താരനാണോ പ്രശ്നം? എങ്കിൽ ഇതിലൊരു ഹെയർ സ്പ്രേ തിരഞ്ഞെടുക്കൂ

സ്ത്രീകളും പുരുഷന്മാരും ഒരു പോലെ നേരിടുന്ന  പ്രശ്നമാണ് താരൻ. അമിതമായ വിയർപ്പ്, പൊടി, രാസപദാർത്ഥങ്ങൾ അടങ്ങിയ ഷാമ്പൂവിൻ്റെ ഉപയോഗം എന്നിങ്ങനെ പല കാരണങ്ങൾ കൊണ്ട് താരൻ ഉണ്ടാകാം. ഇതു ശ്രദ്ധിക്കാതെ പോയാൽ പിന്നീട് പരിഹരിക്കാൻ സാധിക്കാത്ത പ്രശ്നമായി മാറാം.

താരൻ അകറ്റാൻ പ്രയാസമാണെന്ന ധാരണ വേണ്ട, അത് നിങ്ങൾ കരുതുന്നതിലും എളുപ്പമാണ്. താരൻ തുരത്താൻ സഹായിക്കുന്ന ഹെയർ സ്പ്രേ വളരെ ഗുണപ്രദമാണ്. അത് കടയിൽ നിന്നും വലിയ വില കൊടുത്തു വാങ്ങേണ്ടതില്ല. വളരെ കുറച്ച് ചേരുവകൾ ഉപയോഗിച്ച് കെമിക്കൽ രഹിതമായി വീട്ടിൽ തയ്യാറാക്കി സൂക്ഷിക്കാം. അങ്ങനെയുള്ള 3 ഹെയർ കെയർ സ്പ്രേ പരിചയപ്പെടാം. 

ഒലിവ്, ആപ്പിൾ സിഡാർ വിനാഗിരി

ഒരു കപ്പ് ആപ്പിൾ സിഡാർ വിനാഗിരിയിലേയ്ക്ക് ഒരു ടേബിൾസ്പൂൺ ഒലിവ് എണ്ണയും 10 തുള്ളി ടീട്രീ ഓയിലും ചേർത്തിളക്കി യോജിപ്പിക്കാം. അത് ഒരു സ്പ്രേ ബോട്ടിലിലേയ്ക്കു മാറ്റാം. ശേഷം തലയോട്ടിയിലും മുടിയിലും സ്പ്രേ ചെയ്ത് മൃദുവായി മസാജ് ചെയ്യാം. 2 മണിക്കൂറിനു ശേഷം വീര്യം കുറഞ്ഞ ഷാമ്പൂ ഉപയോഗിച്ച് കഴുകി കളയാം. 

ഗ്രീൻ ടീ, ലാവൻഡർ

അര കപ്പ് ഗ്രീൻ ടീയിലേയ്ക്ക് 10 തുള്ളി ലാവെൻഡർ ഓയിലും, രണ്ട് ടേബിൾസ്പൂൺ​ വെളിച്ചെണ്ണയും, ചേർത്തിളക്കി യോജിപ്പിക്കാം. ഇത് ഒരു സ്പ്രേ ബോട്ടിലിലേയ്ക്കു മാറ്റി ഷാമ്പൂ ചെയ്ത മുടിയിൽ സ്പ്രേ ചെയ്യാവുന്നതാണ്. 10 മിനിറ്റിനു ശേഷം കഴുകി കളയാം. 

നാരങ്ങ

ഒരു ടേബിൾസ്പൂൺ ബേക്കിങ് സോഡയിലേയ്ക്ക് അഞ്ചി തുള്ളി റോസ് മേരി എണ്ണ ചേർക്കാം . ഇതിലേയ്ക്ക് ഒരു ടേബിൾസ്പൂൺ​ നാരങ്ങ നീരും, ഒരു ടേബിൾസ്പൂൺ ബദാം എണ്ണയും ചേർത്ത് 1 കപ്പ് വെള്ളം കൂടി ഒഴിച്ചിളക്കി യോജിപ്പിക്കാം. ഇത് സ്പ്രേ ബോട്ടിലിലേയ്ക്കു മാറ്റി ഉപയോഗിക്കാവുന്നതാണ്. ഷാമ്പൂ ചെയ്തു കഴിഞ്ഞ് ഉപയോഗിക്കുന്നതാണ് നല്ലത്. 10 മിനിറ്റു കഴിഞ്ഞ് തണുത്ത വെള്ളത്തിൽ കഴുകി കളയാം. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മുഖം വെയിലേറ്റ് വാടിയോ? ടാൻ അകറ്റാം തക്കാളി ഉണ്ടെങ്കിൽ
• തിളപ്പിച്ചെടുത്ത പാൽ ബാക്കി വന്നോ? എങ്കിൽ മോയ്സ്ച്യുറൈസറാക്കി മാറ്റാം
• അഴകുള്ള പുരികം നേടാൻ വീട്ടിലുണ്ട് വഴികൾ
• മുടി വളർച്ച അതിവേഗത്തിലാക്കാം, പേൻ ശല്യം കുറയ്ക്കാം; വെളിച്ചെണ്ണയിലേയ്ക്ക് ഇതു കൂടി ചേർക്കൂ