മുഖക്കുരുവും കറുത്ത പാടുകളും അകറ്റാൻ മുൾട്ടാണി മിട്ടി

ചർമ്മ സംരക്ഷണം എന്നത് ലഭ്യമായ എല്ലാ വസ്തുക്കളും ഉപയോഗിച്ചു നോക്കുക എന്നല്ല. ചർമ്മത്തിൻ്റെ പ്രകൃതം മനസ്സിലാക്കിക്കൊണ്ട് ഉചിതമായവ തിരഞ്ഞെടുത്ത് പരിചരണത്തിനായി ഉൾപ്പെടുത്തുക എന്നതിനാണ് പ്രാധാന്യം. വിപണിയിൽ ലഭ്യമായ കെമിക്കൽ ഉത്പന്നങ്ങളേക്കാളും പ്രകൃതിദത്തമായവ തിരഞ്ഞെടുക്കുന്നത് ഫലപ്രാപ്തി കൂട്ടുന്നു. സൗന്ദര്യ സംരക്ഷണത്തിന് ഏറെ നാളായി ഉപയോഗത്തിലിരിക്കുന്ന ഒന്നാണ് മുൾട്ടാണി മിട്ടി. അധികമായുള്ള എണ്ണ മയം, ചർമ്മത്തിൽ അടിഞ്ഞു കൂടിയിരിക്കുന്ന മാലിന്യങ്ങൾ എന്നിവ നീക്കം ചെയ്യുന്നതിന് ഇത് സഹായിക്കും. മുഖക്കുരുവിനും നിറം വർധിപ്പിക്കുന്നതിനും മുൾട്ടാണി മിട്ടി ഉപയോഗിക്കാറുണ്ട്. 

മുൾട്ടാണി മിട്ടി ഉപയോഗിച്ച് വ്യത്യസ്ത തരത്തിലുള്ള ഫെയ്സ്പാക്കുകൾ എങ്ങനെ തയ്യാറാക്കാം എന്ന് അറിഞ്ഞോളൂ.

മുൾട്ടാണി മിട്ടിയും തക്കാളി നീരും

രണ്ട് സ്പൂൺ തക്കാളി നീരിലേക്ക് രണ്ട് ടീസ്പൂൺ മുൾട്ടാണി മിട്ടി ചേർക്കാം. അതിലേക്ക് ഒരു സ്പൂൺ ചന്ദനപ്പൊടി, ഒരു സ്പൂൺ മഞ്ഞൾപ്പൊടി എന്നിവ ചേർത്ത് ഇളക്കി യോജിപ്പിക്കാം. ഈ മിശ്രിതം മുഖത്ത് പുരട്ടുക. പത്ത് മിനിറ്റിനു ശേഷം ചെറുചൂടുള്ള വെള്ളത്തിൽ മുഖം കഴുകാം. മുഖത്തെ കറുത്ത പാടുകൾ അകറ്റാൻ ഈ പാക്ക് ഉപയോഗിച്ചു നോക്കൂ. 

മുൾട്ടാണി മിട്ടി റോസ് വാട്ടർ

ഒരു ചെറിയ കപ്പിൽ അൽപ്പം മുൾട്ടാണി മിട്ടിയെടുക്കാം. അതിലേക്ക് രണ്ട് ടേബിൾസ്പൂൺ റോസ് വാട്ടർ ചേർത്ത് ഇളക്കി യോജിപ്പിക്കാം. ഈ മിശ്രിതം മുഖത്ത് പുരട്ടി നന്നായി ഉണങ്ങിയതിനു ശേഷം കഴുകി കളയാം. ചർമ്മത്തിൽ അടിഞ്ഞു കൂടിയിരിക്കുന്ന അഴുക്ക് നീക്കം ചെയ്യുന്നതിന് ഈ ഫെയ്സ് പാക്ക് സഹായകരമാകും. 

മുൾട്ടാണി മിട്ടി ചന്ദപ്പൊടി

മുൾട്ടാണി മിട്ടിയിലേക്ക് അൽപം ചന്ദപ്പൊടിയും പനിനീരും ചേർത്ത് ഇളക്കി യോജിപ്പിക്കുക. അത് മുഖത്ത് പുരട്ടാം. ഉണങ്ങിയതിനു ശേഷം ചെറുചൂടുള്ള വെള്ളത്തിലോ തണുത്ത വെള്ളത്തിലോ മുഖം കഴുകാം. അമിതമായ എണ്ണ മയം അകറ്റാൻ ഈ പാക്ക് ഉപയോഗിച്ചോളൂ

മുൾട്ടാണി മിട്ടി തൈര്

മുൾട്ടാണി മിട്ടിയിലേക്ക് കുറച്ച് തൈര് ചേർത്തിളക്കി യോജിപ്പിക്കാം. ശേഷം ആ മിശ്രിതം മുഖത്ത് പുരട്ടാം. 20 മിനിറ്റിനു ശേഷം കഴുകി കളയാം. മുഖത്തെ കരുവാളിപ്പ് അകറ്റാനും നിറം വർധിപ്പിക്കാനും ഇത് സഹായിക്കും. 

മുൾട്ടാണി മിട്ടി നാരങ്ങാ നീര്

മുൾട്ടാണി മിട്ടിയിലേക്ക് അൽപ്പം നാരങ്ങാ നീരും വിറ്റാമിൻ ഇ എണ്ണയും ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടി ഇരുപത് മിനിറ്റിനു ശേഷം ചെറുചൂടുള്ള വെള്ളത്തിൽ കഴുകി കളയാം. ചർമ്മത്തിലെ പാടുകൾ അകറ്റാൻ അത് സഹായിക്കും. 

മുൾട്ടാണി മിട്ടി വേപ്പില

മുൾട്ടാണി മിട്ടിയിലേക്ക് വേപ്പില അരച്ചതും കുറച്ച് കർപ്പൂരം പൊടിച്ചതും അൽപ്പം റോസ് വാട്ടറും ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടുക. 15 മിനിറ്റിനു ശേഷം കഴുകി കളയാം. മുഖക്കുരു അകറ്റാൻ ഈ ഫെയ്സ് പാക്ക് പരീക്ഷിച്ചു നോക്കൂ. 

മുൾട്ടാണി മിട്ടി തേൻ

ഒരു ടീസ്പൂൺ മുൾട്ടാണി മിട്ടിയിലേക്ക് ഒരു ടീസ്പൂൺ തേൻ ചേർത്തിളക്കി യോജിപ്പിക്കാം. 20 മിനിറ്റിനു ശേഷം കഴുകി കളയാം. വരണ്ട ചർമ്മം ഉള്ളവർക്ക് ഇത് ഗുണകരമാകും.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• അമിതമായ രോമ വളർച്ചയാണോ പ്രശ്നം; മഞ്ഞളും പാലും മുതൽ ചെറുനാരങ്ങ വരെ പരിഹാരം
• അകാല നര നോക്കി വിഷമിക്കേണ്ട, ഈ പൊടിക്കൈകൾ പ്രയോഗിക്കൂ
• കണ്ണിനു ചുറ്റുമുള്ള കറുപ്പ് നിറം അകറ്റാം; പ്രതിവിധി അടുക്കളയിൽ ഉണ്ട്
• 40കളിലും യുവത്വം തുളമ്പുന്ന ചർമ്മം നേടാം, ഇക്കാര്യങ്ങൾ ശ്രദ്ധിക്കൂ