'പോളിംഗ് റെക്കോർഡ് ശതമാനത്തിലേക്കെത്തിക്കുക'; യുവ വോട്ടർമാരോടും സ്ത്രീകളോടും പ്രധാനമന്ത്രിയുടെ ആഹ്വാനം

ഡൽഹി: എട്ട് സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും 57 മണ്ഡലങ്ങളിലെ വോട്ടർമാർ ഇന്ന് ജനവിധിയെഴുതുമ്പോൾ പോളിംഗ് ശതമാനം റെക്കോർഡിലേക്കെത്തിക്കണമെന്ന് ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. 
അവസാന ഘട്ട തിരഞ്ഞെടുപ്പ് നടക്കുന്ന മണ്ഡലങ്ങളിലെ യുവ വോട്ടർമാരേയും സ്ത്രീകളേയും അഭിസംബോധന ചെയ്തുകൊണ്ടാണ് എല്ലാവരും വോട്ടെടുപ്പിൽ പങ്കാളികളാകാനുള്ള പ്രധാനമന്ത്രിയുടെ സന്ദേശം. കന്യാകുമാരിയിൽ ധ്യാനത്തിലുള്ള നരേന്ദ്ര മോദി തന്റെ എക്സിലൂടെയാണ് സന്ദേശം പങ്കുവെച്ചത്. 

"യുവാക്കളും സ്ത്രീകളും തങ്ങളുടെ വോട്ടവകാശം റെക്കോർഡ് സംഖ്യയിൽ വിനിയോഗിക്കുമെന്ന് ഞാൻ പ്രതീക്ഷിക്കുന്നു. ഒരുമിച്ച്, നമുക്ക് നമ്മുടെ ജനാധിപത്യത്തെ കൂടുതൽ ഊർജസ്വലവും പങ്കാളിത്തമുള്ളതുമാക്കാം, ”പ്രധാനമന്ത്രി രാവിലെ പങ്കുവെച്ച എക്‌സിലെ കുറിപ്പിൽ പറഞ്ഞു.

Today is the final phase of the 2024 Lok Sabha elections. As 57 seats across 8 states and UTs go to the polls, calling upon the voters to turnout in large numbers and vote. I hope young and women voters exercise their franchise in record numbers. Together, let’s make our…

— Narendra Modi (@narendramodi) June 1, 2024

ലോക്‌സഭാ തെരഞ്ഞെടുപ്പിന്റെ ഏഴാമത്തെയും അവസാനത്തെയും ഘട്ട വോട്ടെടുപ്പാണ്ആരംഭിച്ചിരിക്കുന്നത്. കഴിഞ്ഞ രണ്ട് തെരഞ്ഞെടുപ്പുകളിലും പ്രധാനമന്ത്രി നരേന്ദ്ര മോദി റെക്കോർഡ് ഭൂരിപക്ഷത്തിൽ വിജയിച്ച വാരാണസി ഉൾപ്പെടെ നിരവധി വിഐപി മണ്ഡലങ്ങളാണ് ഈ ഘട്ടത്തിൽ വിധിയെഴുതുന്നത്. 904 സ്ഥാനാർത്ഥികളാണ് അവസാന ഘട്ടത്തിൽ മത്സരരംഗത്തുള്ളത്. ബിഎസ്പിയാണ് ഈ ഘട്ടത്തിൽ ഏറ്റവും കൂടുതൽ സ്ഥാനാർത്ഥികളെ നിർത്തിയിരിക്കുന്നത്. 56 പേർ ബിഎസ്പി ടിക്കറ്റിൽ മത്സരിക്കുമ്പോൾ, ബിജെപി 51, കോൺഗ്രസ് 31 എന്നിങ്ങനെയാണ് കണക്കുകൾ.

ഏഴാം ഘട്ടത്തിൽ വിധിയെഴുതുന്ന പ്രധാന മണ്ഡലങ്ങൾ

*ടിഎംസി ജനറൽ സെക്രട്ടറിയും സിറ്റിംഗ് എംപിയുമായ അഭിഷേക് ബാനർജിയുടെ സീറ്റായ ഡയമണ്ട് ഹാർബർ

*മുൻ കേന്ദ്രമന്ത്രിയും എസ്എഡി എംപിയുമായ ഹർസിമ്രത് കൗർ ബാദൽ പ്രതിനിധീകരിക്കുന്ന ബതിന്ഡ

*മുൻ കേന്ദ്രമന്ത്രിയും ബിജെപി എംപിയുമായ രവിശങ്കർ പ്രസാദിന്റെ മണ്ഡലമായ പട്‌ന സാഹിബ്

*ബിജെപി ടിക്കറ്റിൽ മത്സരിക്കുന്ന നടി കങ്കണ റണൗട്ടിനെതിരെ ഹിമാചൽ പ്രദേശ് മന്ത്രി വിക്രമാദിത്യ സിംഗ് മത്സരിക്കുന്ന മാണ്ഡി

ലോക്‌സഭാ തിരഞ്ഞെടുപ്പിന്റെ അവസാന ആറ് ഘട്ടങ്ങളിലെ പോളിങ് ശതമാനം

*ഒന്നാം ഘട്ടം- 66.14 ശതമാനം 
*രണ്ടാം ഘട്ടം- 66.71 ശതമാനം
*മൂന്നാം ഘട്ടം- 65.68 ശതമാനം
*നാലാം ഘട്ടം- 69.16 ശതമാനം  
*അഞ്ചാം ഘട്ടം-62.20 ശതമാനം
*ആറാം ഘട്ടം-63.37 ശതമാനം

Read More

• ബലാത്സംഗ കേസിൽ പ്രജ്വൽ രേവണ്ണ അറസ്റ്റിൽ; ചോദ്യം ചെയ്ത് പ്രത്യേകാന്വേഷണ സംഘം
• അച്ഛനെയും സഹോദരനെയും കൊന്ന് ഫ്രിഡ്ജിൽ സൂക്ഷിച്ച 15കാരി അറസ്റ്റിൽ
• പോർഷെ അപകടം: കൗമാരക്കാരന് പകരം രക്തസാമ്പിൾ നൽകിയത് അമ്മ
• സ്റ്റാർട്ടപ്പിൽ ആകാശം മുട്ടുന്ന നേട്ടവുമായി അഗ്നികുൽ; ആദ്യത്തെ ത്രീഡി പ്രിന്റഡ് റോക്കറ്റ് വിക്ഷേപണം വിജയകരം
• മോദിയെ മഹാവിഷ്ണുവിന്റെ അവതാരമാക്കാൻ ശ്രമിക്കുന്നു; ബിജെപിക്കെതിരെ മല്ലികാർജ്ജുൻ ഖാർഗെ