ചിക്കനോ ബീഫോ മട്ടണോ ആകട്ടെ, മണവും രുചിയും കൂട്ടാൻ ഈ മസാലക്കൂട്ട് ഉപയോഗിക്കൂ

വിശേഷ ദിവസങ്ങളിൽ മാത്രമല്ല ഞായറാഴ്ചകളിൽ വീട്ടിലെല്ലാവരും ഒരുമിച്ചെത്തുമ്പോൾ എന്തെങ്കിലു രുചിതകമായ നോൺവെജ് വിഭവങ്ങൾ തയ്യാറാക്കാറില്ലേ. ചിക്കനോ ബീഫോ ഏതുമാകട്ടെ നന്നായി വേവിച്ചെടുക്കാൻ നമ്മൾ ശ്രദ്ധിക്കാറുണ്ട്. എന്നാൽ അതുകൊണ്ട് മാത്രം കാര്യമില്ല. തയ്യാറാക്കുന്ന വിഭവങ്ങൾ രുചികരമാക്കണം എങ്കിൽ അതിൽ ചേർക്കുന്ന മസാലകളുടെ കൂട്ടും കൃത്യമായിരിക്കണം. അതിൽ ഗരം മസാ വളരെ പ്രധാനമാണ്. നോൺ വെജ് വിഭവങ്ങൾ മണവും രുചിയും നൽകുന്നതിൽ ഈ മസാലയ്ക്ക് സുപ്രധാന പങ്കുണ്ട്. അത് എങ്ങനെ ശരിയായ രീതിയിൽ തയ്യാറാക്കി സൂക്ഷിക്കാം എന്ന് പരിചയപ്പെടാം.

Also Read: ചൂടൻ അപ്പത്തിന് നാടൻ മട്ടൺ സ്റ്റ്യൂ, ഇതാ ഒരു സിംപിൾ റെസിപ്പി

ഗരം മസാല വീട്ടിൽ തന്നെ തയ്യാറാക്കുന്നത് വളരെ എളുപ്പമാണ്, കടയിൽ നിന്ന് വാങ്ങുന്നതിനേക്കാൾ രുചിയും മണവും കൂടുതലായിരിക്കും. താഴെക്കൊടുത്തിരിക്കുന്ന ചേരുവകളും തയ്യാറാക്കുന്ന രീതിയും ഒരു സാധാരണ ഗരം മസാലയ്ക്ക് വേണ്ടിയുള്ളതാണ്. നിങ്ങളുടെ ഇഷ്ടത്തിനനുസരിച്ച് ചേരുവകളുടെ അളവിൽ മാറ്റങ്ങൾ വരുത്താവുന്നതാണ്. ഷാൻ ജിയോ തൻ്റെ യൂട്യൂബ് ചാനലിലൂടെ അതിൻ്റെ ചേരുവകളും തയ്യാറാക്കുന്ന വിധവും പരിചയപ്പെടുത്തി തരുന്നുണ്ട്. 

ചേരുവകൾ

• പെരുംജീരകം- 1/4 കപ്പ്
• ഏലയ്ക്ക- 2 ടേബിൾസ്പൂൺ
• കറുവപ്പട്ട- 2-3 വലിയ കഷ്ണങ്ങൾ 
• കുരുമുളക്- 1 ടേബിൾസ്പൂൺ
• തക്കോലം- 2-3 എണ്ണം
• ജാതിപത്രി- 1-2 ചെറിയ കഷ്ണം
• ജാതിക്ക-1/2 എണ്ണം 

Also Read: ഇപ്പോൾ നിങ്ങളുടെ മുന്നിലിരിക്കുന്നതാണ് സ്വാദിഷ്ടമായ ചിക്കൻ റോസ്റ്റ്, ലാലേട്ടൻ്റെ റെസിപ്പി ട്രൈ ചെയ്യൂ

തയ്യാറാക്കുന്ന വിധം

• അടി കട്ടിയുള്ള ഒരു പാൻ അടുപ്പിൽ വച്ചു ചൂടാക്കാം. തീ കുറച്ചു വച്ച് ആദ്യം കറുവപ്പട്ട, തക്കോലം എന്നിവ പാനിലിട്ട് ചെറിയ തീയിൽ 1-2 മിനിറ്റ് ഇളക്കി കൊടുക്കാം. 
• ശേഷം പെരുംജീരകം, ഏലയ്ക്ക, ഗ്രാമ്പൂ, കുരുമുളക്, ജാതിപത്രി എന്നിവ ചേർക്കാം.
• എല്ലാം ഒരുമിച്ച് ഏകദേശം 5-7 മിനിറ്റ് സമയം ചെറിയ തീയിൽ ഇളക്കിക്കൊണ്ടിരിക്കുക. മസാലകൾ കരിയാതെ ശ്രദ്ധിക്കണം. മസാലകൾ ചൂടാകുമ്പോൾ നല്ലൊരു സുഗന്ധം വരും, അതാണ് പാകം.
• ജാതിക്കയാണ് ഉപയോഗിക്കുന്നതെങ്കിൽ, അവസാന നിമിഷം ചേർത്ത് ചെറുതായി ചൂടാക്കാം.
• നന്നായി ചൂടാക്കിയ ശേഷം അടുപ്പണച്ച് തണുക്കാൻ വയ്ക്കാം. ഒരു പരന്ന പാത്രത്തിലേയ്ക്കു മാറ്റി വയ്ക്കുന്നത് വളരെ വേഗം തണുക്കാൻ സഹായിക്കും. 
• മസാലകൾ പൂർണ്ണമായും തണുത്ത ശേഷം ഒരു മിക്സിയുടെ ജാറിലിട്ട് നല്ല മയത്തിൽ പൊടിച്ചെടുക്കാം. ഒന്നിച്ച് കൂടുതൽ നേരം മിക്സി പ്രവർത്തിപ്പിക്കാതെ, ഇടയ്ക്കിടെ നിർത്തി പൊടിക്കുന്നത് മസാല കരിയാതെയും എണ്ണമയം വരാതെയും സഹായിക്കും.

സൂക്ഷിക്കേണ്ട വിധം

പൊടിച്ച ഗരം മസാലപ്പൊടി പൂർണ്ണമായും തണുത്ത ശേഷം വായു കടക്കാത്ത ഒരു കുപ്പിയിലോ പാത്രത്തിലോ അടച്ചു സൂക്ഷിക്കാം. ഇത് വളരെക്കാലം കേടുകൂടാതെയും മണം നഷ്ടപ്പെടാതെയും ഇരിക്കും.

Also Read: ഒരു സ്പൂൺ എണ്ണയിൽ ചിക്കൻ ഫ്രൈ ചെയ്യാൻ പറ്റുമോ? ഇങ്ങനെ ചെയ്തു നോക്കൂ

ഇക്കാര്യങ്ങൾ ശ്രദ്ധിക്കാം

• മസാലകൾ ഡ്രൈ റോസ്റ്റ് ചെയ്യുമ്പോൾ തീ എപ്പോഴും കുറച്ചു മാത്രം വയ്ക്കാം. അല്ലെങ്കിൽ അവ കരിഞ്ഞു കൈപ്പുള്ള മസാലയായി മാറും.
• മസാലകൾ ചൂടാകുമ്പോൾ ഒരുതരം മണം വരാൻ തുടങ്ങും, നിറം ചെറുതായി മാറും. അതാണ് പാകം.
• ഓരോ സ്ഥലത്തും ഓരോ വീടുകളിലും ഗരം മസാലയുടെ ചേരുവകളിലും അളവുകളിലും വ്യത്യാസങ്ങൾ വരാം. ചിലർ ചെറിയ ജീരകം, ബേ ലീഫ്, എന്നിവയും ചേർക്കാറുണ്ട്. നിങ്ങളുടെ ഇഷ്ടത്തിനനുസരിച്ച് മാറ്റങ്ങൾ വരുത്താം.
• വീട്ടിൽ തയ്യാറാക്കുന്ന ഗരം മസാലയ്ക്ക് കടയിൽ നിന്ന് വാങ്ങുന്നതിനേക്കാൾ കൂടുതൽ ഫ്രഷ്‌നസും മണവും ഉണ്ടാകും. ആവശ്യാനുസരണം കുറച്ച് മാത്രം ഉണ്ടാക്കി സൂക്ഷിക്കുന്നത് മസാലയുടെ ഗുണം നിലനിർത്താൻ സഹായിക്കും.

Read More: വെണ്ണയില്ലെങ്കിലും ബട്ടർ ചിക്കൻ ഇങ്ങനെയും തയ്യാറാക്കാം