സുപ്രീം കോടതിയിൽ ചീഫ് ജസ്റ്റിസിനുനേരെ ഷൂ എറിഞ്ഞ് അഭിഭാഷകൻ; അപലപിച്ച് പ്രധാനമന്ത്രി

Shoe thrown at Chief Justice Gavai: ഡൽഹി: ചീഫ് ജസ്റ്റിസ് ബി.ആർ ഗവായിക്കു നേരെ കോടതി മുറിക്കുള്ളിൽ ഷൂ എറിഞ്ഞ സംഭവത്തെ അപലപിച്ച് പ്രധാനമന്ത്രി നരേന്ദ്ര മോദി. ജസ്റ്റിസ് ഗവായിയുമായി സംസാരിച്ച പ്രധാനമന്ത്രി, പ്രതികൂല സാഹചര്യങ്ങളെ നേരിടുമ്പോഴും അദ്ദേഹം പ്രകടിപ്പിച്ച ശാന്തതയെയും സംയമനത്തെയും അഭിനന്ദിക്കുകയും ചെയ്തു. നമ്മുടെ സമൂഹത്തിൽ ഇത്തരം നിന്ദ്യമായ പ്രവൃത്തികൾക്ക് സ്ഥാനമില്ലെന്നും ഇത് തികച്ചും അപലപനീയമാണെന്നും പ്രധാനമന്ത്രി പറഞ്ഞു. 

ഇന്നു രാവിലെ കോടതിയിൽ നടപടികൾ പുരോഗമിച്ചുകൊണ്ടിരിക്കെയാണ് ചീഫ് ജസ്റ്റിസിനുനേരെ അതിക്രമ ശ്രമം ഉണ്ടായത്. ഷൂ എറിഞ്ഞ അഭിഭാഷകനെ സുരക്ഷാജീവനക്കാര്‍ ചേര്‍ന്ന് പുറത്താക്കി. രാകേഷ് കിഷോർ എന്ന 71 കാരനായ അഭിഭാഷകനാണ് ഷൂ എറിഞ്ഞതെന്ന് ഡൽഹി പൊലീസ് പറഞ്ഞു. മധ്യപ്രദേശിലെ ഖജുരാഹോ ക്ഷേത്രത്തിൽ വിഷ്ണു വിഗ്രഹം പുനഃസ്ഥാപിക്കണമെന്ന് ആവശ്യപ്പെട്ടുള്ള ഹർജിയിലെ ചീഫ് ജസ്റ്റിസിന്റെ പരാമർശങ്ങളിൽ അഭിഭാഷകന് അതൃപ്തിയുണ്ടായിരുന്നെന്നാണ് പ്രാഥമിക അന്വേഷണത്തിലെ കണ്ടെത്തൽ. സനാതനധർമത്തിനെതിരെ ചീഫ് ജസ്റ്റിസ് പ്രവർത്തിക്കുന്നു എന്ന് അഭിഭാഷകൻ ആരോപിച്ചു. ഇതേ തുടർന്നാണ് ഷൂസ് എറിഞ്ഞതെന്നാണ് വിവരം.

Also Read: ബിഹാർ നിയമസഭാ തിരഞ്ഞെടുപ്പ് തീയതികൾ ഇന്ന് പ്രഖ്യാപിക്കും; തിരഞ്ഞെടുപ്പ് നടക്കുക ഘട്ടങ്ങളായി

സുരക്ഷാ ഉദ്യോഗസ്ഥർ അഭിഭാഷകനെ പിടികൂടി സുപ്രീം കോടതിയുടെ സുരക്ഷാ വിഭാഗത്തിന് കൈമാറുകയായിരുന്നു. പ്രതിയെ പൊലീസ് കസ്റ്റഡിയിലെടുത്തിരുന്നു. മയൂർ വിഹാർ സ്വദേശിയാണ് പ്രതിയായ അഭിഭാഷകൻ. സുപ്രീം കോടതി ബാർ അസോസിയേഷന്റെ രജിസ്റ്റർ ചെയ്ത അംഗവുമാണെന്ന് പൊലീസ് പറഞ്ഞു.

Also Read: ജയ്പൂരിൽ ആശുപത്രിയിൽ തീപിടിത്തം, 6 രോഗികൾക്ക് ദാരുണാന്ത്യം

കോടതിയിൽ നിന്ന് പുറത്തേക്ക് കൊണ്ടുപോകുമ്പോൾ 'സനാതന ധര്‍മ്മത്തിനു നേരെയുള്ള അപമാനം ഇന്ത്യ വെച്ചുപൊറുപ്പിക്കില്ലെന്ന്' പ്രതി മുദ്രാവാക്യം മുഴക്കി. നാടകീയ സംഭവങ്ങളെ തുടർന്ന് കോടതി നടപടികൾ തടസപ്പെട്ടെങ്കിലും കുറച്ചു നേരത്തിനുള്ളിൽ തുടര്‍ന്നു.

Read More: ‘15 വർഷമായി ചുമയ്ക്ക് ഈ സിറപ്പ് എഴുതി കൊടുക്കുന്നു’: അറസ്റ്റിലായ ഡോക്ടർ