ഓറഞ്ചിന്‍റെ തൊലി കളയേണ്ട; മുഖത്ത് ഇങ്ങനെ ഉപയോഗിക്കാം

ചർമ്മത്തിലെ പാടുകൾ, മുഖക്കുരു എന്നിവ അകറ്റാൻ എല്ലായിപ്പോഴും ബ്യൂട്ടിപാർലറുകളെ ആശ്രയിക്കേണ്ട കാര്യമില്ല. പാർലറിൽ കിട്ടുന്ന അതേ ഫെയ്സ്മാസ്ക്കുകൾ വീട്ടിൽ തന്നെ തയ്യാറാക്കാം. അതിൽ ഒന്നാണ് ഓറഞ്ച് മാസ്ക്. സമീകൃതാഹാരത്തിൻ്റെ ഭാഗമായി ഭക്ഷണക്രമത്തിൽ പഴവർഗങ്ങളും ഉൾപ്പെടുത്തേണ്ടതുണ്ടെല്ലോ. അതിനായി വാങ്ങുന്ന ഓറഞ്ചിൻ്റെ തൊലി ഇനി വെറുതെ കളയേണ്ട. ആരോഗ്യത്തിന് എന്നതു പോലെ തന്നെ ചർമ്മ സൗന്ദര്യത്തിന് ഇതിൻ്റെ തൊലി ഏറെ ഗുണപ്രദമാണ്. മുഖത്തെ ചുളിവുകളും, മുഖക്കുരുവും, കറുത്തപാടുകളും നീക്കെ ചെയ്യുന്നതിനും, എണ്ണമയമുള്ള ചർമ്മത്തിനും ഓറഞ്ചിൻ്റെ തൊലി ഫലപ്രദമാണ്. 

സിട്രസ് വിഭാഗത്തിൽ പെടുന്ന പഴമാണ് ഓറഞ്ച്. അതിനാൽ ധാരാളം വിറ്റാമിൻ സി ഇതിൽ അടങ്ങിയിട്ടുണ്ട്. കോശങ്ങളെ സംരക്ഷിക്കാനും, അവയെ ആരോഗ്യത്തോടെ നിലനിർത്താനും വിറ്റാമിൻ സി സഹായിക്കുന്നു. ആൻ്റിഓക്സിഡൻ്റുകളുടെയും നാരുകളുടെയും സ്രോതസ്സാണ് ഓറഞ്ച്. അകാല വാർധക്യത്തിൻ്റെ ലക്ഷണങ്ങളായ ചുളിവുകൾ, പാടുകൾ എന്നിവ പ്രതിരോധിക്കുന്നതിലും ഇത് പ്രധാന പങ്ക് വഹിക്കുന്നു. 

ഓറഞ്ച് തൊലി സൂക്ഷിക്കേണ്ട വിധം

ഓറഞ്ചിൻ്റെ തൊലി നന്നായി ഉണക്കിയെടുക്കുക. ഉണങ്ങിയ ഓറഞ്ച് തൊലി പൊടിച്ചെടുക്കുക. അത് ഈർപ്പം ഇല്ലാത്ത അടച്ചുറപ്പുള്ള പാത്രത്തിൽ സൂക്ഷിക്കാം. ശേഷം ഫെയ്സ് പാക്കുകളിൽ ചേർത്ത് ഉപയോഗിക്കാം.

ഓറഞ്ച് തൊലി തൈര് ഫെയ്സ്പാക്

ഒരു ടീസ്പൂണ്‍ ഓറഞ്ച് തൊലി പൊടിച്ചതിലേയ്ക്ക് രണ്ട് ടീസ്പൂൺ തൈര് ചേർത്ത് നന്നായി യോജിപ്പിക്കുക.  ഈ മിശ്രിതം മുഖത്ത് പുരട്ടാം. 20 മിനിറ്റിനു ശേഷം കഴുകി കളയാം. ഇത് മുഖത്തെ കരുവാളിപ്പ് മാറാനും മുഖം തിളങ്ങാനും സഹായിക്കും. 

ഓറഞ്ച് തൊലി മുൾട്ടാണി മിട്ടി

ഒരു വലിയ സ്പൂണ്‍ ഓറഞ്ച് തൊലി പൊടിച്ചതില്‍ ഒരു വലിയ സ്പൂണ്‍ മുള്‍ട്ടാണിമിട്ടിയും കുറച്ച് റോസ് വാട്ടറും ചേര്‍ക്കുക. ഇനി ഈ മിശ്രിതം മുഖത്തും കഴുത്തിലും പുരട്ടി 30 മിനിറ്റിനു ശേഷം കഴുകി കളയാം.  ബ്ലാക്ഹെഡ്സും വൈറ്റ് ഹെഡ്സും മാറ്റാന്‍ ഈ പാക്ക് സഹായിക്കും.

ഓറഞ്ച് തൊലി മഞ്ഞൾപ്പൊടി ഫെയ്സപാക്

ഒരു ടേബിള്‍ സ്‌പൂണ്‍ ഓറഞ്ച്‌ തൊലി പൊടിച്ചതിലേയ്ക്ക് രണ്ട്‌ നുള്ള്‌ മഞ്ഞള്‍ പൊടി ചേര്‍ക്കുക. ശേഷം ഇതിലേയ്ക്ക് ഒരു ടേബിള്‍ സ്‌പൂണ്‍ തേന്‍ കൂടി ചേര്‍ത്ത്‌ കുഴമ്പ്‌ രൂപത്തിലാക്കുക.  ഈ മിശ്രിതം മുഖത്ത് പുരട്ടാം. 15 മിനിറ്റിനു ശേഷം കഴുകി കളയാം. മുഖത്തെ കറുത്ത പാടുകളെ അകറ്റാനും കരുവാളിപ്പ് അകറ്റാനും  ഈ പാക്ക് സഹായിക്കും. 

ഓറഞ്ച് തൊലി നാരങ്ങാ നീര്

രണ്ട് ടേബിള്‍ സ്‌പൂണ്‍ ഓറഞ്ച്‌ തൊലി പൊടിച്ചതിലേയ്ക്ക് രണ്ട് തുള്ളി നാരങ്ങാ നീര് ചേര്‍ത്ത് മിശ്രിതമാക്കാം. ഈ മിശ്രിതം മുഖത്ത് പുരട്ടാം. 20 മിനിറ്റിനു ശേഷം കഴുകി കളയാം. മുഖം തിളങ്ങാന്‍ ഈ പാക്ക് സഹായിക്കും.

ഓറഞ്ച് തൊലി പഞ്ചസാര ഫെയ്സപാക്

രണ്ട് ടീസ്പൂണ്‍ പൊടിച്ച ഓറഞ്ച് തൊലി, രണ്ട് ടീസ്പൂണ്‍ പഞ്ചസാരയും തേങ്ങാപ്പാലും ചേർത്ത് പേസ്റ്റ് രൂപത്തിലാക്കി മുഖത്ത് പുരട്ടുക. 15 മിനിറ്റിനു ശേഷം കഴുകി കളയാം. ചര്‍മ്മം തിളങ്ങാന്‍ ഇത് സഹായിക്കും.

പഴം ഓറഞ്ച് തൊലി

രണ്ട് ടേബിള്‍ സ്‌പൂണ്‍ ഓറഞ്ച്‌ തൊലി പൊടിച്ചതിലേയ്ക്ക് പഴുത്ത പഴത്തിന്‍റെ പള്‍പ്പ് കൂടി ചേര്‍ത്ത് മിശ്രിതമാക്കാം. ശേഷം ഈ മിശ്രിതം മുഖത്ത് പുരട്ടാം. 15 മിനിറ്റിനു ശേഷം കഴുകി കളയാം. മുഖക്കുരുവിനെ തടയാന്‍ ഇങ്ങനെ ചെയ്യുന്നത് നല്ലതാണ്. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• കരുത്തുറ്റ തിളക്കമാർന്ന തലമുടിയുടെ രഹസ്യം വെളിപ്പെടുത്തി ശോഭിത ധുലിപാല
• ഇതിലൊന്ന് ശീലമാക്കൂ; ടാൻ അകറ്റി ചർമ്മം തിളക്കമുള്ളതാക്കാം
• വരണ്ടതും നിറം മങ്ങിയതുമായ ചുണ്ടുകൾക്ക് മികച്ച ലിപ് സ്ക്രബ്
• മുടി കഴുകാൻ തേങ്ങാവെള്ളം, താരനും കൊഴിച്ചിലും പമ്പ കടക്കും