പിഎൻബി വായ്പ തട്ടിപ്പ്: രത്‌നവ്യാപാരി മെഹുൽ ചോക്സിയെ ഇന്ത്യക്ക് കൈമാറാൻ അനുമതി

Punjab National Bank Loan Fraud Case: ഡൽഹി: പഞ്ചാബ് നാഷണൽ ബാങ്ക് (പിഎൻബി) വായ്പാ തട്ടിപ്പ് കേസിൽ പ്രതിയായ ഇന്ത്യന്‍ രത്‌നവ്യാപാരി മെഹുല്‍ ചോക്സിയെ ഇന്ത്യക്കു കൈമാറാൻ ആന്റ്‌വെർപ്പ് കോടതി ഉത്തരവിട്ടു. ചോക്സിയെ അറസ്റ്റു ചെയ്ത ബെൽജിയൻ അധികൃതരുടെ നടപടി കോടതി ശരിവച്ചു. ചോക്സിയെ കൈമാറുന്നതുമായി ബന്ധപ്പെട്ട ആദ്യ നിയമ നടപടി ഇതോടെ വ്യക്തമായെന്ന്, മുതിർന്ന ഉദ്യോഗസ്ഥനെ ഉദ്ധരിച്ച് വാർത്താ ഏജൻസിയായ പിടിഐ റിപ്പോർട്ട് ചെയ്തു.

ഇന്ത്യയുടെ ആവശ്യപ്രകാരം മെഹുൽ ചോക്സിയെ ബെൽജിയം പൊലീസ് അറസ്റ്റു ചെയ്ത് അഞ്ചു മാസങ്ങൾക്ക് ശേഷമാണ് സുപ്രധാന വിധി. അതേസമയം, കീഴ്‌ക്കോടതി ഉത്തരവിനെതിരെ മേൽക്കോടതിയെ സമീപിക്കാൻ ചോക്സിക്ക് അവസരമുണ്ട്. ഇന്ത്യയിലേക്ക് നാടുകടത്തിയാൽ ചോക്‌സിയെ മുംബൈയിലെ ആർതർ റോഡ് ജയിലിൽ പാർപ്പിക്കുമെന്ന് ഇന്ത്യ ബെൽജിയം സർക്കാരിന് ഉറപ്പു നൽകി ഒരു മാസത്തിന് പിന്നാലെയാണ് ഉത്തരവ്. സിബിഐയുടെ അഭ്യർത്ഥനയുടെ അടിസ്ഥാനത്തിൽ ഈ വർഷം ഏപ്രിലിലാണ് ചോക്സിയെ ബെൽജിയം പൊലീസ് അറസ്റ്റു ചെയ്തത്. 

Also Read: ഞങ്ങൾ നിങ്ങളോടൊപ്പം; കുടിയേറ്റ വിരുദ്ധ പ്രക്ഷോഭങ്ങൾക്കിടയിൽ ഇന്ത്യക്കാരോട് ഓസ്‌ട്രേലിയ

പഞ്ചാബ് നാഷണൽ ബാങ്കിൽ നിന്നും 13,500 കോടി രൂപ വായ്പയെടുത്ത് രാജ്യംവിട്ട കേസിലെ പ്രധാന പ്രതികളിലൊരാളാണ് മെഹുൽ ചോക്സി. ഇയാളുടെ അനന്തരവൻ നീരവ് മോദിയാണ് മറ്റൊരു പ്രധാന പ്രതി. നീരവ് മോദി നിലവിൽ ലണ്ടനിലെ ജയിലിലാണ്. തട്ടിപ്പു വിവരം പുറത്തുവരുന്നതിന് ഏതാനും ദിവസം മുൻപാണ് മെഹുല്‍ ചോക്‌സിയും നീരവ് മോദിയും ഇവരുടെ കുടുംബവും ഇന്ത്യ വിട്ടത്. ചോക്‌സി ഭാര്യ പ്രീതി ചോക്‌സിക്കൊപ്പം ബെൽജിയത്തിലെ ആന്റ്‌വെർപ്പിൽ താമസിച്ചുവരികയായിരുന്നു.

Also Read: ബിഹാർ തിരഞ്ഞെടുപ്പ്; ഇന്ത്യ സഖ്യത്തിലും സീറ്റുധാരണ, 61 സീറ്റുകൾ കോൺഗ്രസിന്

2018 ൽ, മുംബൈയിലെ പിഎൻബി ബ്രാഡി ഹൗസ് ശാഖയിൽ വായ്പാ തട്ടിപ്പ് നടത്തിയതിനായിരുന്നു മെഹുല്‍ ചോക്‌സിക്കും നീരവ് മോദിയ്ക്കും എതിരെ കേസെടുത്തത്. ഇരുവരെയും കുടുംബാംഗങ്ങളെയും ജീവനക്കാരെയും ബാങ്ക് ഉദ്യോഗസ്ഥരെയും മറ്റു ചിലരെയും അന്വേഷണ ഏജൻസികൾ കേസിൽ പ്രതിചേർത്തിരുന്നു. മുംബൈ കോടതി 2018 ലും 2021 ലും പുറപ്പെടുവിച്ച അറസ്റ്റു വാറണ്ടുകളുടെ അടിസ്ഥാനത്തിലായിരുന്നു ചോക്സിയെ കസ്റ്റഡിയിലെടുത്തത്.

Read More: അന്നത്തെ വിദ്യാർഥി ഇന്നത്തെ ശ്രീലങ്കൻ പ്രധാനമന്ത്രി; ഡൽഹി ഹിന്ദുകോളേജിന് ഇത് അപൂർവ്വ നിമിഷം