കണ്ണിനു ചുറ്റുമുള്ള കറുപ്പ് നിറം അകറ്റാം; പ്രതിവിധി അടുക്കളയിൽ ഉണ്ട്

ചർമ്മ സംരക്ഷണം, മുഖസൗന്ദര്യം എന്നിവയിൽ അതീവ ശ്രദ്ധ പുലർത്തുന്നവരെ അലട്ടുന്ന ഒരു പ്രധാന പ്രശ്നമാണ് കണ്ണിനു ചുറ്റുമുണ്ടാകുന്ന കറുപ്പ്. ഉറക്ക കുറവ്, സമ്മർദ്ദം, നിർജ്ജലീകരണം എന്നിവയാകാം ഇതിനു കാരണം. ഇത് അകറ്റുന്നതിനായി ധാരാളം ഉത്പന്നങ്ങൾ വിപണിയിൽ ലഭ്യമാണ്. എന്നാൽ അവ ശാശ്വതമായ പരിഹാമാകണം എന്നു നിർബന്ധമില്ല. അത്തരം ഉത്പന്നങ്ങൾ ഉപയോഗിക്കുന്നതിനു മുമ്പായി ഒന്ന് ശ്രദ്ധിച്ചാൽ വീട്ടിൽ അടുക്കളയിൽ തന്നെ കണ്ണിനു ചുറ്റുമുള്ള പാടുകളും കറുപ്പും കുറയ്ക്കുന്നതിനു സഹായിക്കുന്ന ഏതാനും വസ്തുക്കൾ കാണാൻ സാധിക്കും. അവ എന്തൊക്കെയെന്നും, ഉപയോഗിക്കേണ്ട വിധവും അറിഞ്ഞിരുന്നോളൂ.

ഉരുളക്കിഴങ്ങ്

ഉരുളക്കിഴങ്ങ് അരച്ചത് കൺതടങ്ങളിൽ പുരട്ടാം. പത്ത് മിനിറ്റിനു ശേഷം തണുത്ത വെള്ളം ഉപയോഗിച്ച് കഴുകി കളയാം. ഉരുളക്കിഴങ്ങ് വട്ടത്തിൽ അരിഞ്ഞെടുത്ത് കണ്ണിൽ വയ്ക്കുന്നതും ഫലപ്രദമാണ്.

ഗ്രീൻ ടീ ബാഗ്

രണ്ട് ഗ്രീൻ ടീ ബാഗ് ചൂടുവെള്ളത്തിൽ മുക്കി വെച്ചതിനു ശേഷം ഫ്രിഡ്ജിൽ സൂക്ഷിക്കുക. തണുത്തതിനു ശേഷം കണ്ണിനു മുകളിലായി വെയ്ക്കുക. പതിനഞ്ച് മിനിറ്റ് വിശ്രമിക്കുക. ശേഷം തണുത്തവെള്ളത്തിൽ മുഖം കഴുകാം. 

കാപ്പിപ്പൊടി

രണ്ട് ടീസ്പൂൺ കാപ്പിപ്പൊടിയിലേക്ക് ഒരു ടീസ്പൂൺ വെളിച്ചെണ്ണ ചേർത്തിളക്കി യോജിപ്പിക്കാം. ഈ മിശ്രിതം കണ്ണിന് ചുറ്റും പുരട്ടുക. 20 മിനിറ്റിനു ശേഷം കഴുകി കളയാം. 

വെള്ളരിക്ക

വെള്ളരിക്ക വട്ടത്തിൽ അരിഞ്ഞോ അല്ലെങ്കിൽ അരച്ചെടുത്തോ കണ്ണിനു ചുറ്റും പുരട്ടുക. പത്ത് മിനിറ്റ് വിശ്രമിക്കുക. ഇത് സ്ഥിരമായി ചെയ്യുന്നത് കണ്ണിനു ചുറ്റുമുള്ള കറുത്തപാട് അകറ്റാൻ സഹായിക്കും. 

തക്കാളി നീര്

ഒരു ടീസ്പൂൺ തക്കാളി ജ്യൂസ് അൽപ്പം നാരങ്ങാ നീരുമായി ചേർത്ത് കണ്ണിനു ചുറ്റും പുരട്ടുക. പത്തു മിനിറ്റിനു ശേഷം കഴുകി കളയുക. കറുത്തപാടുകൾ കുറയ്ക്കാൻ സഹായിക്കുന്ന ആൻ്റി ഓക്സിഡൻ്റുകൾ തക്കാളിയിൽ അടങ്ങിയിട്ടുണ്ട്.

പാലും, മഞ്ഞൾപ്പൊടിയും

ഒരു നുള്ള് മഞ്ഞൾപ്പൊടിയിലേയ്ക്ക് അൽപ്പം പാൽ കൂടി ചേർത്തിളക്കി യോജിപ്പിക്കാം. ഇത് കണ്ണിനു ചുറ്റുമുള്ള കറുത്ത പാടുകളിൽ പുരട്ടി പത്തു പതിനഞ്ച് മിനിറ്റിനു ശേഷം കഴുകി കളഞ്ഞോളൂ.

ബദാം എണ്ണ

കണ്ണിനു ചുറ്റുമുള്ള കറുത്തപാടുകൾ കുറയ്ക്കുന്നതിനു സഹായിക്കുന്ന വിറ്റാമിൻ കെ, വിറ്റാമിൻ എന്നിവ ഇതിൽ അടങ്ങിയിരിക്കുന്നു. കിടക്കുന്നതിനു മുമ്പായി അൽപ്പം ബദാം എണ്ണ കണ്ണിനു ചുറ്റും മസാജ് ചെയ്തു കൊടുക്കുന്നത് ഫലപ്രദമായിരിക്കും.

തണുത്ത പാൽ

പാലിൽ അടങ്ങിയിരിക്കുന്ന ലാക്റ്റിക് ആസിഡ് ഒരു മികച്ച എക്സ്ഫോളിയേറ്ററാണ്. ഇത് ചർമ്മത്തെ തിളക്കമുള്ളതാക്കുന്നു. തണുത്ത പാലിൽ മുക്കിയ പഞ്ഞി പത്തോ പതിനഞ്ചോ മിനിറ്റ് കണ്ണിനു മുകളിൽ വെയ്ക്കാം.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക

Read More

• ശരീരത്തിൽ സുഗന്ധം നിലനിർത്താൻ ഇതാ ചില നുറുങ്ങു വിദ്യകൾ
• പാദങ്ങളിലെ വിണ്ടുകീറൽ; അൽപ്പം കരുതലാകാം
• ചർമ്മത്തിലെ ചുളിവുകൾ അകറ്റാൻ ഒലിവ് എണ്ണ
• തലമുടിയുടെ ഉള്ള് കുറഞ്ഞോ, വൈകേണ്ട ഈ ഹെയർപാക്കുകൾ പരീക്ഷിച്ചോളൂ