പ്ലേ ലിസ്റ്റ് ഭരിക്കാൻ 'കപ്പിൾ സോങ്' എത്തി; പുഷ്പ: ദി റൂൾ ലിറിക്കൽ വീഡിയോ: Pushpa 2: The Rule

അല്ലു അർജ്ജുൻ നായകനാകുന്ന ഏറ്റവും പുതിയ ചിത്രമാണ് 'പുഷ്പ 2: ദി റൂൾ.' റിലീസടുക്കെ ചിത്രത്തിലെ മറ്റൊരു ഗാനം പുറത്തിറക്കിയിരിക്കുകയാണ് നിർമ്മാതാക്കൾ. ചിത്രത്തിന്റെ പിന്നാമ്പുറ കാഴ്ചകൾക്കൊപ്പമാണ് ഗാനം പുറത്തിറക്കിയിരിക്കുന്നത്. "ദ കപ്പിൾ സോങ്" എന്ന് പേരിട്ടിരിക്കുന്ന ഗാനമാണ് റിലീസു ചെയ്തിരിക്കുന്നത്. 

ദേവി ശ്രീ പ്രസാദ് ഈണം നൽകിയ ഗാനം, ചന്ദ്രബോസാണ് എഴുതിയിരിക്കുന്നത്. സൂസെകി (തെലുങ്ക്), അംഗാരോൺ (ഹിന്ദി), സൂദന (തമിഴ്), നൊഡോക (കന്നഡ), കണ്ടാലോ (മലയാളം), ആഗുണർ (ബംഗാളി) എന്നിങ്ങനെ ആറ് ഭാഷകളിലും ഗാനം പുറത്തിറക്കിയിട്ടുണ്ട്. എല്ലാ ഭാഷകളിലും ശ്രേയ ഘോഷാലാണ് ഗാനം ആലപിച്ചിരിക്കുന്നത്.

സുകുമാർ സംവിധാനം ചെയ്ത പുഷ്പ 2: ദി റൂളിൽ അല്ലുവിനെ കൂടാതെ, രശ്മിക മന്ദന്ന, ഫഹദ് ഫാസിൽ, ജഗദീഷ് പ്രതാപ് ഭണ്ഡാരി, സുനിൽ എന്നിവരും അണിനിരക്കുന്നുണ്ട്. പുഷ്പയുടെ ആദ്യഭാഗത്തിലെ അഭിനയത്തിന് മികച്ച നടനുള്ള ദേശീയ അവാർഡ് അർജുൻ നേടിയിരുന്നു എന്നതും പുഷ്പ 2 വിൻ്റെ വരവിന് ആവേശം പകരുന്നുണ്ട്. 

സുകുമാർ റൈറ്റിംഗ്‌സിനൊപ്പം മൈത്രി മൂവി മേക്കേഴ്‌സ് നിർമ്മിച്ച പുഷ്പ 2: ദി റൂൾ എക്കാലത്തെയും ചെലവേറിയ ഇന്ത്യൻ സിനിമകളിൽ ഒന്നാണെന്ന് പറയപ്പെടുന്നു. ദേവി ശ്രീ പ്രസാദിൻ്റെ സംഗീതവും, മിറോസ്ലാവ് കുബ ബ്രോസെക്കിൻ്റെ ഛായാഗ്രഹണവും, കാർത്തിക ശ്രീനിവാസിൻ്റെയും റൂബൻ്റെയും എഡിറ്റിംഗും ചിത്രത്തെ കുറിച്ചുള്ള പ്രതീക്ഷകൾ വർധിപ്പിക്കുന്നു. ചിത്രം 2024 ഓഗസ്റ്റ് 15ന് സ്വാതന്ത്ര്യ ദിനത്തോട് അനുബന്ധിച്ച് റിലീസ് ചെയ്യും.