തക്കാളി നീര് ദിവസവും കണ്ണിനടിയിൽ പുരട്ടുന്നതിൻ്റെ ഗുണങ്ങൾ അറിയാമോ?

ക്ഷീണം, സമ്മർദ്ദം, പ്രായം, ജനിതകം അങ്ങനെ കണ്ണിനു ചുറ്റുമുള്ള കറുപ്പ് നിറത്തിന് പല കാരണങ്ങൾ ഉണ്ട്. അവ ആരോഗ്യത്തിന് ഹാനികരമല്ല എങ്കിലും നിങ്ങളുടെ ചർമ്മത്തെ മങ്ങിയതാക്കി തീർത്തേക്കാം. ഇവ പരിഹരിക്കാൻ മസാജ് ക്രീം, കെമിക്കൽ ട്രീറ്റ്മെൻ്റുകൾ എന്നിവ ലഭ്യമാണ്. അവ മൂലം ഉണ്ടായേക്കാവുന്ന പാർശ്വഫലങ്ങൾ മുൻകൂട്ടി അറിയാൻ സാധിക്കില്ല. പ്രകൃതിദത്ത ചേരുവകളും സൗന്ദര്യ സംരക്ഷണത്തിനായി കാലാകാലങ്ങളായി ഉപയോഗത്തിലുണ്ട്. വീട്ടിൽ സ്ഥിരമായി ഉപയോഗിക്കുന്ന ഇത്തരം  വസ്തുക്കൾ വിശ്രമ വേളകളിൽ കണ്ണിനു ചുറ്റും ഉപയോഗിച്ചാൽ മതിയാകും. 

അതിനായി അടുക്കളയിൽ തന്നെ സുലഭമായ പല വസ്തുക്കളും ഉപയോഗിക്കാം. 

ഐസ്ക്യൂബ്

കണ്ണിനടിയിൽ ഉണ്ടാകുന്ന തടിപ്പ് ഇരുണ്ട് നിറം എന്നിവ അകറ്റുന്നതിന് തണുത്ത വെള്ളത്തിൽ മുഖം കഴുകുന്നത് നല്ലതാണ്. ഒരു ഐസ്ക്യൂബ് വൃത്തിയുള്ള കോട്ടൺ തുണിയിൽ പൊതിഞ്ഞ് കണ്ണിനു ചുറ്റും അഞ്ച് മുതൽ പത്തു മിനിറ്റ് വരെ മസാജ് ചെയ്യുന്നത് ഏറെ ഫലപ്രദമായിരിക്കും. ക്ഷീണം, സമ്മർദ്ദം എന്നിവ മൂലം കണ്ണിനടിയിൽ ഉണ്ടാകുന്ന കറുപ്പ് നിറം അകറ്റാൻ ഇങ്ങനെ ചെയ്തു നോക്കൂ. 

Also Read: ഒറ്റ ഉപയോഗത്തിൽ ചർമ്മം തിളക്കമുള്ളതാക്കാം, കാപ്പിപ്പൊടിയിൽ ഇവ ചേർത്തുപയോഗിക്കൂ

വെള്ളരി കഷ്ണം

കണ്ണിനു ചുറ്റമുള്ള കറുപ്പ് നിറം അകറ്റാനുള്ള പരമ്പരാഗതമായ ഒരു മാർഗമാണ് വെള്ളരി. ധാരാളം ആൻ്റി ഓക്സിഡൻ്റ്, പ്രകൃതിദത്തമായ ആസ്ട്രിജൻ്റ്  സവിശേഷതകൾ ഇതിനുണ്ട്. ചർമ്മത്തിൽ ഉണ്ടാകുന്ന നിറം മാറ്റം തടയാൻ ഇത് ഫലപ്രദമായി പ്രവർത്തിക്കുന്നു. തണുപ്പിച്ചെടുത്ത വെള്ളരി വട്ടത്തിൽ മുറിച്ചെടുക്കാം. കണ്ണുകൾ അടച്ച് മുകളിലായി അവ വച്ച് 10 മുതൽ 15 മിനിറ്റു വരെ വിശ്രമിക്കാം. ദിവസവും രണ്ട് നേരം ഇങ്ങനെ ചെയ്തു നോക്കൂ. 

ടീ ബാഗ്

ഗ്രീൻ ടീ അല്ലെങ്കിൽ ബ്ലാക്ക് ടീ ബാഗാണ് ഉപയോഗിക്കേണ്ടത്. ഇവയിൽ അടങ്ങിയിരിക്കുന്ന ആൻ്റി ഓക്സിഡൻ്റുകൾ രക്തചംക്രമണം മെച്ചപ്പെടുത്തുന്നതിന് സഹായിക്കും. രണ്ട് ടീ ബാഗ് ചൂടുവെള്ളത്തിൽ കുതിർക്കാൻ വയ്ക്കാം. ശേഷം ഫ്രിഡ്ജിൽ വച്ച് തണുപ്പിക്കാം. തണുപ്പിച്ചെടുത്ത ടീ ബാഗ് കണ്ണിനു മുകളിൽ വച്ച് 10 മുതൽ 15 മിനിറ്റു വരെ വിശ്രമിക്കാം. 

Also Read: ഒരു നുള്ള് മഞ്ഞൾപ്പൊടി കൊണ്ട് ചുളിവുകളും പാടുകളും അകറ്റാൻ ഇതാ ഒരു പൊടിക്കൈ

ബദാം എണ്ണ 

ബദാം എണ്ണ പ്രകൃതിദത്തമായി ചർമ്മത്തെ മൃദുവാക്കുന്നതിന് ഗുണം ചെയ്യും. അതേ സമയം വിറ്റാമിൻ ഇയിൽ അടങ്ങിയിരിക്കുന്ന ആൻ്റി ഓക്സിഡൻ്റുകൾ കോശങ്ങളെ പുനരുജ്ജീവിപ്പിക്കുന്നു. ഏതാനും തുള്ളി ബാദം എണ്ണയിലേയ്ക്ക് വിറ്റാമിൻ ഇ എണ്ണ ചേർത്തിളക്കി യോജിപ്പിക്കാം. അത് കണ്ണിനു ചുറ്റും പുരട്ടി മൃദുവായി മസാജ് ചെയ്യാം. കിടക്കുന്നതിനു മുമ്പ് ഇങ്ങനെ ചെയ്യുന്നതാണ് ഉചിതം. രാവിലം കഴുകി കളയാം. ദിവസവും ഇങ്ങനെ ചെയ്യുന്നതിലൂടെ കണ്ണിനു ചുറ്റുമുള്ള കറുപ്പ് നിറം മങ്ങിത്തുടങ്ങും.

തക്കാളി നാരങ്ങാ നീര്

തക്കാളിയിൽ ലൈക്കോപിൻ അടങ്ങിയിട്ടുണ്ട്. അതൊരു ആൻ്റി ഓക്സിഡൻ്റാണ്. ചർമ്മത്തിൻ്റെ നിറ വ്യത്യാസം മെച്ചപ്പെടുത്താൻ ഏറെ ഫലപ്രദമായ ഘടകമാണിത്. നാരങ്ങ പ്രകൃതി ദത്തമായ ബ്ലീച്ചിങ് ഏജൻ്റായി പ്രവർത്തിക്കുന്നു. ഒരു ടീസ്പൂൺ തക്കാളി ജ്യൂസിലേയ്ക്ക് അര ടീസ്പൂൺ നാരങ്ങാ നീര് ചേർത്തിളക്കി യോജിപ്പിക്കാം. ഈ മിശ്രിതം കണ്ണിനു ചുറ്റും പുരട്ടാം. 10 മിനിറ്റിനു ശേഷം കഴുകി കളയാം. രണ്ടാഴ്ച കൂടുമ്പോൾ ഇങ്ങനെ ചെയ്തു നോക്കൂ. 

Also Read: ഒരു നുള്ള് മഞ്ഞൾപ്പൊടി കൊണ്ട് ചുളിവുകളും പാടുകളും അകറ്റാൻ ഇതാ ഒരു പൊടിക്കൈ

ഉരുളക്കിഴങ്ങ് നീര്

ഉരുളക്കിഴങ്ങിന് പ്രകൃത ദത്തമായ ബ്ലീച്ചിങ് സവിശേഷതയുണ്ട്. ഉരുളക്കിഴങ്ങ് അരച്ച് നീര് പിഴിഞ്ഞെടുക്കുക. അതിൽ പഞ്ഞി മുക്കി  10 മിനിറ്റ് കണ്ണിനു മുകളിൽ വയ്ക്കാം. ശേഷം തണുത്ത വെള്ളം ഉപയോഗിച്ച് കഴുകി കളയാം. ദിവസം ഇങ്ങനെ ചെയ്തു നോക്കൂ. 

കറ്റാർവാഴ

ഒരൽപം കറ്റാർവാഴ ജെൽ ദിവസും രാത്രി ഉറങ്ങുന്നതിനു മുമ്പായി കണ്ണിനു ചുറ്റും പുരട്ടൂ. രാവിലെ ഉണർന്നാൽ കഴുകി കളയാം. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ബ്ലാക്ക്ഹെഡ്സും വൈറ്റ്ഹെഡ്സും ഞൊടിയിടയിൽ അകറ്റാം, ഈ വിത്ത് ഒരു സ്പൂൺ മതി