വെളിച്ചെണ്ണ കൈയ്യിലുണ്ടോ? 10 മിനിറ്റിൽ തയ്യാറാക്കാം സൺസ്ക്രീൻ

ചർമ്മത്തിൽ ഉണ്ടാകുന്ന ടാൻ ഏവരേയും അലട്ടുന്ന ഒരു സൗന്ദര്യ പ്രശ്നമാണ്.  മഴക്കാലമാണെങ്കിലും, നിങ്ങൾ വീടിനുള്ളിൽ ആണെങ്കിലും, പുറത്താണെങ്കിലും അൾട്രാ വയലറ്റ് രശ്മികൾ മൂലം ഉണ്ടാകുന്ന ആഘാതം വളരെ വലുതായിരിക്കും. അതിനാൽ സൺസ്ക്രീൻ ഉപയോഗിക്കേണ്ടത് അത്യന്താപേക്ഷിതമാണ്. യുവി രശ്മികളിൽ 80 ശതമാനവും മേഘത്തിനിടയിലൂടെ സഞ്ചരിക്കാൻ ശേഷിയുള്ളവയാണ്. ഇത് ചർമ്മത്തിൽ പതിക്കുകയും ചെയ്യും. 

ഇത് ഒഴിവാക്കാൻ സൺസ്ക്രീൻ ഉപയോഗിക്കുന്നത് ശീലമാക്കാം. എന്നാൽ മികച്ച സൺസ്ക്രീനിന് വിപണയിൽ വില അധികമായിരിക്കും. അത് വീട്ടിൽ തന്നെ തയ്യാറാക്കുന്നതായിരിക്കും ലാഭകരം. മാത്രമല്ല കെമിക്കൽ രഹിത ഉത്പന്നവും ഇതിലൂടെ ഉറപ്പാക്കാൻ സാധിക്കും. 

ചേരുവകൾ

• വെളിച്ചെണ്ണ- 1/4 കപ്പ്
• ഷിയാബട്ടർ- 1/4 കപ്പ്
• സിങ്ക് ഓക്സൈഡ്- 1 ടേബിൾസ്പൂൺ
• ബീവാക്സ്- 1 ടേബിൾസ്പൂൺ
• റോസ്‌വാട്ടർ- 10 തുള്ളി

തയ്യാറാക്കുന്ന വിധം

• ഒരു പാൻ അടുപ്പിൽ വച്ച് അൽപം വെള്ളം ഒഴിക്കാം.
• അതിലേയ്ക്ക് ചെറിയ ഒരു ഹീറ്റ് പ്രൂഫ് ബൗൾ വയ്ക്കാം.
• കാൽ കപ്പ് വെളിച്ചെണ്ണ, കാൽ കപ്പ് ഷിയാ ബട്ടർ, ഒരു ടേബിൾസ്പൂൺ ബീ വാക്സ്  എന്നിവ അതിലേയ്ക്കു ചേർക്കാം.
• ഇടത്തരം തീയിൽ ഇളക്കി അലിയിച്ചെടുക്കാം.
• ശേഷം അടുപ്പിൽ നിന്നും മാറ്റി തണുക്കാൻ വയ്ക്കാം.
• ഇളക്കി കൊണ്ട് തന്നെ ഒരു ടേബിൾസ്പൂൺ സിങ്ക് ഓക്സൈഡ് അതിലേയ്ക്കു ചേർക്കാവുന്നതാണ്.
• ഏതാനും തുള്ളി റോസ്‌വാട്ടറോ ലാവൻഡർ ഓയിലോ അതിലേയ്ക്കു ചേർക്കാം.
• വൃത്തിയുള്ള വായുസഞ്ചാരമില്ലാത്ത പാത്രത്തിലേയ്ക്കു മാറ്റി സൂക്ഷിക്കാം. ഇത് ആവശ്യാനുസരണം ഉപയോഗിക്കാവുന്നതാണ്. 

സൺസ്ക്രീൻ തയ്യാറാക്കാൻ സമയമില്ലെങ്കിൽ പകരം ചില ഓപ്ഷൻസ് ഉണ്ട്. സൺസ്ക്രീനിന് നൽകാൻ സാധിക്കുന്ന എസ്പിഎഫ് വാഗ്ദാനം ചെയ്യുന്ന പ്രകൃതിദത്തമായ ചേരുവകൾ പരിചയപ്പെടാം. 

കറ്റാർവാഴ
കറ്റാർവാഴയ്ക്ക് ഹീലിങ് സവിശേഷതകളുണ്ട്. ഇത് ഒരു നാച്യുറൽ സൺസ്ക്രീൻ കൂടിയാണ്. എസ്പിഎഫ് 20 വരെ ഇത് ലഭ്യമാക്കിയേക്കും.

ഷിയാ ബട്ടർ
ഷിയ ബട്ടർ ഒരു മികച്ച എക്സ്ഫോളിയേറ്റർ കൂടിയാണ്. ഇത് 4 മുതൽ 6 വരെ എസ്പിഎഫ് നൽകിയേക്കും. ചർമ്മം മൃദുവാക്കുന്നതിനും ഷിയ ബട്ടറിൻ്റെ സ്ഥിര ഉപയോഗം ഗുണപ്രദമാണ്.

വെളിച്ചെണ്ണ
കെമിക്കൽ അടങ്ങിയ സൺസ്ക്രീനിന് ഒരു മികച്ച പ്രതിവിധയാണ് വെളിച്ചെണ്ണ. 20 ശതമാനം വരെ അൾട്രാവയലറ്റ് രശ്മികളെ പ്രതിരോധിക്കാൻ അതിനു കഴിയും. മാത്രമല്ല ചർമ്മത്തിന് ആവശ്യമായ വിറ്റാമിൻ ഇയുടെ വെളിച്ചെണ്ണിൽ ധാരാളം അടങ്ങിയിട്ടുണ്ട്.

കാരറ്റ് സീഡ് ഓയിൽ
ബീറ്റാ കരോട്ടിനാൽ സമ്പന്നമായ കാരറ്റ് സിഡ് ഓയിലിന് ആൻ്റി ഇൻഫ്ലമേറ്ററി സവിശേഷതകളുണ്ട്. ഇത് ചില സാഹചര്യങ്ങളിൽ 40 എസ്പിഎഫ് വരെ നൽകിയേക്കും.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായിപ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• വെയിലേറ്റ് വാടിയ ചർമ്മത്തിന് പരിഹാരം ഈ ഫെയ്സ്പാക്കുകൾ
• കൊഴിച്ചിൽ തടഞ്ഞ് ഭംഗിയുള്ള പുരികം നേടാൻ വിദ്യകൾ ഇതാ
• വെളിച്ചെണ്ണയും ഗ്ലിസറിനും ഇങ്ങനെ ഉപയോഗിച്ചു നോക്കൂ, ചുളിവുകളില്ലാത്ത ചർമ്മം നേടാം
• താരൻ ആണോ പ്രശ്നം? വൈകിയിട്ടില്ല ഇന്ന് തന്നെ പരിചരണം തുടങ്ങാം