ചർമ്മം തിളങ്ങാൻ ഉരുളക്കിഴങ്ങ്

കറിയിൽ ഉപ്പ് കൂടുമ്പോൾ അല്ലെങ്കിൽ കൊഴുപ്പ് കൂട്ടാൻ മാത്രമാണോ ഉരുളക്കിഴങ്ങ് ഉപയോഗിക്കാറുള്ളത്?. എന്നാൽ അടുക്കളയിൽ നിന്ന് ഇടയ്ക്ക് അരങ്ങത്തേക്കും ഉരുളക്കിഴങ്ങ് കൊണ്ടു വരാം. ചർമ്മ സംരക്ഷണത്തിന് ഏറെ ഗുണകരമാണത്. കറുത്തപാടുകൾ അകറ്റി ചർമ്മത്തിൻ്റെ സ്വാഭാവിക നിറം നിലനിർത്തുന്ന പ്രകൃതിദത്തമായ ബ്ലീച്ചിങ് ഏജൻ്റാണത്. കൂടാതെ ഇരുമ്പ്, വിറ്റാമിൻ സി, റൈബോഫ്ലേവിൻ തുടങ്ങിയ പോഷകങ്ങളാൽ സമ്പന്നവുമാണ്. ദോഷകരമായ അൾട്രാവയലറ്റ് രശ്മികളിൽ നിന്ന് ആൻ്റി ഓക്സിഡൻ്റുകളുടെ സഹായത്തോടെ ചർമ്മത്തെ സംരക്ഷിക്കുന്നു. 

ഉരുളക്കിഴങ്ങ് ഉപയോഗിച്ച് നിരവധി ഫെയ്സ് പാക്കുകൾ തയ്യാറാക്കാൻ സാധിക്കും.

ഉരുളക്കിഴങ്ങ് വെള്ളരിക്ക നീര്

കണ്ണിന് ചുറ്റമുള്ള കറുപ്പ് മാറാൻ മികച്ച പ്രതിവിധിയാണ് ഉരുളക്കിഴങ്ങ്. ഉരുളക്കിഴങ്ങ് വട്ടത്തിൽ അരിഞ്ഞോ അല്ലെങ്കില്‍ അരച്ചോ പത്ത് മിനിറ്റ് കണ്‍തടങ്ങളില്‍ വയ്ക്കാം. ഉരുളക്കിഴങ്ങിന്‍റെ നീരും വെള്ളരിക്ക നീരും സമം ചേർത്ത് കണ്ണിന് താഴെ പുരട്ടി 20 മിനിറ്റിനു ശേഷം കഴുകി കളയുന്നതും ഗുണം ചെയ്യും.

ഉരുളക്കിഴങ്ങ് തേൻ

കരുവാളിപ്പ് അഥവാ ടാന്‍ മാറാനും ഉരുളക്കിഴങ്ങ് സഹായിക്കും. ഒരു ടേബിള്‍സ്പൂണ്‍ ഉരുളക്കിഴങ്ങിന്റെ നീര് എടുത്തശേഷം അതിലേയ്ക്ക് ഒരു ടീസ്പൂണ്‍ തേൻ ചേർക്കുക. ഈ മിശ്രിതം മുഖത്ത് പുരട്ടാം. പത്ത് മിനിറ്റിനു ശേഷം കഴുകി കളയാം. പതിവായി ഈ പാക്ക് ഉപയോഗിക്കുന്നത് ടാന്‍ മാറാനും ചര്‍മ്മം തിളങ്ങാനും സഹായിക്കും. 

ഉരുളക്കിഴങ്ങ് കടലമാവ് 

ഉരുളക്കിഴങ്ങ് പകുതി ഉടച്ചതിലേയ്ക്ക് ഒരു ടേബിള്‍സ്പൂണ്‍ കടലമാവും ഒരു ടീസ്പൂണ്‍‌ നാരങ്ങാ നീരും ചേര്‍ത്ത് മിശ്രിതമാക്കാം. ശേഷം ഈ മിശ്രിതം മുഖത്ത് പുരട്ടി 15 മിനിറ്റിന് കഴിഞ്ഞ് കഴുകി കളയാം. മുഖത്തെ കറുത്ത പാടുകളെ തടയാനും മുഖം തിളങ്ങാനും ഈ പാക്ക് സഹായിക്കും. 

ഉരുളക്കിഴങ്ങ് തക്കാളി

ഒരു ടേബിള്‍സ്പൂണ്‍ ഉരുളക്കിഴങ്ങിന്റെ നീരിലേയ്ക്ക് ഒരു തക്കാളി പിഴിഞ്ഞത് ചേർക്കുക. ഈ മിശ്രിതം മുഖത്ത് പുരട്ടി പത്ത് മിനിറ്റ് കഴിഞ്ഞ് കഴുകി കളയാം  മുഖക്കുരു, കറുത്ത പാടുകൾ എന്നിവ മാറാൻ ഇത് സഹായിക്കും.

ഉരുളക്കിഴങ്ങ് നാരങ്ങാ നീര്

ഒരു ടേബിള്‍സ്പൂണ്‍ ഉരുളക്കിഴങ്ങ് നീരിൽ രണ്ട് ടീസ്പൂൺ നാരങ്ങാനീര് ചേർത്ത്  മുഖത്ത് പുരട്ടാം. 10 മിനിറ്റിന് ശേഷം കഴുകി കളയാം. ആഴ്ചയില്‍ രണ്ട് തവണയൊക്കെ ഇത് പരീക്ഷിക്കുന്നത് ചര്‍മ്മം തിളങ്ങാന്‍ സഹായിക്കും. 

ഉരുളക്കിഴങ്ങ് മുട്ട

മുട്ടയുടെ വെള്ളയില്‍ ഉരുളക്കിഴങ്ങിന്റെ ജ്യൂസ്‌ ചേര്‍ക്കുക. ശേഷം ഈ മിശ്രിതം മുഖത്ത് പുരട്ടി അരമണിക്കൂര്‍ കഴിയുമ്പോള്‍  കഴുകി കളയാം. മുഖത്തെ ചുളിവുകള്‍ മാറാന്‍ ഈ പാക്ക് സഹായിക്കും. 

ഉരുളക്കിഴങ്ങ് നീര്

ഉരുളക്കിഴങ്ങ് നീര് കൈ മുട്ടിലെ ഇരുണ്ട നിറമുള്ള ഭാഗങ്ങളില്‍ പുരട്ടുന്നതും കറുത്ത നിറത്തെ അകറ്റാന്‍ സഹായിക്കും. 

ഉരുളക്കിഴങ്ങ് കഴുത്തിനു ചുറ്റുമുള്ള പാടുകൾ അകറ്റാൻ

കഴുത്തിന് ചുറ്റുമുള്ള ഇരുണ്ട നിറം മാറാനും ഉരുളക്കിഴങ്ങ്​ സഹായിക്കും. ഇതിനായി ചെറിയ ഉരുളക്കിഴങ്ങ്​ എടുത്ത്​ തൊലി കളഞ്ഞ ശേഷം​ ജ്യൂസ്​ തയാറാക്കുക. അത് കഴുത്തിൽ പുരട്ടുക. ഉണങ്ങു​മ്പോള്‍ ഇളം ചൂടുള്ള വെള്ളത്തിൽ കഴുകി കളയാം. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മുഖത്തെ കറുത്ത പാടുകൾ അകറ്റാം; പരിഹാരം അടുക്കളയിൽ
• മുടി കൊഴിച്ചിൽ തടയാൻ സഹായിക്കുന്ന 8 പോഷകങ്ങൾ ഇവയാണ്
• ചെമ്പരത്തി കൊണ്ട് തലമുടിക്ക് പരിചരണം, ഈ രഹസ്യക്കൂട്ട് പരീക്ഷിക്കൂ
• മൈലാഞ്ചി മതി, താരനും മുടികൊഴിച്ചിലിനും വിട