ചര്‍മ്മത്തിലെ ചുളിവുകള്‍ അകറ്റാന്‍ ഈ ഫെയ്സ് പാക്കുകൾ ഉപയോഗിച്ചു നോക്കൂ

ചർമ്മത്തിലെ പാടുകളും ചുളിവുകളും ശ്രദ്ധയിൽപ്പെട്ടു തുടങ്ങിയോ?. അകാല വാർദ്ധക്യത്തിൻ്റെ ലക്ഷണങ്ങളാണവ. ചർമ്മത്തിൻ്റെ ഇലാസ്തിക കുറഞ്ഞു വരുന്നതാണ് ചുളിവുകൾ ഉണ്ടാകുന്നതിന് പ്രധാന കാരണം. അവ കണ്ടു തുടങ്ങുമ്പോൾ തന്നെ പ്രതിവിധി തേടേണ്ടതുണ്ട്. അതിനായി ബ്യൂട്ടിപാർലറുകളിലും മറ്റും പോകേണ്ട കാര്യമില്ല. പ്രകൃതി ദത്തമായ പരിഹാര മാർഗങ്ങളുണ്ട്. വെളിച്ചെണ്ണയും, കറ്റാർവാഴയും ചർമ്മ സംരക്ഷണത്തിന് ഏറെക്കാലമായി ഉപയോഗത്തിലുണ്ട്. 

വെളിച്ചെണ്ണ

മുഖത്തെ ചുളിവുകളും പാടുകളും പ്രായം ഏറും തോറും വർധിച്ചു കൊണ്ടിരിക്കും. രാത്രി ഉറങ്ങുന്നതിനു മുമ്പ് തണുത്ത വെള്ളത്തിൽ മുഖം കഴുകുക. ശേഷം കുറച്ച് വെളിച്ചെണ്ണ മുഖത്തും കഴുത്തിലും പുരട്ടാം. തുടർന്ന് മൃദുവായി മസാജ് ചെയ്യുക. രാവിലെ തണുത്ത വെള്ളത്തിൽ തന്നെ എണ്ണ കഴുകി കളയാം. എല്ലാ ദിവസവും രാത്രി കിടക്കുന്നതിനു മുമ്പ് ഇത് ചെയ്യാവുന്നതാണ്. സെൻസിറ്റീവ് ചർമ്മം ഉള്ളവർക്ക് ഇത് ചർമ്മ പ്രശ്നങ്ങൾ സൃഷ്ടിച്ചേക്കാം.

കറ്റാർവാഴ ജെൽ

ഒരു ടീസ്പൂൺ കറ്റാർവാഴ ജെല്ലിലേക്ക് രണ്ട് ടീസ്പൂൺ വെള്ളരിക്ക നീര് ചേർത്തിളക്കി യോജിപ്പിക്കാം. ശേഷം ഈ മിശ്രിതം മുഖത്ത് പുരട്ടാം. അര മണിക്കൂറിനു ശേഷം തണുത്ത വെള്ളത്തിൽ കഴുകാം. 

ഒലിവ് എണ്ണയും നാരങ്ങാ നീരും

ഒലിവ് എണ്ണയിലേക്ക് ചെറുനാരങ്ങയുടെ നീര് ചേർത്തിളക്കി യോജിപ്പിക്കാം. ഈ മിശ്രിതം മുഖത്തു പുരട്ടുക. അര മണിക്കൂറിനു ശേഷം കഴുകി കളയാം. ചർമ്മത്തിലെ ചുളിവുകൾ മാറാൻ ഇത് ഉപകരിച്ചേക്കും. നാരങ്ങാ നീരിൽ വിറ്റാമിൻ സി അടങ്ങിയിട്ടുണ്ട് അത് ചർമ്മത്തിലെ അകാല വാർദ്ധക്യ ലക്ഷണങ്ങൾ കുറയ്ക്കാൻ സഹായിക്കും. 

കടലമാവ്

രണ്ട് ടീസ്പൂൺ കടലമാവിലേക്ക് ഒരു ടീസ്പൂൺ ഓട്സും, ഒരു ടീസ്പൂൺ തൈരും ചേർത്തിളക്കി യോജിപ്പിക്കാം. ഇതിലേക്ക് ഒരു ടീസ്പൂൺ തേനും ഒരു ടീസ്പൂൺ മഞ്ഞൾപ്പൊടിയും ചേർത്തിളക്കി യോജിപ്പിക്കാം. ശേഷം ആ മിശ്രിതം മുഖത്ത് പുരട്ടി മൃദുവായി മസാജ് ചെയ്യാം. 20 മിനിറ്റിനു ശേഷം കഴുകി കളയാം. 

കാപ്പിപ്പൊടി ഫെയ്സ്മാസ്ക്ക്

കോഫിയിലടങ്ങിയിരിക്കുന്ന ആൻ്റി ഓക്സിഡൻ്റുകൾ ചർമ്മത്തിൻ്റെ തിളക്കം നിലനിർത്താൻ  സഹായിക്കും. ഇതിനായി കാപ്പി പൊടിയിലേക്ക്  വെളിച്ചെണ്ണയോ ഒലിവ് എണ്ണയോ ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടുക. 15 മിനിറ്റിനു ശേഷം കഴുകി കളയാം. 

തക്കാളിയും ഒലിവ് എണ്ണയും

ഒരു ടീസ്പൂൺ ഒലിവ് എണ്ണയിലേക്ക് രണ്ട് ടീസ്പൂൺ തക്കാളി നീര് ചേർത്തിളക്കി യോജിപ്പിക്കുക. അത് മുഖത്ത് പുരട്ടി 15 മിനിറ്റിനു ശേഷം തണുത്ത വെള്ളം ഉപയോഗിച്ച് കഴുകി കളയാം. തക്കാളിയിൽ ലൈക്കോപിൻ എന്ന സംയുക്തം അടങ്ങിയിട്ടുണ്ട്. ഇത് തുറന്ന സുഷിരങ്ങൾ അടച്ച് മുഖക്കുരുവും കറുത്ത പാടുകളും അകറ്റാൻ സഹായിക്കുന്നു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ചുണ്ടിലെ വരൾച്ച തടയാം, വിദ്യ അടുക്കളയിൽ ഉണ്ട്
• തലമുടി പ്രശ്നങ്ങൾക്ക് ഒറ്റമൂലി, മൈലാഞ്ചി ഇങ്ങനെ ഉപയോഗിക്കാം
• മുഖക്കുരുവും കറുത്ത പാടുകളും അകറ്റാൻ മുൾട്ടാണി മിട്ടി
• അമിതമായ രോമ വളർച്ചയാണോ പ്രശ്നം; മഞ്ഞളും പാലും മുതൽ ചെറുനാരങ്ങ വരെ പരിഹാരം