'പേരെന്താണെന്ന് കുഞ്ഞു ഹോപ്പ്, മമ്മൂട്ടിയെന്ന് പുഞ്ചിരിച്ചുകൊണ്ട് മറുപടി'; മമ്മൂക്കയ്ക്കൊപ്പമുള്ള ചിത്രങ്ങളുമായി ബേസിൽ

ഒരിടവേളയ്ക്ക് ശേഷം വീണ്ടും സിനിമയിൽ സജീവമായിരിക്കുകയാണ് മലയാളത്തിന്റെ മഹാനടൻ മമ്മൂട്ടി. മഹേഷ് നാരായണൻ സംവിധാനം ചെയ്യുന്ന പുതിയ സിനിമയായ 'പേട്രിയറ്റി'ന്റെ ഷൂട്ടിങ്ങിനായി മമ്മൂട്ടി കഴിഞ്ഞ ദിവസം ലൊക്കേഷനിൽ എത്തിയിരുന്നു. മമ്മൂട്ടിയുടെ മടങ്ങിവരവ് സോഷ്യൽ മീഡിയയിൽ അടക്കം ആഘോഷമാക്കുകയാണ് ആരാധകർ.

ഇപ്പോഴിതാ, മമ്മൂട്ടിക്കൊപ്പമുള്ള ചിത്രങ്ങൾ സോഷ്യൽ മീഡിയയിലൂടെ പങ്കുവച്ചിരിക്കുകയാണ് നടൻ ബേസിൽ ജോസഫ്. കുടുംബത്തോടൊപ്പം മമ്മൂട്ടിക്കൊപ്പം ചിലവഴിച്ച സന്തോഷ നിമിഷങ്ങളാണ് ബേസിൽ ആരാധകരുമായി പങ്കുവച്ചത്. മമ്മൂട്ടിയുമായുള്ള മകൾ ഹോപ്പിന്റെ നിഷ്കമായ സംഭാഷണങ്ങളെക്കുറിച്ചും ബേസിൽ പോസ്റ്റിൽ കുറിച്ചു.

"ഇതിഹാസത്തോടൊപ്പം ഒരു സായാഹ്നം ചിലവഴിക്കാൻ കിട്ടിയ അതുല്യമായ ഭാഗ്യം. ഞങ്ങളുടെ കുടുംബം എപ്പോഴും ഹൃദയത്തിൽ സൂക്ഷിക്കുന്ന ഒരു നിമിഷം. എന്റെ മകൾ അദ്ദേഹത്തെ നോക്കി നിഷ്കളങ്കമായി 'നിങ്ങളുടെ പേര് എന്താണെന്ന്' ചോദിച്ചു. മമ്മൂട്ടിയെന്ന് ഒരു ചെറുചിരിയോടെ അദ്ദേഹം മറുപടി പറഞ്ഞു. ജീവിതകാലം മുഴുവൻ മറക്കാനാകാത്ത ഒരു മധുരമുള്ള ഓർമ്മയായി അത് ഹൃദയത്തിൽ പതിഞ്ഞു.

Also Read: 'അവർ വീണ്ടും ചേർന്നാൽ എന്താവും എന്ന് പറയണ്ടല്ലോ;' മമ്മൂട്ടി - മോഹൻലാൽ ചിത്രം പേട്രിയറ്റ് ടീസർ

മമ്മൂക്ക സ്വന്തം ക്യാമറയിൽ തന്നെയാണ് ഫോട്ടോകൾ എടുത്തത്. ഹോപ്പിന്റെയും മമ്മൂക്കയുടെയും ഒരുപാട് സെൽഫികൾ എടുത്തു. ഒപ്പമുണ്ടായിരുന്നു കുറച്ചു സമയം, ലോകത്തിന് അദ്ദേഹം ആരെന്ന കാര്യം പോലും മറന്നു. ഒരുപാട് അടുത്ത സുഹൃത്തിനൊപ്പം ഇരിക്കുകയാണെന്ന തോന്നലായിരുന്നു. മമ്മൂക്ക, നിങ്ങളുടെ അതുല്യമായ സൗമ്യതയ്ക്കും സ്നേഹത്തിനും, ഞങ്ങൾക്ക് എന്നും മനസ്സിൽ സൂക്ഷിക്കാവുന്ന ഒരു സായാഹ്നം സമ്മാനിച്ചതിനും ഹൃദയത്തിൽനിന്നും നന്ദി,' ബേസിൽ കുറിച്ചു.

ഏഴു മാസത്തെ വിശ്രമത്തിനു ശേഷമാണ് മമ്മൂട്ടി വീണ്ടും ക്യാമറയ്ക്കു മുന്നിൽ എത്തുന്നത്. 45 ദിവസം പേട്രിയറ്റിൽ അഭിനയിച്ചു കഴിഞ്ഞായാരുന്നു മമ്മൂട്ടി ചികിത്സയ്ക്കായി ചെന്നൈയിലേക്ക് പോയത്. 45 ദിവസത്തെ ഷെഡ്യൂളാണ് സിനിമയ്ക്ക് ഇനിയുള്ളത്. ഒക്ടോബർ ഒന്നിനാണ് ചിത്രീകരണം വീണ്ടും ആരംഭിച്ചത്.

Also Read: മമ്മൂട്ടിയുടെയും മോഹൻലാലിന്റെയും നായിക, 7790 കോടിയുടെ ആസ്തി; ആളെ മനസ്സിലായോ?

മമ്മൂട്ടിയും മോഹൻലാലും വർഷങ്ങൾക്കു ശേഷം ഒന്നിച്ചെത്തുന്ന ബിഗ് ബജറ്റ് ചിത്രമാണ് പേട്രിയറ്റ്. 18 വർഷങ്ങൾക്ക് ശേഷമാണ് ഈ സിനിമയിലൂടെ വീണ്ടും താരരാജാക്കൻമാർ ഒരുമിച്ചെത്തുന്നത്. ഇതിന് ട്വൻറി20 എന്ന സിനിമയിലാണ് ഇരുവരും ഒന്നിച്ചെത്തിയത്. ശ്രീലങ്കയാണ് സിനിമയുടെ പ്രധാന ലൊക്കേഷൻ. ശ്രീലങ്കയ്ക്ക് പുറമെ അബുദാബി, ലണ്ടൻ, തായ്ലൻഡ്, അസർബൈജാൻ, ഹൈദരാബാദ്, ദില്ലി, വിശാഖപട്ടണം എന്നിവിടങ്ങളും സിനിമയുടെ പ്രധാന ലൊക്കേഷനുകളാണ്.

സംവിധായകൻ മഹേഷ് നാരായണൻ തന്നെയാണ് സിനിമയുടെ കഥയും തിരക്കഥയും ഒരുക്കിയിരിക്കുന്നത്. ആൻറോ ജോസഫ് നിർമ്മാണവും നിർവ്വഹിക്കുന്നു.ബോളിവുഡിലെ പ്രശസ്ത ഛായാഗ്രാഹകൻ മനുഷ് നന്ദനാണ് ഛായാഗ്രഹണം. കോ പ്രൊഡ്യൂസർമാർ - സി.ആർ സലിം, സുഭാഷ് ജോർജ് മാനുവൽ എന്നിവരും നിർവ്വഹിക്കുന്നു. ഫഹദ് ഫാസിൽ, കുഞ്ചാക്കോ ബോബൻ, നയൻതാര, രേവതി തുടങ്ങി വൻ താരനിരയാണ് ചിത്രത്തിൽ അണിനിരക്കുന്നത്.

Read More: നീയെന്നെ വിട്ട് നിന്റെ വഴിക്ക് പോകുന്നുവെന്ന് ഞാൻ അംഗീകരിച്ചു തുടങ്ങേണ്ടിയിരിക്കുന്നു: അർജുൻ കപൂർ