സ്ഥാനാർഥികളെ പിൻവലിക്കണം; അൻവറിനോട് വിഡി സതീശൻ

തിരുവനന്തപുരം: പാലക്കാട്, ചേലക്കര ഉപതിരഞ്ഞെടുപ്പുകളിലേക്കുള്ള സ്ഥാനാർത്ഥികളെ പിൻവലിക്കണമെന്ന് പി വി അൻവറിനോട് അഭ്യർത്ഥിച്ച് പ്രതിപക്ഷ നേതാവ് വി ഡി സതീശൻ. യുഡിഎഫിന്റെ തീരുമാനപ്രകാരമാണ് വിഡി സതീശൻ അൻവറിനോട് ഇക്കാര്യം അഭ്യർത്ഥിച്ചത്. ഫാസിസ്റ്റ് വിരുദ്ധ പോരാട്ടത്തിൽ സിപിഎമ്മിനെയും ബിജെപിയെയും ഒരുപോലെ എതിർക്കണമെന്ന് അൻവറിനോട് പ്രതിപക്ഷ നേതാവ് പറഞ്ഞു.

സിപിഎം സർക്കാരിന്റെ ജനവിരുദ്ധ നയങ്ങളേയും ബിജെപി സർക്കാരിന്റെ ഫാസിസ്റ്റ് നയങ്ങൾക്കെതിരെയും നിലപാടെടുക്കാൻ അൻവർ ഡിഎംകെ സ്ഥാനാർത്ഥികളെ പിൻവലിച്ച് യുഡിഎഫ് സ്ഥാനാർത്ഥികളെ പിന്തുണയ്ക്കണമെന്നാണ് വിഡി സതീശൻ ആവശ്യപ്പെട്ടിരിക്കുന്നത്. 

ഡിഎംകെ സ്ഥാനാർത്ഥികളുണ്ടെങ്കിൽ ബിജെപി, സിപിഎം വിരുദ്ധ വോട്ടുകൾ ഭിന്നിച്ചുപോകാമെന്ന തീരുമാനത്തിന്റെ അടിസ്ഥാനത്തിലാണ് പ്രതിപക്ഷ നേതാവിന്റെ അഭ്യർത്ഥനയെന്നാണ് സൂചന. അൻവർ തിരഞ്ഞെടുപ്പിൽ നിർണായക ഘടകമായേക്കുമെന്ന് യുഡിഎഫ് വിലയിരുത്തുന്നതായാണ് ഈ നീക്കം സൂചിപ്പിക്കുന്നത്.

പാലക്കാട് ബിജെപിക്കെതിരെ പൊതുസ്വതന്ത്രൻ വരണമെന്നും ഇന്ത്യാ മുന്നണി സ്ഥാനാർത്ഥിയെ നിർത്തണമെന്നും അൻവർ ആവശ്യപ്പെട്ടത് ശ്രദ്ധേയമാണ്. ഇന്ത്യ മുന്നണിയുടെ സ്ഥാനാർത്ഥി വന്നാൽ ഒരു സംശയവുമില്ലാതെ പാലക്കാട് ജയിക്കാമെന്നാണ് അൻവർ പറഞ്ഞിരുന്നത്. പാലക്കാട് രാഹുൽ മാങ്കൂട്ടത്തിലാണ് യുഡിഎഫ് സ്ഥാനാർത്ഥി. സിപിഐഎം പിന്തുണയോടെ ഡോ പി സരിനാണ് എൽഡിഎഫ് സ്വതന്ത്ര സ്ഥാനാർത്ഥിയായി മത്സരിക്കുക.

കൂടിയാലോചനയ്ക്ക് ശേഷം തീരുമാനം

യുഡിഎഫുമായി നടത്തിയ ചർച്ചകൾ അൻവർ മാധ്യമങ്ങളോട് സ്ഥിരീകരിച്ചു. നേരിട്ടും അല്ലാതെയും യുഡിഎഫ് ബന്ധപ്പെട്ടതായും യുഡിഎഫ് അഭ്യർത്ഥന ചർച്ച ചെയ്യുമെന്നും കൂടിയാലോചനകൾക്ക് ശേഷം തീരുമാനമെന്നും അൻവർ വ്യക്തമാക്കി.

മതേതരചേരികൾ ഒന്നിച്ചു നിൽക്കണമെന്ന് താൻ തന്നെ ആവശ്യപ്പെട്ടിട്ടുണ്ട്. അത് മാത്രമാണ് മുന്നോട്ട് വെക്കുന്നതെന്നും അൻവർ വിശദീകരിച്ചു

Read More

• സോണിയാ ഗാന്ധി വയനാട്ടിലേക്ക്:പ്രിയങ്കയ്ക്ക് ഒപ്പം റോഡ് ഷോയിൽ പങ്കെടുക്കും
• പാർട്ടി നവീൻ ബാബുവിന്റെ കുടുംബത്തിനൊപ്പം; പൂർണ പിന്തുണയെന്ന് എം.വി ഗോവിന്ദൻ
• കെഎസ്ആര്‍ടിസി ബസിൽ വൻ കവര്‍ച്ച; നഷ്ടപ്പെട്ടത് ഒന്നര കിലോ സ്വർണം
• ശ്രീപദ്മനാഭ സ്വാമി ക്ഷേത്രത്തിൽ മോഷണം; സ്ത്രീകൾ ഉൾപ്പെടുന്ന സംഘം പിടിയിൽ
• പാലക്കാട് സി. കൃഷ്ണകുമാർ, വയനാട് നവ്യ ഹരിദാസ്, ചേലക്കരയിൽ കെ. ബാലകൃഷ്ണൻ; സ്ഥാനാർത്ഥികളെ പ്രഖ്യാപിച്ച് ബിജെപി