തലമുടിയുടെ ഉള്ള് കുറഞ്ഞോ, വൈകേണ്ട ഈ ഹെയർപാക്കുകൾ പരീക്ഷിച്ചോളൂ

മുടിയഴകിൽ പ്രധാനം അതിൻ്റെ നിറവും ഉള്ളുമാണ്. എന്നാൽ ഇന്ന് അധിക ആളുകളും നേരിടുന്ന പ്രധാന പ്രശ്നങ്ങളാണ് താരനും, മുടി കൊഴിച്ചിലും. സൗന്ദര്യ സംരക്ഷണത്തിൽ തലമുടിക്ക് അധികം പ്രാധാന്യം നൽകാത്തതാണ് ഇതിന് കാരണം. അന്തരീക്ഷത്തിലെ ഈർപ്പം, പൊടി, എന്നിവ മാത്രമല്ല നിങ്ങൾ കഴിക്കുന്ന ഭക്ഷണവും ജീവിത ശൈലിയും വരെ മുടിയുടെ ആരോഗ്യത്തെ ബാധിക്കുന്നുണ്ട്. ചർമ്മത്തിനു നൽകുന്ന അതേ പരിചരണവും ശ്രദ്ധയും മുടിക്കും നൽകണം. വളരെ കട്ടികുറഞ്ഞ പ്രതലമാണ് തലമുടിക്കുള്ളത്. അതിനാൽ കരുതൽ അനിവാര്യമാണ്.

മുടിക്ക് ഉള്ളും കരുത്തും നൽകുന്നതിന് വീട്ടിൽ തന്നെ പരീക്ഷിക്കാവുന്ന ചില പ്രകൃതിദത്ത ഹെയർ പാക്കുകൾ ഉണ്ട്. അവ പരിചയപ്പെടാം

കോഫി ഹെയർ പാക്ക്

കുറച്ച് കാപ്പിപ്പൊടിയിലേക്ക് അൽപ്പം വെള്ളം ഒഴിച്ചി കലക്കിയെടുക്കാം. ഇത് ഒരു ഗ്ലാസ് ബോട്ടിലിലാക്കി ഫ്രിഡ്ജിൽ സൂക്ഷിച്ചോളൂ. 24 മണിക്കൂറിനു ശേഷം ഫ്രിഡ്ജിൽ നിന്നെടുത്ത് കോട്ടൺ തുണി ഉപയോഗിച്ച് അരിച്ചെടുക്കാം. ഇത് ഒരു സ്പ്രേ ബോട്ടിലിലേക്ക് മാറ്റാം. എല്ലാ ദിവസവും രണ്ട് നേരം ഇത് തലയോട്ടിൽ പുരട്ടി മൃദുവായി മസാജ് ചെയ്യാം. 20 മിനിറ്റ് കഴിഞ്ഞ് വീര്യം കുറഞ്ഞ ഷാമ്പൂ ഉപയോഗിച്ച് കഴുകി കളയാം. ബാക്കി വരുന്ന കോഫി മാസ്ക് ഫ്രിഡ്ജിൽ സൂക്ഷിച്ച് രണ്ടാഴ്ച വരെ ഉപയോഗിക്കാം. 

കഞ്ഞിവെള്ളം

അൽപ്പം ഉലുവ കഞ്ഞിവെള്ളത്തിൽ ഒരു രാത്രി കുതിർത്തു വയ്ക്കാം. പിറ്റേ ദിവസം ഇതുപയോഗിച്ച് തലമുടി കഴുകിക്കോളൂ. ആഴ്ചയിൽ മൂന്നോ നാലോ തവണ ഇങ്ങനെ ചെയ്യുന്നത് മുടികൊഴിച്ചിലും താരനും അകറ്റാൻ സഹായിക്കും. 

ഉള്ളി നീര്

ചുവന്നുള്ളി ചെറിയ കഷ്ണങ്ങളായി അരിഞ്ഞ് അരച്ചെടുക്കുക. ശേഷം അത് പിഴിഞ്ഞ് നീര് മാത്രമെടുക്കാം. ഇത് തലയോട്ടിയിലും തലമുടിയിലും പുരട്ടി മസാജ് ചെയ്യുക. പത്ത് മിനിറ്റിനു ശേഷം വീര്യം കുറഞ്ഞ ഷാമ്പൂ ഉപയോഗിച്ച് കഴുകി കളയാം. 

ഉലുവ

ഉലുവ എണ്ണ ഉപയോഗിക്കാം. ശുദ്ധമായ വെളിച്ചെണ്ണയിലേക്ക് അൽപ്പം ഉലുവ എണ്ണ ചേർത്ത് യോജിപ്പിക്കാം. അത് തലയോട്ടിയിൽ പുരട്ടി രണ്ട് മണിക്കൂർ വിശ്രമിക്കുക. ശേഷം കഴുകി കളയാം. ഇത് തലയോട്ടിയുടെ ആരോഗ്യത്തിനും മുടി വളർച്ചക്കും ഗുണം ചെയ്യും.

മൈലാഞ്ചിയും നെല്ലിക്കയും

ഒരു ടേബിൾ സ്പൂൺ നെല്ലിക്ക ഉണക്കിപൊടിച്ചതിലേക്ക് മൂന്ന് ടേബിൾസ്പൂൺ മൈലാഞ്ചിയില പൊടിച്ചതു ചേർക്കാം. നാല് സ്പൂൺ ചൂടുവെള്ളം ചേർത്തിളക്കി യോജിപ്പിക്കുക. ഈ മിശ്രിതം തലയോട്ടിയിലും തലമുടിയിലും പുരട്ടൂ. ഒരു മണിക്കൂറിനുശേഷം കഴുകി കളയാം. മാസത്തിൽ ഒരിക്കൽ ഇങ്ങനെ ചെയ്തു നോക്കൂ. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• 40കളിലും യുവത്വം തുളമ്പുന്ന ചർമ്മം നേടാം, ഇക്കാര്യങ്ങൾ ശ്രദ്ധിക്കൂ
• കരുത്തുറ്റ തലമുടി നേടാം ഒപ്പം മുഖക്കുരുവും അകറ്റാം​, ഇഞ്ചി ഇങ്ങനെ ഉപയോഗിച്ചു നോക്കൂ
• ചർമ്മ സംരക്ഷണത്തിന് മുരിങ്ങയിലയും
• കൺതടങ്ങളിലും ചുണ്ടിലുമുള്ള ഇരുണ്ട നിറം അകറ്റാൻ ബീറ്റ്റൂട്ടും ഉരുളക്കിഴങ്ങും