ഉരുളക്കിഴങ്ങ് മുതൽ പപ്പായ വരെ, കൈമുട്ടിലെ കറുപ്പ് നിറം അകറ്റാൻ വിദ്യകൾ അനവധി

മുഖക്കുരുവും, പാടുകളും, ചുളിവുകളും നമ്മൾ പെട്ടെന്നു ശ്രദ്ധിച്ചേക്കാവുന്ന സൗന്ദര്യ പ്രശ്നങ്ങളാണ്. എന്നാൽ ഇതേ കരുതൽ കൈമുട്ടുകൾക്കും നൽകാറുണ്ടോ?. ഹോർമോൺ വ്യതിയാനം മുതൽ, സ്ഥിരമായി മുട്ട് കുത്തിയിരിക്കുന്നതും, വരണ്ട ചർമ്മവും  ഈ നിറ വ്യത്യാസത്തിന് കാരണമായേക്കും. ചർമ്മ സംരക്ഷണത്തിന് ലഭ്യമായതു പോലെ കൈമുട്ടുകളുടെ പരിചണത്തിന് അധികം ഉത്പന്നങ്ങൾ കിട്ടണമെന്നില്ല. വിഷമിക്കേണ്ട വീട്ടിൽ ദിവസേന ഉപയോഗിക്കുന്ന ചില വസ്തുക്കൾ ഉണ്ടെങ്കിൽ കൈമുട്ടിലെ കറുപ്പ് നിറത്തിന് പരിഹാരം കാണാവുന്നതേയുള്ളൂ. 

വെള്ളരിക്ക

വെള്ളരിക്ക വട്ടത്തിൽ മുറിച്ച് ഇരുണ്ട നിറമുള്ള ഭാഗത്ത് 15 മിനിറ്റ് മസാജ് ചെയ്യാം. ഇത് പതിവായി ചെയ്യുന്നത് കറുപ്പ് നിറം കുറയ്ക്കാൻ സഹായിക്കും.

തൈര്

കുറച്ച് തൈരിൽ ഒരു ടീസ്പൂൺ വിനാഗിരി ചേർത്തിളക്കി യോജിപ്പിക്കാം. കൈമുട്ടിൽ ഇത് പുരട്ടുക. പത്ത് മിനിറ്റിനു ശേഷം കഴുകി കളയാം. തൈര് ഒരു ബ്ലീച്ചിങ് ഏജൻ്റായി പ്രവർത്തിക്കുന്നു.

പപ്പായ

ഇരുണ്ട് പാടുകൾ അകറ്റാൻ സഹായിക്കുന്ന എൻസൈമുകളും വിറ്റാമിനുകളും പപ്പായയിൽ അടങ്ങിയിട്ടുണ്ട്. പഴുത്ത പപ്പായയുടെ പൾപ്പ് പ്രത്യേകം എടുത്ത് ഇരണ്ട നിറം ഉള്ള ഭാഗത്ത് പുരട്ടാം. ഇരുപത് മിനിറ്റിനു ശേഷം കഴുകി കളയാം. 

മഞ്ഞൾ

ഒരൽപ്പം തൈരിലേക്ക് കുറച്ച് മഞ്ഞൾ കൂടി ചേർത്തിളക്കി യോജിപ്പിക്കാം. അത് കൈമുട്ടിൽ പുരട്ടി പതിനഞ്ച് മിനിറ്റ് വിശ്രമിക്കുക. ശേഷം തണുത്ത വെള്ളത്തിൽ കഴുകി കളയാം. 

കറ്റാർവാഴ

കറ്റാർവാഴയുടെ ജെൽ വേർപ്പെടുത്തി അതിലേക്ക് കുറച്ച് തേൻ കൂടി ചേർത്തിളക്കി യോജിപ്പിക്കാം. ഇത് കൈമുട്ടിൽ പുരട്ടുക. പതിവായി ഇങ്ങനെ ചെയ്യുന്നത് കറുപ്പ് നിറം കുറയ്ക്കാൻ സഹായിക്കും. 

നാരങ്ങ

നാരങ്ങ നല്ലൊരു ബ്ലീച്ചിങ് ഏജൻ്റായി പ്രവർത്തിക്കും. ഒരു നാരങ്ങ പകുതി മുറിച്ച് കറുപ്പ് നിറം ഉള്ള ഭാഗത്ത് മസാജ് ചെയ്യാം. ചെറുനാരങ്ങ പഞ്ചസാരയില്‍ മുക്കിയതിനു ശേഷം കൈമുട്ടില്‍ നന്നായി ഉരയ്ക്കുന്നതും കറുപ്പ് നിറം മാറാന്‍ നല്ലതാണ്.

ഉരുളക്കിഴങ്ങ്

ഉരുളക്കിഴങ്ങ് ചെറിയ കഷ്ണങ്ങളായി മുറിച്ചോ അല്ലെങ്കിൽ അരച്ചെടുത്തോ കറുപ്പ് നിറമുള്ള ഭാഗങ്ങളിൽ പുരട്ടാം. ഇത് ചർമ്മത്തിന് തിളക്കം നൽകാൻ സഹായിച്ചേക്കും.

വെളിച്ചെണ്ണ

ചർമ്മം വരണ്ട് പോകുന്നതും നിറം മങ്ങാൻ കാരണമായേക്കും. അതിനായി വെളിച്ചെണ്ണ ഉപയോഗിച്ച് ദിവസവും രണ്ടു തവണ കൈമുട്ടുകളിൽ മസാജ് ചെയ്യാം.

ഒലിവ് എണ്ണ

ഒലിവ് എണ്ണ മുട്ടിൽ പുരട്ടി അൽപ്പ സമയം മസാജ് ചെയ്യാം. അതിലേക്ക് പഞ്ചസാര ചേർത്തും മസാജ് ചെയ്യാവുന്നതാണ്. മൃതചർമ്മം നീക്കം ചെയ്യുന്നതിന് ഇത് ഉപകരിക്കും. 

ഗ്ലിസറിൻ

രാത്രി ഉറങ്ങാൻ കിടക്കുന്നതിനു മുമ്പായി ഗ്ലിസറിനും പനിനീരും സമം ചേർത്തിളക്കി യോജിപ്പിക്കാം. ഇത് കൈമുട്ടിൽ പുരട്ടുക. രാവിലെ കഴുകി കളയാം. ചർമ്മത്തിൻ്റെ സ്വാഭാവിക നിറം നിലനിർത്തുന്നതിനു ഇത് ഗുണപ്രദമാണ്. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ചര്‍മ്മത്തിലെ ചുളിവുകള്‍ അകറ്റാന്‍ ഈ ഫെയ്സ് പാക്കുകൾ ഉപയോഗിച്ചു നോക്കൂ
• ചുണ്ടിലെ വരൾച്ച തടയാം, വിദ്യ അടുക്കളയിൽ ഉണ്ട്
• തലമുടി പ്രശ്നങ്ങൾക്ക് ഒറ്റമൂലി, മൈലാഞ്ചി ഇങ്ങനെ ഉപയോഗിക്കാം
• മുഖക്കുരുവും കറുത്ത പാടുകളും അകറ്റാൻ മുൾട്ടാണി മിട്ടി