Iran-Israel Conflict: ഇറാനിലെ പുതിയ സൈനിക മേധാവിയെ വധിച്ചെന്ന് ഇസ്രായേൽ; ചുമതല ഏറ്റെടുത്തത് കഴിഞ്ഞ 13ന്

Iran-Israel Conflict: ടെൽ അവീവ്: ഇസ്രായേൽ- ഇറാൻ സംഘർഷം രൂക്ഷം. ഇറാന്റെ പുതിയ സൈനിക മേധാവി മേജർ ജനറൽ അലി ശദ്മാനിയെ വധിച്ചെന്ന് ഇസ്രായേൽ സൈന്യം അവകാശപ്പെട്ടു. ഇറാന്റെ സൈനിക ആസ്ഥാനമായ ഖത്തം അൽ അൻബിയാ സെൻട്രലിൽ വെച്ചാണ് ഇദ്ദേഹത്തെ വധിച്ചതെന്ന് സൈന്യം അവകാശപ്പെടുന്നു.

Also Read:ടെഹ്‌റാനിൽ നിന്ന് ഇന്ത്യൻ വിദ്യാർത്ഥികളെ ഒഴിപ്പിച്ചു; ഇന്ത്യക്കാരോട് സുരക്ഷിത സ്ഥലങ്ങളിലേക്ക് മാറാൻ നിർദേശം

കഴിഞ്ഞയാഴ്ച ഇസ്രയേൽ ഇറാനിൽ നടത്തിയ ആദ്യത്തെ ആക്രമണത്തിൽ കൊല്ലപ്പെട്ട മേജർ ജനറൽ ഗൊലാം അലി റാഷിദിന്റെ പിൻഗാമിയായി ചുമതലയേറ്റതായിരുന്നു അലി ശദ്മാനി.

ഇറാൻ സൈന്യത്തിന്റെ ഏകോപനവും എമർജൻസി കമാൻഡ് സെന്ററുമായി പ്രവർത്തിക്കുന്ന ആസ്ഥാനമാണ് ഖത്തം അൽ അൻബിയാ ഹെഡ്ക്വാർട്ടേഴ്‌സ്. ഇവിടെ സൈനിക മേധാവിയായി ചുമതലയേറ്റ മേജർ ജനറൽ അലി ശദ്മാനിയെ ദിവസങ്ങൾക്കകം തന്നെ വധിച്ചുവെന്നാണ് ഇസ്രയേൽ സൈന്യത്തിന്റെ അവകാശവാദം. വ്യോമാക്രമണത്തിൽ അലി ശദ്മാനിയെ കൊല്ലപ്പെടുത്തുകയായിരുന്നു എന്നാണ് ഇസ്രയേൽ അവകാശപ്പെടുന്നത്.

Also Read:ടെഹ്‌റാനിൽനിന്ന് എല്ലാവരും ഉടൻ ഒഴിയണമെന്ന് ട്രംപ്, ജി 7 ഉച്ചകോടി പൂർത്തിയാക്കാതെ മടങ്ങി

ഇക്കഴിഞ്ഞ പതിമൂന്നാം തീയ്യതിയാണ് അലി ശദ്മാനിയെ ഖത്തം അൽ അൻബിയാ സെൻട്രൽ ഹെഡ്ക്വാർട്ടേഴ്‌സ് കമാൻഡറായി നിയോഗിച്ചുകൊണ്ട് ഇറാൻ പരമോന്നത നേതാവ് ആയത്തുള്ള അലി ഖമേനി ഉത്തരവിറക്കിയത്. മികച്ച സേവനവും അനുഭവ പരിചയവും കണക്കിലെടുത്ത് അലി ശദ്മാനിക്ക് മേജർ ജനറൽ പദവി നൽകുന്നുവെന്നും സൈനിക മേധാവി സ്ഥാനത്ത് നിയോഗിക്കുവെന്നും ഖമേനി ട്വീറ്റ് ചെയ്തിരുന്നു.

Also Read:ഏതു നിമിഷവും ആക്രമണം; ടെഹ്റാനിൽനിന്ന് ജനങ്ങൾ ഒഴിഞ്ഞുപോകണമെന്ന് ഇസ്രായേൽ

അതേസമയം, ഇറാൻ-ഇസ്രായേൽ സംഘർഷം രൂക്ഷമാകുന്ന സാഹചര്യത്തിൽ ഇന്ത്യൻ വിദ്യാർത്ഥികളെ സുരക്ഷിതമായി ടെഹ്റാനിൽ നിന്ന് മാറ്റിപ്പാർപ്പിച്ചതായി ഇറാനിലെ ഇന്ത്യൻ എംബസി. എല്ലാ ഇന്ത്യക്കാരും പബ്ലിക് ഇൻഫർമേഷൻ ഓഫിസർമാരും സുരക്ഷിതമായ സ്ഥലങ്ങളിലേക്ക് മാറണമെന്നും നിർദേശം നൽകിയിട്ടുണ്ട്. ടെഹ്റാനിൽ നിന്ന് പോയ ചില ഇന്ത്യക്കാരെ അർമേനിയ അതിർത്തി വഴി സുരക്ഷിതമായ സ്ഥലങ്ങളിലേക്ക് എത്തിച്ചതായും എംബസി അറിയിച്ചു.

ടെഹ്റാനിലെ മുഴുവൻ ജനങ്ങളെയും ഉടനടി ഒഴിപ്പിക്കാൻ യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയതിന് തൊട്ടുപിന്നാലെയാണ് ഇന്ത്യൻ എംബസി അധികൃതരുടെ പുതിയ നിർദേശം. ഇന്ത്യക്കാർ എല്ലാവരും തലസ്ഥാന നഗരത്തിന് പുറത്ത് സുരക്ഷിത സ്ഥലങ്ങളിലേക്ക് ഉടൻ മാറണമെന്നാണ് നിർദേശം. ടെഹ്റാനിലെ ഇന്ത്യക്കാർ ഉടൻ തന്നെ എംബസിയുമായി ബന്ധപ്പെടണമെന്നും അവരുടെ സ്ഥലവും ബന്ധപ്പെടാനുള്ള നമ്പറുകളും നൽകണമെന്നും നിർദേശം നൽകിയിട്ടുണ്ട്. 

Read More

ട്രംപിനെ വധിക്കാൻ ഇറാൻ പദ്ധതിയിട്ടു: ഗുരുതര ആരോപണവുമായി ബെഞ്ചമിൻ നെതന്യാഹു