ചേരുവ കൂടി ഉൾപ്പെടുത്താം. 

Also Read: ദോശ പാനിൽ ഒട്ടിപ്പിടിച്ചിരിക്കാറുണ്ടോ? എങ്കിൽ ഇനി ഇങ്ങനെ ചെയ്തു നോക്കൂ

ചേരുവകൾ

• പച്ചരി - 500 ഗ്രാം,
• വേവിച്ച ചോറ് - 250 ഗ്രാം,
• ഉഴുന്ന് പരിപ്പ് - 250 ഗ്രാം

തയ്യാറാക്കുന്ന വിധം

• അരിയും ഉഴുന്നും ആറ് മണിക്കൂറെങ്കിലും വെള്ളത്തിൽ കുതിർത്തു വയ്ക്കാം. 
• മൂന്ന് മണിക്കൂർ കഴിഞ്ഞു ഉഴുന്ന് കുതിർക്കാൻ വെച്ച വെള്ളമെടുത്ത് ഫ്രിഡ്ജിൽ വയ്ക്കാം.
• ഉഴുന്ന് ഒരു കപ്പിന് ഒന്നര കപ്പ് വരെ വെള്ളം ചേർത്ത് നല്ലതു പോലെ അരയ്ക്കുക. ഫ്രിഡ്ജിൽ വച്ച് തണുപ്പിച്ച വെള്ളം ചേർത്തു വേണം അരയ്ക്കാൻ. 
• കുതിർത്ത് വച്ച അരി റവയുടെ പരുവത്തിൽ അരച്ചെടുക്കുക. രണ്ട് കപ്പ് അരിയ്ക്കു മുക്കാൽ കപ്പ് വെളളം മതിയാകും. തീരെ അരഞ്ഞു പോകരുത്. ഇതിലേയ്ക്ക് വേവിച്ച ചോറ് കൂടി ചേർക്കാം. ഇത് അരിയ മൃദുവായി അരഞ്ഞു കിട്ടാൻ സഹായിക്കും. 
• അരി അരച്ചെടുത്തതിലേയ്ക്ക് ഉഴുന്നു മാവ് ചേർത്തിളക്കി യോജിപ്പിക്കാം. 
• തയ്യാറാക്കിയ മാവ് ഒരു രാത്രി അല്ലെങ്കിൽ 8 മണിക്കൂറെങ്കിലു പുളിക്കാൻ മാറ്റി വയ്ക്കാം. 
• പിറ്റേദിവസം മാവിലേയ്ക്ക് ഉപ്പ് ചേർത്തിളക്കി യോജിപ്പിച്ച് ഇഡ്ഡലി തട്ടിൽ ഒഴിച്ച് ആവിയിൽ വേവിച്ചെടുക്കാം. ഇഷ്ടം പോലെ കഴിക്കാം. 

Also Read: മൂന്ന് ചേരുവയിൽ ഒരു ബ്രേക്ക്ഫാസ്റ്റ് ഒരുക്കാം, ഇതാ റെസിപ്പി

Also Read: ഗോതമ്പ് പൊടിയിലേയ്ക്ക് ഇതൊരു സ്പൂൺ ചേർത്തു നോക്കൂ, പഞ്ഞിപോലെ സോഫ്റ്റ് ചപ്പാത്തി ദിവസവും കഴിക്കാം

സോഫ്റ്റ് ഇഡ്ഡലിക്ക് ഇക്കാര്യങ്ങൾ കൂടി ശ്രദ്ധിക്കൂ

• അരച്ചെടുത്ത മാവ് എത്രത്തോളം പുളിപ്പിക്കുന്നുവോ അത്രത്തോളും നല്ലതാണ്. എന്നാൽ കാലാവസ്ഥ അനുസരിച്ച് അതിൽ വ്യത്യാസം വരും. മഴക്കാലത്ത് കുറച്ചധികം നേരം പുളിപ്പിക്കാൻ വയ്ക്കാം. എന്നാൽ കഠിനമായ വെയിലുള്ള വേനൽക്കാലത്ത് മാവ് ഒത്തിരി നേരം പുളിപ്പിക്കാൻ മാറ്റി വയ്ക്കരുത്.
• അരിയും ഉഴുന്നും അരയ്ക്കുന്നതിനൊപ്പം കുറച്ച് റവ കൂടി ചേർത്തു മാവ് തയ്യാറാക്കി നോക്കൂ. ഇഡ്ഡലി സോഫ്റ്റാകാൻ അത് സഹായിക്കും.
• അരിയും ഉഴുന്നു കുതിർത്തെടുക്കുന്നതു പോലെ അവലും വെള്ളത്തിൽ കുതിർത്ത് മാവ് അരയ്ക്കുമ്പോൾ അതിനൊപ്പം ചേർക്കാം. മാവ് നന്നായി അരയുന്നതിനും ഇത് സഹായിക്കും. ഈ​ മാവ് ഉപയോഗിച്ച് സോഫ്റ്റ് ഇഡ്ഡലി തയ്യാറാക്കാം.
• പുളിപ്പിക്കാൻ ഉപയോഗിക്കുന്ന ചേരുവ എത്രത്തോളം നല്ലതാണോ അത്രത്തോളം സോഫ്റ്റും സ്പോഞ്ചിയും ആയിരിക്കും ഇഡ്ഡലി. മാവ് അരയ്ക്കുമ്പോൾ രുചി അനുസരിച്ച് തൈര് ചേർക്കാം. ശേഷം മാവ് പുളിപ്പിക്കാൻ മാറ്റി വയ്ക്കാം. മാവിലേയ്ക്ക് തൈര് ചേർക്കുമ്പോൾ ഫെർമൻ്റേഷൻ പ്രക്രിയ സുഗമമാകുന്നു.

Read More: മയമുള്ള ചപ്പാത്തി വേണോ? 5 മിനിറ്റിൽ ചുട്ടെടുക്കാം കുക്കറിൽ