Love Under Construction OTT: ലവ് അണ്ടർ കൺസ്ട്രക്ഷൻ ഒടിടിയിലേക്ക്, എപ്പോൾ എത്തും?

Love Under Construction OTT: വെബ് സീരിസ് ലോകത്തും സജീവ  സാന്നിധ്യമാണ് നടൻ അജു വർഗീസ്.  അജു വർഗീസ് അഭിനയിക്കുന്ന നാലാമത്തെ വെബ് സീരീസും റിലീസിനൊരുങ്ങുകയാണ്. കരിക്കിന്റെ തേരാപാര ആയിരുന്നു അജു അഭിനയിച്ച ആദ്യ വെബ് സീരിസ്. പിന്നീട് ഹോട്ട്സ്റ്റാറിന്റെ  കേരള ക്രൈം ഫയൽസ്, പേരില്ലൂർ പ്രീമിയർ ലീഗ് എന്നീ വെബ് സീരിസുകളിലും അജു വേഷമിട്ടു. 

ഇപ്പോഴിതാ, ഡിസ്നി പ്ലസ് ഹോട്ട്സ്റ്റാറിന്റെ ലവ് അണ്ടർ കൺസ്ട്രക്ഷൻ ആണ് റിലീസിനൊരുങ്ങുന്നത്. ഈ വെബ് സീരീസിലും ഒരു പ്രധാന റോളിൽ അജു വർഗീസ് അഭിനയിക്കുന്നുണ്ട്.  

നീരജ് മാധവിനെ സംബന്ധിച്ചും വെബ് സീരിസുകളുടെ ലോകം പുതിയ അനുഭവമല്ല. നീരജിന്റെ കരിയറിലെയും നാലാമത്തെ വെബ് സീരീസ് ആണിത്. ആമസോൺ പ്രൈമിന്റെ ദി ഫാമിലിമാൻ സീസൺ 1, നെറ്റ്ഫ്ളിക്സിന്റെ ഫീൽസ് ലൈക്ക് ഇറാക്ക്, ഡിസ്നി പ്ലസ് ഹോട്ട്സ്റ്റാറിന്റെ ഷോ ടൈം എന്നിവയാണ് ഇതിനു മുൻപു റിലീസിനെത്തിയ നീരജിന്റെ വെബ് സീരീസുകൾ. മൂന്നും ഹിന്ദി വെബ് സീരീസുകൾ ആയിരുന്നു. ഇതാദ്യമായാണ് ഒരു മലയാളം വെബ് സീരീസിൽ നീരജ് അഭിനയിക്കുന്നത്. 

ഡിസ്നി പ്ലസ് ഹോട്ട്സ്റ്റാറിന്റെ ആറാമത്തെ മലയാളം സീരീസാണ് ലവ് അണ്ടർ കൺസ്ട്രക്ഷൻ. പ്രണയവും കോമഡിയും കോർത്തിണക്കിയ സീരീസ് ആണിതെന്നാണ് ട്രെയിലർ നൽകുന്ന സൂചന. അജു വർഗീസിനും നീരജ് മാധവിനുമൊപ്പം ഗൗരി ജി. കിഷനും ഈ സീരീസിൽ പ്രധാന കഥാപാത്രമായി എത്തുന്നു. 

 ഒരു ചെറുപ്പക്കാരന്റെ ജീവിതത്തിലെ സ്വപ്നമായ വീട്, അതിനൊപ്പം ജീവിതത്തിൽ എത്തിയ പ്രണയം- അതു രണ്ടും ഒരുമിച്ച് മുന്നോട്ട് കൊണ്ടു പോകാനുള്ള ശ്രമത്തിനിടെ നേരിടുന്ന സമ്മർദ്ദങ്ങളാണ് ഈ കോമഡി വെബ് സീരീസിന്റെ പ്രമേയം. നീരജ് മാധവ് അവതരിപ്പിക്കുന്ന കഥാപാത്രം ഒരു വീട് വെയ്ക്കാന്‍ ശ്രമിക്കുന്നതും, അയാളുടെ പ്രണയത്തിനെയും ചുറ്റിപറ്റിയാണ് കഥ മുന്നേറുന്നത്. 

ആനന്ദ് മന്മഥന്‍, കിരണ്‍ പീതാംബരന്‍, സഹീര്‍ മുഹമ്മദ്, ഗംഗ മീര, ആന്‍ സലിം, തങ്കം മോഹന്‍, മഞ്ജുശ്രീ നായര്‍ എന്നിവരാണ് സീരീസിലെ മറ്റു പ്രധാന അഭിനേതാക്കൾ. 

വിഷ്ണു ജി. രാഘവ് രചനയും സംവിധാനവും ചെയ്തിരിക്കുന്ന  ഈ സീരീസിന്റെ സംഗീതസംവിധാനം ഗോപി സുന്ദറാണ്. ഛായാഗ്രഹണം അജയ് ഡേവിഡ് കാച്ചപ്പിള്ളി നിര്‍വ്വഹിക്കുന്നു. രജപുത്രയുടെ ബാനറിൽ എം. രഞ്ജിത്ത് ആണ് ഈ റോം കോം സീരീസ് നിർമിച്ചിരിക്കുന്നത്. മലയാളം, ഹിന്ദി, തമിഴ്, തെലുങ്ക്, കന്നഡ, ബംഗാളി, മറാത്തി ഭാഷകളിലായാണ് സീരീസ് പുറത്തിറങ്ങുക.

ഡിസ്നി പ്ലസ് ഹോട്ട്സ്റ്റാറിൽ ഫെബ്രുവരി 28 മുതൽ 'ലവ് അണ്ടർ കൺസ്ട്രക്ഷൻ' സ്ട്രീമിംഗ് ആരംഭിക്കും. 

Read More

• രാഷ്ട്രീയം ശരിയല്ല, ഉണ്ണി മുകുന്ദനെ നായകനാക്കി ആരേലും സിനിമ ചെയ്യുമോ? മറുപടിയുമായി നിർമ്മാതാവിന്റെ കുറിപ്പ്
• Thanupp OTT: തണുപ്പ് ഒടിടിയിലേക്ക്
• പുഷ്പ താരം ദാലി ധനഞ്ജയ വിവാഹിതനായി
• നടൻ ജയൻ ചേർത്തലക്കെതിരെ മാനനഷ്ടക്കേസ് നൽകാൻ നിർമാതാക്കളുടെ സംഘടന
• ഡോക്ടറായി ഉണ്ണി മുകുന്ദൻ; കുടുംബ പ്രേക്ഷകരെ കൈയ്യിലെടുക്കാൻ 'ഗെറ്റ് സെറ്റ് ബേബി,' ട്രെയിലർ എത്തി
• സൂപ്പർ ഹീറോയായി നിവിൻ പോളി; 'മൾട്ടിവേഴ്‌സ് മന്മഥൻ' ഫസ്റ്റ് ലുക്ക് പോസ്റ്റർ പുറത്ത്