വരണ്ടതും നിറം മങ്ങിയതുമായ ചുണ്ടുകൾക്ക് മികച്ച ലിപ് സ്ക്രബ്

മുഖത്തിന് എത്ര തന്നെ പരിചരണം നൽകിയാലും നിറം മങ്ങിയ വരണ്ട ചുണ്ടുകൾ പലപ്പോഴും ഒരു പ്രശ്നമാകാറുണ്ട്. പ്രത്യേകിച്ച് തണുത്ത കാലാവസ്ഥയിൽ അന്തരീക്ഷത്തിലെ ഈർപ്പത്തിൻ്റെ കുറവ് ചർമ്മത്തെ അമിതമായ വരൾച്ചയിലേയ്ക്കു നയിച്ചേക്കും. വളരെ കട്ടി കുറഞ്ഞ മൃദുവായ ചർമ്മമാണ് ചുണ്ടിൻ്റേത്. അതിനാൽ ശ്രദ്ധയോടെയുള്ള പരിചരണം ആവശ്യമാണ്. ആഴ്ചയിൽ ഒരിക്കലെങ്കിലും ചുണ്ടുകൾ സ്ക്രബ് ചെയ്യുന്നത് മൃതചർമ്മ കോശങ്ങൾ നീക്കം ചെയ്ത് നിറം മെച്ചപ്പെടുത്തുന്നതിന് സഹായിച്ചേക്കും. ഇതിലൂടെ ചുണ്ടുകളുടെ മൃദുത്വവും നിലനിർത്താൻ സാധിക്കും. 

വെറും മൂന്നു ചേരുവകൾ ഉണ്ടെങ്കിൽ വീട്ടിൽ തന്നെ ലിപ് സ്ക്രബ് തയ്യാറാക്കാം. അതിന് ആവശ്യമായ ചേരുവകൾ ഇവയാണ്: 

ചേരുവകൾ

• തേൻ
• നാരങ്ങാ നീര്
• പഞ്ചസാര

തയ്യാറാക്കുന്ന വിധം

ഒരു ടേബിൾസ്പൂൺ തേനിലേയ്ക്ക് ഒരു ടീസ്പൂൺ നാരങ്ങാ നീരും ഒരു ടീസ്പൂൺ പഞ്ചസാരയും ചേർത്തിളക്കി യോജിപ്പിക്കാം. ഈ മിശ്രിതം ചുണ്ടിൽ പുരട്ടി 2 മിനിറ്റ് മൃദുവായി മസാജ് ചെയ്യാം. അൽപ സമയത്തിനു ശേഷം കഴുകി കളയാം. തുടർന്ന് ലിപ് ബാം പുരട്ടാം.

ചുണ്ടുകളുടെ പരിചരണത്തിന് വീട്ടിൽ തയ്യാറാക്കി ഉപയോഗിക്കാവുന്ന ലിപ് സ്ക്രബുകൾ പരിചയപ്പെടാം.

വെളിച്ചെണ്ണ തേൻ

വെളിച്ചെണ്ണയും തേനും ഇളക്കി യോജിപ്പിക്കുക. ശേഷം ഈ മിശ്രിതം ചുണ്ടിൽ പുരട്ടി 10 മിനിറ്റ് മൃദുവായി മസാജ് ചെയ്യാം. ഇളം ചൂടുവെള്ളത്തിൽ കഴുകി കളയുക. ചുണ്ടിൻ്റെ വരൾച്ച കുറയാൻ ഇത് സഹായിക്കും.

കാപ്പിപ്പൊടി തേൻ

കാപ്പിപ്പൊടിയിലേക്ക് കുറച്ചു തേൻ ചേർത്തിളക്കി യോജിപ്പിക്കാം. ഇത് ചുണ്ടിൽ പുരട്ടി 10 മിനിറ്റ് മസാജ് ചെയ്യുക. ചെറുചൂടു വെള്ളത്തിൽ കഴുകാം. 

ചോക്ലേറ്റ് ലിപ് സ്ക്രബ്

ഒരു ടേബിൾസ്പൂൺ ചോക്ലേറ്റിലേക്ക് രണ്ട് ടേബിൾസ്പൂൺ ബ്രൗൺ ഷുഗർ, ഒരു ടേബിൾസ്പൂൺ വാനില എസ്സെൻസ് എന്നിവ നന്നായി ഇളക്കി യോജിപ്പിക്കുക. ഇത് ചുണ്ടിൽ പുരട്ടി മസാജ് ചെയ്യാം. കട്ടി കുറഞ്ഞ തുണി ഉപയോഗിച്ച് തുടച്ചെടുക്കാം. 

ബ്രൗൺ ഷുഗറും തേനും

ബ്രൗൺ ഷുഗറും തേനും ഒരുമിച്ചു ചേർത്തിളക്കി യോജിപ്പിക്കുക. അത് ചുണ്ടിൽ പുരട്ടി അഞ്ച് മിനിറ്റ് മൃദുവായി മസാജ് ചെയ്യൂ. ശേഷം ഇളം ചൂടുവെള്ള്ത്തിൽ കഴുകാം. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മുടി കഴുകാൻ തേങ്ങാവെള്ളം, താരനും കൊഴിച്ചിലും പമ്പ കടക്കും
• മുഖത്തെ ചുളിവുകൾ അകറ്റാൻ ബദാം ഓയിൽ
• മുഖം കണ്ണാടി പോലെ തിളങ്ങാൻ അരിപ്പൊടിയും തൈരും ഇങ്ങനെ ഉപയോഗിക്കൂ
• വെയിലേറ്റ് കരുവാളിച്ച മുഖം ഇനി തിളങ്ങും, തക്കാളി ഇങ്ങനെ ഉപയോഗിക്കൂ