സിജോയെ കയ്യേറ്റം ചെയ്തു; റോക്കി ഷോയിൽ നിന്നും പുറത്തേക്ക് Bigg Boss Malayalam 6

Bigg Boss malayalam 6: ബിഗ് ബോസ് വീടിനകത്ത് മത്സരാർത്ഥികൾ രണ്ടാഴ്ച പൂർത്തിയാക്കിയിരിക്കുകയാണ്. 19 മത്സരാർത്ഥികളുമായി ആരംഭിച്ച ഷോയിൽ നിന്നും മൂന്നുപേർ ഇതിനകം തന്നെ ഔട്ടായി കഴിഞ്ഞു. രതീഷ് കുമാർ, നിഷാന, സുരേഷ് മേനോൻ എന്നിവരാണ് ഇതുവരെ പുറത്തായ മത്സരാർത്ഥികൾ. 

വാരാന്ത്യ എപ്പിസോഡിനു തൊട്ടുപിന്നാലെ, വീടിനകത്ത് ചില അപ്രതീക്ഷിത സംഭവങ്ങൾ ഉണ്ടായിരിക്കുകയാണ്. സഹ മത്സരാർത്ഥിയായ സിജോയെ കയ്യേറ്റം ചെയ്യുന്ന അസി റോക്കിയെ ആണ് പുതിയ പ്രമോയിൽ കാണാനാവുക. ശാരീരികമായി ഉപദ്രവിക്കുക എന്നത് ബിഗ് ബോസ് നിയമങ്ങളുടെ ലംഘനമാണ്. അത്തരം സാഹചര്യങ്ങളിൽ നിയമം ലംഘിച്ച വ്യക്തി ഷോ വിട്ട് പുറത്തുപോവേണ്ടി വരും, മാത്രമല്ല നിയമപ്രശ്നങ്ങളും നേരിടും. സിജോയെ കയ്യേറ്റം ചെയ്ത റോക്കിയെ ഷോയിൽ നിന്നും പുറത്താക്കി എന്ന വാർത്തയാണ് ഇപ്പോൾ പ്രചരിക്കുന്നത്. 

ഈ സീസണിലെ മികച്ച മത്സരാർത്ഥികളിൽ ഒരാളായിരുന്നു അസി റോക്കി. എന്നാൽ ദേഷ്യം നിയന്ത്രിക്കാനാവാത്ത റോക്കിയുടെ പെരുമാറ്റം പലപ്പോഴും വീടിനകത്ത് വലിയ ചർച്ചാവിഷയമായിരുന്നു. കഴിഞ്ഞ ദിവസം ദേഷ്യം നിയന്ത്രിക്കാനാവാതെ ഹൗസിലെ പ്രോപ്പർട്ടി നശിപ്പിച്ച റോക്കിയെ ശിക്ഷാനടപടിയെന്നവണ്ണം നേരിട്ട് നോമിനേറ്റ് ചെയ്യപ്പെട്ടിരുന്നു. 

പുറത്തുവന്ന പുതിയ പ്രമോയിൽ റോക്കിയും സിജോയും ഹാളിൽ വെച്ച് വാക്കേറ്റത്തിൽ ഏർപ്പെടുന്നതും പരസ്പരം വെല്ലുവിളിക്കുന്നതുമാണ് കാണാനാവുക. റോക്കി സിജോയോട് ധൈര്യമുണ്ടെങ്കിൽ ദേഹത്ത് കൈ വെച്ച് നോക്കുവെന്ന് വെല്ലുവിളിക്കുന്നുണ്ട്. കൈവെച്ചാൽ എന്ത് ചെയ്യുമെന്ന് ചോദിച്ച് സിജോ റോക്കിയുടെ താടിയിൽ പിടിക്കുന്നതും കാണാം. പിന്നാലെ സിജോയുടെ കവിളിൽ തല്ലുകയാണ് റോക്കി. പെട്ടെന്നുണ്ടായ സംഭവവികാസങ്ങളിൽ അന്താളിച്ചു നിൽക്കുകയാണ് സഹമത്സരാർത്ഥികൾ. അർജുൻ ഓടി വന്ന് റോക്കിയെ പിടിച്ചു മാറ്റുന്നതും മറ്റുള്ള മത്സരാർത്ഥികൾ ഓടി സിജോയ്ക്ക് അരികിലേക്ക് വരുന്നതും കാണാം. 

View this post on Instagram

A post shared by Asianet (@asianet)

ഒന്നാം സീസൺ മുതൽ തന്നെ ബിഗ് ബോസ് ഷോയിലേക്ക് എത്താനായി കഠിനമായി പരിശ്രമിച്ച ആളാണ് താനെന്ന് റോക്കി തന്നെ തുറന്നു പറഞ്ഞിരുന്നു. എന്നാൽ ദേഷ്യം നിയന്ത്രിക്കാനാവാത്ത ഈ സ്വഭാവത്താൽ റോക്കി ഷോയിൽ നിന്നും പുറത്തേക്ക് പോവുന്നത് ആരാധകരെയും നിരാശരാക്കിയിരിക്കുകയാണ്. 

മുൻപും സഹമത്സരാർത്ഥികളെ ശാരീരികമായി ഉപദ്രവിച്ചതിന്റെ പേരിൽ മത്സരാർത്ഥികളെ ബിഗ് ബോസിൽ നിന്നും പുറത്താക്കിയിട്ടുണ്ട്. രേഷ്മയുടെ കണ്ണിൽ മുളകു തേച്ചതിന്റെ പേരിൽ രജിത്ത് കുമാറും റിയാസ് സലിമിനെ തള്ളിയതിന്റെ പേരിൽ റോബിൻ രാധാകൃഷ്ണനുമൊക്കെ ഷോ വിട്ട് ഇറങ്ങേണ്ടി വന്നിട്ടുണ്ട്. 

Read More Stories Here

• ജാസ്മിൻ നല്ല ഗെയിമാണോ കളിച്ചത്?; പൊട്ടിത്തെറിച്ച് മോഹൻലാൽ
• പ്രെഷർ ഉണ്ടെങ്കിൽ വീട്ടിലിരിക്കണം; രതീഷിനോട് പൊട്ടിത്തെറിച്ച് ലാലേട്ടൻ
• അർജുൻ അർഹതപ്പെടാത്ത ക്യാപ്റ്റൻസിയുമായാണ് നിൽക്കുന്നത്: ഫിറോസ് ഖാൻ
• ആദ്യം ചായ ഉണ്ടാക്കാൻ പഠിക്ക്, എന്നിട്ട് ഇണ്ടാക്ക് നിലയും വിലയും: ട്രോൾമഴയിൽ നനഞ്ഞ് ബിഗ് ബോസ്