മുഖത്ത് ചുളിവുകൾ വീഴുന്നോ? ഈ ശീലങ്ങൾ ഉടൻ നിർത്തൂ

പ്രായമാകുമ്പോൾ മുഖത്ത് ചുളിവുകൾ വീഴുന്നത് സ്വാഭാവികമാണ്. എന്നാൽ, നാൽപതുകളിൽ ചുളിവുകൾ പ്രത്യക്ഷപ്പെടുന്നുവെങ്കിൽ ചില തെറ്റായ ശീലങ്ങളാകാം അതിനു കാരണം. ചുളിവുകൾ വരുന്നത് കുറയ്ക്കാൻ എത്രയും വേഗം ഒഴിവാക്കേണ്ട ചില ശീലങ്ങൾ എന്തൊക്കെയെന്ന് നോക്കാം.

പതിവായി സൺസ്ക്രീൻ പുരട്ടുന്നില്ല

അകാല ചുളിവുകൾക്ക് പിന്നിലെ പ്രധാന കാരണങ്ങളിലൊന്ന് സൂര്യാഘാതമാണ്. സൂര്യനിൽ നിന്നുള്ള അൾട്രാവയലറ്റ് രശ്മികൾ ചർമ്മത്തിന്റെ ഇലാസ്തികത നിലനിർത്തുന്നതിന് പ്രധാനമായ കൊളാജൻ, എലാസ്റ്റിൻ എന്നിവ നശിപ്പിക്കുന്നു. ചർമ്മത്തെ സംരക്ഷിക്കാൻ മേഘാവൃതമായ ദിവസങ്ങളിൽ പോലും സൺസ്ക്രീൻ ഉപയോഗിക്കുക. കുറഞ്ഞത് SPF 30 ഉള്ള ഒരു ബ്രോഡ്-സ്പെക്‌ട്രം സൺസ്‌ക്രീൻ ഉപയോഗിക്കുക. പുറത്ത് പോകുമ്പോൾ ഓരോ രണ്ട് മണിക്കൂറിലും സൺസ്ക്രീൻ ഉപയോഗിക്കാൻ മറക്കാതിരിക്കുക.

ആവശ്യത്തിന് വെള്ളം കുടിക്കുന്നില്ല

നിർജലീകരണവും ചുളിവുകൾ വരുന്നതിനുള്ള ഒരു കാരണമാണ്. ചർമ്മത്തിൽ ആവശ്യത്തിന് ഈർപ്പം ഇല്ലെങ്കിൽ ഇലാസ്തികത നഷ്ടപ്പെടുകയും വരണ്ടതും ചുളിവുകൾ വീഴുകയും ചെയ്യും. ചർമ്മത്തിന് ഉള്ളിൽ നിന്ന് ഈർപ്പം നിലനിർത്താൻ ദിവസം മുഴുവൻ കുറഞ്ഞത് 8 ഗ്ലാസ് വെള്ളമെങ്കിലും കുടിക്കുക. കൂടാതെ, പഴങ്ങളും പച്ചക്കറികളും പോലുള്ള ജലാംശം അടങ്ങിയ ഭക്ഷണങ്ങൾ കഴിക്കുക.

പതിവായുള്ള പുകവലി

പുകവലി ചർമ്മത്തിന്റെ പ്രായമാകൽ പ്രക്രിയയെ ത്വരിതപ്പെടുത്തുന്നു. പുകയിലയിലെ രാസവസ്തുക്കൾ കൊളാജൻ, എലാസ്റ്റിൻ നാരുകൾ എന്നിവയെ നശിപ്പിക്കുന്നു. ഇത് അകാല ചുളിവുകൾക്കും ചർമ്മം ഇടിഞ്ഞു തൂങ്ങുന്നതിനും കാരണമാകുന്നു. ചർമ്മത്തെയും മൊത്തത്തിലുള്ള ആരോഗ്യത്തെയും സംരക്ഷിക്കുന്നതിനുള്ള ഏറ്റവും നല്ല മാർഗമാണ് പുകവലി ഉപേക്ഷിക്കുന്നത്. 

ആവശ്യത്തിന് ഉറക്കം ലഭിക്കുന്നില്ല

ഉറക്കം കുറയുന്നത് ചർമ്മത്തെ ബാധിക്കുകയും കൊളാജൻ തകർച്ചയ്ക്ക് കാരണമാകുകയും ചെയ്യും. എല്ലാ രാത്രിയിലും ഏഴ് മുതൽ ഒമ്പത് മണിക്കൂർ ഉറങ്ങുക. 

അനാരോഗ്യകരമായ ഭക്ഷണക്രമം

മോശം ഭക്ഷണക്രമം ചർമ്മത്തിന്റെ ആരോഗ്യത്തെ ബാധിക്കുകയും ചുളിവുകൾക്ക് കാരണമാവുകയും ചെയ്യും. വിറ്റാമിനുകളായ സി, ഇ, ആന്റിഓക്‌സിഡന്റുകൾ എന്നിവ പോലുള്ള അവശ്യ പോഷകങ്ങൾ നിറഞ്ഞ വിവിധതരം പഴങ്ങൾ, പച്ചക്കറികൾ, ധാന്യങ്ങൾ എന്നിവ ഭക്ഷണത്തിൽ ഉൾപ്പെടുത്തുക. ഇവയെല്ലാം ചർമ്മത്തിന് ആരോഗ്യവും യുവത്വവും നിലനിർത്തുന്നതിന് ആവശ്യമായ പോഷകങ്ങൾ നൽകും.

Read More

• ചന്ദനവും കാപ്പി പൊടിയും തേനും; തമന്നയുടെ സൗന്ദര്യ രഹസ്യം
• മുഖം ഷേവ് ചെയ്യുന്നതാണോ എല്ലാ ചർമ്മപ്രശ്നങ്ങൾക്കുമുള്ള പരിഹാരം?
• സൺസ്ക്രീൻ എങ്ങനെയാണ് ഉപയോഗിക്കേണ്ടത്? വീഡിയോ
• വാസ്‌ലിൻ മുഖത്ത് പുരട്ടിയാൽ എന്ത് സംഭവിക്കും?